ၶွင်ႇသီႇဢဝ်ၶိုၼ်းၸိုင်ႈတႆး ၸတ်းႁဵတ်းပၢင်ပိုတ်ႇ ႁူင်းႁဵၼ်းၸိူဝ်ႉၸၢတ်ႈလင်မႂ်ႇ တီႈၵွင်းမုင်ႈမိူင်း

မိူဝ်ႈဝႃး ဝၼ်းထီႉ 24 December 2020 (လိူၼ်ၸဵင်မႂ်ႇ 10 ၶမ်ႈ ပီႊတႆး 2115 ၼီႈ) ၶွင်ႇသီႇဢဝ်ၶိုၼ်းၸိုင်ႈတႆး ဢွၼ်ႁူဝ်ၸတ်းႁဵတ်း ပၢင်ပိုတ်ႇႁူင်းႁဵၼ်းၸိူဝ်ႉၸၢတ်ႈလင်မႂ်ႇ တီႈၵွင်းမုင်းမိူင်း ဝႃႈၼႆ။

ပၢင်ပိုတ်ႇႁူင်းႁဵၼ်းၸိူဝ်ႉၸၢတ်ႈ လင်မႂ်ႇၼႆႉ တႄႇၸတ်းႁဵတ်း မိူဝ်ႈဝၼ်းထီႉ 24 December 2020 တေႃႇထိုင် မိူဝ်ႈၼႆႉ ဝၼ်းထီႉ 25 December 2020 ၶၢဝ်းတၢင်း 2 ဝၼ်းသေ မီးၸဝ်ႈသိုၵ်းဝၼ်းလီ၊ ၸဝ်ႈသိုၵ်းတႃႉပလွႆး၊ ၸုမ်းၼၢင်းယိင်း ၶွင်ႇသီႇဢဝ်ၶိုၼ်းၸိုင်ႈတႆး ၼႂ်းပိုၼ်ႉတီႈ လႄႈ ပီႈၼွင်ႉၶႅၵ်ႇ ၼႂ်းပိုၼ်ႉတီႈၶဝ်ႈႁူမ်ႈ ဝႃႈၼႆ။

ၸွမ်းၼင်ႇၶပ်ႉမၢႆပၢင်ၵႅဝ်ႈ မီးၼၼ်ႉသေ မိူဝ်ႈဝႃး ယၢမ်းၵၢင်ၶမ်ႈ 18:00 မူင်းၼၼ်ႉ မီးပၢင်ထွမ်ႇလိၵ်ႈ ထွမ်ႇထမ်းတြႃး လႄႈ မီးပႃးတၢင်းၵႃႈၼူၵ်ႉတူဝ်း မူၼ်ႈၸႂ်ပၼ်ပီႈၼွင်ႉၶႅၵ်ႇၵႂႃႇ ၼႆယဝ်ႉ။

ထိုင်မႃးမိူဝ်ႈၼႆႉ ယၢမ်းၵၢင်ၼႂ် 07:00 မူင်း ယူႇတီႈတၵ်ႉၵႃႇသတ်ႉထႃး လႆႈဢွၼ်ၵၼ် ၵၢပ်ႈသွမ်း သင်ႇၶၸဝ်ႈ တီႈႁူင်းႁဵၼ်းမႂ်ႇ၊ ယၢမ်း 07:30 မူင်း ၶိုၼ်းသိုပ်ႇၸႃႇၵႃႉလဵင်ႉလူ ပီႈၼွင်ႉၶႅၵ်ႇ ၸိူဝ်းမႃးၶဝ်ႈႁူမ်ႈ လႄႈ ယၢမ်း 09:00 မူင်း ၽိတ်ႈမွၵ်ႇဢဝ် ၸဝ်ႈသိုၵ်းဝၼ်းလီ ၵႅတ်းပၢႆႉပိုတ်ႇၽုၺ်ႇ ႁူင်းႁဵၼ်းလင်မႂ်ႇၵႂႃႇ ၼႆယဝ်ႉ။

ဝၢႆးသေၼၼ်ႉ သင်ႇၶၸဝ်ႈပိုတ်ႇပၢင်ၵႅဝ်ႈသေ ၸဝ်ႈသိုၵ်းဝၼ်းလီ မွၵ်ႇလၢတ်ႈၶေႃႈၵႂၢမ်းၵႂႃႇဝႃႈ (1) ဢဝ်ၵုင်ႇမုၼ်ၼိူဝ် ၸဝ်ႈတႃႇၼႃႉ ၽူႈၵူၼ်းလီဢၼ်လႆႈၸွႆႈထႅမ် တႃႇတေပဵၼ်မႃး ႁူင်းႁဵၼ်းၸိူဝ်ႉ ၸၢတ်ႈလင်မႂ်ႇ၊ (2) ၸိူဝ်ႉမူင်ႈၵေႃႈမူင်ႈပႅင်း ၸိူဝ်ႉမႅင်းၵေႃႈမႅင်းႁၵ်ႉ ၾိင်ႈငႄႈၾိင်ႈထုင်း ႁိတ်ႈႁွႆႈလိၵ်ႈလၢႆးႁဝ်း ထုၵ်ႇလီပူၵ်းပွင်ႁၵ်ႉသႃထိင်းသိမ်း ႁႂ်ႈၶိုၼ်ႈယႂ်ႇမႂ်ႇသုင်၊ (3) ပၢင်ပိုတ်ႇႁူင်းႁဵၼ်းမႂ်ႇၼႆႉ ယွၼ်ႉငဝ်းလၢႆးတၢင်းပဵၼ်ၶူဝ်ႇဝိတ်ႉ 19 တိတ်းၸပ်းၽႄႈလၢမ်းလႄႈ ႁဝ်းၶႃႈဢမ်ႇလႆႈၸတ်းႁဵတ်းယႂ်ႇလူင် ဝႃႈၼႆ။

သိုပ်ႇၼၼ်ႉ ၸဝ်ႈသိုၵ်းတႃႉပလွႆး မွၵ်ႇလၢတ်ႈၶေႃႈၵႂၢမ်းသေ ၽူႈတၢင်တူဝ်ၸုမ်းၼၢင်းယိင်း ၶွင်ႇသီႇ ဢဝ်ၶိုၼ်းၸိုင်ႈတႆး မွၵ်ႇလၢတ်ႈၶေႃႈၵႂၢမ်း ယိၼ်းၸူမ်းၶွပ်ႈၸႂ် လႄႈ လွင်ႈလႆႈပဵၼ်မႃး ႁူင်းႁဵၼ်းၸိူဝ်းၸၢတ်ႈ လင်မႂ်ႇၼႆႉသေ ႁူမ်ႈၵၼ်လူႇတၢၼ်းယၢတ်ႇၼမ်ႉ ႁူင်းႁဵၼ်းမႂ်ႇ ယဝ်ႉတူဝ်ႈလီငၢမ်းၵႂႃႇ ၼႆယဝ်။

ႁူင်းႁဵၼ်းၸိူဝ်ႉၸၢတ်ႈ တီႈၵွင်းမုင်ႈမိူင်းၼႆႉ ၼၢင်းလိူၼ်ၶမ်း ႁူဝ်ပဝ်ႈၸုမ်းၼၢင်းယိင်း ၶွင်ႇသီႇဢဝ်ၶိုၼ်းၸိုင်ႈတႆး လႆႈဢွၼ်ႁူဝ်လုၵ်ႈၸုမ်း လႄႈ ၽူႈမီးပုၼ်ႈၽွၼ်း RCSS/SSA ၼႂ်းပိုၼ်ႉတီႈ တႄႇၵေႃႇသၢင်ႈ ပူၵ်းသဝ်မင်ႇၵလႃႇ ႁူင်းႁဵၼ်းၸိူဝ်ႉၸၢတ်ႈမႃး မိူဝ်ႈဝၼ်းထီႉ 4 March 2020 ၼၼ်ႉသေ ထိုင်မႃးၼႂ်းလိူၼ် December 2020 ၼႆႉ ၵေႃႇသၢင်ႈယဝ်ႉတူဝ်ႈလီငၢမ်းယဝ်ႉလႄႈ ၸင်ႇလႆႈၸတ်းႁဵတ်း ပၢင်ပိုတ်ႇႁူင်းႁဵၼ်းၸိူဝ်ႉၸၢတ်ႈလင်မႂ်ႇ ၼႆယဝ်ႉ။

ပိုၼ်းၵႅပ်ႈ လွင်ႈလႆႈပဵၼ်မႃးႁူင်းႁဵၼ်းၸိူဝ်ႉၸၢတ်ႈလင်မႂ်ႇ

ဢိင်ၼိူဝ် မိူဝ်ႈဝၼ်းထီႉ 14-15 January 2019 ပူၼ်ႉမႃးၼၼ်ႉ ႁူဝ်ပဝ်ႈၸုမ်းၼၢင်ယိင်း ၶွင်ႇသီႇဢဝ်ၶိုၼ်းၸိုင်ႈတႆး ၼၢင်းလိူၼ်ၶမ်း ဢွၼ်ႁူဝ်လုၵ်ႈၸုမ်းၼၢင်းယိင်း လၢႆလၢႆၵေႃႉသေ လႆႈၵႂႃႇၸတ်းႁဵတ်း ဝၼ်းလုၵ်ႈဢွၼ်ႇ တီႈႁူင်းႁဵၼ်းၸိူဝ်ႉၸၢတ်ႈ ၵွင်းမုင်ႈမိူင်းလႄႈ လႆႈၸတ်းႁဵတ်းပႃး ပၢင်ႁူပ်ႉထူပ်းဢုပ်ႇဢူဝ်း ၸုမ်းၼၢင်းယိင်း ၶွင်ႇသီႇဢဝ်ၶိုၼ်းၸိုင်ႈတႆး ထႅင်ႈလၢႆလၢႆလွင်ႈသေ လႆႈႁူႉဝႃႈ ႁူင်းႁဵၼ်းၸိူဝ်ႉၸၢတ်ႈလင်ၵဝ်ႇၼၼ်ႉ ၸႂ်ႉမႃးႁိုင်ယဝ်ႉလႄႈ ၶႂ်ႈၵေႃႇသၢင်ႈ ႁူင်းႁဵၼ်းလင်မႂ်ႇ တီႈၵွင်းမုင်ႈမိူင်းၼႆယူ။

ထိုင်မႃး ဝၼ်းထီႉ 09 May 2019 ၸင်ႇမီးပၢင်ၵုမ်ႁူဝ်ႁုပ်ႈပီႊ မုၵ်ႉၸုမ်းၼၢင်းယိင်း ၶွင်ႇသီႇဢဝ်ၶိုၼ်း ၸိုင်ႈတႆးသေ ဢုပ်ႇဢူဝ်းလႆႈၸႂ်ၵၼ်ဝႃႈ တေၵေႃႇသၢင်ႈႁူင်းႁဵၼ်းၸိူဝ်ႉၸၢတ်ႈ လင်မႂ်ႇၼႆလႄႈ တေႁဵတ်းဝႂ်ၸၢမ်းၵၢမ်ႇ ႁႃငိုၼ်းၵွင်ၵၢင် တႃႇၵေႃႇသၢင်ႈႁူင်းႁဵၼ်းၼႆသေ၊ ထိုင်ၼႂ်းလိူၼ် September 2019 ၼၼ်ႉ လႆႈတႄႇပိုၼ်ၽၢဝ်ႇၶၢႆ ဝႂ်ၸၢမ်းၵၢမ်ႇ တႃႇလႆႈမႃးငိုၼ်းၵွင်ၵၢင် ၶၢဝ်းတၢင်း 5 လိူၼ် လႄႈ လႆႈပိုတ်ႇၽူၺ်ႇ ဝႂ်ၸၢမ်းၵၢမ်ႇ ၼႂ်းဝၼ်းၸိူဝ်ႉၸၢတ်ႈၸိုင်ႈတႆး တီႈငဝ်ႈၸိုင်ႈလွႆတႆးလႅင်း ဝၼ်းထီႉ 07 February 2020 ၼၼ်ႉသေ လႆႈဢဝ်သူး ရၢင်းဝၼ်း မွပ်ႈဢၢပ်ႈပၼ်တီႈ ၽူႈၵၢမ်ႇလီ ယဝ်ႉတူဝ်ႈလီငၢမ်းၵႂႃႇယူႇယဝ်ႉ။

ၸွမ်းၼင်ႇ ငိုၼ်းၵွင်ၵၢင် ဢၼ်ႁႃလႆႈမႃး တင်းမူတ်းၼၼ်ႉသေ မိူဝ်ႈဝၼ်းထီႉ 04 March 2020 လႆႈတႄႇၵေႃႇသၢင်ႈႁူင်းႁဵၼ်းၸိူဝ်ႉၸၢတ်ႈ တီႈၵွင်းမုင်ႈမိူင်း ပဵၼ်ဢၼ်ယဝ်ႉတူဝ်ႈလီငၢမ်းသေ ထိုင်မႃး မိူဝ်ႈၼႆႉ ဝၼ်းထီႉ 25 December 2020 ၼႆႉ ယူႇတီႈၸုမ်းၼၢင်းယိင်း ၶွင်ႇသီႇဢဝ်ၶိုၼ်းၸိုင်တႆး ၼႂ်းပိုၼ်ႉတီႈ ၸင်ႇလႆႈတၢင်တူဝ် မွပ်ႈဢၢပ်ႈႁူင်းႁဵၼ်းပၼ် ၶူး လႄႈ လုၵ်ႈႁဵၼ်း ဢိၵ်ႇတင်း ၽူႈမီးပုၼ်ႈၽွၼ်း တီႈဝၢၼ်ႈၵွင်းမုင်ႈမိူင်း လုမ်းလႃးတူၺ်းထိုင်ၵႂႃႇ ၼႆယဝ်ႉ။

တႃႇတေပဵၼ်မႃး ႁူင်းႁဵၼ်းၸိူဝ်ႉၸၢတ်ႈလင်မႂ်ႇၼႆႉၵေႃႈ ယူႇတီႈ ႁူဝ်ပဝ်ႈမုၵ်ႉၸုမ်းၼၢင်းယိင်း ၶွင်ႇသီႇဢဝ်ၶိုၼ်းၸိုင်ႈတႆး ၼၢင်းလိူၼ်ၶမ်း ယိၼ်းၸူမ်းၶွပ်ႈၸႂ် ယႂ်ႇၼမ်ထိုင် ၽူႈယႂ်ႇၵူၼ်းလူင် လႄႈ ၽူႈမီးၼမ်ႉၸႂ် တီႈၸမ်တီႈၵႆတင်းသဵင်ႈ ဢၼ်လႆႈၶဝ်ႈႁူမ်ႈႁဵတ်းသၢင်ႈ တေႃႇထိုင်ႁူင်းႁဵၼ်း ပေႃးယဝ်ႉတူဝ်ႈၵႂႃႇလီငၢမ်းၼႆႉ ၼႆယဝ်ႉ။

တႆးလွတ်ႈလႅဝ်း