မၢၼ်ႈလၵ်ႉႁႅမ်ၵိၼ် ဝူဝ်းၵႂၢႆးၵူၼ်းမိူင်း၊ ပလိၵ်ႈမၢၼ်ႈဢမ်ႇတၵ်းသဵင် ၼႂ်းၸႄႈဝဵင်းလၢႆးၶႃႈ

ၸၢဝ်းၶိူဝ်းမၢၼ်ႈ ဢၼ်ပၵ်းသဝ်းၸွမ်း ၶူဝ်သၢႆးၶၢဝ် ၼႂ်းၵႄႈၵၢင်ဝဵင်းလၢႆးၶႃႈ လႄႈ ဝၢၼ်ႈမႂ်ႇသုင် ဢိူင်ႇပုင်ႇၼိူဝ် ၸႄႈဝဵင်းလၢႆးၶႃႈၼၼ်ႉ လၵ်ႉႁႅမ်ၵိၼ်ဝူဝ်းၵႂၢႆးၵူၼ်းမိူင်း ဝႃႈၼႆ။

မိူဝ်ႈဝၼ်းထီႉ 19 June,2022 (လိူၼ်ၸဵတ်းလွင်ႈ 6 ၶမ်ႈ ပီႊတႆး 2116 ၼီႈ) ၵူၼ်းမိူင်းၼႂ်းပိုၼ်ႉတီႈၵေႃႉၼိုင်ႈ ပွင်ႇၶၢဝ်ႇမႃးဝႃႈ “ၸၢဝ်းၶိူဝ်းမၢၼ်ႈ ဢၼ်မီးတီႈၶူဝ်သၢႆးၶၢဝ် ၼႂ်းၵေႈၵၢင် ဝဵင်းလၢႆးၶႃႈ လႄႈ ဝၢၼ်ႈမႂ်ႇသုင် ဢိူင်ႇပုင်ႇၼိူဝ်ၼၼ်ႉ လၵ်ႉႁႅမ်ၵိၼ်ဝူဝ်းၵႂၢႆးၵူၼ်းမိူင်း ဢမ်ႇယွမ်း 4-5 တူဝ် ယဝ်ႉ” ဝႃႈၼႆ။

သိုပ်ႇလၢတ်ႈထႅင်ႈဝႃႈ “ဢၼ်လၵ်ႉႁႅမ်ၵိၼ် ဝူဝ်းၵႂၢႆးၵူၼ်းဝၢၼ်ႈၼႆႉ ပဵၼ်မၢၼ်ႈတုပ်းမၢၼ်ႈတၢပ်း ဢၼ်မႃးၶၢမ်းတီႈယူႇတီႈၵိၼ်သေ ပၵ်းသဝ်းၸွမ်း ၶူဝ်သၢႆးၶၢဝ်ၸိူဝ်းၼၼ်ႉဢေႃႈ၊ ၶဝ်လၵ်ႉႁႅမ်ၵိၼ် ၵူၺ်းဢမ်ႇၵႃး ဢၼ်လိူဝ်မၼ်းသမ်ႉ ၶဝ်ၶိုၼ်းႁႃၶၢႆတေႃႇပိူၼ်ႈ ႁဵတ်းၼၼ်ဢေႃႈ ၼႂ်းဝူင်ႈၼႆႉၵူၺ်း ဝူဝ်းၵူၼ်းဝၢၼ်ႈႁၢႆသီႇႁႃႈတူဝ်ယဝ်ႉၶႃႈ ႁဝ်းၶႃႈၵႂႃႇတိူင်ႇပလိၵ်ႈမၢၼ်ႈၵေႃႈ ၶဝ်တႄႉမႃးတူၺ်းယူႇ ၵူၺ်းၵႃႈ ၶဝ်ဢမ်ႇဝႃႈႁိုဝ်ၶႃႈ၊ လွင်ႈၼႆႉပေႃးတေပွႆႇဝႆႉႁဵတ်းၼႆတႄႉ ဝၢႆးၼႆႉမႃး ၶဝ်တေၸၢင်ႈယဵၼ်းပဵၼ်ၸူၼ်ဢေႃႈ၊ ယွၼ်ႉၸုမ်းၶဝ်ၵေႃႈ တေယႂ်ႇမႃးတိၵ်းတိၵ်း မိူဝ်ႈလဵဝ်ၶဝ်ၽွတ်ႈႁဵတ်းပဵၼ်ၸုမ်းပဵၼ်ၵိူင်းသေ ယူႇၸွမ်းၶူဝ်သၢႆးၶၢဝ်ၼၼ်ႉၶႃႈ” လၢတ်ႈၼႄၼင်ႇၼႆ။

သိုပ်ႇလၢတ်ႈဝႃႈ “လိူဝ်သေၼၼ်ႉ မိူဝ်ႈပူၼ်ႉမႃးဢမ်ႇႁိုင်သင်ၼႆႉ ၶဝ်ပၢႆတီႉၺွပ်းဢဝ် လုင်းၵေႃႉၼိုင်ႈ ဢၼ်ၵႂႃႇႁႃဝူဝ်းၸွမ်းၸိူဝ်းၼၼ်ႉ ဢေႃႈ၊ ၸုမ်းၶဝ်ဢၢင်ႈပေႃႉထုပ်ႉမၼ်းသေ လုင်းၵေႃႉၼၼ်ႉ တေတွင်းပၢၼ်ႇၶဝ်ၶႃႈယူဝ်ႉ ၶဝ်ၵေႃႈပွႆႇပၼ်ၶိုၼ်းယူႇၶႃႈ၊ ဢၼ်လၵ်ႉၶိုၼ်ႈ ႁိူၼ်းၵူၼ်းဝၢၼ်ႈ ၼႂ်းဝၢၼ်ႈမႂ်ႇသုင် သၢမ်လင် မိူၼ်ၼင်ႇ 1. ႁိူၼ်းလုင်းသၢင်ႇသႃႇ၊ 2. လုင်းဢေႃးၸေႇယ လႄႈ 3. ႁိူၼ်းပႃႈမၼ်ႈ ၸိူဝ်းၼၼ်ႉၵေႃႈ ပဵၼ်မၢၼ်ႈဢၼ်ယူႇၸွမ်းၸိူဝ်းၼၼ်ႉၵူၺ်းၶႃႈ ယၢမ်းလဵဝ်ၼႆႉ ၽူႈလၵ်ႉၵေႃႈလိူင်ႇၼမ်ၼႃႇယဝ်ႉ” လၢတ်ႈၼင်ႇၼႆ။

တင်ႈတႄႇ ၶွင်ႇသီႇသိုၵ်းမၢၼ်ႈ ယိုတ်းမိူင်းမႃးၼႆႉ ၽူႈလၵ်ႉၵူၼ်းၸူၼ် လိူင်ႇၼမ်မႃးၵူႈမိုဝ်ႉၵူႈဝၼ်း၊ ၶၢဝ်းၼႆႉသမ်ႉ ပဵၼ်ၶၢဝ်းၵၢၼ်ငၢၼ်း လိူင်ႇၼမ် တႃႇတေပွႆႇဝႆႉႁိူၼ်းယေးသေ ၵႂႃႇႁဵတ်းၵၢၼ်ၵေႃႈ ၵူၼ်းမိူင်းၶဝ်ဢမ်ႇလိုမ်းၸႂ်တၢင်းႁိူၼ်း ၵူဝ်မီးၽူႈလၵ်ႉၵူၼ်းၸူၼ်ၶဝ် လၵ်ႉၶဝ်ႈသွၵ်ႈတဝ်ၼႆယဝ်ႉ။

တႆးလွတ်ႈလႅဝ်း