သိုၵ်းမၢၼ်ႈပိုတ်ႇဢမူႉဢဝ်တၢင်းၽိတ်း ၸွမ်ၽွင်းလူင်မိူင်းတႆး လႄႈ ၽွင်းလူင်ထႅင်ႈ (3) ၵေႃႉ လူၺ်ႈမၢႆမီႈ ၵိၼ်သူးၵိၼ်လၢပ်ႈ

မိူဝ်ႈဝႃးဝၼ်းထီႉ 16 July 2021 (လိူၼ်ပႅတ်ႇမႂ်ႇ 8 ၶမ်ႈ ပီႊတႆး 2115 ၼီႈ) ယၢမ်းၵၢင်ၶိုၼ်း 8 မူင်းၼၼ်ႉ သိုဝ်ႇၶၢဝ်ႇၸိုင်ႈမိူင်း MRTV ဢၼ်သိုၵ်းမၢၼ်ႈၵုမ်းၵမ်ဝႆႉၼၼ်ႉ ပိုၼ်ၽၢဝ်ႇၵႂႃႇဝႃႈ ၶွမ်ႇမသျိၼ်ႇတိုၵ်းတေႃး လွင်ႈၵိၼ်သူးၵိၼ်လၢပ်ႈ လႆႈၵႂႃႇပိုတ်ႇဢမူႉဢဝ်တၢင်းၽိတ်း ၸွမ်ၽွင်းလူင်မိူင်းတႆး လႄႈ ၽွင်းလူင်မိူင်းတႆးထႅင်ႈ (3) ၵေႃႉ (ၽွင်းလူင်ပၢၼ်လူင်ပွင်ၸိုင်ႈ NLD) တီႈႁူင်းပလိၵ်ႈ ဝဵင်းလူင်တူၼ်ႈတီး မိူင်းတႆးပွတ်းၸၢၼ်းၼႆယဝ်ႉ။

ၵဵဝ်ႇလူၺ်ႈလွင်ႈၼႆႉသေ သိုဝ်ႇၶၢဝ်ႇ Eleven News ဢွၵ်ႇၶၢဝ်ႇဝႆႉ မိူဝ်ႈၼႆႉဝၼ်းထီႉ 17 July 2021 ဝႃႈ ၶွမ်ႇမသျိၼ်ႇတိုၵ်းတေႃး လွင်ႈၵိၼ်သူးၵိၼ်လၢပ်ႈ ဢၼ်သိုၵ်းမၢၼ်ႈ ၵုမ်းၵမ်ဝႆႉၼၼ်ႉ  ၵူတ်ႇထတ်းတူၺ်းသေ ထူပ်းႁၼ်ဝႃႈ ၸွမ်ၽွင်းလူင်မိူင်းတႆး (ၵေႃႉၵဝ်ႇ) တွၵ်ႇတိူဝ်ႇလိၼ်းထုတ်ႉ၊ ၽွင်းလူင် ၽၢႆႇၾႆးၾႃႉလႄႈ ႁႅင်းထၢတ်ႈ (ၵေႃႉၵဝ်ႇ) လုင်းၸၢႆးသၢမ်တိပ်ႉလူင်၊ ၽွင်းလူင်ၽၢႆႇၽႅၼ်ၵၢၼ်လႄႈ ၽၼ်ႇတႃႇငိုၼ်းတွင်း ဢူးၸူဝ်းၺုၼ်ႇလုၼ်ႇ (ၵေႃႉၵဝ်ႇ) လႄႈ ၽွင်းလူင်ၽၢႆႇၸၢဝ်းၶိူဝ်းဢၢင်းသႃး(ၵေႃႉၵဝ်ႇ) တွၵ်ႇတိူဝ်ႇထုၼ်းလႅင်ႇ  ၶဝ် (4) ၵေႃႉၼႆႉ မီးလွင်ႈၵိၼ်သူးၵိၼ်လၢပ်ႈ ၼႆယဝ်ႉ။

ၼႂ်းပီႊၽၼ်ႇတႃႇငိုၼ်း 2017−2018 ၼၼ်ႉ တင်း (3) ၵေႃႉ လုတ်ႈႁၢမ်းပုၼ်ႈၽွၼ်း ၵဵဝ်ႇလွင်ႈၵၢၼ်ငိုၼ်း ဢၼ်လူဝ်ႇလႆႈ တီႈၸဝ်ႈပၢႆးမၢၵ်ႈမီး တႃႇသၢင်ႉငိုၼ်း 3,000 သႅၼ်ပၢႆ ဢၼ်ဢွင်ႇပေႉတႃႇႁပ်ႉပုၼ်ႈၽွၼ်းၵဵပ်းငိုၼ်းၶဝ်ႈ ၼႂ်းၼွင်ႁၢႆးယႃႈ (ဢိၼ်းလေး) ဝဵင်းယွင်ႁူၺ်ႈ မိူင်းတႆးပွတ်းၸၢၼ်းၼၼ်ႉ ၸွမ်ၽွင်းလူင်မိူင်းတႆးဢမ်ႇမီးၶႂၢင်ႉသေ လူတ်းယွမ်းပၼ် တႃႇႁူဝ်ပၢၵ်ႇႁႃႈသိပ်း (50%) ၊ ၵူၺ်းၵႃႈ လူတ်းယွမ်းပၼ်ယဝ်ႉသေတႃႉၵေႃႈ ငိုၼ်းဢၼ်လူဝ်ႇပၼ်ထႅင်ႈ တႃႇႁူဝ်သႅၼ် 1,700 ပၢႆၼၼ်ႉ ၸဝ်ႈပၢႆးမၢၵ်ႈမီး ဢမ်ႇပၼ်ၶိုၼ်းသေဢမ်ႇၵႃး ၽွင်းလူင်ၶဝ် ဢမ်ႇဢဝ်တၢင်းၽိတ်းၸဝ်ႈပၢႆးမၢၵ်ႈမီးထႅင်ႈ ၼႆယဝ်ႉ။

ၼႂ်းပီႊၽၼ်ႇတႃႇငိုၼ်း 2018 လိူၼ် April ထိုင် September ၼၼ်ႉ ၽွင်းလူင်ၽၢႆႇၾႆးၾႃႉ လႄႈ ႁႅင်းထၢတ်ႈ လုင်းၸၢႆးသၢမ်တိပ်ႉလူင်သမ်ႉ ဢမ်ႇမၵ်းမၼ်ႈငိုၼ်းၶွၼ်ႇ တႃႇပၼ်တီႈၸိုင်ႈမိူင်းသေ ဢဝ်ၵၢင်ၸႂ်သုၼ်ႇတူဝ် ပၼ်ၶႂၢင်ႉႁဵတ်းသၢင်ႈၵႃႈၵဵပ်းငိုၼ်းၶဝ်ႈ ၼွင်ႁၢႆးယႃႈ လူၺ်ႈဢမ်ႇလူဝ်ႇသဵင်ႈငိုၼ်းသင်လႄႈ ၼႂ်းပီႊၼၼ်ႉ ၸိုင်ႈမိူင်းလႆႈလူႉသုမ်း ငိုၼ်းၶဝ်ႈ သႅၼ်ပွင်း 10,000 ပၢႆ ၼႆယဝ်ႉ။

ထိုင်မႃးၼႂ်းပီႊၽၼ်ႇတႃႇငိုၼ်း 2019−2020 ၸွမ်ၽွင်းလူင်မိူင်းတႆး လႄႈ ၽွင်းလူင် (3) ၵေႃႉ ဢမ်ႇတၢင်ႇၼႄလႆႈ သဵၼ်ႈသၢႆမၢႆငိုၼ်းၵိုတ်း ၼႂ်းပီႊ 2018−2019 လႆႈသေ ပၼ်ၶႂၢင်ႉၽူႈမၢၵ်ႈမီးၶဝ်လူင်းတိုၼ်းႁဵတ်းသၢင်ႈပၢႆးမၢၵ်ႈမီးထႅင်ႈလႄႈ ၸိုင်ႈမိူင်း လႆႈလူႉသုမ်းငိုၼ်းၶဝ်ႈ တႃႇသၢင်ႉငိုၼ်းသႅၼ်ပွင်း 14,000 ပၢႆ ၼႆယဝ်ႉ။

ၼွၵ်ႈလိူဝ်ၼၼ်ႉ ဢူးၸူဝ်းၺုၼ်ႇလုၼ်ႇ ၽွင်းလူင်ၽၢႆႇၽႅၼ်ၵၢၼ်လႄႈ ၽၼ်ႇတႃႇငိုၼ်းတွင်း ႁပ်ႉငိုၼ်းသူးလၢပ်ႈ 100 သႅၼ်တီႈ ၶွမ်ႇပၼီႇ (2) ဢၼ် ၼႂ်းလိူၼ် October 2020 ၽွင်းပၼ်ၶႂၢင်ႉတႃႇၵေႃႇသၢင်ႈႁဵတ်းတီႈၵိုတ်းလူတ်ႉၵႃးတၢင်ႇၵုၼ်ႇ ဝဵင်းဢေးတႃႇယႃႇ ဝႃႈၼႆ။

ထႅင်ႈၽၢႆႇၼိုင်ႈၵေႃႈၸဝ်ႈပၢႆးမၢၵ်ႈမီး ဢူးၸူဝ်းမိၼ်းထုၼ်း၊ ဢူးဢွင်ႇၵျေႃႇၼၢႆႇလႄႈ မေးၼၢင်း တေႃႇတိၼ်ႇတိၼ်ႇထူၺ်း ၽွင်းလူင်းတိုၼ်းလၢင်းႁဵတ်းၵၢၼ် ၵဵပ်းငိုၼ်းၵႃႈၶဝ်ႈ ၼွင်ႁၢႆးယႃႈၼၼ်ႉ ဢမ်ႇႁဵတ်းၸွမ်းၶၵ်ႉတွၼ်ႈသေ  လႆႈၶႂၢင်ႉႁဵတ်းၵၢၼ်၊ ဢမ်ႇတႅၼ်းၼီႈ သႅၼ်ပွင်း 11,000 ပၢႆ ၼႂ်းပီႊၽၼ်ႇတႃငိုၼ်း 2018−2019 သေ ၶိုၼ်းသိုပ်ႇႁဵတ်းသၢင်ႈထႅင်ႈယဝ်ႉ ထုၵ်ႇၼီႈငိုၼ်းၸိုင်ႈမိူင်းထႅင်ႈသႅၼ်ပွင်း 14,000 ပၢႆ ၼႂ်းပီႊ ၽၼ်ႇတႃႇငိုၼ်း 2019−2020 လႄႈ ႁဵတ်းႁႂ်ႈၸိုင်ႈမိူင်း လူႉသုမ်းငိုၼ်းၶဝ်ႈတင်းၼမ်ၼႆ သိုၵ်းမၢၼ်ႈပိုၼ်ၽၢဝ်ႇဝႆႉၼင်ႇၼႆ။

ယွၼ်ႉၼၼ်လႄႈ ၶွမ်ႇမသျိၼ်ႇတိုၵ်းတေႃးလွင်ႈၵိၼ်သူးၵိၼ်လၢပ်ႈ ဢၼ်ယူႇၽၢႆႇတႂ်ႈ ဢၢမ်းၼၢတ်ႈသိုၵ်းမၢၼ်ႈၼၼ်ႉ ဢဝ်တၢင်းၽိတ်း ၸွမ်ၽွင်းလူင် မိူင်းတႆး တွၵ်ႇတိူဝ်ႇလိၼ်းထုတ်ႉ၊ ၽွင်းလူင်ၽၢႆႇၾႆးၾႃႉလႄႈ ႁႅင်းထၢတ်ႈ လုင်းၸၢႆးသၢမ်တိပ်ႉလူင်၊ ၽွင်းလူင်ၽၢႆႇၽႅၼ်ၵၢၼ် လႄႈ ၽၼ်ႇတႃႇငိုၼ်းတွင်း ဢူးၸူဝ်းၺုၼ်ႉလုၼ်ႇ၊ ၽွင်းလူင်ၽၢႆႇၸၢဝ်းၶိူဝ်းဢၢင်းသႃး တွၵ်ႇတိူဝ်ႇထုၼ်းလႅင်ႇ တီႈလုမ်းတြႃး လူၺ်ႈမၢႆမီႈမတ်ႉတႃ 55 တိုၵ်းတေႃးလွင်ႈၵိၼ်သူးၵိၼ်လၢပ်ႈ ၼႆယဝ်ႉ။

ၸဝ်ႈပၢႆးမၢၵ်ႈမီး ဢူးၸူဝ်းမိၼ်းထုၼ်း၊ ဢူးဢွင်ႇၵျေႃႇၼၢႆႇလႄႈ မေးၼၢင်း တေႃႇတိၼ်ႇတိၼ်ႇထူၺ်းၵေႃႈ ထုၵ်ႇဢဝ်တၢင်းၽိတ်း လူၺ်ႈမၢႆမီႈမတ်ႉတႃ 55/63 တိုၵ်းတေႃးလွင်ႈၵိၼ်သူးၵိၼ်လၢပ်ႈ မိူၼ်ၵၼ်ၼႆယဝ်ႉ။

တႆးလွတ်ႈလႅဝ်း