သိုၵ်းမၢၼ်ႈ တင်း KNU/KNLA ပဵၼ်ပၢင်တိုၵ်းၵၼ်ၼႂ်းမိူင်းယၢင်းသေ ၽၢႆႇသိုၵ်းမၢၼ်ႈ တၢႆ 11 ၵေႃႉ

မိူဝ်ႈၼႆႉ ဝၼ်းထီႉ 14 July 2021 (လိူၼ်ပႅတ်ႇမႂ်ႇ 6 ၶမ်ႈ ပီႊတႆး 2115 ၼီႈ) KNU ပိုၼ်ၽၢဝ်ႇၵႂႃႇဝႃႈ မိူဝ်ႈဝၼ်းထီႉ 12-13 July 2021 ၼႂ်းၶၢဝ်းတၢင်း 2 ဝၼ်း လႆႈပဵၼ်ပၢင်တိုၵ်းၵၼ် တင်း သိုၵ်းမၢၼ်ႈ တီႈၼႂ်းၼႃႈလိၼ်ၵုမ်းၵမ် တပ်ႉၸုမ်း (5) KNU/KNLA ၸႄႈတွၼ်ႈၽႃပုၼ်ႇ (8) ပွၵ်ႈသေ ၽၢႆႇသိုၵ်းမၢၼ်ႈ တၢႆ 11 ၵေႃႉ၊ မၢတ်ႇၸဵပ်း 16 ၵေႃႉ ဝႃႈၼႆ။

ၼႂ်းပၢင်တိုၵ်းၼၼ်ႉ ၽၢႆႇ KNU/KNLA တႄႉ ဢမ်ႇမီးလွင်ႈ မၢတ်ႇၸဵပ်းတူၵ်းသုမ်းသင် ဝႃႈၼႆ။

မိူဝ်ႈဝၼ်းထီႉ 1 July 2021 ပူၼ်ႉမႃးၼၼ်ႉၵေႃႈ သိုၵ်းမၢၼ်ႈ တပ်ႉၶမရ (409) တပ်ႉၽႄ (3) ႁူမ်ႈတင်း တပ်ႉပႂ်ႉလႅၼ်လိၼ် BGF (1014) လႄႈ တပ်ႉၸုမ်း (1) KNU/KNLA ပဵၼ်ပၢင်တိုၵ်းၵၼ် တီႈၼႂ်းၸႄႈဝဵင်းၽႃးဢၢၼ်ႇ မိူင်းယၢင်းသေ ဝၢႆးသေသွင်ၽၢႆႇ ပဵၼ်ပၢင်တိုၵ်းၵၼ်ယဝ်ႉၼၼ်ႉ ၸုမ်းသိုၵ်းမၢၼ်ႈ ယိုဝ်းမၢၵ်ႇလူင် ၵႃႈပွင်ႇၵႃႈပဵၼ် လႄႈ မၢၵ်ႇလူင်ၵႂႃႇတူၵ်းသႂ်ႇ ၼႂ်းဝၢင်းႁိူၼ်းၵူၼ်းမိူင်းလင်ၼိုင်ႈ တီႈဝၢၼ်ႈၺွင်ႇၵုင်း ၼႂ်းၸႄႈဝဵင်းၽႃးဢၢၼ်ႇ ႁဵတ်းႁႂ်ႈၸၢၵ်ႇမၢၵ်ႇတိူဝ်ႉၸပ်းၺႃး ၶဵင်ႇၽြႃး ဢိၵ်ႇတင်း လင်ၶႃးႁိူၼ်းၵူၼ်းမိူင်း ၼႆယဝ်ႉ။

ဝၢႆးသိုၵ်းမၢၼ်ႈ ယိုတ်းဢၢမ်းၼၢတ်ႈၸိုင်ႈမိူင်း လူၺ်ႈဢမ်ႇတြႃးယဝ်ႉ သိုၵ်းမၢၼ်ႈ ဢဝ်ႁႅင်းသိုၵ်းတင်းၼမ် တူင်ႉၼိုင်ၶဝ်ႈၼႂ်းၼႃႈလိၼ်ၵုမ်းၵမ် တပ်ႉၸုမ်း (1) ဢိၵ်ႇ တပ်ႉၸုမ်း (5) KNU/KNLA လႄႈ သွင်ၽၢႆႇၸင်ႇလႆႈပဵၼ်ပၢင်တိုၵ်းၵၼ်ႁၢဝ်ႈႁႅင်း ၸဵမ်မိူဝ်ႈၼႂ်းလိူၼ် February 2021 ပူၼ်ႉမႃးၼၼ်ႉသေ သိုၵ်းမၢၼ်ႈ မီးလွင်ႈတူၵ်းသုမ်း ၼမ်ႁႅင်းလႄႈ သိုၵ်းမၢၼ်ႈ သိုပ်ႇဢဝ်ႁိူဝ်းမိၼ်တိုၵ်း ပွႆႇမၢၵ်ႇပိုတ်းယိုဝ်းၸွမ်းဝၢၼ်ႈသူၼ် ႁိူၼ်းယေးၵူၼ်းမိူင်း ထိုင်တီႈႁဵတ်းႁႂ်ႈ ၵူၼ်းမိူင်းမၢတ်ႇၸဵပ်း လူႉတၢႆ ၊ လႆႈပၢႆႈၽေးပၢင်တိုၵ်းတင်းၼမ် တေႃႇထိုင် ယၢမ်းၽွင်းတေႃႈလဵဝ် ၵူၼ်းပၢႆႈၽေးၵမ်ႈၽွင်ႈ ယင်းဢမ်ႇပႆႇၸၢင်ႈပွၵ်ႈၶိုၼ်း ႁိူၼ်းယေး ၼႆယဝ်ႉ။

တႆးလွတ်ႈလႅဝ်း