သိုၵ်းမၢၼ်ႈတေဢဝ်ႁူမ်ႇလူမ်ႈၸွမ်းႁူင်းႁဵၼ်းသေ ပိုတ်ႇၽုၺ်ႇႁူင်းႁဵၼ်းႁႂ်ႈလႆႈ

ၼင်ႇႁိုဝ်ပေႃးတေပိုတ်ႇၽုၺ်ႇႁူင်းႁဵၼ်းသွၼ်လိၵ်ႈၵူႈၸၼ်ႉၸၼ်ႉလႆႈ ၼႂ်းဝၼ်းထီႉ 1 June 2021 ၼႂ်းၵႄႈၵၢင် ပၢင်တိုၵ်း လွင်ႈသုၵ်ႉယုင်ႈဢူၼ်ၵဝ်းလူင်ၼႆႉ ၶွင်ႇသီႇသိုၵ်းမၢၼ်ႈဝႃႈ တေဢဝ်ႁူမ်ႇလူမ်ႈၸွမ်းႁူင်းႁဵၼ်းသေ ပိုတ်ႇၽုၺ်ႇၵႂႃႇၼႆယဝ်ႉ။

မိူဝ်ႈဝၼ်းထီႉ 15 May 2021 (လိူၼ်ႁူၵ်းမႂ်ႇ 5 ၶမ်ႈ ပီႊတႆး 2115 ၼီႈ) ၸေႃႇမိၼ်းထုၼ်း ၽူႈၶၢၼ်ပၢၵ်ႇ တပ်ႉသိုၵ်းမၢၼ်ႈ လၢတ်ႈတီႈၼႂ်းပၢင်သပ်းၸႅင်ႇၶၢဝ်ႇ ၶွင်ႇသီႇသိုၵ်းမၢၼ်ႈ ဢၼ်ၸတ်းႁဵတ်းတီႈၼေႇပျီႇတေႃႇၼင်ႇၼႆ။

ၶွင်ႇသီႇသိုၵ်းမၢၼ်ႈ ၵၢဝ်ႇၼႄးဝႃႈ လွင်ႈဢၼ်မၢၵ်ႇတႅၵ်ႇ၊ ၸုတ်ႇၾႆးၽဝ် လႄႈ လွင်ႈသုၵ်ႉယုင်ႈၵူႈလွင်ႈလွင်ႈ ၼႂ်းမိူင်းႁူမ်ႈတုမ်ၵူႈတီႈတီႈၼႆႉ ပဵၼ်ယွၼ်ႉပိူဝ်ႈ ၸုမ်းလူင်ပွင်ၸိုင်ႈ NUG လႄႈ ၸုမ်းၵႅတ်ႇၶႄၵူၼ်းမိူင်း PDF ဝႃႈၼႆ။

သင်ဝႃႈၶိုၼ်းပိုတ်ႇၽုၺ်ႇႁူင်းႁဵၼ်းၼႆၸိုင် မိူဝ်ႈဢွၼ်တၢင်းၼႆႉ ၽၢႆႇသိုၵ်းမၢၼ်ႈယၢမ်ႈ လၢတ်ႈဝႃႈ ၼိုင်ႈပီႊၼႆႉ တေလႆႈႁဵၼ်းသွၼ်လိၵ်ႈ တႃႇသွင်ၸၼ်ႉၽွမ်ႉၽွမ်ႉၵၼ် ၼႆယူႇ။

ၽၢႆႇပေႃႈမႄႈလုၵ်ႈႁဵၼ်းၵမ်ႈၽွင်ႈၵေႃႈလၢတ်ႈဝႃႈ တိုၼ်းတေဢမ်ႇႁႂ်ႈလုၵ်ႈဢွၼ်ႇၵႂႃႇ ၶိုၼ်ႈႁဵၼ်းပၢႆးပၺ်ႇၺႃႇသိုၵ်းမၢၼ်ႈလႃးလႃး ၼႆယဝ်ႉ။

တႃႇၵႂႃႇဢၢပ်ႈၵျွင်းၼၼ်ႉ သိုၵ်းမၢၼ်ႈမၵ်းမၼ်ႈဝႆႉ ၼႂ်းၵႄႈ ဝၼ်းထီႉ 24−31 May 2021 ၼႆယဝ်ႉ။

မိူဝ်ႈဝၼ်းထီႉ 5 May 2021 သိုၵ်းမၢၼ်ႈပိုတ်ႇၽုၺ်ႇၸၼ်ႉၸွမ်ၵႂႃႇသေတႃႉၵေႃႈ ၵူၼ်းၶိုၼ်ႈႁွတ်ႈ မီးဢိတ်းဢွၼ်ႇၵူၺ်း ဝႃႈၼႆ။

ထႅင်ႈၽၢႆႇၼိုင်ႈၵေႃႈ ၶွင်ႇသီႇသိုၵ်းမၢၼ်ႈ ပိုၼ်ၽၢဝ်ႇဢဝ်တၢင်းၽိတ်း လူၺ်ႈမၢႆမီႈ 505 (က) လႄႈ ၸီႉသင်ႇ ႁႂ်ႈၶူးသွၼ် ၽၢႆႇပၢႆးပၺ်ႇၺႃႇလူင်ပွင်ၸိုင်ႈ ၸၼ်ႉငဝ်ႈထိုင်ၸၼ်ႉၸွမ် တေႃႇထိုင် ပႃႇမွၵ်ႉၶဝႆႉလႄႈ မိူဝ်ႈလဵဝ်ၼႆႉ ဢဵၼ်ႁႅင်းၶူးသွၼ် တႃႇၶွင်ႇသီႇသိုၵ်းမၢၼ်ႈၵေႃႈ ယူပ်ႈယွမ်းလူင်းႁႅင်း ၼႆယဝ်ႉ။

တႆးလွတ်ႈလႅဝ်း