တၢင်းပဵၼ်ဢမ်ႇႁူႉၸၵ်းမဵဝ်း တီႈမိူင်းဢိၼ်းတီးယႃး တိုၵ်ႉသိုပ်ႇတိူဝ်းၶိုၼ်ႈထႅင်ႈ 100 ပၢႆ လႄႈ မီးၵူၼ်းလူႉတၢႆယဝ်ႉ 1 ၵေႃႉ

ၵူၼ်းမိူင်းဢိၼ်းတီးယႃး ယူႇယူႇၵေႃႈပဵၼ်တႃၸဵပ်း၊ တူၼ်ႉႁၢၵ်ႈ လူၺ်ႈဢမ်ႇႁူႉၸၵ်းလွင်ႈတၢင်းၼၼ်ႉ တိုၵ်ႉသိုပ်ႇတိူဝ်းၶိုၼ်ႈထႅင်ႈ 100 ပၢႆ ဢိၵ်ႇတင်း မီးၵူၼ်းလူႉသဵင်ႈတၢႆယဝ်ႉ 1 ၵေႃႉ။

မိူဝ်ႈၼႆႉ ဝၼ်းထီႉ 08 December 2020 (လိူၼ်သိပ်းသွင်လွင်ႈ 9 ၶမ်ႈ ပီႊတႆး 2114 ၼီႈ) သိုဝ်ႇၶၢဝ်ႇၼွၵ်ႈမိူင်း ဢွၵ်ႇၼႄဝႆႉ ၵဵဝ်ႇလူၺ်ႈလွင်ႈတၢင်းပဵၼ် ဢၼ်ဢမ်ႇပႆႇႁူႉၸိုဝ်ႈ၊ ပႆႇႁူႉၸၵ်းမဵဝ်း ၽႄႈလၢမ်းတီႈ တီႈၼႂ်းဝဵင်းဢီလူႇရူႇ (Eluru) ၸႄႈမိူင်း ဢၼ်ႇတရႃႇ ပရႃႇတိတ်ႉ (Andhra Pradesh) မိူင်းဢိၼ်းတီးယႃးၼၼ်ႉ မိူဝ်ႈဝႃးၼႆႉ ၵူၼ်းပဵၼ်တင်းမူတ်းမီး 315 ၵေႃႉ ၼႆသေတႃႉ ဝၼ်းမိူဝ်ႈၼႆႉတႄႉ ၵူၼ်းမိူင်းၸပ်းတၢင်းပဵၼ်တိူဝ်းၶိုၼ်ႈထႅင်ႈ 140 ၵေႃႉသေ ႁူမ်ႈၵူၼ်းပဵၼ် တင်းမူတ်း 455 ၵေႃႉယဝ်ႉ ဝႃႈၼႆ။

တၢင်းပဵၼ်ဢၼ်ၽႄႈလၢမ်းယူႇ ယၢမ်းလဵဝ်ၼႆႉ ၵမ်ႈၽွင်ႈတေတူၼ်ႉႁၢၵ်ႈ၊ တႃၸဵပ်းသႅပ်ႇ၊ မၢင်ၵေႃႉပဵၼ်လူမ်း လႄႈ မၢင်ၵေႃႉပဵၼ်ပႃးငၢၼ်းၸွၵ်းလၢႆလၢႆၵမ်းသေ မိူဝ်ႈၶမ်ႈဝႃးၼႆႉ မီးၽူႈၸၢႆး ဢႃႇယု 45 ပီႊ လႆႈလူႉသဵင်ႈတၢႆၵႂႃႇ တီႈႁူင်းယႃယဝ်ႉ 1 ၵေႃႉ ယွၼ်ႉတၢင်းပဵၼ်ၼႆႉ ၼႆယဝ်ႉ။

ယွၼ်ႉတၢင်းပဵၼ် ဢၼ်ပႆႇႁူႉၸၵ်းမဵဝ်းမၼ်းၼႆႉသေ ႁဵတ်းႁႂ်ႈၵူၼ်းမိူင်းမီးလွင်ႈမႆႈၸႂ် ၵူဝ်လႆႈမီးလွင်ႈ ၽႄႈလၢမ်းပဵၼ်ဝူင်းၵႂၢင်ႈၵႆ မိူၼ်ၼင်ႇ ၸိူဝ်ႉမႅင်းတၢင်းပဵၼ် COVID-19 ၼႆလႄႈ ယူႇတီႈ ၽူႈၵိူဝ်းၵုမ် ၸႄႈမိူင်း ဢၼ်ႇတရႃႇ ပရႃႇတိတ်ႉ (Andhra Pradesh) ၵေႃႈ လႆႈလူင်းသူႇၸႂ်းၵူၼ်းပဵၼ် ၸွမ်းႁူင်းယႃ လၢႆလၢႆဢွင်ႈတီႈလႄႈ ႁၢင်ႈႁႅၼ်းတူဝ်ႈတၼ်းတွၼ်ႈတႃႇတေႁပ်ႉမိုဝ်းဝႆႉ သင်ဝႃႈ တၢင်းပဵၼ်ၼႆႉ တိုၵ်ႉသိုပ်ႇၽႄႈလၢမ်းထႅင်ႈ ဝႃႈၼႆ၊ ၵူၺ်းၵႃႈ ၵူၼ်းပဵၼ်ဢၼ်ယူတ်းယႃႁၢႆ ၸိုၼ်ႈၶႅၼ်းၶိုၼ်းသေ ပွၵ်ႈၶိုၼ်းႁိူၼ်းၵေႃႈ မီးၸမ်မွၵ်ႈ 200 ယဝ်ႉမိူၼ်ၵၼ်ဝႃႈၼႆ။

ၽၢႆႇဢုပ်ႉပိူင်ႇ ၼႂ်းပိုၼ်ႉတီႈၶဝ်တႄႉ လၢမ်းၶၢတ်ႈဝႆႉဝႃႈ တၢင်းပဵၼ်ၼႆႉ တေလုၵ်ႉတီႈၼမ်ႉ လႄႈ လူမ်း ၼႂ်းပိုၼ်ႉတီႈၼၼ်ႉသေပဵၼ်မႃးၵူၺ်း ယွၼ်ႉၵူၼ်းပဵၼ်တင်းမူတ်း ယူႇၼႂ်းပိုၼ်ႉတီႈလဵဝ်ၵၼ်၊ ၸိူင်ႉႁိုဝ် ၵေႃႈလီ ၵူၼ်းပဵၼ်တင်းမူတ်းၼႆႉ လႆႈၵူတ်ႇထတ်းႁႃ ၸိူဝ်ႉမႅင်းတၢင်းပဵၼ် COVID-19 ပႃးယဝ်ႉ ဢမ်ႇထူပ်းႁၼ် ၵူၼ်းတိတ်းၸပ်းၸိူဝ်ႉမႅင်းသေၵေႃႉ ၼႆယဝ်ႉ။

တေႃႇထိုင်မိူဝ်ႈၼႆႉ ၵူၼ်းတိတ်းၸပ်းၸိူဝ်ႉမႅင်း COVID-19 တီႈၼႂ်းမိူင်းဢိၼ်းတီးယႃး ၶၢဝ်းတၢင်း 24 ၸူဝ်ႈမူင်း  ၵူၼ်းတိတ်းၸပ်းၸိူဝ်ႉမႅင်း တိူဝ်းၶိုၼ်ႈထႅင်ႈ 27,107 ၵေႃႉ ႁူမ်ႈၵူၼ်းတိတ်းၸပ်း ၸိူဝ်ႉမႅင်း တင်းမူတ်းမီး 9,703,908 ၵေႃႉ ၵူၼ်းပဵၼ်ၼမ်သုတ်း ပဵၼ်မၢႆထီႉ 2 ၼႂ်းလုမ်ႈၾႃႉ၊ ၵူၼ်းလူႉသဵင်ႈတၢႆ တိူဝ်းၶိုၼ်ႈထႅင်ႈ 404 ၵေႃႉ ႁူမ်ႈၵူၼ်းလူႉသဵင်ႈတၢႆ တင်းမူတ်းမီး 140,994 ၵေႃႉ၊ ယူတ်းယႃၸိုၼ်ႈၶႅၼ်းၶိုၼ်း 9,177,645 ၵေႃႉ ၼႆယဝ်ႉ။

တီႈမိူင်းဢမေႇရိၵၢၼ်ႇ ၵူၼ်းတိတ်းၸပ်းၸိူဝ်ႉမႅင်း ၼမ်သုတ်းၼႂ်းလုမ်ႈၾႃႉ ၼႂ်းၶၢဝ်းတၢင်း 24 ၸူဝ်ႈမူင်း ၵူၼ်းတိတ်းၸပ်းၸိူဝ်ႉမႅင်း တိူဝ်းၶိုၼ်ႈထႅင်ႈ 198,792 ၵေႃႉ ႁူမ်ႈၵူၼ်းတိတ်းၸပ်းၸိူဝ်ႉမႅင်း 15,369,046 ၵေႃႉ၊ ၵူၼ်းလူႉသဵင်ႈတၢႆ တိူဝ်းၶိုၼ်ႈထႅင်ႈ 1,508 ၵေႃႉ ႁူမ်ႈၵူၼ်းလူႉသဵင်ႈတၢႆ  290,443 ၵေႃႉ၊ ၵူၼ်းယူတ်းယႃၸိုၼ်ႈၶႅၼ်းၶိုၼ်းမီး 8,982,246 ၵေႃႉ ၼႆယဝ်ႉ။

မိူင်းပရႃႇသီးလ် ၵူၼ်းတိတ်းၸပ်းၸိူဝ်ႉမႅင်း တိူဝ်းၶိုၼ်ႈထႅင်ႈ 24,525 ၵေႃႉ ႁူမ်ႈၵူၼ်းတိတ်းၸပ်း ၸိူဝ်ႉမႅင်း 6,628,065 ၵေႃႉ၊ ၵူၼ်းလူႉတၢႆတိူဝ်းၶိုၼ်ႈထႅင်ႈ 426 ၵေႃႉ ႁူမ်ႈၵူၼ်းလူႉတၢႆတင်းမူတ်းမီး 177,388 ၵေႃႉ၊ ယူတ်းယႃၸိုၼ်ႈၶႅၼ်းၶိုၼ်း 5,801,067 ၵေႃႉ ၼႆယဝ်ႉ။

တေႃႇထိုင်မိူဝ်ႈၼႆႉ ဝၼ်းထီႉ 08 December 2020 (လိူၼ်သိပ်းသွင်လွင်ႈ  9 ၶမ်ႈ ပီႊတႆး 2114 ၼီႈ) ၸိူဝ်ႉမႅင်း တၢင်းပဵၼ် COVID-19 ၽႄႈလၢမ်းၸွတ်ႇတူဝ်ႈၵႂႃႇ (218) မိူင်း (218 countries and territories)၊ ၵူၼ်းတိတ်းၸပ်း ၸိူဝ်ႉမႅင်းတင်းပဵၼ် COVID-19 တင်းလုမ်ႈၾႃႉ ႁူမ်ႈတင်းသဵင်ႈမီး (67,956,925) ၵေႃႉ၊ ၵူၼ်းလူႉသဵင်ႈတၢႆမီး (1,550,562) ၵေႃႉ၊ ၵူၼ်းဢၼ်ယူတ်းယႃသေ ၸိုၼ်ႈၶႅၼ်းၶိုၼ်း သမ်ႉမီး (47,043,904) ၵေႃႉ ၸွမ်းၼင်ႇၶေႃႈမုၼ်း − www.worldometers.info/coronavirus/ ဝၼ်းထီႉ 08 December 2020 ၶၢဝ်းယၢမ်း ဝၢႆးဝၼ်း 14:00 မူင်း။

တႆးလွတ်ႈလႅဝ်း