သင်ႇၶၸဝ်ႈ ၼႂ်းတူင်ႇဝဵင်းလၢႆးၶႃႈ ၸႄႈတွၼ်ႈလွႆလႅမ် ဢွၼ်ႁူဝ်ၼမ်းၼႃႈသေ ပိုတ်ႇၽုၺ်ႇပၢင်သွၼ်ၾိင်ႈငႄႈပုတ်ႉထ လႄႈ လိၵ်ႈလၢႆးတႆး ပွၵ်ႈၵမ်း 25 ဢွင်ႈတီႈၸွမ်း ဝၢၼ်ႈ/ပွၵ်ႉ ၼႂ်းဝဵင်းလၢႆးၶႃႈသေ တေၸတ်းႁဵတ်းပၢင်တွပ်ႇလိၵ်ႈမိူဝ်ႈလဵဝ်ၵၼ်တင်းဝဵင်း ဝႃႈၼႆ။

ပၢင်သွၼ်ၾိင်ႈငႄႈပုတ်ႉထ လႄႈ လိၵ်ႈလၢႆးတႆး ပွၵ်ႈၵမ်း 25 ၼႆႉ လႆႈၸတ်းပိုတ်ႇၽုၺ်ႇၵႂႃႇ မိူဝ်ႈဝၼ်းထီႉ 17 March 2021 (လိူၼ်သီႇမႂ်ႇ 5 ၶမ်ႈ ပီႊတႆး 2115 ၼီႈ/ဝၼ်းပုတ်ႉ) သေ ဢၼ်လႆႈပိုတ်ႇၽုၺ်ႇပၢင်သွၼ်တင်းမူတ်းမီး 100 ဢွင်ႈတီႈ လႄႈ မီးလုၵ်ႈႁဵၼ်း ၸၢႆး/ယိင်း ႁူမ်ႈ 4,923 ၵေႃႉ၊ ၶူးသွၼ်/မေႃသွၼ် (ႁူမ်ႈပႃးသင်ႇၶၸဝ်ႈ) မီး 278 ၵေႃႉ ပူင်သွၼ်ပၼ်လုၵ်ႈႁဵၼ်းၵႂႃႇ ၼႆယဝ်ႉ။

ၶူးသွၼ်ၵေႃႉၼိုင်ႈလၢတ်ႈၼႄဝႃႈ − ပၢင်သွၼ်ၼႆႉ မီးၸၼ်ႉငဝ်ႈထိုင်ၸၼ်ႉၸဵတ်းၶႃႈဢေႃႈ ပေႃးထိုင်မႃးဝၼ်းထီႉ 18 May 2021 (လိူၼ်ႁူၵ်းမႂ်ႇ 8 ၶမ်ႈ ပီႊတႆး 2115 ၼီႈ/ဝၼ်းဢင်းၵၢၼ်း) ၼႆ ႁဝ်းၶႃႈတေၸတ်းႁဵတ်းပၢင်တွပ်ႇလိၵ်ႈမိူဝ်ႈလဵဝ်ၵၼ် တင်း 100 ဢွင်ႈတီႈၶႃႈ၊ ယိူင်းဢၢၼ်း ဢၼ်လႆႈၸတ်းႁဵတ်းပၢင်သွၼ်ၼႆႉ ၼင်ႇႁိုဝ်လုၵ်ႈလၢၼ်ၼေႃႇတႅၼ်းၶိူဝ်း ပေႃးတေႁူႉ ၾိင်ႈငႄႈၾိင်ႈထုင်းတႆး လိၵ်ႈတႆး ပိုၼ်းတႆး လႄႈ ၼင်ႇႁိုဝ်ပေႃးတေပဵၼ်ၽူႈဢွၼ်ႁူဝ် ၵူၼ်းမိူင်းတႆး မိူဝ်းၼႃႈၼၼ်ႉ လႆႈပူင်သွၼ်ပၼ်ၶႃႈဢေႃႈ၊ ထႅင်ႈလွင်ႈၼိုင်ႈၵေႃႈ ယိၼ်းၸူမ်းၶွပ်ႈၸႂ်ယႂ်ႇၼမ်ထိုင် ၸဝ်ႈတႃႇၼၵူႈတီႈတီႈ ၸိူဝ်းၸွႆႈထႅမ်ပၼ်လၢႆလၢႆလွင်ႈ ၼႂ်းပၢင်သွၼ် တေႃႇပေႃးယဝ်ႉတူဝ်ႈယူႇၶႃႈ − လၢတ်ႈၼင်ႇၼႆ။

ပၢင်သွၼ်ၾိင်ႈငႄႈပုတ်ႉထ လႄႈ လိၵ်ႈလၢႆးတႆး ၵူႈပီႊပီႊၼၼ်ႉ ၸဝ်ႈၶူးလူင် တွၵ်ႇတႃႇၶမ်းမၢႆထမ်ႇမသႃႇမိ ဢွၼ်ႁူဝ်ၸုမ်းမင်ႇၵလႃႇၼႂ်းမိူင်းၼွၵ်ႈမိူင်းသေ ၸွႆႈထႅမ်မႃးၵူႈပီႊ ဝႃႈၼႆ။

မိူဝ်ႈၼႂ်းပီႊ 2020 ၼၼ်ႉ သင်ႇၶၸဝ်ႈတူင်ႇဝဵင်းလၢႆးၶႃႈ ဢွၼ်ႁူဝ်ပိုတ်ႇၽုၺ်ႇ ပၢင်သွၼ်ၾိင်ႈငႄႈပုတ်ႉထ လႄႈ လိၵ်ႈလၢႆးတႆး ပဵၼ်ပွၵ်ႈၵမ်း 25 သေတႃႉ ယွၼ်ႉၸိူဝ်ႉမႅင်း တၢင်းပဵၼ် COVID-19 ၽႄႈလၢမ်းၼႂ်းမိူင်းႁူမ်ႈတုမ်ႁႅင်းဝႆႉလႄႈ လႆႈပိၵ်ႉဢိုတ်းႁူင်းႁဵၼ်းပႅတ်ႈ ၼႆယဝ်ႉ။

ပၢင်သွၼ်ၾိင်ႈငႄႈပုတ်ႉထ လႄႈ လိၵ်ႈလၢႆးတႆး ၵူႈပီႊပူၼ်ႉမႃးၼၼ်ႉ မီးလုၵ်ႈႁဵၼ်း 6,000 ၵေႃႉ ထိုင် 7,000 ၵေႃႉသေ ပီႊ 2021 ၼႆႉသမ်ႉ ယွၼ်ႉငဝ်းလၢႆးၵၢၼ်မိူင်း မိူင်းႁူမ်ႈတုမ်ၵေႃႈပိူင်ၼိုင်ႈ ယွၼ်ႉငဝ်းလၢႆးၸိူဝ်ႉမႅင်းတၢင်းပဵၼ် COVID-19 ၵေႃႈပိူင်ၼိုင်ႈသေ မီးၼုမ်ႇႁၢႆးၸၢႆးယိင်း ၵႂႃႇၶိုၼ်ႈႁဵၼ်းႁူႉပၺ်ႇၺႃႇ ၸမ် 5,000 ၵေႃႉၵူၺ်းၼႆယဝ်ႉ။

တႆးလွတ်ႈလႅဝ်း