ငဝ်ႈၸိုင်ႈလွႆတႆးလႅင်း ၸတ်းႁဵတ်းပၢင်ၽိုၵ်းၽွၼ်ႉ ထႅမ်ၼမ်ႉၵတ်ႉၶူး ပွၵ်ႈၵမ်း (2) ပီႊ 2022

ၼင်ႇႁိုဝ်ပေႃးတေပဵၼ် လွင်ႈၽိူမ်ႉထႅမ် ၼမ်ႉၵတ်ႉၶူးသွၼ်ၶဝ်ၼႆသေ ႁူင်းႁဵၼ်းၸိူဝ်ႉၸၢတ်ႈ ငဝ်ႈၸိုင်ႈလွႆတႆးလႅင်း ၸတ်းႁဵတ်းပၢင်ၽိုၵ်းၽွၼ်ႉ ထႅမ်ၼမ်ႉၵတ်ႉၶူးသွၼ် ပွၵ်ႈၵမ်း (2) ပီႊ 2022 ဝႃႈၼႆ။

မိူဝ်ႈၼႆႉ ဝၼ်းထီႉ 25 April 2022 (လိူၼ်ႁႃႈလွင်ႈ 10  ၶမ်ႈ ပီႊတႆး 2116 ၼီႈ) ႁူင်းႁဵၼ်းၸိူဝ်ႉၸၢတ်ႈ ငဝ်ႈၸိုင်ႈလွႆတႆးလႅင်း ၸတ်းႁဵတ်းပၢင်ၽိုၵ်းၽွၼ်ႉ ၽိူမ်ႉထႅမ်ၼမ်ႉၵတ်ႉၶူးသွၼ် ပွၵ်ႈၵမ်း (2) ပီႊ 2022 တီႈႁူင်းႁဵၼ်းၸိူဝ်ႉၸၢတ်ႈ ၸၼ်ႉသုင် သေ မီးၽူႈယႂ်ႇၵူၼ်းလူင် ၶွင်ႇသီႇဢဝ်ၶိုၼ်းၸိုင်ႈတႆး (RCSS) လႄႈ ႁွင်ႈၵၢၼ်လူင်ပၢႆးပၺ်ႇၺႃႇ ဢိၵ်ႇပႃး ၶူးသွၼ် မေႃသွၼ် ၶိုၼ်ႈႁွတ်ႈတင်းၼမ် ဝႃႈၼႆ။ ယၢမ်း 10:00 မူင်း ၸဝ်ႈသိုၵ်းလူင် ဢွင်ႇမျႃႉ ၽူႈၼမ်းသိုၵ်း ၶွင်ႇသီႇဢဝ်ၶိုၼ်း ၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) ၽူႈၼင်ႈၸိုင်ႈ မွၵ်ႇလၢတ်ႈၶေႃႈၵႂၢမ်း ပိုတ်ႇပၢင်ၵႂႃႇဝႃႈ “ၵဵဝ်ႇလူၺ်ႈ ၵၢၼ်ၽိုၵ်းၽွၼ်ႉ ၽိူမ်ႉထႅမ်ၼမ်ႉၵတ်ႉၶူးၼႆႉ မီးၼမ်ၵႃႈႁိုဝ်ၵေႃႈ လီၵႃႈၼၼ်ႉ ၽွၼ်းလီၵၢၼ်ၽိုၵ်းၽွၼ်ႉၼႆႉ ဢမ်ႇၵွမ်ႉ လႆႈလွင်ႈလႅၵ်ႈလၢႆႈ တၢင်းႁူႉတၢင်းႁၼ်ၵူၺ်း ယင်းတေလႆႈပႃး တၢင်းႁူႉၵၢၼ်ၶဝ်ႈဢွၵ်ႇတူင်ႇဝူင်းၵူၼ်း ၸိူဝ်းၼႆႉထႅင်ႈ  ယွၼ်ႉၼၼ်တိုၵ်းသူၼ်းထိုင် ၶူးသွၼ်ႁဝ်းၶဝ်ၵူႈၵေႃႉ ႁႂ်ႈသႂ်ႇၸႂ်ၼိူဝ် ၵၢၼ်ၽိုၵ်းၽွၼ်ႉလႄႈ ၵၢၼ်သွၼ် ဢၼ်ၽူႈပူင်သွၼ်ၶဝ် လၢတ်ႈၼၼ်ႉလီလီ၊ တႃႇတေပဵၼ်မႃးၶူးသွၼ်လီ ၼိုင်ႈၵေႃႉၼႆႉမၼ်းဢမ်ႇငၢႆႈ မၼ်းဢိင်ၼိူဝ်ၼမ်ႉၸႂ် ၸေႇတၼႃႇၸဝ်ႈၵဝ်ႇ ၼမ်ႉၵတ်ႉၸဝ်ႈၵဝ်ႇသေ ၶူးသွၼ်ဢၼ်ဝႃႈၼၼ်ႉ ပဵၼ်တီႈ ၸႂ်ယႂ်ႇတႃႇၸိူဝ်ႉၸၢတ်ႈ၊ ၸိူဝ်ႉၶိူဝ်း၊ ဝၢၼ်ႈမိူင်းႁဝ်းတႄႉတႄႉ” ၼႆယဝ်ႉ။

ဝၢႆးသေ ၸဝ်ႈသိုၵ်းလူင် ဢွင်ႇမျႃႉ မွၵ်ႇလၢတ်ႈၶေႃႈၵႂၢမ်း ပိုတ်ႇပၢင်ၵႂႃႇယဝ်ႉ ၶူးၼၢင်းမူၺ်ၶိူဝ်း ၵႅမ်ၽူႈၸတ်းၵၢၼ် ပၢႆးပၺ်ႇၺႃႇ လႆႈမႃးမွၵ်ႇလၢတ်ႈ သပ်းလႅင်းၼႄ လွင်ႈယိူင်းဢၢၼ်းဢၼ်လႆႈၸတ်းႁဵတ်း ပၢင်ၽိုၵ်းၽွၼ်ႉ ၽိူမ်ႉထႅမ်ၼမ်ႉၵတ်ႉၶူးသွၼ်သေ  သိုပ်ႇၼၼ်ႉ ၸဝ်ႈႁၢၼ် ၶမ်းၸၢမ်ႇ ၽူႈၼမ်းၼႂ်း (2) ၶွင်ႇသီႇဢဝ်ၶိုၼ်းၸိုင်ႈတႆး/တပ်သိုၵ်းၸိုင်ႈတႆး (RCSS/SSA) လႆႈမွၵ်ႇလၢတ်ႈ ၶေႃႈၵႂၢမ်း ပၼ်တၢင်းႁူႉတၢင်းႁၼ်ပၼ် ၶူးသွၼ် မေႃသွၼ်ၶဝ်ၵႂႃႇလႄႈ ၶူးၸၢႆးလၢၼ်တႆး ၽူႈၸတ်းၵၢၼ် ႁွင်ႈၵၢၼ်လူင် ပၢႆးပၺ်ႇၺႃႇ ၶွင်ႇသီႇဢဝ်ၶိုၼ်း ၸိုင်ႈတႆး (RCSS) သပ်းလႅင်းၼႄ ပိူင်ၵၢၼ်သွၼ် ၼႂ်းပၢႆးပၺ်ႇၺႃႇၵူႈတီႈတီႈသေ ထိုင်မႃးယၢမ်းၵၢင်ဝၼ်း 11:00 မူင်း ၸဝ်ႈသိုၵ်းလူင် ဢွင်ႇမျႃႉ ၶိုၼ်းမွၵ်ႇလၢတ်ႈ ၶေႃႈၵႂၢမ်း သူင်ႇသင်ႇလႄႈ ပိၵ်ႉပၼ်ပၢင်ၽိုၵ်းၽွၼ်ႉ ထႅမ်ၼမ်ႉၵတ်ႉၶူး ပွၵ်ႈၵမ်း(2) ပီႊ 2022 ၵႂႃႇ ၼႆယဝ်ႉ။

ပၢင်ၽိုၵ်းၽွၼ်ႉ ၽိူမ်ႉထႅမ်ၼမ်ႉၵတ်ႉၶူး ပွၵ်ႈၵမ်း (2) ပီႊ 2022 ၼႆႉ တေၸတ်းႁဵတ်းတႃႇၶၢဝ်းတၢင်း 19 ဝၼ်း တႄႇဢဝ်မိူဝ်ႈၼႆႉ ဝၼ်းထီႉ 25 April 2022 တေႃႇပေႃးထိုင် ဝၼ်းထီႉ 13 May 2022 ၸင်ႇတေယဝ်ႉတူဝ်ႈၼႆသေ ဢိင်ၼိူဝ် ငဝ်းလၢႆးဝၢၼ်ႈမိူင်း သုၵ်ႉယုင်ႈယူႇလႄႈသင်၊ ပီႊသွင်ပီႊမႃးၼႆႉ ယွၼ်ႉငဝ်းလၢႆး ၸိူဝ်ႉမႅင်းတၢင်းပဵၼ် COVID-19 လႄႈသင် တီႈၼိုင်ႈလႄႈတီႈၼိုင်ႈ ယၢပ်ႇၸႂ် လွင်ႈၵႂႃႇမႃးႁႃၵၼ်လႄႈ ၶူးသွၼ် ပၢႆးပၺ်ႇၺႃႇၶွင်ႇသီႇဢဝ်ၶိုၼ်းၸိုင်ႈတႆး ဢၼ်ယူႇ သဝ်းၸွမ်းၼႂ်းမိူင်းတႆး လၢႆလၢႆပိုၼ်ႉတီႈတႄႉ ဢမ်ႇလႆႈၶိုၼ်ႈႁွတ်ႈၸွမ်း ၵူၺ်းမီးၶူးသွၼ်ႁူင်းႁဵၼ်းၸိူဝ်ႉၸၢတ်ႈ ငဝ်ႈၸိုင်ႈလွႆတႆးလႅင်း၊ လွႆသၢမ်သိပ်း၊ လွႆလမ်၊ ၵွင်းမုင်ႈမိူင်း၊ လွင်ႉမၢၵ်ႇဢူဝ်းၸိူဝ်းၼႆႉ ၶဝ်ႈႁူမ်ႈၵႂႃႇၸွမ်း ၼႆယဝ်ႉ။

တႆးလွတ်ႈလႅဝ်း