ၶွင်ႇသီႇဢဝ်ၶိုၼ်းၸိုင်ႈတႆး ၸတ်းႁဵတ်းပၢင်ယွင်ႈယေႃး လုၵ်ႈႁဵၼ်းၽၢၼ်ႇပူၼ်ႉၸၼ်ႉ တီႈငဝ်ႈၸိုင်ႈ လွႆတႆးလႅင်း

ၸုမ်းပွင်ၵၢၼ်ပၢႆးပၺ်ႇၺႃႇ ၶွင်ႇသီႇဢဝ်ၶိုၼ်းၸိုင်ႈတႆး  ၸတ်းႁဵတ်းပၢင်မွပ်ႈဝႂ် ၽၢၼ်ႇပူၼ်ႉၸၼ်ႉ တွၼ်ႈသူးလုၵ်ႈႁဵၼ်းၵတ်ႉၶႅၼ်ႇ ၵူႈၸၼ်ႉၸၼ်ႉ တီႈႁူင်းႁဵၼ်းၸၼ်ႉသုင် ငဝ်ႈၸိုင်ႈလွႆတႆးလႅင်း။

မိူဝ်ႈၼႆႉ ဝၼ်းထီႉ 8 February 2021 (လိူၼ်ၵမ်လွင်ႈ 12 ၶမ်ႈ ပီႊတႆး 2115 ၼီႈ) ၶၢဝ်းယၢမ်း 09:00 မူင်းၼၼ်ႉ ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး လႄႈ ၽူႈယႂ်ႇၵူၼ်းလူင် ၵူႈႁွင်ႈၵၢၼ်  ဢိၵ်ႇတင်း ၶူးသွၼ်၊ လုၵ်ႈႁဵၼ်း၊ ပီႈၼွင်ႉၶႅၵ်ႇ၊ ပေႃႈမႄႈလုၵ်ႈႁဵၼ်း ၶဝ်ႈဢဝ်တီႈယူႇ ၼႂ်းႁူင်းႁေႃး တီႈႁူင်းႁဵၼ်းၸၼ်ႉသုင်သေ ၽူႈၵႅဝ်ပၢင် တၢင်ႇၼႄသၢႆမၢႆလုၵ်ႈႁဵၼ်းၽၢၼ်ႇပူၼ်ႉၸၼ်ႉ၊ လုၵ်ႈႁဵၼ်းၵတ်ႉၶႅၼ်ႇ၊ လုၵ်ႈႁဵၼ်းၼုမ်ႇႁၢၼ်ၸိုင်ႈမိူင်း လႄႈ ၶႅၵ်ႇၽူႈၶိုၼ်ႈႁွတ်ႈတင်းသဵင်ႈယူႇယဝ်ႉ။

ၼင်ႇႁိုဝ် ပေႃးတေပဵၼ် လွင်ႈမင်ႇၵလႃႇလီ ၼႂ်းပၢင်မွပ်ႈဝႂ်ၽၢၼ်ႇပူၼ်ႉၸၼ်ႉလႄႈ သူးလုၵ်ႈႁဵၼ်း ၵတ်ႉၶႅၼ်ႇ၊ လုၵ်ႈႁဵၼ်းၼုမ်ႇႁၢၼ်ၸိုင်ႈမိူင်းၼၼ်ႉ သင်ႇၶၸဝ်ႈ လွတ်ႈႁေႃးမင်ႇၵလႃႇ ပၼ်ၽွၼ်းယဝ်ႉသေ ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး ၸွမ်သိုၵ်းလူင် ယွတ်ႈသိုၵ်း မွပ်ႈဢၢပ်ႈသူးပၼ် လုၵ်ႈႁဵၼ်းၽၢၼ်ႇပူၼ်ႉၸၼ်ႉၵႂႃႇ 1. လုၵ်ႈႁဵၼ်းၽၢၼ်ႇပူၼ်ႉၸၼ်ႉသုင် မီး (8) ၵေႃႉ၊ 2. လုၵ်ႈႁဵၼ်းၸၼ်ႉၵၢင် လႄႈ လုၵ်ႈႁဵၼ်းၸၼ်ႉ 8, 9, 10 မီး (31) ၵေႃႉ၊ 3. လုၵ်ႈႁဵၼ်းၸၼ်ႉဢွၼ် ဢွင်ႇပူၼ်ႉၸၼ်ႉ မီး (48) ၵေႃႉ၊ 4. လုၵ်ႈႁဵၼ်းၵတ်ႉၶႅၼ်ႇ သူးထီႉ   1, 2, 3 ၵူႈၸၼ်ႉၸၼ်ႉၼၼ်ႉသမ်ႉ မီး (33) ၵေႃႉ လႄႈ  5. လုၵ်ႈႁဵၼ်းၼုမ်ႇႁၢၼ်ၸိုင်ႈမိူင်း ပီႊ1-3 ပီႊ 2 ၸုပ်ႈ-3 ႁူမ်ႈ (76) ၵေႃႉ၊  6. လုၵ်ႈႁဵၼ်းၵတ်ႉၶႅၼ်ႇ ႁူင်းႁဵၼ်းတၢင်းလတ်း ပီႊ 1, 2 မီး  (6) ၵေႃႉ ႁူမ်ႈတင်းသဵင်ႈ မီး (204) ၵေႃႉ ၼႆယဝ်ႉ။

ဝၢႆးသေ ႁူဝ်ပဝ်ႈလူင် ၸွမ်သိုၵ်းလူင် ယွတ်ႈသိုၵ်း မွပ်ႈဢၢပ်ႈသူး ပၼ်တီႈလုၵ်ႈႁဵၼ်းယဝ်ႉၼၼ်ႉ လုၵ်ႈႁဵၼ်း ဢွၼ်ၵၼ်ၵၢဝ်ႇၶေႃႈမၼ်ႈၵႅၼ်ႇလုၵ်ႈႁဵၼ်း မီးၼင်ႇၼႆ –  “ၵဝ်ၶႃႈ ပၼ်ၵတိ သႅတ်ႉၸႃႇ တႃႇဢဝ်တၢင်းႁူႉ ၼမ်ႉၵတ်ႉ ဢၼ်လႆႈႁဵၼ်းသွၼ်မႃးၼႆႉ ၸႂ်ႉတိုဝ်းႁဵတ်းသၢင်ႈ ပုၼ်ႈတႃႇ ၸိူဝ်ႉၸၢတ်ႈ၊ ဝၢၼ်ႈမိူင်း၊ ၽႃႇသႃႇ၊ သႃႇသၼႃႇ။ – ၵဝ်ၶႃႈဢၢၼ်းပဵၼ်ၵူၼ်းလီတိုဝ်းၵမ် လွင်ႈမၢၼ်ႇမႅၼ်ႈတြႃးလႄႈ ယုမ်ႇယမ်ၼပ်ႉထိုဝ် မုၵ်ႉၸုမ်း ၽူႈယႂ်ႇၵူၼ်းလူင် လႄႈ ၶူးသွၼ်။ –  ၵဝ်ၶႃႈ တေၸုၵ်းမၼ်ႈၼိူဝ်သဵၼ်ႈတၢင်း ပုၼ်ႈၸိူဝ်ႉၸၢတ်ႈ သိုပ်ႇပိုၼ်ၽႄႈတၢင်းႁူႉ ၼမ်ႉၵတ်ႉ တႃႇပူၵ်းပွင် ဝၢၼ်ႈမိူင်းၸိုင်ႈတႆး ႁႂ်ႈၶိုၼ်ႈယႂ်ႇ ၵတ်းယဵၼ်။  – ၵတိသႅတ်ႉၸႃႇ ဢၼ်လႆႈတိူင်ႇၵၢဝ်ႇမႃးၼႆႉ တေဢဝ်တၢင်ႇ ၼိူဝ်ၶီႈမွမ်ႈၸွမ်ႁူဝ် ႁဵတ်းသၢင်ႈၸွမ်း ဢမ်ႇပၼ်ႁႂ်ႈလူႉလႅဝ် ၸူဝ်ႈၵဝ်ၶႃႈ တိုၵ်ႉမီးၼိူဝ်ႉလိူတ်ႈသၢႆၸႂ်ယူႇ” ၼႆယဝ်ႉ။

သိုပ်ႇသေၼၼ်ႉ ၵႅမ်ၽူႈၸတ်းၵၢၼ် ၸုမ်းပွင်ၵၢၼ် ပၢႆးပၺ်ႇၺႃႇ ၶွင်ႇသီႇဢဝ်ၶိုၼ်းၸိုင်ႈတႆး မေႃသွၼ်ၼၢင်းမူၺ်ၶိူဝ်း သပ်းလႅင်းၼႄ လွင်ႈလႆႈၸတ်းႁဵတ်းပဵၼ်မႃး ဝၼ်းမွပ်ႈဢၢပ်ႈ ဝႂ်ၽၢၼ်ႇပူၼ်ႉၸၼ်ႉ “လုၵ်ႈႁဵၼ်းဢၼ်ႁဵၼ်းယဝ်ႉတီႈ ႁူင်းႁဵၼ်းၸၼ်ႉသုင်ၼႆႉ မုၵ်ႉၸုမ်းလႆႈ ပူၵ်းပွင်ပၼ်ၵူႈလွင်ႈ သင်ယဝ်ႉၸၼ်ႉသုင် ၸၼ်ႉ 12 ၼႆႉယဝ်ႉ  မီးၸႂ်ၶႂ်ႈသိုပ်ႇႁဵၼ်းၼွၵ်ႈမိူင်းထႅင်ႈ ဢိၵ်ႇတင်းၼမ်ႉၵတ်ႉၵေႃႈ ထိုင်ယူႇၼႆ ၸုမ်းပွင်ၵၢၼ်ပၢႆးပၺ်ႇၺႃႇ ၶတ်းၸႂ်ႁႃလၢႆးတၢင်း သိုပ်ႇသူင်ႇၶိုၼ်ႈႁဵၼ်းယူႇ လႄႈ ယိမ်းၸူမ်းထိုင် ပီႈၼွင်ႉၶႅၵ်ႇတီႈၸမ်တီႈၵႆ ဢိၵ်ႇတင်း ပေႃႈမႄႈလုၵ်ႈႁဵၼ်း ဢၼ်လႆႈမႃးၶဝ်ႈႁူမ်ႈ ပၢင်ပွႆးယွင်ႈယေႃးလုၵ်ႈႁဵၼ်းၵတ်ႉၶႅၼ်ႇ ဝၼ်းမိူဝ်ႈၼႆႉ တင်းသဵင်ႈၶႃႈ ” ၼႆယဝ်ႉ။

ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး၊ တပ်ႉသိုၵ်းၸိုင်ႈတႆး RCSS/SSA  ၸွမ်သိုၵ်းလူင် ယွတ်ႈသိုၵ်း မွၵ်ႇလၢတ်ႈၶေႃႈၵႂၢမ်း ပၼ်ၵႂၢမ်းႁူႉၵဵဝ်ႇလူၺ်ႈ ၵႃႈၶၼ်ပၢႆးပၺ်ႇၺႃႇ တီႈလုၵ်ႈႁဵၼ်းဝႃႈ “ၵၢၼ်ႁဵၼ်းပဵၼ်ငဝ်ႈၶၢမ်ႇပိုၼ်ႉ တႃႇႁဵတ်းၵၢၼ်ၼႂ်းဝၼ်းမိူဝ်းၼႃႈ မၼ်းလမ်ႇလွင်ႈ မိူၼ်ၾႆး ထွင်ႇပိူင်းပၼ်သဵၼ်ႈတၢင်း ႁႂ်ႈႁဝ်းၵႂႃႇႁွတ်ႈထိုင်လႆႈတီႈယိူင်းမၢႆ ႁဵၼ်းၵႂႃႇယဝ်ႉသေတႃႉ လူဝ်ႇသိုပ်ႇလူ ဢၢၼ်ႇပပ်ႉလိၵ်ႈတၢင်ႇပိူင် ႁႂ်ႈလႆႈမႃးတၢင်းႁူႉ တူင်ႇဝူင်းၼွၵ်ႈႁူင်းႁဵၼ်း  တႃႇႁႂ်ႈလုၵ်ႈႁဵၼ်း မေႃတၢင်းႁူႉ ၼွၵ်ႈႁူင်းႁဵၼ်းၼၼ်ႉ ႁူင်းႁဵၼ်းၸင်ႇထုၵ်ႇလီမီး ႁွင်ႈလူလိၵ်ႈ ၵၢၼ်ႁဵၼ်းသွၼ်ၼႆႉ လမ်ႇလွင်ႈတႃႇ ၵၢၼ်ပူၵ်းပွင်ဝၢၼ်ႈမိူင်းၸိူဝ်ႉၸၢတ်ႈႁဝ်း လုၵ်ႈႁဵၼ်းလႆႈႁပ်ႉဝႂ်ၽၢၼ်ႇပူၼ်ႉၸၼ်ႉ ဝၼ်းမိူဝ်ႈၼႆႉ မၼ်းပဵၼ်ၵုင်ႇမုၼ်တႃႇတူဝ်ၸဝ်ႈၵဝ်ႇတႄႉတႄႉ  ႁဵၼ်းၶႅၼ်ႇၵႃႈႁိုဝ်ၵေႃႈယဝ်ႉ လူဝ်ႇမီးဢၵျၢင်ႉၸႃႇရိၵ်ႉတ တၢင်းယၢမ်ႈလီ ၸင်ႇယူႇၼႂ်းတူင်ႇဝူင်းၵူၼ်းၼမ်လႆႈ” ၼႆယူႇယဝ်ႉ။

ပၢင်ပွႆးယွင်ႈယေႃး လုၵ်ႈႁဵၼ်းၽၢၼ်ႇပူၼ်ႉၸၼ်ႉ ပဵၼ်ဢၼ်ယဝ်ႉတူဝ်ႈလီငၢမ်း ၶၢဝ်းယၢမ်း ၵၢင်ဝၼ်းသေ  ၽူႈယႂ်ႇၵူၼ်းလူင် လႆႈထၢႆႇၶႅပ်းႁၢင်ႈၵိုၵ်းလုၵ်ႈႁဵၼ်း ဢၼ်လႆႈႁပ်ႉဝႂ်ပူၼ်ႉၸၼ်ႉ ၵူႈၸၼ်ႉၸၼ်ႉ တႃႇပဵၼ်တီႈမၢႆတွင်းၵိုၵ်းပိုၼ်းၵႂႃႇ ၼႆယဝ်ႉ။

တႆးလွတ်ႈလႅဝ်း