ပႃႇတီႇႁူဝ်သိူဝ် SNLD ၸွႆႈထႅမ် ပီႈၼွင်ႉပၢႆႈၽေးပၢင်တိုၵ်း ၼႂ်းၸႄႈဝဵင်းမိူင်းၵိုင်

မိူဝ်ႈဝၼ်းထီႉ 15 July 2021 (လိူၼ်ပႅတ်ႇမႂ်ႇ 7 ၶမ်ႈ ပီႊတႆး 2115 ၼီႈ) ငဝ်ႈငုၼ်း တီႇမူဝ်ႇၶရေႇၸီႇၸိူဝ်ႉၶိူဝ်းတႆး (ႁိုဝ်) ပႃႇတီႇႁူဝ်သိူဝ် (SNLD) ၵႂႃႇၸွႆႈထႅမ် ပီႈၼွင်ႉပၢႆႈၽေးပၢင်တိုၵ်း တီႈဝၢၼ်ႈႁူၺ်ႈလူင် ဢိူင်ႇမိူင်းၶုၼ် ၸေႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ဝႃႈၼႆ။

ပႃႇတီႇႁူဝ်သိူဝ် SNLD ၸွႆႈထႅမ် ပီႈၼွင်ႉပၢႆႈၽေးပၢင်တိုၵ်း တီႈဝၢၼ်ႈႁူၺ်ႈလူင်ၼႆႉ ပဵၼ်ပွၵ်ႈၵမ်း (5) ယဝ်ႉ ဝႃႈၼႆ။

ယွၼ်ႉငဝ်းလၢႆးပၢင်တိုၵ်း တီႈၼႂ်းပိုၼ်ႉတီႈသေ ႁဵတ်းႁႂ်ႈပေႃႈမႄႈၵူၼ်းမိူင်း ဢၼ်ယူႇသၢင်ႈ ၵိၼ်သဝ်း ၼႂ်းဢိူင်ႇမိူင်းၶုၼ် ၸေႈဝဵင်းမိူင်းၵိုင် လႆႈဢွၼ်ၵၼ်ပၢႆႈၽေးပၢင်တိုၵ်း ၵႂႃႇယူႇသွၼ်ႈသဝ်းဝႆႉတီႈ ၵျွင်းမုၼ်ၸဝ်ႈ ဝၢၼ်ႈႁူၺ်ႈလူင်ၼၼ်ႉ ၵူၼ်းပၢႆႈၽေး မီး 98 ၵေႃႉသေ  မီးလွင်ႈယၢပ်ႇၽိုတ်ႇ ၶဝ်ႈၼမ်ႉတၢင်းၵိၼ် ၽႃႈႁူမ်ႇၶူဝ်းၼွၼ်းၼႆလႄႈ ယူႇတီႈပႃႇတီႇႁူဝ်သိူဝ် SNLD လႆႈၵႂႃႇၸွႆႈထႅမ် ၶဝ်ႈၼမ်ႉတၢင်းၵိၼ် ၽႃႈႁူမ်ႇၶူဝ်းၼွၼ်း မိူၼ်ၼင်ႇ ၶဝ်ႈသၢၼ် 102 ထူင်၊ ၼမ်ႉမၼ်းၵိၼ်၊ ၽၵ်းမီႇႁူဝ်လႅင်၊ မၢၵ်ႇၶိူဝ်သူမ်ႈ၊ ပႃဢႅပ်ႇ၊ၶဝ်ႈသွႆးမမ၊ ၵိူဝ်၊ ၽႃႈမႆ (ၽႃႈႁူမ်ႇ) 200 ၽိုၼ်၊ ၽႃႈၵၢင် 100 ၽိုၼ်၊ ၾႆးထၢတ်ႈ 150 လဝ်း၊ ၶႅပ်းတိၼ် 100 ၵူႈ၊ မေႃႈၶဝ်ႈ၊ ၸေႃႉၶူတ်ႉၶဝ်ႈ ၸႃႉၵႂႃႇၸဵမ်ၸိူဝ်းၼႆႉ တူၵ်းမႅၼ်ႈသင်ႉငိုၼ်းမၢၼ်ႈ 7,346,000 ပျႃး (ၸဵတ်းလၢၼ်ႉသၢမ်သႅၼ်သီႇမိုၼ်ႇႁူၵ်းႁဵင်ပျႃးတဵမ်တဵမ်) ဝႃႈၼႆ။

ၶဝ်ႈၼမ်ႉတၢင်းၵိၼ် လႄႈ ၶူဝ်းၶွင်ၸႂ်ႉတိုဝ်း ဢၼ်ပႃႇတီႇႁူဝ်သိူဝ် SNLD ၸွႆႈထႅမ် ပီႈၼွင်ႉပၢႆႈၽေးပၢင်တိုၵ်း တီႈဝၢၼ်ႈႁူၺ်ႈလူင်ၼႆႉ ယူႇတီႈၸုမ်းၵူၼ်းၼုမ်ႇ ဝဵင်မိူင်းၵိုင် ၸွႆႈဢဝ်လူတ်ႉၵႃး တေႃႉသူင်ႇပၼ်တီႈ ၵူၼ်းပၢႆႈၽေးၶဝ် ၼႆယဝ်ႉ။

ယွၼ်ႉငဝ်းလၢႆးပၢင်တိုၵ်းၼႂ်းပိုၼ်ႉတီႈသေ ၵူၼ်းဝၢၼ်ႈၼႂ်းဢိူင်ႇမိူင်းၶုၼ် ၸႄႈဝဵင်းမိူင်းၵိုင် ၸိုင်ႈတႆးပွတ်းၸၢၼ်း ဢွၼ်ၵၼ်ပၢႆႈၽေးပၢင်တိုၵ်း ယူႇသဝ်းဝႆႉၸွမ်း ဝတ်ႉၵျွင်းမုၼ်ၸဝ်ႈ မီး 2,500 ပၢႆယဝ်ႉ ဝႃႈၼႆ။

ယၢမ်းၽွင်းတေႃႈလဵဝ် ၵူၼ်းပၢႆႈၽေးၶဝ် လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ်၊ ၽႃႈႁူမ်ႇၶူဝ်းၼွၼ်း၊ ၽႃႈသိူဝ်ႇ၊ ၽႃႈယၢင်၊ ၾႆးထၢတ်ႈ လႄႈ ယႃႈယႃ ၸဵမ်ၸိူဝ်းၼႆႉယူႇယဝ်ႉ။

တႆးလွတ်ႈလႅဝ်း

Photo – Pi Zom Khur