ဝဵင်းမႄႈႁွင်ႈသွၼ် ၸတ်းႁဵတ်းပၢင်ၵုမ်လူင် လွင်ႈတႆးၵူႈမိူင်းမိူင်း ပွၵ်ႈၵမ်း (2)

ယွၼ်ႉလွင်ႈၽႄႈလၢမ်း ၸိူဝ်ႉမႅင်းတၢင်းပဵၼ် COVID-19 သေ ပၢင်ၵုမ်လူင် လွင်ႈတႆးၵူႈမိူင်းမိူင်း ပွၵ်ႈၵမ်း (2) လႆႈၸတ်းႁဵတ်းၼိူဝ် Online Video Conference လႄႈ တီႈၼႂ်းမိူင်းထႆးတႄႉ မီးၵူၼ်းၶဝ်ႈႁူမ်ႈပၢင်ၵုမ် ၵိုၼ်းၶွၼ်ႈၼမ်။

မိူဝ်ႈၼႆႉ ဝၼ်းထီႉ 04 September 2020 (လိူၼ်ၵဝ်ႈလွင်ႈ 2 ၶမ်ႈ ပီတႆး 2114 ၼီႈ) ၶၢဝ်းယၢမ်း 09:00 မူင်း ၵၢင်ၼႂ် ပီႈၼွင်ႉတႆး ၵူႈမိူင်းမိူင်း လႆႈတႄႇၸတ်းႁဵတ်းပၢင်ၵုမ်လူင် လွင်ႈတႆးၵူႈမိူင်းမိူင်း ပွၵ်ႈၵမ်း (2) တီႈႁူင်းႁဵၼ်းၵေႃးလဵၵ်ႉ ဝဵင်းမႄႈႁွင်ႈသွၼ် (Maehongson Community College) ၸိုင်ႈထႆးသေ ၽူႈမီးပုၼ်ႈၽွၼ်း ၽၢႆႇဢုပ်ႉပိူင်ႇ ၸႄႈဝဵင်း၊ ၸႄႈတွၼ်ႈ မႄႈႁွင်ႈသွၼ် မွၵ်ႇလၢတ်ႈၶေႃႈၵႂၢမ်း ပိုတ်ႇပၢင်ၵုမ်လႄႈ ၸဝ်ႈၶူးလူင် တွၵ်ႇတိူဝ်ၶမ်းမၢႆ ထမ်ႇမသႃႇမိၵေႃႈ လႆႈပၼ်ဢေႃးဝႃႇတ လူၺ်ႈၸႂ်ႉတိုဝ်း Zoom Online Video Conference ပၼ်ဢေႃးဝႃႇတႃႉ ပိုတ်ႇပၢင်ၵုမ်ၵႂႃႇ ၼႆယဝ်ႉ။

ပၢင်ၵုမ်လူင် လွင်ႈတႆးၵူႈမိူင်းမိူင်း ပွၵ်ႈၵမ်း (2) ဢၼ်ၸတ်းႁဵတ်း တီႈဝဵင်းမႄႈႁွင်ႈသွၼ် ပွၵ်ႈၵမ်းၼႆႉ ယွၼ်ႉၵူႈမိူင်းမိူင်း တိုၵ်ႉမီးလွင်ႈၽႄႈလၢမ်း ၸိူဝ်ႉမႅင်းတၢင်းပဵၼ် COVID-19 ယူႇလႄႈ တႃႇဢွၵ်ႇၶၢဝ်းတၢင်း ၶဝ်ႈဢွၵ်ႇမိူင်းၼၼ်ႉ တိုၵ်ႉထုၵ်ႇပိၵ်ႉဢိုတ်းဝႆႉယူႇသေ ပီႈၼွင်ႉတႆး ဢၼ်ယူႇဝႆႉ ၼွၵ်ႈမိူင်းထႅင်ႈလၢႆလၢႆမိူင်း တင်းၼမ်ၼၼ်ႉၵေႃႈ ဢမ်ႇၸၢင်ႈၶဝ်ႈႁူမ်ႈပၢင်ၵုမ်လႆႈ ၵူၺ်းလႆႈၸတ်းႁဵတ်းပၢင်ၵုမ် Online Video Conference ၶဝ်ႈႁူမ်ႈပၢင်ၵုမ်ဢဝ် ၼႆယဝ်ႉ။

မိူၼ်ၼင်ႇ ၽူႈလူင်ႉလႅၼ်ႇပၢႆးပိုၼ်း ဢၼ်ၵူၼ်းမိူင်းတႆးႁဝ်းၶႃႈ ႁူႉၸၵ်းၵၼ်လီၵူႈၵေႃႉ မႄႈၶူးၶိူဝ်းသႅၼ်ၵေႃႈ ဢမ်ႇၸၢင်ႈဢွၵ်ႇၶၢဝ်းတၢင်း ၶဝ်ႈႁူမ်ႈပၢင်ၵုမ် ပွၵ်ႈၵမ်းၼႆႉလႆႈ ၵူၺ်းလႆႈႁဵတ်းငဝ်းႁၢင်ႈသဵင်သေ သူင်ႇၶဝ်ႈႁူမ်ႈ ပၢင်ၵုမ် တေႃႉတႆႇၶႆႈၼႄလွင်ႈ ၵၢၼ်လတ်းၽၢၼ်ႇ ၸိူဝ်ႉၶိူဝ်းတႆး မိူဝ်ႈၵွၼ်ႇပူၼ်ႉမႃး လႄႈ ဝၼ်းမိူဝ်ႈၼႆႉ ဢိၵ်ႇတင်း ဢၼႃႇၵၢတ်ႇ ၸိူဝ်ႉၶိူဝ်းတႆး ဝၼ်းမိူဝ်းၼႃႈ ၼႆယဝ်ႉ။

ၼႂ်းပၢင်ၵုမ်လူင်ၼႆႉ တေဢုပ်ႇဢူဝ်းၵၼ်ၵႂႃႇ ၵူႈလွင်ႈလွင်ႈ ဢၼ်ၵဵဝ်ႇၶွင်ႈၵၼ် ၼႂ်းတူင်ႇဝူင်းၵူၼ်း မိူၼ်ၼင်ႇပၢႆးပိုၼ်း၊ လွင်ႈၵၢၼ်ယုၵ်ႉမုၼ်း ၶူၼ်ႉၶႂႃႉလိၵ်ႈလူင် ၼႂ်းမိူင်းတႆး၊ ပၢႆးႁူႉ ၵူၼ်းပိုၼ်ႉမိူင်း လႄႈ ၸိူဝ်ႉမႅင်းတင်းပဵၼ် COVID-19၊ ၾိင်ႈၾႃႉ သၽႃႇဝ ၽုၼ်ႇၵႂၼ်းၾႆး (PM 2.5)၊ လွင်ႈၵႃႉၶၢႆ ၸွမ်းလႅၼ်လိၼ် မိူင်းမႄႈႁွင်ႈသွၼ် တေႃႇၸူး မိူင်းတႆး-မိူင်းယၢင်းလႅင် လွင်ႈႁႅင်းၵၢၼ်ယၢၼ်မိူင်း ၼႂ်းမိူင်းထႆး လႄႈ ၵူႈမိူင်းမိူင်း ဢိၵ်ႇတင်း ငဝ်းလၢႆး လွင်ႈလႅၵ်ႈလၢႆႈ ပၢႆးမၢၵ်ႈမီး တူင်ႇဝူင်းၵူၼ်း ၼႂ်းမိူင်းတႆးၸိူဝ်းၼႆႉ ၼႆယဝ်ႉ။

ပၢင်ၵုမ်လူင် လွင်ႈတႆးၵူႈမိူင်းမိူင်း ပွၵ်ႈၵမ်း (2) ၼႆႉ တႄႇၸတ်းႁဵတ်း ၼႂ်းဝၼ်းထီႉ 04-06 September 2020 ၼႆႉသေ၊ ပၢင်ၵုမ်ပွၵ်ႈၵမ်း (1) တႄႉ လႆႈၸတ်းႁဵတ်း မိူဝ်ႈဝၼ်းထီႉ 29-30 June 2013 ပူၼ်ႉမႃးၼၼ်ႉ ၼႆယဝ်ႉ။

တႆးလွတ်ႈလႅဝ်း