ဢိတ်ႇသရေး – ပႃႇလႅတ်ႉသ်တၢႆး သိုပ်ႇပိုတ်းယိုဝ်းၵၼ်ႁၢဝ်ႈႁႅင်း ၵူၼ်းတၢႆတိူဝ်းၼမ်ထိုင် 72 ၵေႃႉ

ယွၼ်ႉႁူဝ်ၼႃႈ ၸုမ်းယိပ်းၵွင်ႈၵၢင်ႇ ႁႃးမၢတ်ႉသ် (Hamas) လႆႈတူၵ်းသုမ်းၵႂႃႇ ၼႂ်းပၢင်တိုၵ်း လၢႆၵေႃႉယဝ်ႉသေ မိူဝ်ႈၶမ်ႈဝႃးဝၼ်းပုတ်ႉၼႆႉ ၸုမ်းႁႃးမၢတ်ႉသ် လႆႈသိုပ်ႇပိုတ်းယိုဝ်းမၢၵ်ႇလူင် တုမ်ႉတွပ်ႇဢိတ်ႇသရေးၶိုၼ်း။

မိူဝ်ႈၼႆႉ ဝၼ်းထီႉ 13 May 2021 (လိူၼ်ႁူၵ်းမႂ်ႇ 3 ၶမ်ႈ ပီႊတႆး 2115 ၼီႈ) သိုဝ်ႇၶၢဝ်ႇ BBC ဢွၵ်ႇၼႄဝႆႉဝႃႈ ၸုမ်းယိပ်းၵွင်ႈၵၢင်ႇ ႁႃးမၢတ်ႉသ် (Hamas) ပႃႇလႅတ်ႉသ်တၢႆး သိုပ်ႇပိုတ်းယိုဝ်း မၢၵ်ႇလူင်သႂ်ႇ ၼႂ်းမိူင်းဢိတ်ႇသရေး ၼပ်ႉႁူဝ်သိပ်းလုၵ်ႈ ပဵၼ်လွင်ႈတုမ်ႉတွပ်ႇၶိုၼ်း ဢၼ်ဢိတ်ႇသရေး ဢဝ်ႁိူဝ်းမိၼ်ပွႆႇမၢၵ်ႇလူင်သႂ်ႇ ႁိူၼ်းတိူၵ်ႈ 13 ၸၼ်ႉ ထိုင်တီႈလႆႈ လူမ်ႉၵူၼ်ႇပင်း ၼႂ်းပိုၼ်ႉတီႈ ၵႃႇၸႃႉ (Gaza) မီးႁူဝ်ၼႃႈၸုမ်း ႁႃးမၢတ်ႉသ် လႆႈတူၵ်းသုမ်းၵႂႃႇ လၢႆလၢႆၵေႃႉ ၼႆယဝ်ႉ။

ပၼ်ႁႃၼႂ်းၵႄႈၵၢင် ဢိတ်ႇသရေး – ပႃႇလႅတ်ႉသ်တၢႆးၼႆႉ သိုပ်ႇလုၵ်ႉပဵၼ်ၾႆး ႁွၼ်ႉမႆႈမႃးၶိုၼ်း မိူဝ်ႈၼႂ်းဝၼ်းၸၼ် (ဝၼ်းထီႉ 10 May 2021) ပူၼ်ႉမႃး၊ ဝၢႆးသေ ၵူၼ်းၶိူဝ်းပႃႇလႅတ်ႉသ်တၢႆး လႄႈ ၸဝ်ႈၼႃႈတီႈဢိတ်ႇသရေး မီးလွင်ႈတုမ်ႉတိူဝ်ႉၵၼ် ၼႂ်းဝဵင်းလူင်ၵျေႇရူႇသလႅမ်ႇ (Jerusalem) ႁဵတ်းႁႂ်ႈ ၸုမ်းႁႃးမၢတ်ႉသ် (ပႃႇလႅတ်ႉသ်တၢႆး) ဢမ်ႇႁၢၼ်ႉၸႂ်သေ တႄႇပိုတ်းယိုတ်းမၢၵ်ႇလူင်သႂ်ႇ ၸဝ်ႈၼႃႈတီႈၵူၼ်းၶိူဝ်းၵျူး (ဢိတ်ႇသရေး) ၼႆယဝ်ႉ။

ၸိူင်ႉႁိုဝ်ၵေႃႈလီ ပၢင်တိုၵ်းၼႂ်းၶၢဝ်းတၢင်း 2-3 ဝၼ်းမႃးၼႆႉ ၵူၼ်းမိူင်းၼႂ်းပိုၼ်ႉတီႈ ၵႃႇၸႃႉ (Gaza) ပႃႇလႅတ်ႉသ်တၢႆး လႆႈလူႉသဵင်ႈတၢႆ တီႈဢေႇသုတ်း 65 ၵေႃႉ ၼႂ်းၼၼ်ႉပႃးလုၵ်ႈဢွၼ်ႇ 14 ၵေႃႉ မီးၵူၼ်းမၢတ်ႇၸဵပ်းတီႈဢေႇသုတ်း 374 ၵေႃႉ လႄႈ ၽၢႆႇဢိတ်ႇသရေး မီးၵူၼ်းလူႉသဵင်ႈတၢႆ 7 ၵေႃႉ ၼႂ်းၼၼ်ႉမီးပႃးလုၵ်ႈဢွၼ်ႇ ဢႃႇယု 6 ၶူပ်ႇ 1 ၵေႃႉ ၼႆယဝ်ႉ။

ဢွၼ်ၼႃႈၼႆႉ Benny Gantz ၽွင်းလူင်ၽၢႆႇၵႅတ်ႇၶႄ မိူင်းဢိတ်ႇသရေး ယၢမ်ႈလၢတ်ႈဝႆႉဝႃႈ ၼႆႉပဵၼ်ဢၼ်တႄႇ ႁူဝ်ႁႅၵ်ႈမၼ်းၵူၺ်း ယင်းတိုၵ်ႉမီးပဝ်ႉမၢႆထႅင်ႈတင်းၼမ် ၸႅၼ်ႇထႅဝ်ပႂ်ႉဝႆႉယူႇ တပ်ႉသိုၵ်းဢိတ်ႇသရေး တေႁၢင်ႈႁႅၼ်း ထႅမ်ႁႅင်းသိုၵ်းမွၵ်ႈ 5,000 ၶဝ်ႈၵႂႃႇတူင်ႉၼိုင် ႁိမ်းလႅၼ်လိၼ် ပိုၼ်ႉတီႈၵႃႇၸႃႉ (Gaza) ထႅင်ႈယူႇ ဝႃႈၼႆ။

ယွၼ်ႉလွင်ႈပၼ်ႁႃ ၼႂ်းၵႄႈၵၢင် ၵူၼ်းၶိူဝ်းၵျူး (ဢိတ်ႇသရေး) လႄႈ ၵူၼ်းၶိူဝ်းဢႃႇရၢပ်ႇ (ပႃႇလႅတ်ႉသ်တၢႆး) ယူႇႁူမ်ႈႁွမ်းၸွမ်းၵၼ် ၼႂ်းဝဵင်းလဵဝ်ၵၼ်ၼမ်ၼႆႉသေ သမ်ႉတိုၵ်ႉသိုပ်ႇမီး လွင်ႈတုမ်ႉတိူဝ်ႉၵၼ်ယူႇၼႆႉသေ ယူႇတီႈ ၸွမ်ၽွင်းလူင် မိူင်းဢိတ်ႇသရေး ပႅၼ်းၵျမိၼ်း ၼႄႇတၢၼ်ႇယႁူႇ (Benjamin Netanyahu) လႆႈပိုၼ်ၽၢဝ်ႇ ၸႂ်ႉတိုဝ်းပိူင်ဢုပ်ႉပိူင်ႇ ငဝ်းလၢႆးၶိုၵ်ႉၶၵ်ႉ တႃႇႁႂ်ႈပေႃးတေၸၢင်ႈၵုမ်းထိင်းဝၢၼ်ႈမိူင်း ၼိမ်သဝ်းလႆႈၶိုၼ်းၼၼ်ႉ ၼႆယဝ်ႉ။

ယၢမ်းလဵဝ် လႆႈမီးၵူၼ်းၶိူဝ်းၽႂ်မၼ်း လၢႆလၢႆၸႄႈဝဵင်း ဢမ်ႇႁၢၼ်ႉၸႂ်တေႃႇၵၼ်သေ ဢွၵ်ႇမႃးၸုတ်ႇၾႆးၽဝ် လူတ်ႉၵႃးၸွမ်းသဵၼ်ႈတႃႈသၢႆတၢင်း ပေႃႉထုပ်ႉၶူဝ်းၶွင် ႁဵတ်းႁႂ်ႈမီးလွင်ႈလူႉသုမ်း တင်းၼမ်တင်းလၢႆ မီးၵူၼ်းထုၵ်ႇတီႉၺွပ်းၵႂႃႇ တင်းၼမ်ယဝ်ႉ ဝႃႈၼႆ။

တႆးလွတ်ႈလႅဝ်း