UN ဝႃႈ ပီႊၼႃႈမႃးၵူၼ်းမိူင်းႁူမ်ႈတုမ်ၼိုင်ႈၶိုင်ႈပၢႆတေၸၢင်ႈၵွတ်းၽၢၼ်လိူဝ်သေၼႆႉ

ၸၢတ်ႈၸိုင်ႈလုမ်ႈၾႃႉ UN ပၼ်ၾၢင်ႉလၢတ်ႈဝႃႈ ၼႂ်းပီႊ 2022 ဢၼ်တေထိုင်မႃးၼႆႉ သင်ဝႃႈငဝ်းလၢႆးဝၢၼ်ႈမိူင်းတိုၵ်ႉပဵၼ်ယူႇၸိူင်ႉၼႆ ပေႃးၼႆၸိုင် ႁူဝ်ၼပ်ႉၵူၼ်းမိူင်းႁူမ်ႈတုမ် ၼိုင်ႈၶိုင်ႈပၢႆ တေၸၢင်ႈၵွတ်းၽၢၼ်လိူဝ်သေၼႆႉ ဝႃႈၼႆ။

မိူဝ်ႈဝႃးဝၼ်းထီႉ 01 December 2021 (လိူၼ်သိပ်းသွင်လွင်ႈ 13 ၶမ်ႈ ပီႊတႆး 2115 ၼီႈ) ၸၢတ်ႈၸိုင်ႈလုမ်ႈၾႃႉ UN ပၼ်ၾၢင်ႉလၢတ်ႈဝႆႉဝႃႈ ႁူဝ်ၼပ်ႉၵူၼ်းၵွတ်းၽၢၼ် ဢၼ်ယူႇၼႂ်းဝဵင်း တေၸၢင်ႈတိူဝ်းၶိုၼ်ႈထိုင်သၢမ်ပုၼ်ႈၼႆ သိုဝ်ႇၶၢဝ်ႇ REUTERS ဢွၵ်ႇၶၢဝ်ႇဝႆႉၼင်ႇၼႆ။

ၸွမ်းၼင်ႇၽၢႆႇမုၼ်းလႅင်းၶိုၼ်ႈယႂ်ႇ ၸၢတ်ႈၸိုင်ႈလုမ်ႈၾႃႉ (United Nations Development program− UNDP) လႆႈတွင်ႈထၢမ်ၼႃႈႁိူၼ်း 1200 ပၢႆသေ ၵဵပ်းၶေႃႈမုၼ်းဝႆႉၼၼ်ႉ သင်ၸိူဝ်ႉဝႃႈ ငဝ်းလၢႆးဝၢၼ်ႈမိူင်းပႆႇမီးလွင်ႈလႅၵ်ႈလၢႆႈၸူးထိုင် လၢႆးဢုပ်ႉပိူင်ႇတီႇမူဝ်ႇၶရေႇသီႇပေႃးၼႆၸိုင် ၽူႈပၢႆးမၢၵ်ႈမီးပၢၼ်ၵၢင် တေၸၢင်ႈႁၢႆလၢႆၵႂႃႇယူႇ ၼႆယဝ်ႉ။

ၵူၼ်းၼႂ်းပိုၼ်ႉတီႈ ဢၼ်ၸုမ်း UNDP တွင်ႈထၢမ်ဝႆႉၼၼ်ႉ လၢတ်ႈဝႃႈ ငိုၼ်းဢၼ်ၵဵပ်းဝႆႉမိူဝ်ႈပူၼ်ႉမႃးၼၼ်ႉ ၸၢႆႇမူတ်းယဝ်ႉသေ တႃႇတေႁႃႁဵတ်းၵၢၼ်ထႅင်ႈၵေႃႈ ယၢပ်ႇၽိုတ်ႇႁႅင်းၼႃႇ ယွၼ်ႉၼႂ်းပိုၼ်ႉတီႈ ဢမ်ႇမီးလွင်ႈႁူမ်ႇလူမ်ႈၼႆယဝ်ႉ။

ၵမ်ႈၽွင်ႈၵေႃႈ လႆႈၶၢႆၶူဝ်းၶွင်ၸႂ်ႉတိုဝ်းမိူၼ်ၼင်ႇလူတ်ႉၵႃး၊ လူတ်ႉၶိူင်ႈၸိူဝ်းၼႆႉသေ ၵႄႈလိတ်ႈပၼ်ႁႃၼႃႈႁိူၼ်းၵႂႃႇၼႆ ၸၢတ်ႈၸိုင်ႈလုမ်ႈၾႃႉ UNDP ပိုၼ်ၽၢဝ်ႇဝႆႉၼင်ႇၼႆ။

ၸွမ်းၼင်ႇၸၢတ်ႈၸိုင်ႈလုမ်ႈၾႃႉၶူၼ်ႉၶႂႃႉၶေႃႈမုၼ်း ၼႂ်းမိူင်းႁူမ်ႈတုမ်သေ လၢမ်းၶၢတ်ႈလၢတ်ႈဝႆႉၼၼ်ႉ တေႃႈလဵဝ်ႁူဝ်ၼပ်ႉၵူၼ်းၵွတ်းၽၢၼ် ၼႂ်းမိူင်းႁူမ်ႈတုမ် မီးႁူဝ်ပၢၵ်ႇသၢဝ်းသီႇ 24.8% ပေႃးပီႊၼႃႈမႃး တေၸၢင်ႈတိူဝ်းၶိုၼ်ႈသုင်ထိုင်သွင်ပုၼ်ႈ ႁူဝ်ပၢၵ်ႇသီႇသိပ်းႁူၵ်း 46.3% ၼႆယဝ်ႉ။

တႆးလွတ်ႈလႅဝ်း