ၶႄႇ ၽိုၵ်းသိုၵ်းႁိမ်းၵုၼ်ထႆႇဝၼ်ႇ လႄႈ ဢမေႇရိၵၢၼ်ႇ ဢဝ်ႁိူဝ်းတိုၵ်းမုင်ႈၼႃႈၸူး ပၢင်ႇလၢႆႇၶႄႇ

ငဝ်းလၢႆး ၼႂ်းၼႃႈၼမ်ႉပၢင်ႇလၢႆၶႄႇပွတ်းၸၢၼ်း မိူၼ်ႁၢင်ႈတေၶိုၼ်းသုၵ်ႉသၵ်ႉ မႃးထႅင်ႈၵမ်းၼိုင်ႈ ဝၢႆးသေၶႄႇ ၶဝ်ႈၽိုၵ်းသိုၵ်းႁိမ်းၵုၼ်ထႆႇဝၼ်ႇ လႄႈ ဢမေႇရိၵၢၼ်ႇၵေႃႈ ဢဝ်ႁိူဝ်းတိုၵ်းၵႂႃႇတူင်ႉၼိုင် ပဵၼ်ပွၵ်ႈၵမ်းသွင် ၼႂ်းပီႊၼႆႉ။

မိူဝ်ႈဝႃး ဝၼ်းထီႉ 6 April 2021 (လိူၼ်သီႇလွင်ႈ 10 ၶမ်ႈ ပီႊတႆး 2115 ၼီႈ) သိုဝ်ႇၶၢဝ်ႇ CNA  ဢွၵ်ႇၼႄဝႆႉဝႃႈ တပ်ႉသိုၵ်းၶႄႇ လႆႈဢဝ်ႁိူဝ်းလူင် လဵဝ်ၼိင် (Liaoning) ဢၼ်ပဵၼ်ႁိူဝ်းတၢင်ႇႁိူဝ်းမိၼ် လမ်းဢွၼ်တၢင်းသုတ်း ၶွင်တပ်ႉသိုၵ်းၶႄႇ လႄႈ ႁိူဝ်းတိုၵ်းထႅင်ႈ 5 လမ်း ၵႂႃႇၽိုၵ်းၽွၼ်ႉၵၢၼ်သိုၵ်း တီႈၼႂ်းၼႃႈၼမ်ႉပၢင်ႇလၢႆႇ ဢိူမ်ႈၸမ်ႁိမ်းၵုၼ်ထႆႇဝၼ်ႇ လူၺ်ႈဢၢင်ႈဝႃႈ ထႆႇဝၼ်ႇတိုၼ်းပဵၼ် လႅၼ်လိၼ်ပွတ်းဢွၼ်ႇတွၼ်ႈၼိုင်ႈ ၶွင်ၸိုင်ႈမိူင်းၶႄႇၵူၺ်းၼႆသေ ႁဵတ်းႁႂ်ႈၾႆး ၼႂ်းၵႄႈၵၢင် ထႆႇဝၼ်ႇ လႄႈ ၶႄႇ လုၵ်ႉႁႅင်းမႃးလိူဝ်သေၵဝ်ႇ ဝႃႈၼႆ။

တပ်ႉၼမ်ႉသိုၵ်းၶႄႇ သပ်းၸႅင်ႈၶၢဝ်ႇဝႃႈ လွင်ႈဢၼ်လႆႈဢဝ် ႁိူဝ်းတေႃႉတၢင်ႇႁိူဝ်းမိၼ် လဵဝ်ၼိင် (Liaoning) ၽိုၵ်းၽွၼ်ႉၵၢၼ်သိုၵ်း တီႈၼႂ်းၼႃႈၼမ်ႉပၢင်ႇလၢႆႇထႆႇဝၼ်ႇၼႆႉ ပဵၼ်ပိူင်ၵၢၼ်ၽိုၵ်း မိူၼ်မိူဝ်ႈၵူႈပွၵ်ႈၵူၺ်း ယိူင်းဢၢၼ်းတႃႇႁႄႉၵင်ႈၵႅတ်ႇၶႄလႆႈ လွင်ႈႁူမ်ႇလူမ်ႈၸိုင်ႈမိူင်း ၼင်ႇႁိုဝ် ပေႃးတေၶႅမ်ႉလႅပ်ႈလီလိူဝ်သေၵဝ်ႇ ၼႂ်းၶၢဝ်းတၢင်းၼႃႈၵေႃႈ တေၸၢင်ႈႁဵတ်းပၢင်ၽိုၵ်းၽွၼ်ႉသိုၵ်းၼႆႉထႅင်ႈယူႇ ဝႃႈၼႆ။

ယူႇတီႈ ႁွင်ႈၵၢၼ်ၽၢႆႇၵႅတ်ႇၶႄ မိူင်းထႆႇဝၼ်ႇ လၢတ်ႈဝႃႈ မိူၼ်တင်းၶႄႇ ၵုမ်းၵမ်ၼိူဝ်ၼႃႈၾႃႉ (ၵၢင်ႁၢဝ်) လႄႈ ၼႂ်းၼႃႈၼမ်ႉပၢင်ႇလၢႆႇ ႁွပ်ႈၵုၼ်ထႆႇဝၼ်ႇဝႆႉသေ လွင်ႈၼႆႉ တိုၼ်းတေလႆႈႁႃလၢႆးတၢင်း ၸတ်းၵၢၼ်ၵႂႃႇ ၼင်ႇဢၼ်ၵိုင်ႇငၢမ်ႇယူႇ ၼႆယဝ်ႉ။

ၼႂ်းဝၼ်းလဵဝ်ၵၼ်ၼႆႉၵူၺ်း ဢမေႇရိၵၢၼ်ႇၵေႃႈ လႆႈဢဝ်ႁိူဝ်းတေႃႉတၢင်ႇ ႁိူဝ်းမိၼ်တိုၵ်း ထီႇဢူဝ်ႇတေႃႇ ရုတ်ႉသ်ဝဵတ်ႉတ် (Theodore Roosevelt) မုင်ႈၼႃႈၸူး ၼႂ်းၼႃႈၼမ်ႉပၢင်ႇလၢႆႇၶႄႇ ပွတ်းၸၢၼ်း ပဵၼ်ပွၵ်ႈၵမ်း 2 ဝႃႈၼႆ။

သိုဝ်ႇၶၢဝ်ႇ Reuters ဢွၵ်ႇၼႄဝႆႉဝႃႈ တပ်ႉၼမ်ႉမၢႆထီႉ (7) ၶွင်တပ်ႉသိုၵ်းဢမေႇရိၵၢၼ်ႇ လႆႈသူင်ႇႁိူဝ်းတေႃႉတၢင်ႇ ႁိူဝ်းမိၼ်တိုၵ်း မုင်ႈၼႃႈၸူးပၢင်ႇလၢႆႇၶႄႇပွတ်းၸၢၼ်း ပဵၼ်ပွၵ်ႈၵမ်း 2 ၼႂ်းပီႊ 2021 ၼႆႉ လၢတ်ႈဝႃႈ ပုၼ်ႈတႃႇၶဝ်ႈၵႂႃႇႁဵတ်းၵၢၼ်မိူၼ်ၵဝ်ႇ ဝႃႈၼႆ။

တပ်ႉၼမ်ႉမၢႆထီႉ (7) ၼႆႉ တေမီးၽုင်ႁိူဝ်းဝႆႉ လၢႆလၢႆလမ်း ဢၼ်ႁွင်ႉဝႃႈ ‘Theodore Roosevelt Carrier Strike Group’ လႆႈထုၵ်ႇသူင်ႇၶဝ်ႈမႃး ၼႂ်းပၢင်ႇလၢႆႇၶႄႇ ၸူဝ်ႈၽွင်းဢၼ် ၶႄႇ လႄႈ မိူင်းႁိမ်းႁွမ်း မီးႁွႆးတႅၵ်ႇၸတ်ႉၵၼ်ၼႆႉ ဝႃႈၼႆ။

လၢႆၽၢႆႇလၢမ်းၶၢတ်ႈဝႆႉဝႃႈ လွင်ႈဢမေႇရိၵၢၼ်ႇ သူင်ႇၽုင်ႁိူဝ်း Theodore Roosevelt Carrier Strike Group’ မုင်ႈၼႃႈၸူး ၼႃႈၼမ်ႉပၢင်ႇလၢႆႇၶႄႇ ပွတ်းၸၢၼ်းပွၵ်ႈၵမ်းၼႆႉၵေႃႈ တေၵဵဝ်ႇၶွင်ႈၸွမ်း လွင်ႈဢၼ် တပ်ႉသိုၵ်းၶႄႇ ဢဝ်းႁိူဝ်းတိုၵ်း ၶဝ်ႈၽိုၵ်းၽွၼ်ႉၵၢၼ်သိုၵ်း ႁိမ်းၸမ်ၵုၼ်ထႆႇဝၼ်ႇ ၼၼ်ႉယူႇၼႆလႄႈ ပဵၼ်တီႈလုမ်ႈၾႃႉ သူၼ်ၸႂ်ပၵ်းတႃပႂ်ႉတူၺ်းၸွမ်းဝႆႉယူႇ ၼႆယဝ်ႉ။

တႆးလွတ်ႈလႅဝ်း