ပီႈၼွင်ႉတႆး ဢၼ်ႁဵတ်းၵၢၼ်မီးဝႆႉတီႈ ဝဵင်းၵဵင်းမႆႇ ၸိုင်ႈထႆးၼၼ်ႉ တေပိုတ်ႇပၢင်သွၼ်လိၵ်ႈတႆး ၼႆလႄႈ သင်ဝႃႈၼုမ်ႇႁၢႆးၸၢႆးယိင်းႁဝ်းၶဝ် သူၼ်ၸႂ်ၶႂ်ႈႁဵၼ်းၼႆၸိုင် ၵႂႃႇသႂ်ႇလူင်းၸိုဝ်ႈ တႃႇၶဝ်ႈႁဵၼ်း လႆႈယူႇၼႆယဝ်ႉ။

ပၢင်သွၼ်လိၵ်ႈတႆး ဢွင်ႈတီႈဝတ်ႉပႃႇပဝ်ႈၼႆႉ တႄႇပိုတ်ႇႁပ်ႉလုၵ်ႈႁဵၼ်း ၸဵမ်မိူဝ်ႈဝၼ်းထီႉ 7  March 2021 သေ တေသိုပ်ႇႁပ်ႉလုၵ်ႈႁဵၼ်း တေႃႇထိုင်ဝၢႆးလိူၼ်ႁႃႈ သၢင်းၵျၢၼ်ႇယဝ်ႉ ဝႃႈၼႆ၊ ပၢင်သွၼ်ၼႆႉ တေႁပ်ႉလုၵ်ႈႁဵၼ်းဢၼ်မီးဢႃႇယု 13 ပီႊၶိုၼ်ႈၼိူဝ် လႄႈ ႁပ်ႉသွၼ်ပၼ် ၵူႈၸၢဝ်းၶိူဝ်းယူႇ ဝႃႈၼႆ။

မေႃသွၼ်ၵေႃႉၼိုင်ႈလၢတ်ႈၼႄဝႃႈ − ႁဝ်းၶႃႈႁပ်ႉလုၵ်ႈႁဵၼ်းမႂ်ႇ လႄႈ လုၵ်ႈႁဵၼ်းၵဝ်ႇ ယူႇၶႃႈ၊ မိူဝ်ႈတႄႇမၼ်းႁဝ်းၶႃႈ ႁပ်ႉလုၵ်ႈႁဵၼ်းတေႃႇထိုင် ဝၼ်းထီႉ 28 March 2021 ၶႃႈဢေႃႈ ၵမ်းၼႆႉ ႁဝ်းၶႃႈၶိုၼ်းမႄးလႅၵ်ႈလၢႆႈ တေႁပ်ႉတေႃႇထိုင် ဝၢႆးသွၼ်းၼမ်ႉဢဝ်ၶႃႈ၊ ႁဝ်းၶႃႈတေမီးဝႂ်ထၢမ်တွပ်ႇ မၼ်းသေၶႃႈဢေႃႈ၊ ပေႃးမႃးတွပ်ႇယဝ်ႉ ႁဝ်းၶႃႈၸင်ႇတေတႅပ်းတတ်းပၼ်လႆႈၶႃႈ ထုၵ်ႇလီယူႇ ၸၼ်ႉလႂ်၊ ၶၢဝ်းယၢမ်းႁဵၼ်းတႄႉ တေပဵၼ်ဝၼ်းဢႃးတိတ်ႉၵူႈဝၼ်း တႄႇယၢမ်းႁူဝ်ၶမ်ႈ 18:00 မူင်းထိုင် 20:00 မူင်း၊ သင်ဝႃႈတႄႇပိုတ်ႇႁဵၼ်းလိၵ်ႈၵႂႃႇယဝ်ႉၼႆ ႁဝ်းၶႃႈတေပွင်ႇလႅင်းပၼ် လုၵ်ႈႁဵၼ်းႁဝ်းၵူႈၵေႃႉယူႇဢေႃႈ− လၢတ်ႈၼႄၼင်ႇၼႆ။

ၼင်ႇႁိုဝ်လိၵ်ႈလၢႆးတႆးႁဝ်း ပေႃးတေဢမ်ႇႁၢႆၵႂႃႇၼၼ်ႉ ႁဝ်းယူႇတီႈလႂ်မိူင်းလႂ်ၵေႃႈ ထုၵ်ႇလီႁဵၼ်းႁူႉ ၶိုၼ်းလိၵ်ႈလၢႆး ၸဝ်ႈၵဝ်ႇယူႇလႄႈ သိုပ်ႇပိုၼ်ၽႄႈလိၵ်ႈလၢႆးၸဝ်ႈၵဝ်ႇယူႇယဝ်ႉ။

သင်ဝႃႈမီးလွင်ႈဢမ်ႇပွင်ႇၸႂ် လႄႈ ၶႂ်ထၢမ်သေလွင်ႈလွင်ႈၼႆၸိုင် ၵပ်းသိုပ်ႇလႆႈတီႈ မၢႆၽူင်း ၸၢႆးၸွမ်လႅင်း 061,969,3599 ၊ ယိင်းၼွင်ႉၼၢင်း 062,921,8971 ၊ ယိင်းၸိင်ႇဢူႉ 065,757,3958 ၊ ယိင်းသႅင်လၢဝ် 099,381,0565 လႄႈ တၢင်း Facebook Page – Wat Pa Pao Tai Literature Class2 လႆႈယူႇ ဝႃႈၼႆ။

တႆးလွတ်ႈလႅဝ်း
Photo – “Wat Pha Pao Tai Literature Class2” / ပၢင်သွၼ်လိၵ်ႈတႆးမိူဝ်ႈပူၼ်ႉမႃး