KPDF ပိုၼ်ၽၢဝ်ႇ တေႁႂ်ႈမီးၸုမ်းၵႅတ်ႇၶႄၵူၼ်းမိူင်း ၸွတ်ႇတူဝ်ႈမိူင်းယၢင်းလႅင်

ၼင်ႇႁိုဝ် ပေႃးတေၸၢင်ႈတေႃႇသူႈ တိုၵ်းတေႃးပႅတ်ႈ ၸုမ်းသိုၵ်းမၢၼ်ႈယိုတ်းဢၢမ်းၼၢတ်ႈ ဢုပ်ႉပိူင်ႇဝၢၼ်ႈမိူင်းၼၼ်ႉ  ၸုမ်းၵႅတ်ႇၶႄၵူၼ်းမိူင်းယၢင်းလႅင် (KPDF) တေၶွတ်ႇၽွတ်ႈၸုမ်း ႁႂ်ႈမီးၵူႈၸႄႈဝဵင်း ဝႃႈၼႆ။

ယွၼ်ႉဢမ်ႇၶႂ်ႈယူႇတႂ်ႈ ပိူင်ဢုပ်ႉပိူင်ႇသိုၵ်းမၢၼ်ႈ ယိုတ်းဢၢမ်းၼၢတ်ႈလူင်ပွင်ၸိုင်ႈ ဢၼ်ၵူၼ်းမိူင်း လိူၵ်ႈတင်ႈၶိုၼ်ႈမႃးၼၼ်ႉသေ ၸုမ်းၵႅတ်ႇၶႄၵူၼ်းမိူင်းယၢင်းလႅင် (Karenni People Defense Force – KPDF) ၶဝ်ႈထိူၼ်ႇၽိုၵ်းၽွၼ်ႉၵၢၼ်သိုၵ်း လႄႈ ႁဵတ်းၶိူင်ႈၵွင်ႈၵၢင်ႇဢွၵ်ႇႁင်းၵူၺ်း ၼႂ်းပိုၼ်ႉတီႈ မိူင်းယၢင်းလႅင် ႁိမ်းလႅၼ်လိၼ်မိူင်းယၢင်းလႅင် – ထႆး တီႈၼိုင်ႈ တႃႇတေႃႇသူႈ တိုၵ်းလိုပ်ႈပႅတ်ႈ ၸုမ်းၶွင်ႇသီႇသိုၵ်းမၢၼ်ႈ ၼႆယဝ်ႉ။

ၸုမ်းၵႅတ်ႇၶႄၵူၼ်းမိူင်းယၢင်းလႅင် (KPDF) ယၢမ်ႈပိုၼ်ၽၢဝ်ႇတီႈၼိူဝ် Facebook Page ဝႆႉဝႃႈ တေၶွတ်ႇၽွတ်ႈ ၸုမ်းၵႅတ်ႇၶႄၵူၼ်းမိူင်းယၢင်းလႅင် ႁႂ်ႈပေႃးမီးၸွတ်ႇၵူႈၸႄႈဝဵင်း တူဝ်ႈတင်းမိူင်း ယၢင်းလႅင် ဝႃႈၼႆ။

ၵူၺ်းၵႃႈ လွင်ႈၼႆႉ လၢႆလၢႆၽၢႆႇ မုင်ႈႁၼ်ဝႆႉဝႃႈ ၼႂ်းၶၢဝ်းတၢင်းၼႃႈမႃးၼႆႉ ယိုင်ႈၶႅၼ်းတေသုၵ်ႉသၵ်ႉ လိူဝ်သေၵဝ်ႇ၊ ယွၼ်ႉဝႃႈ ၸုမ်းယိပ်းၵွင်ႈၵၢင်ႇ ၼႂ်းမိူင်းယၢင်းလႅင်ၵေႃႈမီးၼမ်ယဝ်ႉလႄႈ မၢင်ၽဝ်ႇ တေၸၢင်ႈတူၵ်းလွၵ်းသိုၵ်းမၢၼ်ႈ ႁႂ်ႈၸုမ်းယိပ်းၵွင်ႈၵၢင်ႇၼင်ႇၵၼ် ပိုတ်းယိုဝ်းၵၼ်ၶိုၼ်းၵေႃႈပဵၼ်လႆႈ ၼႆယဝ်ႉ။

ၶူးတႄႇၼီႇယႄႇ ၽူႈၼမ်းၼႂ်း 2 ပႃႇတီႇမႂ်ႇသုင်ၸိူဝ်ႉၸၢတ်ႈယၢင်းလႅင် (KNPP) လၢတ်ႈဝႃႈ  ယူႇတီႈ KNPP သေ ဢမ်ႇလႆႈသၢၼ်ၶတ်း ၸုမ်းၵႅတ်ႇၶႄၵူၼ်းမိူင်း ဢၼ်ၶွတ်ႇၽွတ်ႈၶိုၼ်ႈမႃးမႂ်ႇ၊ ၵူၺ်းၵႃႈ ဢမ်ႇပႆႇထိုင်ၶၢဝ်းယၢမ်း တႃႇတေလၢတ်ႈၼႄ လွင်ႈၸမ်ၸႂ်ၵၼ် တင်းသွင်ၸုမ်း KPDF လႄႈ KNPP ဢၼ်မီးတေႃႇၵၼ်ၼၼ်ႉ ဝႃႈၼႆ။

တူဝ်တႅၼ်း တီႈၵိူဝ်းၵုမ်ၶွင်ႇသီႇမိူင်းယၢင်းလႅင် (Karenni State Consultative Council-KSCC) ဢွၵ်ႇမႃးလၢတ်ႈတီႈသိုဝ်ႇၶၢဝ်ႇ Kantarawaddy Times ဝႆႉဝႃႈ “ယွၼ်းပၼ်ၾၢင်ႉဝႆႉ တႃႇတေၵေႃႇတင်ႈ ၸုမ်းယိပ်းၵွင်ႈၵၢင်ႇမႂ်ႇၶိုၼ်ႈမႃးၼၼ်ႉ သင်ဢမ်ႇမီးလၵ်းၼမ်းၵႅၼ်ႇၶႅင်ႇ လႄႈ မီးမူႇပိူင်တႅၵ်ႇလႅင်းၼႆ တေဢမ်ႇၸၢင်ႈတမ်းဝၢင်းၽႅၼ်ၵၢၼ်သိုၵ်းလႆႈ ၼင်ႇတဵမ်ထူၼ်ႈ” ၼႆယဝ်ႉ။

ၶႅပ်းႁၢင်ႈၸိူဝ်းၼႆႉ လႆႈပိုၼ်ၽႄႈဢွၵ်ႇမႃး မိူဝ်ႈၼႂ်းဝၼ်းထီႉ 6 July 2021 ပူၼ်ႉမႃးၼႆႉသေ ၵူၼ်းၵမ်ႈၼမ်ဢွၵ်ႇတၢင်းႁၼ်ထိုင်ဝႃႈ ၽႂ်တေပဵၼ်ၽူႈဢွၼ်ႁူဝ် ၸုမ်းၸိူဝ်းၶဝ်တႄႉဢမ်ႇႁူႉ ၵူၺ်းၵႃႈ ၸုမ်းၶဝ်ၶႂ်ႈလႆႈလူင်ပွင်ၸိုင်ႈ ဢၼ်မီးလွင်ႈၽဵင်ႇပဵင်းတြႃး ၼႆယဝ်ႉ။

တႆးလွတ်ႈလႅဝ်း