မိူဝ်ႈၼႆႉ ဝၼ်းထီႉ 7 April 2021 (လိူၼ်သီႇလွင်ႈ 11 ၶမ်ႈ ပီႊတႆး 2115 ၼီႈ) ၸုမ်းၽူႈတၢင်ၼႃႈ CRPH တေႁူပ်ႉထူပ်းဢုပ်ႇဢူဝ်းၸွမ်း ၸုမ်းၽူႈၸွပ်ႇ တႃႇၶူၼ်ႉႁႃၶေႃႈမုၼ်းမၢၼ်ႇမႅၼ်ႈ တီႈမိူင်းႁူမ်ႈတုမ် IIMM ၸၢတ်ႈၸိုင်ႈလုမ်ႈၾႃႉ ၼႆယဝ်ႉ။

တွၵ်ႇတိူဝ်ႇသႃႇသႃႇ ၽွင်းတၢင်မိူင်းႁူမ်ႈတုမ်ၼႂ်းၸၢတ်ႈၸိုင်ႈလုမ်ႈၾႃႉ ဢၼ်ၸုမ်းတူဝ်တႅၼ်း သၽႃးမိူင်းႁူမ်ႈတုမ် CRPH ပိုၼ်ၽၢဝ်ႇဝႆႉဝႃႈ ၸုမ်းၽူႈတၢင်ၼႃႈ CRPH လႄႈ ၸုမ်းၽူႈၸွပ်ႇ IIMM တေဢုပ်ႇဢူဝ်းၵၼ်လွင်ႈတပ်ႉသိုၵ်းမၢၼ်ႈ ၵေႃႇၵၢၼ်ႁၢႆႉၶႃႈႁႅမ်တၢႆၵူၼ်းမိူင်း ၼႂ်းမိူင်းႁူမ်ႈတုမ် ဝၢႆးသိုၵ်းမၢၼ်ႈ ယိုတ်းဢၢမ်းၼၢတ်ႈ တႄႇၸဵမ်မိူဝ်ႈဝၼ်းထီႉ 1 February 2021 ပူၼ်ႉမႃးၼႆယဝ်ႉ။

ၼင်ႇႁိုဝ်ပေႃးတေဢဝ်တၢင်းၽိတ်းတပ်ႉသိုၵ်းမၢၼ်ႈလႆႈၼၼ်ႉ ၸုမ်း CRPH လႄႈ ၸုမ်းၽူႈၸွပ်ႇ IIMM တေႁူမ်ႈမိုဝ်းႁဵတ်းသၢင်ႈၵၼ်ၵႂႃႇလႆႈၸိူင်ႉႁိုဝ်ဢၼ်ဝႃႈၼၼ်ႉ တေဢုပ်ႇဢူဝ်းၵၼ်ဝႃႈၼႆ။

ထႅင်ႈၽၢႆႇၼိုင်ႈၵေႃႈ CRPH လႆႈႁပ်ႉဝႆႉ သၢၵ်ႈသေႇလၵ်းထၢၼ် 180,000  ဢၼ် ၵဵဝ်ႇလွင်ႈသိုၵ်းမၢၼ်ႈ ၵေႃႇၵၢၼ်ႁၢႆႉသေ သၢၵ်ႈသေႇၸိူဝ်းၼႆႉ ၼႄလႆႈၸႅင်ႈလႅင်းဝႃႈ သိုၵ်းမၢၼ်ႈပူၼ်ႉပႅၼ်သုၼ်ႇလႆႈ သုၼ်ႇပဵၼ်ၵူၼ်း ႁၢဝ်ႈႁႅင်းၼႆယဝ်ႉ။

ၼႂ်းသၢၵ်ႈသေႇလၵ်းထၢၼ်ဢၼ် CRPH မီးဝႆႉၼၼ်ႉ

• လွင်ႈၶွင်ႇသီႇသိုၵ်းမၢၼ်ႈလူလၢႆၶႃႈႁႅမ်တၢႆၵူၼ်းမိူင်း (540) ပၢႆ
• ၵူၼ်းမိူင်းလႆႈလူႉသဵင်ႈတၢႆ ၽွင်းသိုၵ်းမၢၼ်ႈလႄႈပလိၵ်ႈမၢၼ်ႈတီႉၺွပ်းၸႅတ်ႈထၢမ် (10) ပၢႆ
• လွင်ႈသိုၵ်းမၢၼ်ႈ ပေႃႇထုပ်ႉၵူၼ်းမိူင်း
• သိုၵ်းမၢၼ်ႈဢဝ်ဢဵၼ်ႁႅင်း ပိုတ်းယိုဝ်းယႃႉၽျၢၵ်ႈၵူၼ်းမိူင်းၼႄၵၢင်ၸႂ်လူၺ်ႈလၢႆးၵတ်းယဵၼ် ထိုင်တီႈလူႉသဵင်ႈတၢႆ လႄႈ ဢမ်ႇပၼ်ၵူၼ်းမိူင်းၸူႉတုမ်ၼႄၵၢင်ၸႂ်လူၺ်ႈလၢႆးၵတ်းယဵၼ်
• တီႉၺွပ်းၵူၼ်းမိူင်းၼင်ႇဢမ်ႇမီးပၵ်းမီးပိူင်
• ၶွင်ႇသီႇသိုၵ်းမၢၼ်ႈ လမ်းတီႉၺွပ်း ၽူႈသိုဝ်ႇၶၢဝ်ႇ၊ ၽူႈၵုမ်းထတ်းလိၵ်ႈလႄႈ ပိၵ်ႉဢိုတ်းၶဝ်ႈယႃႉ လုမ်းသိုဝ်ႇၶၢဝ်ႇ
• လွင်ႈပိၵ်ႉဢိုတ်းလႅင်းဢိၼ်ႇတိူဝ်ႇၼႅတ်ႇ လႄႈ ပူၼ်ႉပႅၼ်သုၼ်ႇလႆႈလၢတ်ႈၸႃၵူၼ်းမိူင်း ၸႃႉၵႂႃႇၸိူဝ်းၼႆႉဝႃႈၼႆ။

ၸုမ်းၽူႈၸွပ်ႇ IIMM ၼႆႉ မုၵ်ႉၸုမ်းၸၢတ်ႈၸိုင်ႈလုမ်ႈၾႃႉ UN ၶွတ်ႇၽွတ်ႈၶိုၼ်ႈမႃးၼႂ်းပီႊ 2018  တႃႇၸွပ်ႇၶူၼ်ႉႁႃၵဵပ်းၶေႃႈမုၼ်း တီႈမိူင်းရၶႅင်ႇ ႁူမ်ႈတင်း ၶူၼ်ႉႁႃၶေႃႈမုၼ်း လွင်ႈပူၼ်ႉပႅၼ် သုၼ်ႇလႆႈသုၼ်ႇပဵၼ်ၵူၼ်း ႁူဝ်ၼႃႈၸုမ်းပဵၼ် ၽူႈတၢင်ၼႃႈၵတ်ႉၶႅၼ်ႇ မိူင်းဢမေႇရိၵၢၼ်ႇ ၼီႇၵူဝ်ႇလတ်ႉသ် ၵုမ်ႇၵျီႇဢႅၼ်ႇ (Nicholas Koumjian)၊ ၸုမ်းဢၼ်ၼႆႉ မီးပုၼ်ႈၽွၼ်း တႃႇတေၸွႆႈထႅမ်ၶူၼ်ႉႁႃသၢၵ်ႈသေႇ ၼႂ်းမိူင်း၊ၼွၵ်ႈမိူင်း ၼင်ႇႁိုဝ်ပေႃးတေဢဝ်တၢင်းၽိတ်း တႅပ်းတတ်းတြႃးလႆႈ ၽူႈမီးတၢင်းၽိတ်းၸၼ်ႉသုင် တီႈလုမ်းတႅပ်းတတ်းတြႃး ၼႂ်းမိူင်းၼွၵ်ႈမိူင်း ၼႆယဝ်ႉ။

မိူဝ်ႈပူၼ်ႉမႃးၼႆႉ CRPH ယၢမ်ႈပိုၼ်ၽၢဝ်ႇလၢတ်ႈဝႆႉဝႃႈ တေဢၢၼ်းဢဝ်တၢင်းၽိတ်း တပ်ႉသိုၵ်းမၢၼ်ႈ ထိုင်တီႈလုမ်းတႅပ်းတတ်းတြႃးၵူႈမိူင်းမိူင်း ICC ၼႆယဝ်ႉ။

ပႅၵ်ႉသမ်ႉဝႃႈ မိူင်းႁူမ်ႈတုမ် ဢမ်ႇၸႂ်ႈၽူႈၶဝ်ႈၸုမ်း ICC ၼႆသေတႃႉၵေႃႈ ၼင်ႇႁိုဝ်ပေႃးတေၵူတ်ႇထတ်း ဢဝ်တၢင်းၽိတ်းလႆႈၸွမ်းၼင်ႇမၢႆမီႈၵူႈမိူင်းမိူင်းမီးၼၼ်ႉ CRPH တိုၵ်ႉၶတ်းၸႂ်ဝႆႉယူႇဝႃႈၼႆ။

ထႅင်ႈလွင်ႈၼိုင်ႈၵေႃႈ တႄႇၸဵမ်မိူဝ်ႈၼႂ်းၵၢင်လိူၼ် November 2019 ပူၼ်ႉမႃး ၵဵဝ်ႇလူၺ်ႈလွင်ႈ ၽဵဝ်ႈမူၺ်ႉၶိူဝ်းၵူၼ်း ရူဝ်ႇႁိၼ်ႇၵျႃႇသေ လုမ်းတြႃး ICC ပၼ်ၶႂၢင်ႉ ႁႂ်ႈၸုမ်းၽူႈတၢင်ၼႃႈ လူင်းပိုၼ်ႉတီႈတွင်ႈထၢမ်ၵူတ်ႇထတ်း ၼႂ်းမိူင်းႁူမ်ႈတုမ်လႄႈ မိူင်းပင်းၵလႃးတဵတ်ႉသ်ဝႆႉယဝ်ႉမိူၼ်ၵၼ် ဝႃႈၼႆ။

တႆးလွတ်ႈလႅဝ်း