လွင်ႈၵိုတ်းယိုဝ်းတီႈဝဵင်းမိၼ်းတတ်ႉ ၶၢဝ်းတၢင်း 14 ဝၼ်း ဢမ်ႇမီးၽွၼ်းလီတႃႇၵူၼ်းပၢႆႈၽေး

မိူဝ်ႈဝၼ်းထီႉ 22 June 2021 သိုဝ်ႇၶၢဝ်ႇၼႂ်းမိူင်းႁူမ်ႈတုမ် လႆႈၵပ်းသိုပ်ႇတွင်ႈထၢမ်ၼႂ်းပိုၼ်ႉတီႈသေ လၢႆးငၢၼ်းလၢတ်ႈဝႆႉဝႃႈ လွင်ႈတပ်ႉၵႅတ်ႇၶႄၵူၼ်းမိူင်းၶျၢင်း (CDF) ဝူၼ်ႉတႃႇႁႂ်ႈၵူၼ်းပၢႆႈၽေးပၢင်တိုၵ်း ပေႃးတေၸၢင်ႈပွၵ်ႈမိူဝ်းၸႂ်းတူၺ်းၶိုၼ်းႁိူၼ်းၽႂ်မၼ်းၼႆသေ လႆႈတူၵ်းလူင်းၵိုတ်းတိုၵ်းၸွမ်း ၶွင်ႇသီႇသိုၵ်းမၢၼ်ႈ ၶၢဝ်းတၢင်း 14 ဝၼ်း တီႈၼႂ်းဝဵင်းမိၼ်းတတ်ႉ ၸႄႈမိူင်းၶျၢင်း ၼၼ်ႉ တေႃႇထိုင်ဝၼ်းမိူဝ်ႈၼႆႉ ဢမ်ႇပႆႇႁၼ်မီးၽွၼ်းလီသင် တႃႇၵူၼ်းပၢႆႈၽေး ဝႃႈၼႆ။

သလၢႆးတူႇမီး ၽူႈယၢမ်ႈၶဝ်ႈပႃးၸွမ်း ၼႂ်းတပ်ႉၵႅတ်ႇၶႄႇၶျၢင်းလၢတ်ႈဝႃႈ ၸူဝ်ႈၽွင်းၵိုတ်းယိုဝ်းၼႆႉ ၵူၼ်းမိူင်းပၢႆႈၽေး မီးသုၼ်ႇလႆႈၶဝ်ႈမိူဝ်းၼႂ်းဝဵင်းသေတႃႉၵေႃႈ ယင်းတိုၵ်ႉလူဝ်ႇသုၼ်ႇတႃႇတေလႆႈ တေႃႉဢဝ်ၶဝ်ႈၼမ်ႉတၢင်းၵိၼ် ၼမ်ႉမၼ်းထၢတ်ႈသီႇ လႄႈ ယႃႈယႃတႃႇၵူၼ်းယူႇဢမ်ႇလီၸိူဝ်းၼႆႉ ၼင်ႇလွတ်ႈလႅဝ်းထႅင်ႈယူႇဝႃႈၼႆ။

ပႅၵ်ႉသမ်ႉ ၽၢႆႇၶွင်ႇသီႇသိုၵ်းမၢၼ်ႈလၢတ်ႈဝႃႈ ၵူၼ်းမိူင်းၼႂ်းပိုၼ်ႉတီႈ မီးသုၼ်ႇၶဝ်ႈမိူဝ်းယူႇၶိုၼ်း တီႈႁိူၼ်းယေးၽႂ်မၼ်းလႆႈယဝ်ႉၼႆသေတႃႉၵေႃႈ ၼႂ်းၵႃႈၵူၼ်းပၢႆႈၽေးတင်းၼမ်ၼၼ်ႉ ဢၼ်ပွၵ်ႈၶဝ်ႈဝဵင်းမိူဝ်းၶိုၼ်းၼႆႉ တေမီးယူႇမွၵ်ႈ ႁူဝ်ပၢၵ်ႇသၢမ်သိပ်း (30%) သေ ၼႂ်းၼၼ်ႉ ၵမ်ႈၽွင်ႈယင်းပွၵ်ႈဢဝ် ၶဝ်ႈၼမ်ႉတၢင်းၵိၼ်တီႈႁိူၼ်းယဝ်ႉၵေႃႈ ပွၵ်ႈၵႂႃႇယူႇၶိုၼ်း တီႈဢွင်ႈၵူၼ်းပၢႆႈၽေးၼၼ်ႉ ယူႇဝႃႈၼႆ။

သလၢႆးတူႇမီး လၢတ်ႈဝႃႈ ၶဝ်ႈသၢၼ်ၼႆႉ ဢမ်ႇလႆႈတေႃႉဢဝ်ၼင်ႇလွတ်ႈလွတ်ႈလႅဝ်းလႅဝ်း၊ ပေႃးဢဝ်လူတ်ႉၶိူင်ႈတေႃႉၼႆၸိုင်ႈ တေႃႉတၢင်ႇလႆႈ ၼိုင်ႈထူင်ၵူၺ်း၊ သင်တၢင်ႇသွင်ထူင်ၼႆ သိုၵ်းမၢၼ်ႈႁႂ်ႈဢဝ်ဢွၵ်ႇတမ်းဝႆႉၼိုင်ႈထူင်ယဝ်ႉ တေဢမ်ႇလႆႈတၢင်ႇသွင်ထူင်။ ၼမ်ႉမၼ်းထၢတ်ႈသီႇ တႃႇသႂ်ႇလူတ်ႉၵေႃႈ တေႃႉဢဝ်သွင်သၢမ်ပုင်းဢမ်ႇလႆႈ၊ တေလႆႈဢဝ်ၼိုင်ႈပုင်းၵူၺ်းသေ ၼိုင်ႈပုင်းၵေႃႈတေဢမ်ႇလႆႈၼမ်လိူဝ် ႁႃႈၵႃႇလၢၼ်ႇၵူၺ်းလႄႈ ၼမ်ႉမၼ်းထၢတ်ႈသီႇ တႃႇၵႂႃႇမႃးၵူၺ်းၵေႃႈ ဢမ်ႇၵုမ်ႇထူၼ်ႈလႆႈ ယဝ်ႉဝႃႈၼႆ။

သလၢႆးတူႇမီး သိုပ်ႇလၢတ်ႈပႃးဝႃႈ “လွင်ႈၼႆႉ ပေႃးယူႇတီႈတူဝ်ၵဝ်ၶႃႈသေလၢတ်ႈတႄႉ ဢမ်ႇမီးလွင်ႈ ယုမ်ႇယမ်ၵၼ်ၼၼ်ႉယဝ်ႉ ၶေႃႈလႆႈၸႂ်မိူၼ်ၼင်ႇပွၵ်ႈၼႆႉ မိူဝ်ႈဢွၼ်တင်းၵေႃႈယၢမ်ႈမီးမႃး ၵူၺ်းၼႃႈ ယွၼ်ႉဢမ်ႇႁဵတ်းၸွမ်းၼင်ႇၶေႃႈလႆႈၸႂ်ၵၼ်ၼၼ်ႉလႄႈ ၵမ်းလိုၼ်းၵေႃႈ ပဵၼ်ပၢင်တိုၵ်းၵၼ်ၶိုၼ်းယူႇ ပွၵ်ႈၼႆႉၵေႃႈ သင်မီးလွင်ႈဢမ်ႇႁဵတ်းၸွမ်းၼင်ႇ ၶေႃႈလႆႈၸႂ်ၵၼ်ၼၼ်ႉၼႆၵေႃႈ ပၢင်တိုၵ်းတေၸၢင်ႈပဵၼ်မႃးၶိုၼ်း” ဝႃႈၼႆ။

မိူဝ်ႈပူၼ်ႉမႃးၼႆႉ ၵူၼ်းၼုမ်ႇဝဵင်းမိၼ်းတတ်ႉ 7 ၵေႃႉ ဢၼ်ၼႄၵၢင်ၸႂ် ဢမ်ႇလူဝ်ႇသိုၵ်းမၢၼ်ႈဢုပ်ႉမိူင်း လႆႈထုၵ်ႇတီႉၺွပ်း၊ ၼႂ်းဝၼ်းထီႉ 27 April 2021 ၼႆႉ ၵူၼ်းမိူင်းလႆႈၵႂႃႇတုၵ်းယွၼ်းထိုင် တီႈႁူင်းပလိၵ်ႈ မိၼ်းတတ်ႉသေ ဢုပ်ႇဢူဝ်းႁႃလၢႆးၵႄႈလိတ်ႈၵၼ်တင်းပလိၵ်ႈဢမ်ႇလႆႈလႄႈ ဝၼ်းၼၼ်ႉယၢမ်းၵၢင်ၶမ်ႈၵေႃႈ လႆႈတႄႇပဵၼ်ပၢင်တိုၵ်းၵမ်းလဵဝ်သေ ဝၢႆးၼၼ်ႉ ၶိုၼ်းလႆႈပိုၼ်ၽၢဝ်ႇၵိုတ်းယိုဝ်းၵၼ် မႃးယူႇၵမ်းၼိုင်ႈ မိူၼ်ၵၼ်ဝႃႈၼႆ။

ၽွင်းၵိုတ်းယိုဝ်းၵၼ်ၼၼ်ႉ ၽၢႆႇၶွင်ႇသီႇသိုၵ်းမၢၼ်ႈ ယၢမ်ႈမီးသုၼ်ႇလႆႈႁေႃႈလူတ်ႉၵႃး ၶဝ်ႈၼႂ်းဝဵင်းမိၼ်းတတ်ႉသေ ၵႂႃႇတၢင်းဝဵင်းပလႅတ်ႉဝ ၸိူဝ်းၼႆႉယူႇ ၵူၺ်းၼႃႇ ဝၢႆးၼၼ်ႉ ဝၼ်းထီႉ 12 May 2021 ၼႆႉ လွင်ႈပိုၼ်ၽၢဝ်ႇၵိုတ်းယိုဝ်းၵၼ်ၼၼ်ႉ လူႉသေ ၶိုၼ်းပဵၼ်ပၢင်တိုၵ်းတေႃးတေႃႇၵၼ် တေႃႇထိုင် ဝၼ်းထီႉ 19 June 2021 ၼႆႉယူႇဝႃႈၼႆ။

လွင်ႈၵိုတ်းယိုဝ်း ပွၵ်ႈၵမ်းသွင်ၼႆႉ ၽူႈယႂ်ႇၵူၼ်းလူင် ၼႂ်းဝဵင်းမိၼ်းတတ်ႉ လႆႈဢုပ်ႇဢူဝ်းငူပ်ႉငီႉတင်းသွင်ၽၢႆႇပၼ်သေ လွင်ႈၵိုတ်းယိုဝ်းၵၼ်ၼႆႉ လႆႈတႄႇ ဝၼ်းထီႉ 20 June 2021 တေႃႇထိုင် ဝၼ်းထီႉ 4 July 2021 ၼႆႉ ၶၢဝ်းတၢင်း 14 ဝၼ်း တႃႇႁႂ်ႈၵူၼ်းၼႂ်းပိုၼ်ႉတီႈ ပေႃးတေၸၢင်ႈပွၵ်ႈတူၺ်းၶိုၼ်း ႁိူၼ်းယေးၽႂ်မၼ်း ဝႃႈၼႆ။

ၽၢႆႇတပ်ႉၵႅတ်ႇၶႄႇၵူၼ်းမိူင်းၶျၢင်းလၢတ်ႈဝႃႈ ၽွင်းလႆႈၸႂ်ၵိုတ်းယိုဝ်းၵၼ် ပွၵ်ႈၼႆႉၵေႃႈ တင်းသွင်ၽၢႆႇ တိုၼ်းတေဢမ်ႇလႆႈၶိုၼ်ႈသိုၵ်း၊ တပ်းဝၢင်း တီႈယူႇမႂ်ႇသိုၵ်း၊ ၽၢႆႇသိုၵ်းမၢၼ်ႈ တေဢမ်ႇလႆႈၵႂႃႇပိုတ်းယိုဝ်းသႂ်ႇ ဢွင်ႈတီႈၵူၼ်းပၢႆႈၽေးယူႇသဝ်း လႄႈ တေဢမ်ႇလႆႈ တီႉၺွပ်းၸႅတ်ႈထၢမ်ၵူၼ်းမိူင်း၊ တေလႆႈပွႆႇၵူၼ်းမိူင်း တေႃႉဢဝ်ၶဝ်ႈၼမ်ႉတင်းၵိၼ် ၸိူဝ်းၼႆႉ လႄႈ တေလႆႈပႂ်ႉတူၺ်းပႃးဝႃႈ ၸွင်ႇၽၢႆႇၶွင်ႇသီႇသိုၵ်းမၢၼ်ႈ မီးလွင်ႈႁဵတ်းၸွမ်းၶေႃႈလႆႈၸႂ်ၸိူဝ်းၼႆႉယူႇႁိုဝ် ဢမ်ႇႁဵတ်းၸွမ်းႁိုဝ် ၼႆယူႇ။

ၵူၼ်းမိူင်းၼႂ်းပိုၼ်ႉတီႈ ဝဵင်းမိၼ်းတတ်ႉၵေႃႈ ဢွၼ်ၵၼ်ႁၼ်ထိုင်ဝႃႈ လွင်ႈၵိုတ်းယိုဝ်းၵၼ် ၼႂ်းၵႄႈၵၢင် တပ်ႉၵႅတ်ႇၶႄၵူၼ်းမိူင်းၶျၢင်းဢၼ် မီးၵွင်ႈယၢမ်းမဵဝ်းလဵဝ် ပဵၼ်ၶိူင်ႈမိုဝ်း လႄႈ ၶွင်ႇသီႇသိုၵ်းမၢၼ်ႈ ဢၼ်မီး ႁိူဝ်းမိၼ်တိုၵ်း ၶၢဝ်းတၢင်း 14 ဝၼ်းၼႆႉ ၽၢႆႇၶွင်ႇသီႇသိုၵ်းမၢၼ်ႈ တေလႆႈၶၢဝ်းယၢမ်းတႃႇႁၢင်ႈႁႅၼ်း ဝၢင်းၽႅၼ်လႄႈ ၽၢႆႇသိုၵ်းမၢၼ်ႈၵူၺ်း တေႁၼ်လႆႈၽွၼ်းလီ ဝႃႈၼႆ။

ယၢမ်းလဵဝ် ၽၢႆႇၶွင်ႇသီႇသိုၵ်းမၢၼ်ႈ မီးလွင်ႈတေႃႉတၢင်ႇၶဝ်ႈၼမ်ႉတၢင်းၵိၼ် ဢၼ်လူဝ်ႇၸႂ်ႉၸိူဝ်းၼၼ်ႉ လႄႈ ဝၢင်းၽႅၼ် ၵၢၼ်သိုၵ်းၸိူဝ်းၼႆႉယူႇ ၽၢႆႇၵူၼ်းပၢႆႇၽေးတႄႉၵေႃႈ ယင်းတိုၵ်ႉပႆႇလႆႈသုၼ်ႇလွတ်ႈလႅဝ်း တႃႇတေႃႉဢဝ်ၶဝ်ႈၼမ်ႉတၢင်းၵိၼ် ၵူၺ်းလႆႈသုၼ်ႇမွၵ်ႈဝႃႈ ပွၵ်ႈတူၺ်းၶိုၼ်းႁိူၼ်းၽႂ်မၼ်းမွၵ်ႈၼၼ်ႉၵူၺ်း ဝႃႈၼႆ။

ၼၢင်းယိင်းဝဵင်းမိၼ်းတတ်ႉၵေႃႈၼိုင်ႈၵေႃႈ လၢတ်ႈဝႃႈ မိူဝ်ႈၵူၼ်းမိူင်း ပွၵ်ႈတူၺ်းၶိုၼ်းႁိူၼ်းၽႂ် မၼ်းၼၼ်ႉ ႁိူၼ်းၵူၼ်းမိူင်းၼႂ်းပွၵ်ႉ ဢၼ်မီးယူႇဝႆႉၽၢႆႇတူၵ်းဝဵင်းမိၼ်းတတ်ႉၼၼ်ႉ ၵမ်ႈပႃႈၼမ် လႆႈႁၼ်ထုၵ်ႇၽွၵ်ႈယႃႉထိုင်ၼႂ်းႁိူၼ်းသေ လႆႈႁၼ်ႁွႆးထုၵ်ႇယႃႉၵဝ်းသွၵ်ႈတဝ်ယဝ်ႉ လူတ်ႉၶိူင်ႈ လႄႈ ၶူဝ်းၶွင်မီးၵႃႈၶၼ်ယႂ်ႇၸိူဝ်းၼႆႉၵေႃႈ ႁၢႆလၢႆ ၵႂႃႇယူႇဝႃႈၼႆ။

မၼ်းၼၢင်းသိုပ်ႇလၢတ်ႈပႃးဝႃႈ ႁိူၼ်းၼွင်ႉၸၢႆး လႄႈ ပီႈဢၢႆႈမၼ်းၼၢင်းၵေႃႈ ထုၵ်ႇၵူၼ်းႁၢႆႉၽွၵ်ႈယႃႉ ၶဝ်ႈၵဝ်းတဝ်ၼႂ်းႁိူၼ်း၊ လၵ်ႉဢဝ်လူတ်ႉၶိူင်ႈတီႈႁိူၼ်းၶဝ်ၸိူဝ်းၼၼ်ႉ ၵႂႃႇပႃးယူႇဝႃႈၼႆသေ တေႃႇထိုင်ယၢမ်းလဵဝ်တႄႉ ၵူၼ်းမိူင်းၵမ်ႈၽွင်ႈၵေႃႈ မိူဝ်းယူႇႁိူၼ်းယဝ်ႉ ၵမ်ႈၽွင်ႈတႄႉ ပွၵ်ႈမိူဝ်းတူၺ်းႁိူၼ်းၽႂ်မၼ်းယဝ်ႉသေ ဢဝ်ၶူဝ်းၶွင်မဵဝ်းဢၼ်လူဝ်ႇၸႂ်ႉယဝ်ႉ ၶိုၼ်းပွၵ်ႈမႃးတီႈဢွင်ႈပၢႆႈၽေးၼၼ်ႉၵူၺ်း တူဝ်မၼ်းတႄႉ ယွၼ်ႉပႆႇတမ်းၸႂ်လွင်ႈႁူမ်ႇလူမ်ႈလႄႈ ပႆႇႁတ်းၶဝ်ႈဝဵင်းမိူဝ်းၶိုၼ်း ၼႂ်းၸႂ်တႄႉ မီးၵၢင်ၸႂ် ၶႆႈပွၵ်ႈႁိူၼ်းၶိုၼ်းယူႇဝႃႈၼႆ။

ၽွင်းၵိုတ်းယိုဝ်းၵၼ်ပွၵ်ႈသွင်ၼႆႉ ၽၢႆႇသိုၵ်းမၢၼ်ႈမီးလွင်ႈတူင်ႉၼိုင် ၶဝ်ႈဢဝ်တီႈယူႇ တီႈၵျွင်းမုၼ်ၸဝ်ႈ ဢၼ်ယၢၼ်ဝဵင်းမိၼ်းတတ်ႉ မွၵ်ႈႁႃႈႁူၵ်းလၵ်းၼၼ်ႉလႄႈ ႁဵတ်းႁႂ်ႈ ၵူၼ်းပိုၼ်ႉတီႈၵူဝ်သေ သိုပ်ႇလႅၼ်ႈပၢႆႈထႅင်ႈယူႇ ပႅၵ်ႉသမ်ႉၶွင်ႇသီႇသိုၵ်းမၢၼ်ႈ ၸွမ်းႁွင်ႉ ယႃႇႁႂ်ႈပၢႆႈၼႆသေတႃႉ ၵူၼ်းမိူင်းပိုၼ်ႉတီႈ ဢၼ်လႅၼ်ႈပၢႆႈၼၼ်ႉ ယွၼ်ႉပဵၼ်သိုၵ်းလႄႈ ၵူၼ်းမိူင်းၵူဝ်ၶဝ်သေ ဢမ်ႇမီးၽႂ်ထွမ်ၶဝ် လႄႈ  လႆႈဢွၼ်ၵၼ်ပၢႆႈယူႇၵူၺ်းဝႃႈၼႆ။

ၽူႈၶၢၼ်ပၢၵ်ႇ ၽၢႆႇတပ်ႉၵႅတ်ႇၶႄၵူၼ်းမိူင်းၶျၢင်းၵေႃႈလၢတ်ႈဝႃႈ ၸူဝ်ႈၽွင်းၵိုတ်းယိုဝ်းၼႆႉတႄႉ ၵူႈၽၢႆႇၽၢႆႇ လႆႈလူမ်ၸႂ်ယူႇဢိတ်းၼိုင်ႈလႄႈ ၽၢႆႇတပ်ႉၵႅတ်ႇၶႄၵူၼ်းမိူင်းၶျၢင်းၶဝ်ၵေႃႈ ယင်းတိုၵ်ႉသိုပ်ႇၶဝ်ႈပွႆးတိုၵ်းလႆႈထႅင်ႈယူႇ ၵူၺ်းၼႃႇ ပေႃးဢဝ်ၶၢဝ်းယၢဝ်းဝႃႈ တႃႇၽူႈဢႃႇယုယႂ်ႇ လႄႈ လုၵ်ႈဢွၼ်ႇၼၼ်ႉတႄႉ တေဢမ်ႇပေႃးသၢင်ႇထုၵ်ႇဝႃႈၼႆ။

ၸူဝ်ႈၽွင်းပၢႆႈၽေးသေ သွၼ်ႈသေႃႉယူႇၼႂ်းထိူၼ်ၼႆႉၵေႃႈ ၽူႈဢႃႇယုယႂ်ႇ ဢၼ်တေၸၢင်ႈလူႉတၢႆသုမ်းသၢႆၸႂ်လႆႈၵူႈၶၢဝ်းၼၼ်ႉ မီးဝႆႉပႃးလႄႈ ယွၼ်ႉၼၼ် လႆႈၵိုတ်းယိုဝ်းၸူဝ်ႈၶၢဝ်းသေ ၽွင်းၼႆႉၵေႃႈ ၵူၼ်းမိူင်းတေလႆႈလူမ်ၸႂ်ၵူႈၽၢႆႇၽၢႆႇ ၸဵမ်ၶဝ်ႈၼမ်ႉတၢင်းၵိၼ် လႄႈ ယႃႈယႃ ၸိူဝ်းၼႆႉဝႃႈၼႆ။

ၼွၵ်ႈလိူဝ်ၼၼ်ႉ ၽူႈၶၢၼ်ပၢၵ်ႇယင်းလၢတ်ႈပႃးဝႃႈ တပ်ႉၵႅတ်ႇၶႄၵူၼ်းမိူင်းၶျၢင်းၶဝ် လႄႈ ၵူၼ်းမိူင်းၸိူဝ်းပၢႆႈၽေး ဢၼ်လႆႈယူႇတီႈလဵဝ်ၵၼ်ၵေႃႈမီးယူႇ ယွၼ်ႉၵူၼ်းမိူင်းၵေႃႈ ႁၼ်ထိုင်ဝႃႈ ပေႃးလႆႈယူႇၸွမ်း တပ်ႉၵႅတ်ႇၶႄၶဝ်ၼႆ တိုၼ်းမီးလွင်ႈႁူမ်ႇလူမ်ႈယူႇၼႆလႄႈ ဢမ်ႇၸၢင်ႈႁႂ်ႈၵူၼ်းမိူင်း ၶၢႆႉၵႂႃႇယူႇတၢင်ႇတီႈ လႄႈ တီႈဢၼ်တေၸီႉၼႄလႆႈသေ တႃႇၵူၼ်းမိူင်းတေပၢႆႈၵႂႃႇယူႇလႆႈ ထႅင်ႈၼၼ်ႉၵေႃႈ ဢမ်ႇပေႃးမီးၼမ်ယဝ်ႉ ဝႃႈၼႆ။

ၵဵဝ်ႇလွင်ႈဢၼ် သိုၵ်းမၢၼ်ႈယိုၼ်ႈမိုဝ်းၵိုတ်းယိုဝ်းၵၼ်ပွၵ်ႈၼႆႉသေ ၽၢႆႇတပ်ႉၵႅတ်ႇၶႄၵူၼ်းမိူင်းၶျၢင်း ႁၼ်ထိုင်ဝႃႈ ဢမ်ႇၸႂ်ႈဝႃႈသိုၵ်းမၢၼ်ႈ ဢီးလူႁၼ်ထိုင်ၵူၼ်းမိူင်းၸိူဝ်းပၢႆႈၽေးသေ လႆႈၸႂ်ၵိုတ်းယိုဝ်းၵၼ် ယွၼ်ႉၼၼ် ၽၢႆႇတပ်ႉၵႅတ်ႇၶႄၵူၼ်းမိူင်းႁၼ်ဝႃႈ သိုၵ်းမၢၼ်ႈ တိုၼ်းမီးၽႅၼ်ၵၢၼ် ၼႂ်းႁူဝ်ၶဝ်ဝႆႉယူႇဝႃႈၼႆ။

လွင်ႈဢၼ် CDF ၶဝ် ၶဝ်ႈပွႆးတိုၵ်းယူႇၼႆႉၵေႃႈ ဢမ်ႇၸႂ်ႈတႃႇဝဵင်းမိၼ်းတတ်ႉ လႄႈ ၸႄႈမိူင်းၶျၢင်းၼႆႉ တီႈလဵဝ်ၵူၺ်းသေ ႁၼ်ထိုင်ဝႃႈ ပဵၼ်ၶဝ်ႈပွႆးတိုၵ်းတႃႇ တူဝ်ႈမိူင်းႁူမ်ႈတုမ်ယူႇ ဝႃႈၼႆ။

ၽူႈၶၢၼ်ပၢၵ်ႇ သိုပ်ႇလၢတ်ႈၼႄပႃး ၸူဝ်ႈၽွင်းပဵၼ်ပၢင်တိုၵ်းၵၼ်တင်းတပ်ႉသိုၵ်းမၢၼ်ႈ ၶၢဝ်းတၢင်းသွင်သၢမ်လိူၼ်မႃးၼႆႉ ပဵၼ်ပၢင်တိုၵ်းၼိုင်ႈပွၵ်ႈၵေႃႈ လႆႈတူဝ်ထူပ်းယူႇၵူႈပွၵ်ႈ ႁူႉတီႈယူပ်ႈယွမ်း တူဝ်ၵဝ်ႇပႃးသေ ဢၼ်လႆႈလူႉတၢႆ ၵႂႃႇၼႂ်းပၢင်တိုၵ်းၸိူဝ်းၼၼ်ႉၵေႃႈ တိုၼ်းပဵၼ်ၽူႈႁတ်းႁၢၼ် ၵူႈၵေႃႉယူႇဝႃႈၼႆ။

ၽၢႆႇတပ်ႉၵႅတ်ႇၶႄၵူၼ်းမိူင်းၶျၢင်း ပိုၼ်ၽၢဝ်ႇဝႆႉ ဝၢႆးၶွင်ႇသီႇသိုၵ်းမၢၼ်ႈ ယိုတ်းဢၢမ်းၼၢတ်ႈမႃးယဝ်ႉ ပၢင်တိုၵ်းတႄႇပဵၼ်မႃး တီႈဝဵင်းမိၼ်းတတ်ႉ မိူဝ်ႈဝၼ်းထီႉ 24 April 2021 တေႃႇထိုင် ဝၼ်းထီႉ 10 June 2021 ၼႆႉသေ ၵူၼ်းလူႉတၢႆ ၽွင်းပၢင်တိုၵ်း ၼႂ်းမိူင်းၶျၢင်းၼႆႉ ၽၢႆႇၶွင်ႇသီႇသိုၵ်းမၢၼ်ႈ မီးယူႇ 123 ၵေႃႉ ၽၢႆႇတပ်ႉၵႅတ်ႇၶႄၵူၼ်းမိူင်းၶျၢင်း မီးယူႇ 45 ၵေႃႉ လႄႈ ၵူၼ်းမိူင်းယူဝ်းယူဝ်း မီးယူႇ 3 ၵေႃႉ ဝႃႈၼႆ။

တႆးလွတ်ႈလႅဝ်း