သိုၵ်းမၢၼ်ႈ လႄႈ KNU/KNLA ပဵၼ်ပၢင်တိုၵ်းၵၼ် ၼႂ်းမိူင်းမွၼ်း

သိုၵ်းမၢၼ်ႈ ယိုတ်းဢၢမ်းၼၢတ်ႈၸိုင်ႈမိူင်း လႄႈ တပ်ႉသိုၵ်းပူတ်းပွႆႇၸိူဝ်ႉၸၢတ်ႈယၢင်း KNU/KNLA ပဵၼ်ပၢင်တိုၵ်း တီႈႁိမ်းဝၢၼ်ႈမၢၼ်ႇဢွင်ႇ ၸႄႈဝဵင်းယေး ၸႄႈတွၼ်ႈတူးပလႃႇယႃႇ ၼႂ်းမိူင်းမွၼ်း။

မိူဝ်ႈဝႃးဝၼ်းထီႉ 6 April 2021 (လိူၼ်သီႇလွင်ႈ 10 ၶမ်ႈ ပီႊတႆး 2115 ၼီႈ) ယၢမ်းၵၢင်ၶမ်ႈမွၵ်ႈ 18:40 မူင်းထိုင်မွၵ်ႈ 19:30 မူင်း သိုၵ်းမၢၼ်ႈ လႄႈ တပ်ႉၵွင် 16 ၽၢႆႇတႂ်ႈၵုမ်းၵမ်တပ်ႉၸုမ်း 6 KNU/KNLA ပဵၼ်ပၢင်တိုၵ်းၵၼ်သေ ၼႂ်းပၢင်တိုၵ်းၼၼ်ႉ မီးၵူၼ်းမိူင်းၼႂ်းပိုၼ်ႉတီႈၵေႃႉၼိုင်ႈ လႆႈတိူဝ်ႉၸပ်း မၢၵ်ႇၵွင်ႈတီႈၶႃလူင်။

ၼႂ်းၸႄႈဝဵင်းယေး မိူင်းမွၼ်းၼၼ်ႉ KNU/KNLA တူင်ႉၼိုင်ႁွတ်ႈထိုင်ဝႆႉသေ ပဵၼ်ဝႆႉၼႃႈလိၼ် ၵုမ်းၵမ်ၶွင် တပ်ႉၸုမ်း 6 KNU/KNLA ၼႆယဝ်ႉ။

ဝၢႆးသေ KNU/KNLA ၶဝ်ႈႁုပ်ႈသိမ်းတပ်ႉမၢၼ်ႈ ၼႂ်းဝၼ်းထီႉ 27 March 2021 ယဝ်ႉသေ ၼႂ်းဝၼ်းၼၼ်ႉၵူၺ်းၼင်ႇၵဝ်ႇ KNU/KNLA ထုၵ်ႇသိုၵ်းမၢၼ်ႈဢဝ်ၶိူင်ႈမိၼ် ၵႂႃႇတိုၵ်းတေႃႇထိုင် ၼႂ်းဝၼ်းထီႉ 28 March 2021 လႄႈ မီးၵူၼ်းမိူင်းယၢင်း ၼပ်ႉႁူဝ်ႁဵင်လႆႈပၢႆႈၽေး ယူႇၸွမ်းလႅၼ်လိၼ် မိူင်းထႆး  ၼႆယဝ်ႉ။

တႆးလွတ်ႈလႅဝ်း
ၶေႃႈမုၼ်းတီႈ − Irrawaddy, KIC