ဝၼ်းထီႉ 1 လိူၼ်ထူၼ်ႈသိပ်းဢဵတ်းၼႆႉ တေပိုတ်ႇၽုၺ်ႇႁူင်းႁဵၼ်းၶိုၼ်း

ၶွင်ႇသီႇသိုၵ်းမၢၼ်ႈပိုၼ်ၽၢဝ်ႇလၢတ်ႈၵႂႃႇဝႃႈ ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ် COVID-19 လူတ်းယွမ်းလူင်းမႃးယဝ်ႉလႄႈ ၼႂ်းဝၼ်းထီႉ 1 November 2021 (လိူၼ်သိပ်းဢဵတ်းလွင်ႈ 12 ၶမ်ႈ ပီႊတႆး 2115 ၼီႈ) ၼႆႉ တေပိုတ်ႇၽုၺ်ႇႁူင်းႁဵၼ်းၶိုၼ်းယဝ်ႉ ဝႃႈၼႆ။

ၶွင်ႇသီႇသိုၵ်းမၢၼ်ႈ လႆႈၵူတ်ႇထတ်း ႁူဝ်ၼပ်ႉၵူၼ်း ၼိုင်ႈသႅၼ် ၶၢဝ်းတၢင်း 14 ဝူင်ႈ ပူၼ်ႉမႃးၼႆႉသေ ဢမ်ႇလႆႈႁၼ် ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ် ၼမ်ယဝ်ႉလႄႈ ၸင်ႇလႆႈပိုၼ်ၽၢဝ်ႇ လၢတ်ႈၵႂႃႇၸိူင်ႉၼႆ။

ၵူၺ်းၵႃႈ ၸွမ်းၼင်ႇၶေႃႈပိုၼ်ၽၢဝ်ႇ ၶွမ်ႇမတီႇ ၽၢႆႇႁႄႉၵင်ႈ ၵုမ်းထိင်း ယူတ်းယႃ တၢင်းပဵၼ် COVID-19 ဢွၵ်ႇမႃးၼၼ်ႉတႄႉ ၼႂ်း 46 ၸႄႈဝဵင်း မိူၼ်ၼင်ႇ မိူင်းၶၢင် 6 ၸႄႈဝဵင်း၊ မိူင်းယၢင်းလႅင် 3 ၸႄႈဝဵင်း၊ မိူင်းယၢင်း 2 ၸႄႈဝဵင်း၊ မိူင်းၶျၢင်း 2 ၸႄႈဝဵင်း၊ တိူင်းၸႄႈၵႅင်း 1 ၸႄႈဝဵင်း၊ တိူင်းမၵူၺ်း 4 ၸႄႈဝဵင်း၊ တိူင်းမၢၼ်းတလေး 1 ၸႄႈဝဵင်း၊ မိူင်းရၶႅင်ႇ 1 ၸႄႈဝဵင်း လႄႈ မိူင်းတႆး 26 ၸႄႈဝဵင်း ၼၼ်ႉ ယွၼ်ႉၸိူဝ်ႉမႅင်းတၢင်းပဵၼ် COVID-19 တိုၵ်ႉၽႄႈလၢမ်းႁၢဝ်ႈႁႅင်းယူႇလႄႈ တေပႆႇပိုတ်ႇၽုၺ်ႇၶိုၼ်း ဝႃႈၼႆ။

ၼႂ်းမိူင်းတႆး 26 ၸႄႈဝဵင်း ဢၼ်ပႆႇပိုတ်ႇၽုၺ်ႇႁူင်းႁဵၼ်းလႆႈၼၼ်ႉ 1. ၸႄႈဝဵင်းၼွင်ၶဵဝ်၊ 2. ၸႄႈဝဵင်းၵဵင်းတုင်၊ 3. ၸႄႈဝဵင်းမိူင်းၽျၢၵ်ႈ၊ 4. ၸႄႈဝဵင်းမိူင်းယွင်း၊ 5. ၸႄႈဝဵင်းသီႇသႅင်ႇ၊ 6. ၸႄႈဝဵင်းပင်းတရႃႉ၊ 7. ၸႄႈဝဵင်းပၢင်လွင်း၊ 8. ၸႄႈဝဵင်းလွၵ်ႉၸွၵ်ႇ၊ 9. ၸႄႈဝဵင်းႁူဝ်ပူင်း၊ 10. ၸႄႈဝဵင်းၵူတ်ႉၶၢႆ၊ 11. ၸႄႈဝဵင်းၼမ်ႉၶမ်း၊ 12. ၸႄႈဝဵင်းမၢၼ်ႈပဵင်း၊ 13. ၸႄႈဝဵင်းမိူင်းသၢတ်ႇ၊ 14. ၸႄႈဝဵင်းမိူင်းတူၼ်၊ 15. ၸႄႈဝဵင်းၵုၼ်လူင်၊ 16. ၸႄႈဝဵင်းလႃႈသဵဝ်ႈ၊ 17. ၸႄႈဝဵင်းသႅၼ်ဝီ၊ 18. ၸႄႈဝဵင်းမိူင်းၼၢႆး၊ 19. ၸႄႈဝဵင်းမိူင်းပၼ်ႇ၊ 20. ၸႄႈဝဵင်းမွၵ်ႇမႆႇ၊ 21. ၸႄႈဝဵင်းလၢင်းၶိူဝ်း၊ 22. ၸႄႈဝဵင်းၵုၼ်ႁဵင်၊ 23. ၸႄႈဝဵင်းၼမ်ႉၸၢင်၊ 24. ၸႄႈဝဵင်းမိူင်းသူႈ၊ 25. ၸႄႈဝဵင်းလၢႆးၶႃႈ လႄႈ 26. ၸႄႈဝဵင်းလွႆလႅမ် ၼႆယဝ်ႉ။

46 ၸႄႈဝဵင်း ဢၼ်ပၢႆႈၸၢင်ႈပိုတ်ႇၽုၺ်ႇႁူင်းၶိုၼ်း ယွၼ်ႉၸိူဝ်ႉမႅင်းတၢင်းပဵၼ်  ဝႃႈၼႆႉသေတႃႉၵေႃႈ ၸႄႈဝဵင်းၽလၢၼ်း လႄႈ ႁႃးၶႃး ဢၼ်မီးၼႂ်းၸႄႈမိူင်းၶျၢင်းၼၼ်ႉတႄႉ ယွၼ်ႉတိုၵ်ႉမီးပၢင်တိုၵ်းယိုဝ်းၵၼ်ယူႇလႄႈ တေပႆႇၸၢင်ႈပိုတ်ႇၽုၺ်ႇ ႁူင်းႁဵၼ်းၶိုၼ်း ဝႃႈၼႆ။

သၢႆၵၢၼ်မိၼ်ၼႂ်းမိူင်းတႄႉ လႆႈတႄႇပိုတ်ႇၽုၺ်ႇမိၼ်ၵႂႃႇမႃးၶိုၼ်း မိူဝ်ႈဝၼ်းထီႉ 26 October 2021 ၼၼ်ႉယဝ်ႉသေ သၢႆၵၢၼ်မိၼ်ၽၢႆႇၼွၵ်ႈမိူင်းၼၼ်ႉၵေႃႈ တေပိုတ်ႇၽုၺ်ႇမိၼ်ၶိုၼ်း ၼႂ်းၶၢဝ်းတၢင်းဢမ်ႇႁိုင်သင်ၼႆႉဝႃႈၼႆ။

မိူဝ်ႈပူၼ်ႉမႃး လိူၼ်ထူၼ်ႈၸဵတ်း (July 2021) ၼၼ်ႉ ယူႇတီႈႁွင်ႈၵၢၼ်ၽၢႆႇပၢႆးယူႇလီ လႄႈ ၽၢႆႇလဵၼ်ႈႁႅင်း မိူင်းႁူမ်ႈတုမ် ပိုၼ်ၽၢဝ်ႇလၢတ်ႈဝႃႈ ယွၼ်ႉၸိူဝ်ႉမႅင်းတၢင်းပဵၼ် COVID-19 ၽႄႈလၢမ်းသေ ႁူင်းႁဵၼ်းလူင်ပွင်ၸိုင်ႈ ႁူင်းႁဵၼ်းပူၵ်ႉၵူဝ်ႇသုၼ်ႇတူဝ် လႄႈ ၵျွင်းမုၼ်ၸဝ်ႈဢၼ်ပိုတ်ႇသွၼ်လိၵ်ႈၸိူဝ်းၼႆႉ ႁႂ်ႈလႆႈပိၵ်ႉဢိုတ်းဝႆႉၸူဝ်ႈၶၢဝ်း ဝႃႈၼႆမႃးယူႇ။

တႆးလွတ်ႈလႅဝ်း