ၸုမ်းတူင်ႇဝူင်းၵူၼ်း 400 ပၢႆ တုၵ်းယွၼ်းယႃႇႁႂ်ႈ Telenor ၶၢႆပၼ် ၶွမ်ႇပၼီႇ M1 Group ဢၼ်ၵဵဝ်ႇၸွမ်းတပ်ႉသိုၵ်းမၢၼ်ႈ

ၸုမ်းတူင်ႇဝူင်းၵူၼ်းၼႂ်းမိူင်းႁူမ်ႈတုမ် 400 ပၢႆ ႁူမ်ႈၵၼ်သူင်ႇလိၵ်ႈတုၵ်းယွၼ်းထိုင် ၶွမ်ႇပၼီႇၵၢၼ်ၵပ်းသိုပ်ႇ Telenor ဝႃႈ ႁႂ်ႈႁုပ်ႈသိမ်းပၼ်ၵၢၼ်ၶၢႆၶူင်းၵၢၼ် Telenor ပၼ် ၶွမ်ႇပၼီႇ M1 Group ဢၼ်ၵဵဝ်ႇၸွမ်းတပ်ႉသိုၵ်းမၢၼ်ႈၼႆယဝ်ႉ။

ၵဵဝ်ႇလူၺ်ႈၵၢၼ်ၶၢႆ သၢႆၵပ်းသိုပ်ႇ Telenor ၼႆႉသေ ဝၼ်းထီႉ 12 July 2021  ၸုမ်းတူင်ႇဝူင်းၵူၼ်း ၼႂ်းမိူင်းႁူမ်ႈတုမ် 464 ၸုမ်း ႁူမ်ႈၵၼ်တႅမ်ႈလိၵ်ႈၸူးထိုင် ၸွမ်ၽွင်းလူင်မိူင်းၼေႃႇဝူၺ်းသေ တုၵ်းယွၼ်းဝႆႉ ႁႂ်ႈႁုပ်ႈသိမ်းပၼ်ၵၢၼ်ၶၢႆ Telenor ၸူး M1 Group ၶွမ်ႇပၼီႇၸိုဝ်ႈသဵင်လူႉၼၼ်ႉ ၼႆယဝ်ႉ။

ၸုမ်းတူင်ႇဝူင်းၵူၼ်းတိုၵ်းသူၼ်းဝႆႉဝႃႈ ႁႂ်ႈႁုပ်ႈသိမ်းၵၢၼ်ၶၢႆ သၢႆၵပ်းသိုပ်ႇ Telenor လႄႈ ႁႂ်ႈၶိုၼ်းမႄးထတ်းသၢင် လွင်ႈသုၼ်ႇလႆႈသုၼ်ႇပဵၼ်ၵူၼ်းသေယဝ်ႉ မီးလွင်ႈပွင်ႇလႅင်းၼႄၵူၼ်းမိူင်းႁူမ်ႈတုမ် ၵဵဝ်ႇလွင်ႈၵၢၼ်ၶၢႆ Telenor ၼႆႉ ဝႃႈၼႆ။

မိူဝ်ႈလဵဝ်ၼႆႉ ပဵၼ်ဢၼ်မႆႈၸႂ်ႁႅင်းပုၼ်ႈတႃႇၵူၼ်းမိူင်းႁူမ်ႈတုမ် သင်ဝႃႈ Telenor ၶၢႆပၼ် ၶွမ်ႇပၼီႇၸိုဝ်ႈသဵင်လူႉ M1 Group ဢၼ်ၵဵဝ်ႇၸွမ်း တပ်ႉသိုၵ်းမၢၼ်ႈၼၼ်ႉ ပေႃးၼႆၸိုင် လွင်ႈႁူမ်ႇလူမ်ႈၶေႃႈမုၼ်းသုၼ်ႇတူဝ်ၵူၼ်းမိူင်းႁူမ်ႈတုမ် 17 လၢၼ်ႉ ဢၼ်ၸႂ်ႉတိုဝ်း သၢႆၵပ်းသိုပ်ႇ Telenor တင်းမူတ်း သိုၵ်းမၢၼ်ႈတေၶဝ်ႈထိုင် ၵုမ်းထိင်းဝႆႉမူတ်း ၼႆယဝ်ႉ။

မိူဝ်ႈဢွၼ်တၢင်းၼႆႉ ၶွမ်ႇပၼီႇ Telenor ယၢမ်ႈပိုၼ်ၽၢဝ်ႇမႃးယူႇတႃႇသေႇဝႃႈ ပဵၼ်ၶွမ်ႇပၼီႇဢၼ်ၸုၵ်းမၼ်ႈယူႇၽၢႆႇ မၢၼ်ႇမႅၼ်ႈ လွင်ႈၽဵင်ႇပဵင်းတြႃး ႁဵတ်းၸွမ်း ၶေႃႈတိုဝ်းၵမ်ၵူႈမိူင်းမိူင်းမၵ်းမၼ်ႈဝႆႉလႄႈ တေႁႄႉၵင်ႈလွင်ႈႁူမ်ႇလူမ်ႈ ၵၢၼ်ၸႂ်ႉတိုဝ်း Digital ၵူၼ်းမိူင်းႁူမ်ႈတုမ်ၼႆသေတႃႉ မိူဝ်ႈလဵဝ် ၶွမ်ႇပၼီႇ Telenor ဢမ်ႇႁဵတ်းၸွမ်း ၶေႃႈတိုဝ်းၵမ်ၶွမ်ႇပၼီႇၸဝ်ႈၵဝ်ႇၼႆယဝ်ႉ။

မိူဝ်ႈဝၼ်းထီႉ 8 July 2021 ပူၼ်ႉမႃးၼၼ်ႉ ၶွမ်ႇပၼီႇ Telenor ငဝ်ႈငုၼ်း မိူင်းၼေႃႇဝူၺ်း ပိုၼ်ၽၢဝ်ႇၵႂႃႇဝႃႈ သၢႆၵပ်းသိုပ်ႇ Telenor မိူင်းႁူမ်ႈတုမ်ၼၼ်ႉ လႆႈၶၢႆပၼ်ၶွမ်ႇပၼီႇမိူင်းလေႇပႃႇၼွၼ်ႇ M1 Group တႃႇသၢင်ႉငိုၼ်း 105 လၢၼ်ႉ တေႃႇလႃႇဢမေႇရိၵၢၼ်ႇ ၼႂ်းၼၼ်ႉ တႃႇ 55 လၢၼ်ႉတေႃႇလႃႇဢမေႇရိၵၢၼ်ႇတႄႉ တေလႆႈၽွၼ်ႇၸၢႆႇပၼ်ၵမ်းဢိတ်းဢိတ်း ၼႂ်းၶၢဝ်းတၢင်း (5) ပီႊ ဝႃႈၼႆ။

ၸွမ်းၼင်ႇသိုဝ်ႇၶၢဝ်ႇ DVB ဢွၵ်ႇၶၢဝ်ႇဝႆႉၼၼ်ႉ ဝၢႆးသိုၵ်းမၢၼ်ႈယိုတ်းဢၢမ်းၼၢတ်ႈ ၸိုင်ႈမိူင်း မိူဝ်ႈဝၼ်းထီႉ 1 February 2021 ၼႆႉမႃး သိုၵ်းမၢၼ်ႈပၼ်ႁႅင်းဢီး ပိၵ်ႉဢိုတ်းသၢႆၵပ်းသိုပ်ႇဢိၼ်ႇတိူဝ်ႇၼႅတ်ႉ ၼႂ်းမိူင်းႁူမ်ႈတုမ်လႄႈ Telenor လႆႈႁူပ်ႉထူပ်းလွင်ႈလူႉသုမ်း တႃႇသၢင်ႉငိုၼ်း 725 လၢၼ်ႉတေႃႇလႃႇဢမေႇရိၵၢၼ်ႇ ဝႃႈၼႆ။

ၸွမ်းၼင်ႇၽိုၼ်လိၵ်ႈလၢႆးငၢၼ်း ၶွမ်ႇပၼီႇ Telenor ၼၼ်ႉ ၼႂ်းပီႊ 2020 ၶၢဝ်းတၢင်းၼိုင်ႈပီႊ ၶွမ်ႇပၼီႇလႆႈၼမ်ႉမျၢတ်ႈၼမ်ႉတွၼ်းတီႈသၢႆၵပ်းသိုပ်ႇ Telenor သၢင်ႉငိုၼ်း 800 လၢၼ်ႉ တေႃႇလႃႇဢမေႇရိၵၢၼ်ႇ ၼႆယဝ်ႉ။

ၶွမ်ႇပၼီႇ M1 Group ဢၼ်သိုဝ်ႉ Telenor ၼႆႉ ယၢမ်ႈႁဵတ်းၵၢၼ်ၸွမ်းၶွမ်ႇပၼီႇ ဢၼ်ၵဵဝ်ႇၸွမ်းတပ်ႉသိုၵ်းမၢၼ်ႈလႄႈ ၸုမ်းသုၼ်ႇလႆႈသုၼ်ႇပဵၼ်ၵူၼ်း Burma Campaign UK လႆႈဢဝ်ၸိုဝ်ႈသဵင် M1 Group ၶဝ်ႈၼႂ်းသၢႆမၢႆၸိုဝ်ႈသဵင်လူႉဝႆႉယဝ်ႉ ဝႃႈၼႆ။

တႆးလွတ်ႈလႅဝ်း