သိုၵ်းမၢၼ်ႈႁႄႉႁၢမ်ႈၵူၼ်းမိူင်း  ဢမ်ႇပၼ်ၶဝ်ႈဢွၵ်ႇဝဵင်းလၢႆးၶႃႈ

မိူဝ်ႈဝၼ်းထီႉ 19 December 2024 (လိူၼ်ၸဵင်လွင်ႈ 4 ၶမ်ႈ ပီႊတႆး 2119 ၼီႈ) ၽၢႆႇဢုပ်ႉပိူင်ႇမၢၼ်ႈ ဝဵင်းလၢႆးၶႃႈ ဢဝ်တင်းၵႃးသေ လႄႇႁႃသေႃႇ/ပၢဝ်ႇ ၸွမ်းၼႂ်းပွၵ်ႉၼႂ်းယွမ်ႇ လွင်ႈဢမ်ႇပၼ်ၽႂ်ၶဝ်ႈဢွၵ်ႇဝဵင်း ယၢမ်းႁူဝ်ၼႆ လႄႈ ႁူဝ်ၶမ်ႈ ဝႃႈၼႆ။

ၵူၼ်းမိူင်းၼႂ်းပိုၼ်ႉတီႈလၢတ်ႈၼႄဝႃႈ ႁဝ်းၶႃႈငိၼ်း ၽၢႆႇဢုပ်ႉပိူင်ႇမၢၼ်ႈၶဝ်ဝႃႈတႄႉ ပေႃးယၢမ်းၵၢင်ၼႂ်ၸဝ်ႉပႆႇထိုင် 6:00 မူင်း လႄႈ ယၢမ်းႁူဝ်ၶမ်ႈသမ်ႉပေႃးပူၼ်ႉၵႂႃႇ 18:00 မူင်းၼႆ ၽႂ်တေဢမ်ႇလႆႈၶဝ်ႈဢွၵ်ႇဝဵင်းလၢႆးၶႃႈယဝ်ႉ၊ သင်ၽႂ်တိုဝ်တၼ်သေ လတ်းၵႂႃႇၸွမ်းလၢၼ်ႇသိုၵ်းမၢၼ်ႈ ဢၼ်မီးတီႈ တၢင်းၶဝ်ႈ/ဢွၵ်ႇဝဵင်း ၼၼ်ႉၼႆ တေထုၵ်ႉတီႉၺွပ်းဢဝ်တၢင်းၽိတ်းၼႆၶႃႈ၊ ယွၼ်ႉသင်လႄႈပိုၼ်ၽၢဝ်ႇ ၸိူင်ႉၼႆၼၼ်ႉ ဢမ်ႇပႆႇလႆႈႁူႉၸွမ်း ဝႃႈၼႆ။

ၸဝ်ႈသူၼ်ၶဝ်ႈၵၢပ်ႇ ၵေႃႉၼိုင်ႈလၢတ်ႈၼႄဝႃႈ ၽွင်းၼႆႉသမ်ႉပဵၼ်ၶၢဝ်း ၵူၼ်းမိူင်းဢဝ်ၶဝ်ႈၵၢပ်ႇ လႄႈ ၵမ်ႉၼမ်ၵေႃႈ သူၼ်ၽုၵ်ႇသွမ်ႈၶွင်ၵူၼ်းမိူင်း မီးတီႈၼွၵ်ႈဝဵင်း မၢင်ၸိူဝ်းသမ်ႉသူၼ်မီးၵႆဝဵင်း ၼွၼ်းၸွမ်းသူၼ်ၵေႃႈ သမ်ႉဢမ်ႇလွတ်ႈၽေး၊ လွင်ႈၽၢႆႇဢုပ်ႉပိူင်ႇမၢၼ်ႈ ပိုၼ်ၽၢဝ်ႇၸိူင်ႉၼႆၼႆႉ ႁဵတ်းႁႂ်ႈၸဝ်ႈသူၼ်/ၸဝ်ႈႁႆႈ မီးလွင်ႈယၢပ်ႇၽိုတ်ႇၵိၼ်းၸႂ်ယူႇ၊ ပၵ်းပိူင်ၼႆႉ တေၸႂ်ႉထိုင်ဝၼ်းလႂ်ၼႆၵေႃႈ ဢမ်ႇငိၼ်းၶဝ်လၢတ်ႈပႃး ဝႃႈၼႆ။

တီႈဝဵင်းလၢႆးၶႃႈၼႆႉ သိုၵ်းမၢၼ်ႈတေတင်ႈလၢၼ်ႇၵူတ်ႇထတ်းဝႆႉ 3 ဢွင်ႈတီႈ၊ (1) ၼႃႈတပ်ႉၶလယ 64 သဵၼ်ႈတၢင်းၵႂႃႇ မိူင်းၵိုင် ၊ (2) တပ်ႉတီႈၶူဝ်ၼမ်ႉတဵင်း ဝၢၼ်ႈမၢၵ်ႇလၢင်း  သဵၼ်ႈတၢင်းၵႂႃႇ မိူင်းၼွင်၊ (3) လၢၼ်ႇၵူတ်ႇထတ်း တီႈႁိမ်းၵျွင်းတေႃးယႃႉ သဵၼ်ႈတၢင်းၵႂႃႇ ပၢင်လူင် ၼႆယဝ်ႉ။

တႆးလွတ်ႈလႅဝ်း