ၵူၼ်းမိူင်းမၢၼ်ႈ ၼႄၵၢင်ၸႂ် တီႈၼႃႈလုမ်း UN ဢမ်ႇႁၼ်လီၸွမ်းလၢႆးႁဵတ်းသၢင်ႈ သိုၵ်းမၢၼ်ႈ

ဢိင်ၼိူဝ် သိုၵ်းမၢၼ်ႈမီးလွင်ႈတီႉၺွပ်း ၽူႈၵိူဝ်းၵုမ်ၸိုင်ႈမိူင်း လႄႈ တူဝ်ၸွမ်ၸိုင်ႈ ဢိၵ်ႇတင်း ၸုမ်းၽွင်းလူင်သေ ၵူၼ်းမိူင်းမၢၼ်ႈ ဢၼ်ယူႇတီႈ မိူင်းၵျုႇပၢၼ်ႇ ၼႄၵၢင်ၸႂ် တီႈၼႃႈလုမ်း UN။

မိူဝ်ႈၼႆႉဝၼ်းထီႉ 01 February 2021 (လိူၼ်ၵမ်လွင်ႈ 5 ၶမ်ႈ ပီႊတႆး 2115 ၼီႈ) ၸွမ်းၼင်ႇ မိူင်းႁူမ်ႈတုမ် ပိုၼ်ၽၢဝ်ႇဝၢၼ်ႈမိူင်း ငဝ်းလၢႆးၶိုၵ်ႉၶၢၵ်ႉ ႁႂ်ႈၸွမ်သိုၵ်းလူင် ၵေႃႉၵဝ်ႇ မျိၼ်ႉသူၺ်ႇ ၵႅမ်ၸွမ်ၸိုင်ႈမိူင်းႁူမ်ႈတုမ် ၶိုၼ်ႈပဵၼ်ၸွမ်ၸိုင်ႈမိူင်းႁူမ်ႈတုမ် ၸွမ်းၼင်ႇမၢႆမီႈ ပိူင်ငဝ်ႈပိုင်းမိူင်း မတ်ႉတႃ 418 (ၵ) မီးၼၼ်ႉသေ သမ်ႉမီးလွင်ႈ တီႉၺွပ်းဢၼ်တူဝ် ၸွမ်ၸိုင်ႈ ဢူးဝိၼ်းမျိၼ်ႉ လႄႈ ၽူႈၵိုဝ်းၵုမ်ၸိုင်ႈမိူင်း တေႃႇဢွင်ႇသၢၼ်းသုၵျီႇ ဢိၵ်ႇတင်း ၽူႈၶဝ်ႈၸုမ်း ပႃႇတီႇၼူၵ်ႉယုင်း (NLD) ထႅင်ႈတင်းၼမ် လႄႈ ႁဵတ်းႁႂ်ႈၵူၼ်းမိူင်းမၢၼ်ႈ ဢၼ်ယူႇတီႈ မိူင်းၵျုႇပၢၼ်ႇ ဢွၵ်ႇမႃးၼႄၵၢင်ၸႂ် တီႈၼႃႈလုမ်းၸၢတ်ႈၸိုင်ႈလုမ်ႈၾႃႉ (UN) ၼႂ်းဝဵင်းလူင်တူဝ်ႇၵျူဝ်ႇ မိူင်းၵျုႇပၢၼ်ႇ ဝႃႈၼႆ။

ၵူၼ်းၼႄၵၢင်ၸႂ်ၶဝ် လၢတ်ႈဝႃႈ ဢမ်ႇႁၼ်လီၸွမ်း လၢႆးႁဵတ်းသၢင်ႈသိုၵ်းမၢၼ်ႈ ဢၼ်ၸႂ်ႉတိုဝ်း ဢႃႇၼႃႇသေ တီႉၺွပ်းႁုပ်ႈသိမ်းဢႃႇၼႃႇ လူင်ပွင်ၸိုင်ႈ လႄႈ တုၵ်းယွၼ်းႁႂ်ႈပွႆႇပၼ်ၶိုၼ်း ၵူၼ်းၸိူဝ်းထုၵ်ႇတီႉၺွပ်း ဢိၵ်ႇတင်း တုၵ်းယွၼ်းႁႂ်ႈ ပၼ်သုၼ်ႇလွတ်ႈလႅဝ်း မိူင်းႁူမ်ႈတုမ် ဝႃႈၼႆ။

ၵဵဝ်ႇလူၺ်ႈလွင်ႈၼႆႉသေ ၽူႈၼမ်းၼႂ်းလူင် ၸုမ်းၸၢတ်ႈၸိုင်ႈလုမ်ႈၾႃႉ (United Nations-UN) ဢၼ်ႇတူဝ်ႇၼီႇဢူဝ်ႇ ၵူႇတႄႇရႅတ်ႉသ် (Antonio Guterres) လႆႈဢွၵ်ႇမႃးသပ်းၸႅင်ႈၶၢဝ်ႇ ဢမ်ႇႁၼ်လီၸွမ်း လၢႆးႁဵတ်းသၢင်ႈတပ်ႉသိုၵ်းမၢၼ်ႈ ၼင်ႇႁၢဝ်ႈႁႅင်း ဢၼ်တပ်ႉသိုၵ်းမၢၼ်ႈ တီႉၺွပ်း ၸုမ်းလူင်ပွင်ၸိုင်ႈ ပႃႇတီႇဢၼ်ဢွင်ႇပေႉပၢင်လိူၵ်ႈတင်ႈ ၼင်ႇၼႆလႄႈ တေလႆႈဝႃႈ ပဵၼ်လၢႆးႁဵတ်းသၢင်ႈ ၶႂ်ႈမွတ်ႇယႃႉပႅတ်ႈ ပိူင်တီႇမူဝ်ႇၶရေႇသီႇၵူၺ်းသေ၊ ယင်းတုၵ်းယွၼ်းႁႂ်ႈ တပ်ႉသိုၵ်းမၢၼ်ႈ ယုမ်ႇယမ်ၼပ်ႉထိုဝ် သဵင်ၵၢင်ၸႂ်ၵူၼ်းမိူင်း ၼႆယဝ်ႉ။

ၼွၵ်ႈလိူဝ်ၼၼ်ႉ ယူႇတီႈၸုမ်း WEVO တီႈၼႂ်းမိူင်းထႆး လႆႈပိုၼ်ၽၢဝ်ႇဝႃႈ ဢိင်ၼိူဝ် မိူင်းထႆး ပဵၼ်ၸိုင်ႈမိူင်းဢူၺ်းလီ ဢႃႇသီႇယၼ်ႇ 10 မိူင်းသေ ဢမ်ႇႁၼ်လီၵမ်ႉထႅမ်ၸွမ်း လွင်ႈသိုၵ်းမၢၼ်ႈ လႄႈ ၼႂ်းၶၢဝ်းယၢမ်းဝၢႆးၼႆႉ လႆႈမီးလွင်ႈၼႄၵၢင်ၸႂ် တီႈၼႃႈလုမ်းၽွင်းတၢင် မိူင်းႁူမ်ႈတုမ် ဢၼ်မီးဝႆႉ တီႈၼႂ်းမိူင်းၵွၵ်ႇၸိုင်ႈထႆးၼၼ်ႉ ၼႆယဝ်ႉ။

တႆးလွတ်ႈလႅဝ်း