ပီႈၼွင်ႉတႆးၼႂ်းမိူင်းထႆး ဢဝ်ၶွင်ၵိၼ်ယႅမ်ႉ ၸွႆႈထႅမ်ပၼ် တပ်ႉသိုၵ်းၸိုင်ႈတႆး RCSS/SSA

ယိူင်းဢၢၼ်းႁႂ်းပဵၼ်ႁႅင်းၵမ်ႉၸွႆႈ ၵေႃႉသိုၵ်းၵေႃႉႁၢၼ်ၼႆလႄႈ ပီႈၼွင်ႉတႆး ၼႂ်းမိူင်းထႆး လႆႈဢဝ်ၶွင်ၵိၼ်ယႅမ်ႉၸွႆႈထႅမ်ပၼ်တီႈ ၵေႃႉသိုၵ်းတပ်ႉသိုၵ်းၸိုင်ႈတႆး RCSS/SSA တီႈငဝ်ႈၸိုင်ႈ လွႆတႆးလႅင်း ဝႃႈၼႆ။

မိူဝ်ႈဝၼ်းထီႉ 5 February 2022 (လိူၼ်သၢမ်မႂ်ႇ 5 ၶမ်ႈ ပီႊတႆး 2116 ၼီႈ)ပူၼ်ႉမႃးၼၼ်ႉ ႁူဝ်ၶိုၼ်ႈၵျွင်းတႆး ဝတ်ႉမႄႈဢိတ်ႇ ဢိၵ်ႇတင်း ပီႈၼွင်ႉတႆး ဝၢၼ်ႈမူင်ႈၵွင်ႉ၊ ဝၢၼ်ႈမႄႈသိပ်ႇ၊ ဝၢၼ်ႈမႄႈတေႃႉလႄႈ ဝၢၼ်ႈႁူၺ်ႈႁူၵ်း ဢိူင်ႇၵဵင်းလၢဝ် ၸႄႈတွၼ်ႈၵဵင်းမႆႇ ၸိုင်ႈထႆး လႆႈႁူမ်ႈၵၼ်သေ ဢဝ်ၶွင်ၵိၼ်ယႅမ်ႉမိူၼ်ၼင်ႇ ၶဝ်ႈသၢၼ် 2 ထူင်ပၢႆပွတ်း၊ ၶဝ်ႈသၢၼ်ၶူဝ်ႈသုၵ်း 4 ထူင်၊ ၽၵ်းၵၢတ်ႇသူမ်ႈ 5 ပုင်း၊ ၶဝ်ႈသွႆးမမ  40 ၽႃႇ၊ ဢီႇမဵတ်ႈႁႅင်ႈ 1 kg ၊ ၽွင်ဝၢၼ် 30 ထူင်လႄႈ ၵႃႈၼမ်ႉမၼ်းလူတ်ႉတေႃႉသူင်ႇၶူဝ်းၶွင် 1,000 (ၼိုင်ႈႁဵင်ဝၢတ်ႇ) ႁူမ်ႈတၢင်း မူတ်း တူၵ်းမႅၼ်ႈသၢင်ႉငိုၼ်းထႆး 17,700 (ၼိုင်ႈမိုၼ်ႇၸဵတ်းႁဵင်ၸဵတ်းပၵ်ႇဝၢတ်ႇ) သေ ၸွႆႈထႅမ်ပၼ် တီႈၵေႃႉသိုၵ်း တပ်ႉသိုၵ်းၸိုင်ႈတႆး RCSS/SSA တီႈငဝ်ႈၸိုင်ႈ လွႆတႆးလႅင်း ယူႇယဝ်ႉ။

ယူႇတီႈၽူႈမီးပုၼ်ႈၽွၼ်း တပ်ႉသိုၵ်းၸိုင်ႈတႆး RCSS/SSA လႆႈတၢင်တူဝ် ၵေႃႉသိုၵ်းၵေႃႉႁၢၼ်သေ ယိၼ်းၸူမ်းၶွပ်ႈၸႂ်ယႂ်ႇၼမ် တီႈၽူႈမီးၼမ်ႉၸႂ် ၽိူၵ်ႇၸိုၼ်ႈၶၢဝ်သႂ်ႁဝ်းၶဝ် တႄႉတႄႉဝႃႈဝႃႈ ယူႇယဝ်ႉ။

တႆးလွတ်ႈလႅဝ်း