မၢၵ်ႇတႅၵ်ႇ တီႈႁူင်းႁဵၼ်းၸၼ်ႉသုင် ဝဵင်းမိူင်းမွၵ်ႇ မီးၵူၼ်းမၢတ်ႇၸဵပ်းၵေႃႉၼိုင်ႈ

မိူဝ်ႈဝၼ်းထီႉ 22 June 2021 ယၢမ်းၵၢင်ၼႂ် မွၵ်ႈ 09:30  မူင်းၼႆႉ မၢၵ်ႇတႅၵ်ႇတီႈႁူင်းႁဵၼ်းၸၼ်ႉသုင် ဢၼ်မီးၼႂ်းပွၵ်ႉၶႃၼၢၼ် ဝဵင်းမိူင်းမွၵ်ႇ ၸႄႈမိူင်းၶၢင်သေ ႁဵတ်းႁႂ်ႈ ၵူၼ်းႁဵတ်းလိူမ်ႈလႆႇမူတ်းသႂ် တီႈႁူင်းႁဵၼ်းၵေႃႉၼိုင်ႈ လႆႈတၢင်းၸဵပ်းမၢတ်ႇ ၵႂႃႇယူႇဝႃႈၼႆ။

ၵူၼ်းၼႂ်းပိုၼ်ႉတီႈ ဢၼ်ယူႇၸမ်ႁူင်းႁဵၼ်းၼၼ်ႉလၢတ်ႈဝႃႈ “မၢၵ်ႇဢၼ်ႁဵတ်းဢဝ်သွင်လုၵ်ႈၼႆႉ မႃးမီးဝႆႉတႂ်ႈၶူဝ်လႆ ႁူင်းႁဵၼ်းသေ တႅၵ်ႇၵႂႃႇ ႁဝ်းတၼ်းလႆႈငိၼ်းသဵင်တႅၵ်ႇမၢၵ်ႇတႅၵ်ႇ 2 လုၵ်ႈၼႆႉယူႇ၊ သဵင်မၼ်းတႄႉ ဢမ်ႇပေႃးလင်ၵႃႈႁိုဝ်။ ၽွင်းမၢၵ်ႇတႅၵ်ႇၼၼ်ႉၵေႃႈ ပဵၼ်ၽွင်းယၢမ်းမွၵ်ႈ 9 မူင်းၶိုင်ႈယဝ်ႉလႄႈ လုၵ်ႈႁဵၼ်းတင်း မေႃသွၼ်ၶဝ်တႄႉ ၶဝ်ႈယူႇၼႂ်းႁွင်ႈႁဵၼ်းမူတ်းယဝ်ႉ ဢမ်ႇတၼ်းလႆႈမၢတ်ႇၸဵပ်း၊ ဢၼ်မၢတ်ႇၸဵပ်းၼၼ်ႉ ပဵၼ်ၵူၼ်းႁဵတ်းလွင်ႈမူတ်းသႂ်ႇ တီႈႁူင်းႁဵၼ်း” ဝႃႈၼႆ။

ဝၢႆးမၢၵ်ႇတႅၵ်ႇယဝ်ႉ ႁူင်းႁဵၼ်းၵေႃႈ လႆႈပိၵ်ႉဢိုတ်းၵမ်းလဵဝ်သေ ပလိၵ်ႈလႄႈသိုၵ်းမၢၼ်ႈ သိုပ်ႇႁဵတ်း လွင်ႈၵူတ်ႇထတ်းတူၺ်းၸွမ်း ပိူင်ပဵၼ်လႄႈ ဢွင်ႈတီႈမၢၵ်ႇတႅၵ်ႇ တီႈၼႂ်းႁူင်းႁဵၼ်းၼၼ်ႉယူႇဝႃႈၼႆ။

မိူဝ်ႈဝႃး ယၢမ်းဝၢႆးဝၼ်းၼၼ်ႉ ၽၢႆႇသိုဝ်ႇၶၢဝ်ႇသိုၵ်းမၢၼ်ႈ MWD တႄႉ ၶိုၼ်းၼႅတ်ႈဢွၵ်ႇၶၢဝ်ႇလၢတ်ႈၵႂႃႇဝႃႈ လွင်ႈမၢၵ်ႇတႅၵ်ႇတီႈမိူင်းမွၵ်ႇၼႆႉဝႃႈ ပဵၼ်ႁွႆးမိုဝ်းၸုမ်းၵေႃႇၵၢၼ်ႁၢႆႉဝႃႈၼႆ။

တႆးလွတ်ႈလႅဝ်း