ၸုမ်းသိုၵ်းမၢၼ်ႈ ဢဝ်ၾႆးၸုတ်ႇၽဝ်ႁိူၼ်းၵူၼ်းမိူင်း

မိူဝ်ႈဝၼ်းထီႉ 16 July 2021 တပ်ႉႁူမ်ႈပွင်း ဢၼ်ပဵၼ် သိုၵ်းမၢၼ်ႈ လႄႈ တပ်ႉပႂ်ႉလႅၼ်လိၼ် BGF တင်း KNU/KNLA ပဵၼ်ပၢင်တိုၵ်းၵၼ် တီႈႁိမ်းဝၢၼ်ႈၵူးသဵၵ်ႉ ၸေႈတွၼ်ႈၽႃပုၼ်ႇ (မူတေႃး) မိူင်းယၢင်း ၼႂ်းၼႃႈလိၼ်ၵုမ်းၵမ် တပ်ႉၸုမ်း (5) KNU/KNLA သေ  ဝၢႆးပၢင်တိုၵ်းယဵၼ်ၵႂႃႇယဝ်ႉၼၼ်ႉ ၽၢႆႇသိုၵ်းမၢၼ်ႈ ဢဝ်ၾႆးၸုတ်ႇၽဝ် ႁိူၼ်းၵူၼ်းမိူင်း ၼႆယဝ်ႉ။

ယွၼ်ႉပိူဝ်ႈ ၸုမ်းသိုၵ်းမၢၼ်ႈ ယိုတ်းဢၢမ်းၼၢတ်ႈ လႄႈ တပ်ႉပႂ်ႉလႅၼ်လိၼ် BGF ႁူမ်ႈၵၼ်သေ ၸႂ်ႉႁႅင်းသိုၵ်းတင်းၼမ် ပူၼ်ႉပႅၼ်ၶဝ်ႈၼႂ်းၼႃႈလိၼ်ၵုမ်းၵမ် တပ်ႉၸုမ်း (5) KNU/KNLA လႄႈ သွင်ၽၢႆႇ ၸင်ႇလႆႈပဵၼ် ပၢင်တိုၵ်းၵၼ် ယူႇယဝ်ႉ။

ဝၢႆးသေပၢင်တိုၵ်းယဵၼ်ၵႂႃႇယဝ်ႉၼၼ်ႉ ၸုမ်းသိုၵ်းမၢၼ်ႈ  ၶဝ်ႈၵႂႃႇၼႂ်းဝၢၼ်ႈၵူးသဵၵ်ႉသေ ဢဝ်ၾႆးၸုတ်ႇၽဝ် ႁိူၼ်းၵူၼ်းဝၢၼ်ႈ  လူၺ်ႈဢမ်ႇမီးလွင်ႈမီးတၢင်းသင်၊ လင်ႁိူၼ်းၵူၼ်းဝၢၼ်ႈ ထုၵ်ႇသိုၵ်းမၢၼ်ႈ ဢဝ်ၾႆးၽဝ်ၵႂႃႇ လၢႆလင်ဢၼ်ဝႃႈၼၼ်ႉတႄႉ ဢမ်ႇပႆႇလႆႈႁူႉၸွမ်းလီလီ ဝႃႈၼႆ။

ၵူၼ်းမိူင်းၼႂ်းပိုၼ်ႉတီႈၵေႃႉၼိုင်ႈ လၢတ်ႈၼႄဝႃႈ ၼႂ်းပွတ်းတွၼ်ႈၽႃပုၼ်ႇၼၼ်ႉ သိုၵ်းမၢၼ်ႈ ၵမ်းၵမ်းယိုဝ်းမၢၵ်ႇလူင်သႂ်ႇ ၼႂ်းဝၢၼ်ႈ ဢၼ်ၵူၼ်းမိူင်းၼႂ်းပိုၼ်ႉတီႈ ယူႇသၢင်ႈၵိၼ်သဝ်းလႄႈ ႁဵတ်းႁႂ်ႈၵူၼ်းမိူင်း တူၵ်းၸႂ်ၵူဝ်ႁေ လႆႈမႆႈၸႂ်ဝႆႉယူႇ ၵူႈၶၢဝ်းယၢမ်း ဝႃႈၼႆ။

မိူဝ်ႈလဵဝ်ၵေႃႈ ၼႂ်းပွတ်းတွၼ်ႈၽႃပုၼ်ႇၼႆႉ သိုၵ်းမၢၼ်ႈ တေႃႉသူင်ႇၶဝ်ႈၼမ်ႉ တၢင်းၵိၼ် ၽိူမ်ႉႁႅင်းသိုၵ်း တူင်ႉၼိုင်ဝႆႉတင်းၼမ်လႄႈ ၸင်ႇလႆႈပဵၼ်ပၢင်တိုၵ်းၵၼ် တင်း တပ်ႉၸုမ်း (5) KNU/KNLA ယူႇၵူႈဝၼ်း ဝႃႈၼႆ။

မိူဝ်ႈဝၼ်းထီႉ 16 July 2021 ၵူၺ်းၼင်ႇၵဝ်ႇ KNU/KNLA ၶဝ်ႈလူမ်ႇတိုၵ်း တပ်ႉပၢင်သဝ်းသိုၵ်းမၢၼ်ႈ တပ်ႉမ 44 လႄႈ ၶလယ 2 သေ သွင်ႇၽၢႆႇ လႆႈပဵၼ်ပၢင်တိုၵ်းၵၼ်ယူႇ မွၵ်ႈ 1 ၸူဝ်ႈမွင်းပၢႆ ၽၢႆႇသိုၵ်းမၢၼ်ႈ တၢႆ 3 ၵေႃႉ၊ မၢတ်ႇၸဵပ်း 1 ၵေႃႉ ၼႆယဝ်ႉ။

ၽူႈမီးၸၼ်ႉ KNU/KNLA ၸဝ်ႈၼိုင်ႈလၢတ်ႈၼႄဝႃႈ ဝၢႆးသေၽၢႆႇႁဝ်းၶႃႈ ၶဝ်ႈတိုၵ်း တပ်ႉမၢၼ်ႈယဝ်ႉ ၽၢႆႇသိုၵ်းမၢၼ်ႈ ဢမ်ႇႁၢၼ်ႉၸႂ်သေ ယိုဝ်းမၢၵ်ႇလူင်ၶဝ်ႈၼႂ်းဝၢၼ်ႈ လႄႈ ႁဵတ်းႁႂ်ႈၸၢၵ်ႇမၢၵ်ႇၵႂႃႇတိူဝ်ႉၸပ်းၺႃး ၵူၼ်းဝၢၼ်ႈ မၢတ်ႇၸဵပ်း 5 ၵေႃႉ၊ ပဵၼ်ၵူၼ်းၸၢႆး 3 ၵေႃႉ လႄႈ ၽူႈယိင်း 2 ၵေႃႉသေ ၼႂ်းၼၼ်ႉ ပႃးလုၵ်ႈဢွၼ်ႇ ဢႃႇယု 13 ၶူပ်ႇ ၼိုင်ႈၵေႃႉ ၼႆယဝ်ႉ။

တႆးလွတ်ႈလႅဝ်း

Photo – Thoolei News