ၵေႃပွင်ၵၢၼ် ၸွႆႈၸိူဝ်ႉၸၢတ်ႈ ႁူပ်ႉထူပ်းဢုပ်ႇဢူဝ်း လႄႈ ၵမ်ႉၸွႆႈထႅမ် ပၢႆးပၺ်ႇၺႃႇ ၶွင်ႇသီႇဢဝ်ၶိုၼ်းၸိုင်ႈတႆး

ၸုမ်းပွင်ၵၢၼ် ပၢႆးပၺ်ႇၺႃႇ ၶွင်ႇသီႇဢဝ်ၶိုၼ်းၸိုင်ႈတႆး လႄႈ ၵေႃပွင်ၵၢၼ် ၸွႆႈၸိူဝ်ႉၸၢတ်ႈ ႁူပ်ႉထူပ်း ဢုပ်ႇဢူဝ်းၵၼ် ၵဵဝ်ႇလူၺ်ႈ ၶူင်းၵၢၼ်ၵမ်ႉၸွႆႈပၢႆးပၺ်ႇၺႃႇ ယိုၼ်းယၢဝ်း (မိူင်းထႆး)။

မိူဝ်ႈဝၼ်းထီႉ 8 March 2021 (လိူၼ်သၢမ်လွင်ႈ 10 ၶမ်ႈ ပီႊတႆး 2115 ၼီႈ) ယူႇတီႈ ၵေႃပွင်ၵၢၼ် ၸွႆႈၸိူဝ်ႉၸၢတ်ႈ ၵဵင်းမႆႇ လႄႈ မိူင်းၵွၵ်ႇ ၸိုင်ႈထႆး ဢၼ်မီးပီႈၼေႃႇၶမ်း ဢွၼ်ႁူဝ်ၼၼ်ႉသေ လႆႈၶဝ်ႈႁူပ်ႉထူပ်းဢုပ်ႇဢူဝ်း ၸုမ်းပွင်ၵၢၼ်ပၢႆးပၺ်ႇၺႃႇ ၶွင်ႇသီႇဢဝ်ၶိုၼ်းၸိုင်ႈတႆး တီႈၵဵင်းမႆႇ ၵဵဝ်ႇလူၺ်ႈလွင်ႈ ၶူင်းၵၢၼ်ၵမ်ႉၸွႆႈပၢႆးပၺ်ႇၺႃႇ ယိုၼ်းယၢဝ်း (မိူင်းထႆး) ဢိၵ်ႇတင်းထႅင်ႈ လွင်ႈတူင်ႉၼိုင် လုၵ်ႈႁဵၼ်း ၽွင်းၶၢဝ်းမႆႈၼႆႉ ဝႃႈၼႆ။

ၼႂ်းပၢင်ႁူပ်ႉထူပ်းၵၼ် ပွၵ်ႈၵမ်းၼႆႉ ယူႇတီႈ ၵေႃပွင်ၵၢၼ်ၸွႆႈၸိူဝ်ႉၸၢတ်ႈ လႆႈဢဝ်ၶူဝ်းၶွင်ၵိၼ်ယႅမ်ႉ လႄႈ ၶူဝ်းၶွင်ၸႂ်ႉတိုဝ်း ဢၼ်ၸမ်ပဵၼ် တွၼ်ႈတႃႇလုၵ်ႈႁဵၼ်း  ထႅင်ႈတင်းၼမ်တင်းလၢႆသေ ၵမ်ႉၸွႆႈတီႈ ၽူႈမီးပုၼ်ႈၽွၼ်း ၸုမ်းပွင်ၵၢၼ်ပၢႆးပၺ်ႇၺႃႇ ၶွင်ႈသီႇဢဝ်ၶိုၼ်းၸိုင်ႈတႆး ၼႆယဝ်ႉ။

ၶူဝ်းၶွင်ၸႂ်ႉတိုဝ်း တေမီးမိူၼ်ၼင်ႇ ၽႃႈတူမ်းသူပ်း (Mask) 102 ဢႅပ်ႇ၊ သိူဝ်ႈၶူဝ်း 39 ၽိုၼ်၊ ၼမ်ႉသၢႆႇႁူဝ် 734 တဝ်ႈ လႄႈ ၼမ်ႉသၢႆႇႁူဝ်ထူင်လဵၵ်ႉ 15 ၽႅၵ်ႉ၊ ၽွင်ႇတႃႇ (POWDER) 12 တဝ်ႈ၊ ၵွၼ်ႈသီ 1,301 ၵွၼ်ႈ၊ ယႃသီၶဵဝ်ႈ 1,057 ဢၼ်၊ မႆႉသီၶဵဝ်ႈ 852 ဢၼ်၊ သၢႆၾႆးၾႃႉ တၢင်းယၢဝ်း 300 မီႇတိူဝ်ႇ၊ ၽွင်သၵ်ႉၶူဝ်း 161 ၵီႇလူဝ်ႇၵရမ်ႇ လႄႈ ၶူဝ်းမိုဝ်း 2 ထႅင်ႈ 36 ထူင် ၼႆယဝ်ႉ။

ၶူဝ်းၶွင်ၵိၼ်ယႅမ်ႉ တေမီးၶဝ်ႈသၢၼ် 144 ၵီႇလူဝ်ႇ၊ ၼမ်ႉမၼ်းၵိၼ် 6 ပုင်း၊ ၶဝ်ႈသွႆးမမ 18 တိူၵ်ႈ၊ ၼမ်ႉၼူမ်း 1 တိူၵ်ႈ၊ ၽွင်ဝၢၼ် 1 တိူၵ်ႈ၊ ၽွင်ၵႆႇ 1တိူၵ်ႈ၊  ၵိူဝ် 900 ၵီႇလူဝ်ႇ၊ ပႃဢႅပ်ႇ 2 ထူဝ်ၸၢၼ်ႈ၊ တၢင်းၵိၼ်ယွႆႈယႅမ်း 3 တိူၵ်ႈ လႄႈ ယႃႈယႃထႅင်ႈ 3 တိူၵ်ႈ ၼႆယဝ်ႉ။

ယူႇတီႈ ၸၢႆးၼုမ်ႇမိူင်း ၽူႈၸတ်းၵၢၼ် ၶူင်းၵၢၼ်ပၢႆးပၺ်ႇၺႃႇ ယိုၼ်းယၢဝ်း (မိူင်းထႆး) ဢိၵ်ႇတင်းထႅင်ႈ ၽူႈမီးပုၼ်ႈၽွၼ်း ၸုမ်းပွင်ၵၢၼ် ပၢႆးပၺ်ႇၺႃႇ ၶွင်ႇသီႇဢဝ်ၶိုၼ်းၸိုင်ႈတႆးၵေႃႈ ပဵၼ်ဢၼ် ယိၼ်းၸူမ်းၶွပ်ႈၸႂ်ယႂ်ႇၼမ်ထိုင်တီႈ ၵေႃပွင်ၵၢၼ်ၸွႆႈၸိူဝ်ႉၸၢတ်ႈ လႄႈ ပီႈၼွင်ႉႁႅင်းၵၢၼ်ယၢၼ်မိူင်း တင်းသဵင်ႈ ဢၼ်လႆႈႁူမ်ႈႁႅင်းၵၼ် ၵမ်ႉၸွႆႈထႅမ်မႃးၼႆႉသေ ၸင်ႇလႆႈမွပ်ႈဢၢပ်ႈၽိုၼ်ဝႂ်ယွင်ႈယေႃး ပၼ်တီႈၽူႈမီးၼမ်ႉၸႂ်ၶဝ် ႁႂ်ႈပဵၼ်တီႈမၢႆတွင်းၵိုၼ်းပိုၼ်းၵႂႃႇ ၼႆယဝ်ႉ။

ၶူင်းၵၢၼ် ၵမ်ႉၸွႆႈပၢႆးပၺ်ႇၺႃႇ ယိုၼ်းယဝ်းၼႆႉ ၵေႃႇတင်ႈၶိုၼ်ႈမႃး မိူဝ်ႈဝၼ်းထီႉ 07 July 2017 ၶေႃႈယိူင်းဢၢၼ်း ဢၼ်လႆႈတင်ႈၶိုၼ်ႈ ၶူင်းၵၢၼ် 30 ဝၢတ်ႇ ၵမ်ႉၸွႆႈပၢႆးပၺ်ႇၺႃႇ SEA ၼႆႉ မီးဝႆႉယူႇ 4 ၶေႃႈ (1) တႃႇႁႂ်ႈလုၵ်ႈဢွၼ်ႇမိူင်းတႆး ၶဝ်ႈထိုင်လႆႈငဝ်ႈၶၢမ်ႇပိုၼ်ႉ ပၢႆးပၺ်ႇၺႃႇ ၊ (2) တႃႇပူၵ်းပွင် ပိူင်ပၢႆးပၺ်ႇၺႃႇ လႄႈ လၵ်ႇသုတ်ႇၵၢၼ်ႁဵၼ်းသွၼ်၊ (3) တႃႇၸွႆႈထႅမ် ၶိူင်ႈၵမ်ႉၵႅမ်ၵၢၼ်ႁဵၼ်းသွၼ်၊ ၽူႈႁၢပ်ႇၵၢၼ် လႄႈ ၶူးသွၼ်၊ (4) တႃႇၵမ်ႉၸွႆႈ လွင်ႈၵိၼ်ယႅမ်ႉ လႄႈ ၶူဝ်းၶွင် လုၵ်ႈဢွၼ်ႇႁူင်းသဝ်း ၸိူဝ်းၼႆႉသေ မိူဝ်ႈလဵဝ် မီးၸုမ်းလုၵ်ႈႁဵၼ်း သင်ႇၶတႆးမိူင်းၵွၵ်ႇ၊ ၸုမ်းလႅင်းသၼ်လွႆ၊ ၸုမ်းႁူမ်ႈႁႅင်းၸႂ်တႆး၊ ၸုမ်းၸၢဝ်းၶိူဝ်းတႆး၊ ႁိူၼ်းႁူမ်ႈႁၵ်ႉ ၸိူဝ်းၼႆႉ ၶဝ်ႈႁူမ်ႈႁဵတ်းသၢင်ႈၸွႆႈထႅမ်ဝႆႉ ၼႆယဝ်ႉ။

တႆးလွတ်ႈလႅဝ်း