ပီႇယႃႇ Myanmar လႄႈ Kirin တေၽႄတၢင်းၵၼ်ယဝ်ႉ

ၶွမ်ႇပၼီႇလဝ်ႈပီႇယႃႇ မိူင်းၵျႃႇပၢၼ်ႇ Kirin ပိုၼ်ၽၢဝ်ႇဝႃႈ တေၵိုတ်းလိုဝ်ႈ လွင်ႈႁဵတ်းၵၢၼ်ၸွမ်း ၶွမ်ႇပၼီႇဢၼ်ၵဵဝ်ႇၸွမ်းတပ်ႉသိုၵ်းမၢၼ်ႈ (2) ဢၼ်လႄႈ သၢၼ်ၶတ်းလွင်ႈသိုၵ်းမၢၼ်ႈ သိမ်းဢႃႇၼႃႇၵႂႃႇယူႇၼႆယဝ်ႉ။

ၶွမ်ႇပၼီႇ Kirin ပဵၼ်ၶွမ်ႇပၼီႇၼႂ်းမိူင်းၵျႃႇပၢၼ်ႇဢွၼ်တၢင်းသုတ်း ဢၼ်ပိုၼ်ၽၢဝ်ႇ သၢၼ်ၶတ်းလွင်ႈသိုၵ်းမၢၼ်ႈ သိမ်းဢႃႇၼႃႇဝႃႈၼႆ။

မိူဝ်ႈဝႃးဝၼ်းထီႉ 5 February 2021 (လိူၼ်ၵမ်လွင်ႈ 9 ၶမ်ႈ ပီႊတႆး 2115 ၼီႈ) ၶွမ်ႇပၼီႇ Kirin ပိုၼ်ၽၢဝ်ႇဝႃႈ မႆႈၸႂ်ၸွမ်းၵူၼ်းမိူင်းႁူမ်ႈတုမ်ယူႇ လၢႆးႁဵတ်းသၢင်ႈတပ်ႉသိုၵ်းမၢၼ်ႈၼႆႉ သၢၼ်ၶတ်းမူႇပိူင်ပေႃႇလသီႇၶေႃႈၸုၵ်းမၼ်ႈ ၶွမ်ႇပၼီႇ Kirin လွင်ႈၸၼ်ႉထၢၼ်ႈလႄႈ သုၼ်ႇလႆႈသုၼ်ႇပဵၼ်ၵူၼ်းၼႆယဝ်ႉ။

ၼႂ်းၶေႃႈပိုၼ်ၽၢဝ်ႇၼၼ်ႉ ပႃးဝႆႉဝႃႈ − ငဝ်းလၢႆးမိူဝ်ႈလဵဝ်ၼႆႉ ႁဝ်းၶႃႈဢမ်ႇမီးသဵၼ်ႈတၢင်းလိူၵ်ႈယဝ်ႉ၊ ယွၼ်ႉၼၼ် ႁဝ်းၶႃႈ တေၵိုတ်းလိုဝ်ႈ လွင်ႈႁဵတ်းၵၢၼ်ၸွမ်း ၶွမ်ႇပၼီႇဢၼ်ၵဵဝ်ႇၸွမ်းတပ်ႉသိုၵ်းမၢၼ်ႈ (MEHL) ၵႂႃႇ၊ တႃႇၵိုတ်းလိုဝ်ႈ ႁႂ်ႈပဵၼ်တၢင်းၵၢၼ်ၼၼ်ႉၵေႃႈ တေသိုပ်ႇႁဵတ်းသၢင်ႈၵႂႃႇယဝ်ႉ ဝႃႈၼႆ။

ၶွမ်ႇပၼီႇ Kirin ၼႆႉ လူင်းတိုၼ်းလၢင်းပဵၼ်သျႄႇယႃႇၵၼ်တင်း ၶွမ်ႇပၼီႇ ဢၼ်ၵဵဝ်ႇၸွမ်းတပ်ႉသိုၵ်းမၢၼ်ႈဝႆႉ (2) ဢၼ်၊ (1) Myanmar Brevery ဢၼ်ႁဵတ်းဢွၵ်ႇ ပီႇယႃႇ Myanmar လႄႈ (2) Mandalay Brevery ဢၼ်ႁဵတ်းဢွၵ်ႇလဝ်ႈ Mandalay ၸႃႉၵႂႃႇၸိူဝ်းၼႆႉသေ ၶွမ်ႇပၼီႇ Kirin မီးသျႄႇယႃႇ ႁူဝ်ပၢၵ်ႇ ႁႃႈသိပ်းဢဵတ်း (51%) လိူဝ်ၼၼ်ႉတႃႇ ႁူဝ်ပၢၵ်ႇသီႇသိပ်းၵဝ်ႈ (49%) တႄႉ ပဵၼ်တိုၼ်းလၢင်း ၽၢႆႇၶွမ်ႇပၼီႇဢၼ်ၵဵဝ်ႇၸွမ်းသိုၵ်းမၢၼ်ႈလွၼ်ႉလွၼ်ႉ ၼႆယဝ်ႉ။

ၶွမ်ႇပၼီႇ Kirin လႆႈၸႂ်ႉငိုၼ်းတိုၼ်းလၢင်း 560 လၢၼ်ႉတေႃႇလႃႇဢမေႇရိၵၢၼ်ႇသေ သိုဝ်ႉဢဝ်သျႄႇယႃႇ ပီႇယႃႇ Myanmar တႃႇႁူဝ်ပၢၵ်ႇ ႁႃႈသိပ်းႁႃႈ (55%) တီႈၶွမ်ႇပၼီႇဢၼ်ၵဵဝ်ႇၸွမ်း တပ်ႉသိုၵ်းမၢၼ်ႈ (MEHL) မိူဝ်ႈပီႊ 2015 ပူၼ်ႉမႃးၼႆႉသေ ၶိုၼ်းၶၢႆပၼ်ၶိုၼ်း MEHL တႃႇ (4%) ၼႂ်းပီႊ 2017 ၼႆယဝ်ႉ။

မိူဝ်ႈပူၼ်ႉမႃး ၼႂ်းလိူၼ် November 2020 ၼႆႉ ယွၼ်ႉပိူဝ်ႈ ၸုမ်းသုၼ်ႇလႆႈသုၼ်ႇပဵၼ်ၵူၼ်းၵူႈမိူင်းမိူင်း Amnesty International (AI) ဢွၵ်ႇလိၵ်ႈလၢႆးငၢၼ်း တိုၵ်းသူၼ်းၶွမ်ႇပၼီႇၼွၵ်ႈမိူင်း ယႃႇႁႂ်ႈႁဵတ်းၵၢၼ်ၸွမ်း ၶွမ်ႇပၼီႇတပ်ႉသိုၵ်းမၢၼ်ႈယဝ်ႉၼၼ်ႉ ၶွမ်ႇပၼီႇ Kirin လႆႈၵိုတ်းယင်ႉပႅတ်ႈ တႃႇပၼ်ၼမ်ႉတွၼ်းတီႈၶွမ်ႇပၼီႇ MEHL ဝႆႉယဝ်ႉဝႃႈၼႆ။

ယူႇတီႈၸုမ်းၸၢတ်ႈၸိုင်ႈလုမ်ႈၾႃႉ ၵေႃႈပိုၼ်ၽၢဝ်ႇပၼ်ၾၢင်ႉဝႆႉ မိူဝ်ႈၼႂ်းလိူၼ် August 2019 ၼၼ်ႉ ဝႃႈ ၶွမ်ႇပၼီႇၼွၵ်ႈမိူင်း ဢၼ်ႁဵတ်းၵၢၼ်ၸွမ်းၶွမ်ႇပၼီႇတပ်ႉသိုၵ်းမၢၼ်ႈၼၼ်ႉ မီးသုၼ်ႇ ႁူႉႁၼ် ၵမ်ႉထႅမ်ၸွမ်း လွင်ႈသိုၵ်းမၢၼ်ႈပူၼ်ႉပႅၼ်သုၼ်ႇလႆႈသုၼ်ႇပဵၼ်ၵူၼ်းယူႇၼႆယဝ်ႉ။

တႆးလွတ်ႈလႅဝ်း