ဢမေႇရိၵၢၼ်ႇ တိုၵ်ႉမုင်ႈမွင်း ဢႃႇသီႇယၼ်ႇ ႁႂ်ႈၵႄႈလိတ်ႈပၢၼ်ႁႃၵၢၼ်မိူင်း ၼႂ်းမိူင်းႁူမ်ႈတုမ် ၼင်ႇဝႆးၽႂ်း

ပၢင်ၵုမ်ၶိုၵ်ႉၶၵ်ႉ ၽူႈၼမ်းဢႃႇသီႇယၼ်ႇ 10 မိူင်းယဝ်ႉတူဝ်ႈၵႂႃႇ ၶၢဝ်းတၢင်းလိူၼ်ပၢႆယဝ်ႉသေတႃႉ ယွၼ်ႉပႆႇၽေႃႇၼမ်ႉၼႄတူဝ်သင်လႆႈလႄႈ ဢမေႇရိၵၢၼ်ႇ မုင်ႈမွင်းဢႃႇသီႇယၼ်ႇ ၶဝ်ႈၵႄႈလိတ်ႈပၼ်ႁႃ။

မိူဝ်ႈဝႃး ဝၼ်းထီႉ 2 June 2021 (လိူၼ်ႁူၵ်းလွင်ႈ 8 ၶမ်ႈ ပီႊတႆး 2115 ၼီႈ) သိုဝ်ႇၶၢဝ်ႇ VOA ဢွၵ်ႇၼႄဝႆႉဝႃႈ ၵႅမ်ၽွင်းလူင်ၽၢႆႇၼွၵ်ႈမိူင်း မိူင်းဢမေႇရိၵၢၼ်ႇ ဝဵၼ်ႇတီႇ ဢႃႇရ် ၶျုးရ်မႅၼ်း (Wendy R. Sherman) လႆႈဢွၵ်ႇၶၢဝ်းတၢင်းၵႂႃႇ ဢွင်ႈတီႈႁဵတ်းၵၢၼ်လုမ်းလူင် ဢႃႇသီႇယၼ်ႇ ၼႂ်းမိူင်းဢိၼ်ႇတူဝ်ႇၼီးသျုး လႄႈ သိုပ်ႇဢွၵ်ႇၶၢဝ်းၵႂႃႇတီႈမိူင်း ၵမ်ႇပေႃးတီးယႃး ဢိၵ်ႇတင်း မိူင်းထႆး လူၺ်ႈမီးယိူင်းဢၢၼ်းလူင် ပုၼ်ႈတႃႇ ဢုပ်ႇဢူဝ်းငူပ်ႉငီႉ ၵႄႈလိတ်ႈပၼ်ႁႃၵၢၼ်မိူင်း ၼႂ်းမိူင်းႁူမ်ႈတုမ် ၼင်ႇႁိုဝ် ၵူၼ်းမိူင်းပေႃးတေဢမ်ႇလႆႈထုၵ်ႇ ပူၼ်ႉပႅၼ်သုၼ်ႇလႆႈသုၼ်ႇပဵၼ် ႁၢႆႉႁႅင်းလိူဝ်သေၼႆႉ လႄႈ ႁူမ်ႈၵၼ်ႁႃလၢႆးတၢင်း တႃႇႁႂ်ႈၶွင်ႇသီႇသိုၵ်းမၢၼ်ႈ ပေႃးတေၵိုတ်းယိုတ်း လွင်ႈႁဵတ်းႁၢႆႉၸႃႉတေႃႇၵူၼ်းမိူင်း၊ ၼင်ႇႁိုဝ် ၵူၼ်းတူၵ်းၶွၵ်ႈၵၢၼ်မိူင်း ပေႃးတေလႆႈထုၵ်ႇပွႆႇတူဝ်ဢွၵ်ႇမႃးၶိုၼ်း လႄႈ ႁႂ်ႈမိူင်းႁူမ်ႈတုမ် ၶိုၼ်းဢုပ်ႉပိူင်ႇလူၺ်ႈလၢႆးတီႇမူဝ်ႇၶရေႇသီႇ ၼင်ႇတဵမ်တဵမ်ထူၼ်ႈထူၼ်ႈၼၼ်ႉ ဝႃႈၼႆ။

ၵၢၼ်ဢွၵ်ႇၶၢဝ်းတၢင်း သူႇၸႂ်းဢႃႇသီႇယၼ်ႇၶွင် ဝဵၼ်ႇတီႇ ဢႃႇရ် ၶျုးရ်မႅၼ်း (Wendy R. Sherman) ၼပ်ႉလႆႈဝႃႈ ပဵၼ်ပွၵ်ႈဢွၼ်တၢင်းသုတ်း ဝၢႆးသေမၼ်းၼၢင်း လႆႈႁပ်ႉတၼ်းႁဵင်းပဵၼ် ၵႅမ်ၽွင်းလူင် ၽၢႆႇၼွၵ်ႈမိူင်း မိူင်းဢမေႇရိၵၢၼ်ႇ လႄႈ ပဵၼ်ၼႂ်းၽွင်းယၢမ်းလဵဝ်ၵၼ်တင်း ဢႃႇသီႇယၼ်ႇ 9 မိူင်း ယိုၼ်ႈလိၵ်ႈသၢၼ်ၶတ်း လွင်ႈဢၼ်ၸၢတ်ႈၸိုင်ႈလုမ်ႈၾႃႉ (UN) ဢၢၼ်းဢွၵ်ႇမၢႆႇမီႈ ႁၢမ်ႈၶၢႆၶိူင်ႈယိပ်း ၵွင်ႈၵၢင်ႇပၼ် တပ်ႉသိုၵ်းမၢၼ်ႈၼၼ်ႉ ဝႃႈၼႆ။

ဝဵၼ်ႇတီႇ ဢႃႇရ် ၶျုးရ်မႅၼ်း လၢတ်ႈတီႈသိုဝ်ႇၶၢဝ်ႇဝႃႈ “ငဝ်းလၢႆးဢၼ်ၵူၼ်းမိူင်းႁူမ်ႈတုမ် လႆႈထူပ်းယူႇ ယၢမ်းလဵဝ်ၼႆႉ ႁဝ်းၵူႈၵေႃႉဢမ်ႇယိူၼ်ႉၵၼ်ႈ သိုပ်ႇပႂ်ႉတူၺ်းၵႂႃႇလႆႈထႅင်ႈယဝ်ႉ ႁဝ်းယုမ်ႇယမ်ဝႃႈ ၸၢတ်ႈၸိုင်ႈလုမ်ႈၾႃႉ (UN) တေဢွၵ်ႇမၢႆမီႈသေၸိူဝ်ႉသေပိူင် တွၼ်ႈတႃႇမိူင်းႁူမ်ႈတုမ်းယူႇ လႄႈ ယၢမ်းလဵဝ် ၵူႈမိူင်းမိူင်းၵေႃႈ ဢွၼ်ၵၼ်ပၼ်ႁႅင်းဢီး ဢႃႇသီႇယၼ်ႇဝႆႉ တႃႇႁႂ်ႈပေႃးၸၢင်ႈငူပ်ႉငီႉလႆႈ ၶွင်ႇသီႇသိုၵ်းမၢၼ်ႈသေ ပႂ်ႉထွမ်ႇၶေႃႈတႅၵ်ႇလႅင်း လွင်ႈမိူင်းႁူမ်ႈတုမ် တေလႆႈဢုပ်ႉပိူင်ႇၶိုၼ်း လၢႆးတီႇမူဝ်ႇၶေရႇသီႇယူႇ” ဝႃႈၼႆ။

ၼႂ်းပၢင်ႁူပ်ႉထူပ်း ၽူႈၼမ်းဢႃႇသီႇယၼ်ႇ ပွၵ်ႈၵမ်းၼႆႉ ဝဵၼ်ႇတီႇ ဢႃႇရ် ၶျုးရ်မႅၼ်း ယင်းလႆႈတူၵ်ႇလၢတ်ႈပႃး လွင်ႈဢၼ်ၽူႈသိုဝ်ႇၶၢဝ်ႇ ဢမေႇရိၵၢၼ်ႇ လႆႈထုၵ်ႇၶွင်ႇသီႇသိုၵ်းမၢၼ်ႈ တီႉၺွပ်းၵုမ်းၶင်တူဝ် 2 ၵေႃႉ တႅၼ်ႇၼီႇ ၾႅၼ်ႇသ်တႃႇ (Danny Fenster) ၽူႈၵုမ်းထတ်းလိၵ်ႈသိုဝ်ႇၶၢဝ်ႇ Frontier Myanmar လႄႈ Nathan Maung မုင်ႈမွင်းဝႃႈ ဢႃႇသီႇယၼ်ႇ တေပၼ်တၢင်းၸွႆႈထႅမ် ႁႂ်ႈၶဝ်တင်း 2 ၵေႃႉ လွတ်ႈဢွၵ်ႇပူၼ်ႉ လွင်ႈတီႉၺွပ်း ၶွင်ၶွင်ႇသီႇသိုၵ်းမၢၼ်ႈ ပွၵ်ႈၵမ်းၼႆႉယူႇ ဝႃႈၼႆ။

တႆးလွတ်ႈလႅဝ်း