သိုၵ်းမၢၼ်ႈ ဢဝ်မၢၵ်ႇလူင်ပိုတ်းယိုဝ်းသႂ်ႇ မိူင်းထႆး၊ သိုၵ်းထႆးလႆႈတိူဝ်း လွင်ႈႁူမ်ႇလူမ်ႈဝႆႉၸွမ်းလႅၼ်လိၼ်ႁႅင်း

ဢမ်ႇမီးပၢင်တိုၵ်းသင်သေ သိုၵ်းမၢၼ်ႈယူႇၽၢႆႇမိူင်းႁူမ်ႈတုမ် ဢဝ်မၢၵ်ႇလူင် ပိုတ်းယိုဝ်းသႂ်ႇ ဝၢၼ်ႈၵူၼ်းဝၢၼ်ႈၼိုင်ႈ ၽင်ႇမိူင်းထႆး ၸွမ်းလႅၼ်လိၼ် ၼႂ်းၸႄႈတွၼ်ႈ မႄႈႁွင်ႈသွၼ်ၼႆယဝ်ႉ။

မိူဝ်ႈဝႃးဝၼ်းထီႉ  20 May 2021 (လိူၼ်ႁူၵ်းမႂ်ႇ 10 ၶမ်ႈ ပီႊတႆး 2115 ၼီႈ) သိုဝ်ႇၶၢဝ်ႇထႆး The Nation ဢွၵ်ႇၶၢဝ်ႇဝႆႉဝႃႈ မိူဝ်ႈဝႃးမွၵ်ႈယၢမ်းၵၢင်ဝၼ်းတဵင်ႈၼႆႉ သိုၵ်းမၢၼ်ႈ တပ်ႉၶမယ (341) ဢၼ်ပၵ်းတပ်ႉဝႆႉ ၼႂ်းၸႄႈတွၼ်ႈၽႃပုၼ်ႇ မိူင်းယၢင်းၼၼ်ႉ ဢဝ်မၢၵ်ႇလူင် 60 mm ပိုတ်းယိုဝ်းၵႂႃႇ 3 လုၵ်ႈ ဝၢၼ်ႈထတႃးၾင်ႇ ၸႄႈဝဵင်းမႄႈသရဵင်း ၸႄႈတွၼ်ႈမႄႈႁွင်ႈသွၼ် ဢၼ်မီးၼမ်ႉၶူင်းၶႅၼ်ႈၵၼ်ႈလႅၼ်လိၼ် တင်းမိူင်းယၢင်း ၼႆယဝ်ႉ။

ယွၼ်ႉမၢၵ်ႇလူင်သိုၵ်းမၢၼ်ႈ တူၵ်းတႅၵ်ႇၼႂ်းဝၢၼ်ႈလႄႈ ၵူၼ်းဝၢၼ်ႈထတႃးၾင်ႇ မိူင်းထႆး ဢွၼ်ၵၼ်ၼႅတ်ႈပၢႆႈၽေး ၵႂႃႇယူႇဢွင်ႈတီႈလွတ်ႈၽေးဝႆႉၸူဝ်ႈၶၢဝ်း၊ ယွၼ်ႉလွင်ႈပိုတ်းယိုဝ်းၼႆႉသေ ၶူဝ်းၶွင်လူႉလႅဝ်ၵႂႃႇၵႃႈႁိုဝ်တႄႉ ဢမ်ႇပႆႇလႆႈႁူႉ ႁူဝ်ယွႆႈမၼ်းၼႆယဝ်ႉ။

ယူႇတီႈ တပ်ႉသိုၵ်းထႆးၵေႃႈ လႆႈဢဝ်မၢၵ်ႇမေႃႇတႃႇလူင် K 120 mm သေ ပိုတ်းယိုဝ်း တုမ်ႉတွပ်ႇၶိုၼ်း တပ်ႉသိုၵ်းမၢၼ်ႈ 2 ၵမ်းသေ တိူဝ်းဢဵၼ်ႁႅင်း ဢဝ်ႁူမ်ႇလူမ်ႈဝႆႉၸွမ်းလႅၼ်လိၼ်တင်းၼမ် ၼႆယဝ်ႉ။

ၸဵမ်မိူဝ်ႈယၢမ်းၵၢင်ၼႂ်ၸဝ်ႉၼၼ်ႉ သိုၵ်းမၢၼ်ႈမီးလွင်ႈဢဝ်မၢၵ်ႇလူင်ပိုတ်းယိုဝ်းသႂ်ႇ ပိုၼ်ႉတီႈတႃးၶႂၢင် ၼႃႈတီႈၵုမ်းၵမ် တပ်ႉသိုၵ်းယၢင်း KNU/KNLA သေ သိုၵ်းထႆး လၢမ်းၶၢတ်ႈဝႃႈ သိုၵ်းမၢၼ်ႈဢဝ်မၢၵ်ႇလူင်ပိုတ်းယိုဝ်းသႂ်ႇတီႈၽင်ႇမိူင်းထႆးၼၼ်ႉ ပဵၼ်ပုၼ်ႈတႃႇ လွၵ်ႇငိူတ်ႈယႃႇႁႂ်ႈသိုၵ်းယၢင်း ၶၢမ်ႈၼမ်ႉၶူင်း ပၢႆႈၶဝ်ႈၵႂႃႇၸူး ၽင်ႇမိူင်းထႆး ၼႆယဝ်ႉ။

ၸွမ်းၼင်ႇလႅင်ႇၶၢဝ်ႇပိုၼ်ႉတီႈ တပ်ႉသိုၵ်းယၢင်း KNU/KNLA လၢတ်ႈတီႈသိုဝ်ႇၶၢဝ်ႇၼၼ်ႉ သိုၵ်းမၢၼ်ႈဢၼ်မီးယူႇၼႂ်းပိုၼ်ႉတီႈလႅၼ်လိၼ် ယၢင်း−ထႆး ၼႂ်းၸႄႈတွၼ်ႈၽႃပုၼ်ႇ ၸိူဝ်းၼၼ်ႉ ၶၢတ်ႇၶိူင်ႈယိပ်းၵွင်ႈၵၢင်ႇ၊ မၢၵ်ႇမိုဝ်ႉၸိုၼ်းယၢမ်းတင်းၼမ်သေ ပႂ်ႉႁိူဝ်းမိၼ်သိုၵ်းမၢၼ်ႈ တႃႇမႃးသူင်ႇမၢၵ်ႇမိုဝ်ႉၸိုၼ်းယၢမ်းဝႆႉယူႇ ၼႆယဝ်ႉ။

တႆးလွတ်ႈလႅဝ်း