ပေႃႈမႄႈၵူၼ်းမိူင်း ၸွႆႈထႅမ်ၶူဝ်းၶွင်ၵိၼ်ယႅမ်ႉ တီႈၵေႃႉသိုၵ်းၵေႃႉႁၢၼ်

ၼင်ႇႁိုဝ် တေပဵၼ်ႁႅင်းၵမ်ႉၸွႆႈ ၸိူဝ်ႉၸၢတ်ႈၼႆသေ ပေႃႈမႄႈၵူၼ်းမိူင်း ဢဝ်ၶူဝ်းၶွင်ၵိၼ်ယႅမ်ႉ တင်းၼမ် ၵႂႃႇၸွႆႈထႅမ်ၵေႃႉသိုၵ်း ၵေႃႉႁၢၼ် RCSS/SSA ဢၼ်တူင်ႉၼိုင် ၼႂ်းၼႃႈတီႈ။

မိူဝ်ႈဝၼ်းထီႉ 25 October 2020 (လိူၼ်သိပ်းဢဵတ်းမႂ်ႇ 9 ၶမ်ႈ ပီႊတႆး 2114 ၼီႈ) ၸွမ်းၼင်ႇ ပေႃႈမႄႈၵူၼ်းမိူင်း ၽုၵ်ႇသွမ်ႈၸိူဝ်ႉၽၼ်း မွၵ်ႇမၢၵ်ႇႁၢၵ်ႈႁူဝ် မိူဝ်ႈၽွင်းၶၢဝ်းႁိူဝ်ႉ ၶၢဝ်းၾူၼ်ၼၼ်ႉသေ ၵမ်းၼႆႉသမ်ႉ ထိုင်ၶၢဝ်းဢဝ် မၢၵ်ႇၶဝ်ႈတဝ်ႈၼမ်ႉယဝ်ႉလႄႈ ပေႃႈမႄႈၵူၼ်းမိူင်း ၼႂ်းၸႄႈဝဵင်းမိူင်းပၼ်ႇ ဢဝ်ၶူဝ်းၶွင် ဢၼ်ဢွၵ်ႇ ၼႂ်းႁႆႈၼႂ်းသူၼ်တင်းၼမ် ၵႂႃႇၸွႆႈထႅမ်ပၼ်တီႈ ၵေႃႉသိုၵ်း တပ်ႉသိုၵ်းၸိုင်ႈတႆး RCSS/SSA ဝႃႈၼႆ။

ၼွၵ်ႈလိူဝ်သေ ၶူဝ်းၶွင်ဢၼ်ဢွၵ်ႇၼႂ်းႁႆႈသူၼ်ယဝ်ႉ ပေႃႈမႄႈၵူၼ်းမိူင်း ယင်းသိုဝ်ႉၶူဝ်းၶွင် ၵိၼ်ယႅမ်ႉ မိူၼ်ၼင်ႇ ၼမ်ႉမီႇၼမ်ႉမၼ်း၊ ပႃႁႅင်ႈ၊ ၽၵ်းမီႇ လႄႈ ထႅင်ႈလၢႆလၢႆလွင်ႈ ၸွႆႈထႅမ်ပၼ် တႃႇႁႂ်ႈပဵၼ်ႁႅင်းၸႂ်ၵေႃႉသိုၵ်း ၵေႃႉႁၢၼ်ၶဝ်ယူႇၵိၼ်ၵႂႃႇ ၼႆယဝ်ႉ။

ၼႂ်းဝၼ်းလဵဝ်ၵၼ် ၼၼ်ႉၵူၺ်းၼင်ႇၵဝ်ႇ ပေႃႈမႄႈၵူၼ်းမိူင်းလၢႆလၢႆၵေႃႉ ၼႂ်းၸႄႈဝဵင်းလၢင်းၶိူဝ်း မီးၼမ်ႉၸႂ်ၸေႇတၼႃႇလီသေ ႁူမ်ႈၵၼ်ႁဵတ်းၼိူဝ်ႉၵႆႇဢုပ်ႉ ၵႂႃႇလဵင်ႉၵေႃႉသိုၵ်ႉ တပ်ႉသိုၵ်းၸိုင်ႈတႆး ဢၼ်တူင်ႉၼိုင် ၼႂ်းၼႃႈတီႈ လၢင်းၶိူဝ်း – မိူင်းပၼ်ႇ ၸိုင်ႈတႆးပွတ်းၸၢၼ်းမိူၼ်ၵၼ် ၼႆယဝ်ႉ။

ယူႇတီႈ ၽူႈမီးပုၼ်ႈၽွၼ်း ၵေႃႉသိုၵ်းတပ်ႉသိုၵ်းၸိုင်ႈတႆး RCSS/SSA ၵေႃႈ လႆႈႁပ်ႉၶူဝ်းၶွင် ၸွႆႈထႅမ်တင်းသဵင်ႈသေ ပဵၼ်ဢၼ်ယိၼ်းၸူမ်း ၶွပ်ႈၸႂ်ယႂ်ႇၼမ်ထိုင် ပေႃႈမႄႈၵူၼ်းမိူင်း ဢိၵ်ႇတင်း ၽူႈမီးၼမ်ႉၸႂ် ၽိူၵ်ႇၸိုၼ်ႈၶၢဝ်သႂ် ဢၼ်လႆႈၵမ်ႉထႅမ်မႃး ၶူဝ်းၶွင်ၵိၼ်ယႅမ်ႉၸိူဝ်းၼႆႉတင်းသဵင်ႈ ၼႆယဝ်ႉ။

မိူဝ်ႈဝၼ်းထီႉ 23 October 2020 ပူၼ်ႉမႃးၼၼ်ႉၵေႃႈ ပီႈၼွင်ႉတႆး ၽူႈႁၵ်ႉၸိူဝ်ႉၸၢတ်ႈၼႂ်းမိူင်းထႆး ႁူမ်ႈၸူႉတုမ်ငိုၼ်းတွင်းၵၼ်သေ ဢဝ်ငိုၼ်းမၢၼ်ႈ 14,880,000 ပျႃး (သိပ်းသီႇလၢၼ်ႉပႅတ်ႇသႅၼ်ပႅတ်ႇမိုၼ်ႇပျႃး) ၸွႆႈထႅမ်ပၼ်တီႈ ၵေႃႉသိုၵ်း တပ်ႉသိုၵ်းၸိုင်ႈတႆး ဢၼ်တူၵ်းပုၼ်ႈၽွၼ်း တူင်ႉၼိုင်ဝႆႉ ၼႂ်းၼႃႈသိုၵ်း ၼႆယဝ်ႉ။

တႆးလွတ်ႈလႅဝ်း