ႁူင်းႁဵၼ်းတၢင်းလတ်း ငဝ်ႈၸိုင်ႈလွႆတႆးလႅင်း ၸတ်းႁဵတ်းပၢင်ပွႆးသူင်ႇသင်ႇ လုၵ်ႈႁဵၼ်းပီႊ(3) ၸုပ်ႈ (2)

ႁူင်းႁဵၼ်းၸိူဝ်ႉၸၢတ်ႈ ႁူင်းႁဵၼ်းတၢင်းလတ်း ၸတ်းႁဵတ်းပၢင်ပွႆးသူင်ႇသင်ႇ လုၵ်ႈႁဵၼ်း ၸိူဝ်းဢၼ်ႁဵၼ်းယဝ်ႉၸၼ်ႉပီႊ (3) ၸုပ်ႈ (2) တီႈႁူင်းႁဵၼ်းၸိူဝ်ႉၸၢတ်ႈ တီႈငဝ်ႈၸိုင်ႈ လွႆတႆးလႅင်း။

မိူဝ်ႈၼႆႉ ဝၼ်းထီႉ 18 February 2022 (လိူၼ်သၢမ်လွင်ႈ 3 ၶမ်ႈ ပီႊတႆး 2116 ၼီႈ) ယူႇတီႈၽူႈၵွၼ်းႁူင်းႁဵၼ်းတၢင်းလတ်း ၶူးၸၢႆးၽူႈ ဢိၵ်ႈပႃး ၶူးသွၼ်ႁူင်းႁဵၼ်း တၢင်းလတ်းလၢႆလၢႆၵေႃႉ လႆႈၸတ်းႁဵတ်း ပၢင်ပွႆးသူင်ႇသင်ႇလုၵ်ႈႁဵၼ်း ၸိူဝ်းဢၼ်ႁဵၼ်းယဝ်ႉ ပီႊ(3) သေတေဢွၵ်ႇႁၢပ်ႇထၢမ်းၵၢၼ် ၸွႆႈၼႂ်းႁွင်ႈၵၢၼ်လူင် ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ၸွမ်းၼင်ႇ တၢင်းသူင် ၽႂ်မၼ်းမီးၼၼ်ႉ ဝႃႈၼႆ။

ပၢင်ပွႆးသူင်ႇသင်ႇလုၵ်ႈႁဵၼ်းၼႆႉ ၸတ်းႁဵတ်းၵႂႃႇတီႈ ႁူင်းႁဵၼ်းၸိူဝ်ႉၸၢတ်ႈ ႁူင်းႁဵၼ်းတၢင်းလတ်ႈ ငဝ်ႈၸိုင်ႈလွႆတႆးလႅင်းသေ မီးၽူႈၶဝ်ႈၸုမ်းပွင်ၵၢၼ် ပၢႆးပၺ်ႇၺႃႇ ၶူးၸၢႆးတွၼ်းလႅင်း၊ ၽူႈၵွၼ်းႁူင်းႁဵၼ်းတၢင်းလတ်း ၶူးၸၢႆးၽူႈ၊ ၽူႈၵွၼ်းႁူင်းႁဵၼ်းၸၼ်ႉၸွမ် ၶူးၸၢႆးလွၼ်ႉတႆး၊ ၽူႈၵွင်းႁူင်းႁဵၼ်းၸၼ်ႉသုင် ၶူးၼၢင်းမူၺ်ၶိူဝ်း၊ ဢိၵ်ႇပႃး ၶူးသွၼ်လၢႆလၢႆၵေႃႉလႄႈ လုၵ်ႈႁဵၼ်းႁူင်းႁဵၼ်း ၸၼ်ႉသုင်၊ လုၵ်ႈႁဵၼ်းၸၼ်ႉၵၢင်၊ လုၵ်ႈႁဵၼ်းၸၼ်ႉငဝ်ႈ၊  လုၵ်ႈႁဵၼ်း ႁူင်းႁဵၼ်းတၢင်းလတ်း ဢိၵ်ႇပႃးပေႃႈမႄႈလုၵ်ႈႁဵၼ်း ၶိုၼ်ႈႁွတ်ႈတင်းၼမ် ဝႃႈၼႆ။

ၶၢဝ်းယၢမ်းၵၢင်ၼႂ် 09:00 မူင်း ၶူးၸၢႆးတွၼ်းလႅင်း ၽူႈၶဝ်ႈၸုမ်းပွင်ၵၢၼ်ပၢႆးပၺ်ႇၺႃႇ လႆႈမႃးမွၵ်ႇလၢတ်ႈၶေႃႈၵႂၢမ်း ပိုတ်ႇပၢင်ပွႆးသူင်ႇသင်ႇလုၵ်ႈႁဵၼ်းၶဝ်ၵႂႃႇသေ သိုပ်ႇၼၼ်ႉ ၽူႈၵွၼ်းႁူင်းႁဵၼ်းတၢင်းလတ်း ၶူးၸၢႆးၽူႈ လႆႈမွၵ်ႇလၢတ်ႈၶေႃႈၵႂၢမ်း သူင်ႇသင်ႇလုၵ်ႈႁဵၼ်းၶဝ်ၵႂႃႇၵႂၢမ်းႁႃႈၶေႃႈဝႃႈ လုၵ်ႈႁဵၼ်းၶဝ်ၵူႈၵေႃႉ ၵႂႃႇႁပ်ႉပုၼ်ႈၽွၼ်း တီႈႁွင်ႈၵၢၼ်လႂ်ၵေႃႈလီ
(1) လူဝ်ႇမေႃမီးလွင်ႈယိူၼ်ႉၵၼ်ႈ ၵွပ်ႈဝႃႈတီႈဢၼ်ႁဝ်းယူႇမႂ်ႇၼၼ်ႉ တေဢမ်ႇၸၢင်ႈမိူၼ်တီႈႁဝ်းယၢမ်ႈယူႇမႃး (2) တေလႆႈမီးၵၢၼ်လဵပ်ႈႁဵၼ်းတႃႇသေႇ  ၵႂႃႇယူႇတီႈလႂ်ၵေႃႈလီ ၵၢၼ်လဵပ်ႈႁဵၼ်းၼႆႉယႃႇပၼ်ၶၢတ်ႇ (3) တေလႆႈမေႃၸွႆႈၵၢၼ် ၵႂႃႇယူႇတီႈလႂ်ၵေႃႈ ႁႂ်ႈမေႃၸွႆႈထႅမ်ပိူၼ်ႈ၊ ယူႇဝၢၼ်ႈႁႂ်ႈၵမ်ႉဝၢၼ်ႈ ယူႇမိူင်းၵေႃႈ ႁႂ်ႈၵမ်ႉမိူင်း မိူၼ်ၼင်ႇၵႂၢမ်းမီးဝႆႉဝႃႈ ၼမ်ႉပဵင်းမိူင်းၵေႃႈ ႁိူဝ်းၶိုၼ်ႈသုင် (4) ႁႂ်ႈဝႆႉၵႃႈၶၼ်ၶၢဝ်းယၢမ်း ၶၢဝ်းယၢမ်းဢၼ်ဝႃႈၼႆႉ လမ်ႇလွင်ႈၼႃႇ ယွၼ်ႉၼၼ် ႁဝ်းယႃႇပေပၼ်ၶၢဝ်းယၢမ်းပူၼ်ႉၵႂႃႇလၢႆလၢႆ (5) လူဝ်ႇမီးယိူင်းဢၢၼ်း  ဢွၵ်ႇၵႂႃႇယူႇတီႈလႂ်ၵေႃႈလီ တူဝ်ႁဝ်းၵေႃႈလီ၊ တႃႇၵူၼ်းတင်းၼမ်ၵေႃႈလီ ႁဝ်းတိုၼ်းလူဝ်ႇမီး ယိူင်းဢၢၼ်းသုင်သုင်၊  တႃႇယိူင်းဢၢၼ်းႁဝ်းတေထိုင် ၼၼ်ႉၵေႃႈ ႁဝ်းတေလႆႈၸႂ်ႉယိပ်းတိုဝ်း ၸွမ်းပၵ်းပိူင်သေ ႁဵတ်းသၢင်ႈၵႂႃႇ ဝႃႈၼႆ။

ဝၢႆးသေၼၼ်ႉ ယင်းမီးထႅင်ႈၽူႈၵွၼ်းႁူင်းႁဵၼ်းၸၼ်ႉၸွမ်၊ ၽူႈၵွင်းႁူင်းႁဵၼ်းၸၼ်ႉသုင် လႄႈၶူးသွၼ်ၶဝ်လၢႆလၢႆၵေႃႉ လႆႈမႃးမွၵ်ႇလၢတ်ႈၶေႃႈၵႂၢမ်းသူင်ႇသင်ႇလုၵ်ႈႁဵၼ်းၶဝ်ၵႂႃႇသေ ထိုင်မႃး ယၢမ်း 10:00 မူင်း ၽူႈၶဝ်ႈၸုမ်းပွင်ၵၢၼ်ပၢႆးပၺ်ႇၺႃႇ ၶူးၸၢႆးတွၼ်းလႅင်း ၶိုၼ်းလႆႈမွၵ်ႇလၢတ်ႈ ၶေႃႈၵႂၢမ်းပိၵ်ႉပၢင်ၵႂႃႉသေ ပၢင်သူင်ႇသင်ႇလုၵ်ႈႁဵၼ်းတၢင်းလတ်း ပီႊ (3) ၸုပ်ႈ (2) ပဵၼ်ဢၼ်ယဝ်ႉတူဝ်ႈၵႂႃႇလီငၢမ်း ဝႃႈၼႆ။

ႁူင်းႁဵၼ်းတၢင်းလတ်းၼႆႉ ၶူးၸၢႆးၽူႈ လႆႈဢဝ်ပုၼ်ႈၽွၼ်းသေၵေႃႇတင်ႈမႃး မိူဝ်ႈဝၼ်းထီႉ 13 June 2018 သေ တေႁပ်ႉလုၵ်ႈႁဵၼ်းၸိူဝ်းဢႃႇယု 15 ၶူပ်ႇ ၶိုၼ်ႈၼိူဝ်လႄႈ တေလႆႈႁဵၼ်းတႃႇၶၢဝ်းတၢင်းသၢမ်ပီႊ ပီႊ(1)၊ ပီႊ(2) ပီႊ(3) ၼႆသေ ၼႂ်းၶၢဝ်းတၢင်းသၢမ်ပီႊၼႆႉ တေလႆႈႁဵၼ်းတႄႇဢဝ်ငဝ်ႈၶၢမ်ႇပိုၼ်ႉထၢၼ် လိၵ်ႈတႆး၊ လိၵ်ႈဢိင်းၵိတ်ႉ၊ ပၢႆးၼပ်ႉ၊ ပၢႆးတူင်ႇဝူင်းၵူၼ်း၊ ပၢႆးပိုၼ်း ဢိၵ်ႇပႃး ပၢႆးပၺ်ႇၺႃႇႁႃလဵင်ႉတွင်ႉ မိူၼ်ၼင်ႇၵၢၼ်ၽုၵ်ႇသွမ်ႈ၊ ၵၢၼ်ႁဵတ်းတၢင်းၵိၼ် တၢင်းယႅမ်ႉၸိူဝ်းၼႆႉ ဝႃႈၼႆ။

ၵူႈပီႊပီႊပူၼ်ႉမႃးၼႆႉၵေႃႈ ယူႇတီႈႁူင်းႁဵၼ်းၸိူဝ်ႉၸၢတ်ႈ ႁူင်းႁဵၼ်းတၢင်းလတ်း ငဝ်ႈၸိုင်ႈလွႆးတႆးလႅင်း လႆႈၸတ်းႁဵတ်းမႃး ပၢင်ပွႆးႁပ်ႉလုၵ်ႈႁဵၼ်းမႂ်ႇလႄႈသင် ပၢင်ပွႆးသူင်ႇသင်ႇလုၵ်ႈႁဵၼ်းလႄႈသင် ပုၼ်ႈတႃႇလုၵ်ႈႁဵၼ်း ဢႃႇယုယႂ်ႇ၊ မီးၵၢင်ၸႂ် ၶႂ်ႈၶိုၼ်ႈႁဵၼ်းၼၼ်ႉမႃးၵူႈပီႊပီႊသေ ပၢင်သူင်ႇသင်ႇလုၵ်ႈႁဵၼ်းပီႊၼႆႉ ပဵၼ်ၸုပ်ႈ(2) ၼႆယဝ်ႉ။

တႆးလွတ်ႈလႅဝ်း