ယွၼ်ႉပၢင်တိုၵ်းသိုၵ်းမၢၼ်ႈလႄႈ ၸုမ်းၵႅတ်ႇၶႄၵူၼ်းမိူင်းသေ ႁဵတ်းႁႂ်ႈၵူၼ်းမိူင်း လႆႈပၢႆႈၽေး တင်းၼမ်

ယွၼ်ႉပၢင်တိုၵ်းသိုၵ်းမၢၼ်ႈ လႄႈ ၸုမ်းၵႅတ်ႇၶႄၵူၼ်းမိူင်းသေ ႁဵတ်းႁႂ်ႈၵူၼ်းမိူင်း တီႈၼႂ်းၸႄႈဝဵင်းၽၢႆၶုၼ်ႇ ပွတ်းဢွၵ်ႇၼမ်ႉ လႄႈ ၸႄႈဝဵင်းယွင်ႁူၺ်ႈ ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း လႆပၢႆႈၽေးပၢင်တိုၵ်းတင်းၼမ် ဝႃႈၼႆ။

တႄႇဢဝ်ၼႂ်းၵၢင်လိူၼ် May 2022 သိုၵ်းမၢၼ်ႈလႄႈ သိုၵ်းပဢူဝ်းၽိူၵ်ႇ PNO ႁူမ်ႈၵၼ်သေ ပဵၼ်ပၢင်တိုၵ်း တင်း ၸုမ်းၵႅတ်ႇၶႄၵူၼ်းမိူင်း PDF တီႈဝၢၼ်ႈသွင်ၼၢင်းၶႄး ၸႄႈဝဵင်းၽၢႆၶုၼ်ႇ ႁၢဝ်ႈႁႅင်း ဝႃႈၼႆ။ မိူဝ်ႈဝၼ်းထီႉ 16 May 2022 (လိူၼ်ႁူၵ်းလွင်ႈ 2 ၶမ်ႈ ပီႊတႆး 2116 ၼီႈ) ၼၼ်ႉ ဝၢၼ်ႈသွင်ၼၢင်းၶႄး မွၵ်ႈ 40 လင်ႁိူၼ်း လႆႈထုၵ်ႇတင်းၵူၼ်းဢမ်ႇႁူႉၸိုဝ်ႈ/ၸုမ်း ဢဝ်ၾႆးၸုတ်ႇၽဝ်ပႅတ်ႈတင်းမူတ်း ဝႃႈၼႆ။

မိူဝ်ႈဝၼ်းထီႉ 20 May 2022 ၸုမ်းသိုၵ်းမၢၼ်ႈလႄႈ ၸုမ်းၵႅတ်ႇၶႄၵူၼ်းမိူင်း ပဵၼ်ပၢင်တိုၵ်းၵၼ် ႁၢဝ်ႈႁႅင်းသေ ႁဵတ်းႁႂ်ႈပၢင်တိုၵ်းၼႂ်းၵႄႈသွင်ၽၢႆႇ သိုပ်ႇလၢမ်းၵႂႃႇထိုင်တီႈလွႆပဝ်း ႁၢဝ်ႈႁႅင်းလႄႈ သိုၵ်းမၢၼ်ႈဢၼ်ပၵ်းတပ်ႉဝႆႉတီႈၽၢႆၶုၼ်ႇသမ်ႉ ယိုဝ်းမၢၵ်ႇလူင်ၶဝ်ႈၼႂ်းဝၢၼ်ႈၼမ်ႉသူမ်ႈ၊ ဝၢၼ်ႈလႃႈႁႄ၊ ဝၢၼ်ႈမၢၵ်ႇၶိူဝ်ၶမ်း၊ ဝၢၼ်ႈၺွင်ႇမူၼ်း၊ ဝၢၼ်ႈလိၼ်ပူၵ်ႇလူင်၊ ဝၢၼ်ႈၼႃးႁီး၊ ဝၢၼ်ႈဢုမ်ႇတိုင်း၊ ဝၢၼ်ႈၶူး၊ ဝၢၼ်ႈႁူၺ်ႈၸၢင်ႉၽိူၵ်ႇ ၸိူဝ်းၼႆႉသေ ႁဵတ်းႁႂ်ႈၵူၼ်းမိူင်း လႆႈပၢႆႈဢွၵ်ႇ ယၢၼ်ႁိူၼ်းယေးၵႂႃႇသေ ၵမ်းၼၼ်ႉသမ်ႉ လႆႈထုၵ်ႇတင်းသိုၵ်းမၢၼ်ႈ ၶဝ်ႈယႃႉသွၵ်ႈတဝ်ႈ ပေႃႉလႅဝ် ဢဝ်လၢႆၶူဝ်းၶွင်ၵူၼ်းမိူင်း မိူၼ်ၼင်ႇ− လူတ်ႉၶိူင်ႈ လူတ်ႉၵႃး၊ ၸိူဝ်ႉၽၼ်းၶဝ်ႈၵၢပ်ႇ၊ ၸၢၵ်ႈဢိတ်ႇၶဝ်ႈ ဢိၵ်ႇတင်း ၶူဝ်းၶွင်ႁိူၼ်းယေး ၸိူဝ်းမီးၵႃႈၶၼ်ၼၼ်ႉ ပေႃးဢမ်ႇၵိုတ်း ဝႃႈၼႆ။

လိူဝ်သေၸုမ်းသိုၵ်းမၢၼ်ႈ ဢဝ်လၢႆၶူဝ်းၶွင်ႁိူၼ်းယေးၵူၼ်းမိူင်းယဝ်ႉ ပေႃးၵူၼ်းမိူင်းတေပွၵ်ႈ မိူဝ်းၶိုၼ်းတီးႁိူၼ်းၼႆၵေႃႈ သိုၵ်းမၢၼ်ႈၶဝ်ဢမ်ႇပၼ်ၶဝ်ႈဝၢၼ်ႈ သေဢမ်ႇၵႃး သမ်ႉပၢႆဢဝ်ၵွင်ႈ ၸၢၵ်ႈယိုဝ်းသႂ်ႇၵမ်းလဵဝ်လႄႈ ႁဵတ်းႁႂ်ႈၵူၼ်းမိူင်းဢမ်ႇၸၢင်ႈၶဝ်ႈၼႂ်းဝၢၼ်ႈသေ လွင်ႈၶူဝ်းၶွင် ႁိူၼ်းယေး လႆႈလူႉသုမ်းၵႂႃႇၵႃႈႁိုဝ် ဢၼ်ဝႃႈၼၼ်ႉတေႉ ဢမ်ႇပႆႇလႆႈႁပ်ႉႁူႉၸွမ်း ဝႃႈၼႆ။

မိူဝ်ႈလဵဝ်ၵူၼ်းမိူင်းဢၼ်ပၢႆႈၽေးၼၼ်ႉ လႆႈပၢႆႈၵႂႃႇယူႇသွၼ်ႈသဝ်းဝႆႉတီႈ ထုင်ႉတမ်ၽၢၵ်ႇ ၸႄႈဝဵင်းသီႇသႅင်ႇ ဝၢၼ်ႈတႆး မိူၼ်ၼင်ႇ− 1. ဝၢၼ်ႈၼမ်ႉၸႄႇမႄႈ၊ 2. ဝၢၼ်ႈပၢင်ၵၢၼ်း၊ 3. ဝၢၼ်ႈၵုၼ်ၼွတ်ႈ၊ 4. ဝၢၼ်ႈၼွင်ပႃယဵၼ်ႇ၊ 5. ဝၢၼ်ႈၼွင်ၶူမ်း၊ 6. ဝၢၼ်ႈဝဵင်းလူင်၊ 7. ဝၢၼ်ႈၼွင်ၸၵႃႇ၊ 8. ဝၢၼ်ႈၼွင်၊ 9. ဝၢၼ်ႈလွႆၸေႈ၊ 10 ဝၢၼ်ႈႁေႈလႄႈ ၵမ်ႈၽွင်ႈသမ်ႉလႆႈပၢႆႈၵႂႃႇတီႈၼႂ်း ၸႄႈဝဵင်းပၢင်လွင်း 1. ဝၢၼ်ႈႁူဝ်ဝူဝ်း၊ 2. ဝၢၼ်ႈလိၼ်ၶၢၼ်၊ 3. ဝၢၼ်ႈလွႆၵဵင်ႈ သေဢမ်ႇၵႃး ၵမ်ႈၽွင်ႈၵေႃႈလႆႈပၢႆႈၵႂႃႇတီႈၼႂ်း ၸႄႈဝဵင်းယွင်ႁူၺ်ႈ ၼွင်ၼိူဝ် ၵေႃႈၵူၼ်းမိူင်းလႆႈပၢႆႈၽေးၵႂႃႇ ယူႇသွၼ်ႈသဝ်းတင်းၼမ်၊ တီႈၼႂ်းၸႄႈဝဵင်းလွႆၵေႃႇ ဝၢၼ်ႈပိင်ႈၶဵတ်ႇ လႄႈ ဝတ်ႉပိင်ႈၶဵတ်ႇၵေႃႈ မီးၵူၼ်းမိူင်းပၢႆႈၽေးၵႂႃႇယူႇသွၼ်ႈသဝ်းဝႆႉတင်းၼမ် မိူၼ်ၵၼ် ဝႃႈၼႆ။

ယွၼ်ႉသိုၵ်းမၢၼ်ႈလႄႈ သိုၵ်းပဢူဝ်းၽိူၵ်ႇ PNO ႁူမ်ႈၵၼ်သေ ပဵၼ်ပၢင်တိုၵ်းၵၼ်တင်း ၸုမ်းၵဵတ်ႇၶႄၵူၼ်းမိူင်းႁၢဝ်ႈႁႅင်းသေ ႁဵတ်းႁႂ်ႈၵူၼ်းမိူင်းၼႂ်းၸႄႈတွၼ်ႈတူၼ်ႈတီး လႆႈပၢႆႈၽေး ပၢင်တိုၵ်းတင်းၼမ် မိူၼ်ၼင်ႇ တီႈၼႂ်းဢိူင်ႇလွႆပဝ်း ၵူၼ်းမိူင်းလႆႈပၢႆႈၽေးတေမီး 1. ဝၢၼ်ႈႁူဝ်တိုင်း တႃႇလင်ႁိူၼ်း 82 လင် မီးၵူၼ်းလႆႈပၢႆႈၽေး 445 ၵေႃႉ၊ 2. ဝၢၼ်ႈၸဝ်ႈၽယႃးလွႆ တႃႇလင်ႁိူၼ်း 99 လင် မီးၵူၼ်းလႆႈပၢႆႈၽေး 508 ၵေႃႉ၊ 3. ဝၢၼ်ႈသွင်ၼၢင်းၶႄး တႃႇလင်ႁိူၼ်း 65 လင် မီးၵူၼ်းလႆႈပၢႆႈၽေး 385 ၵေႃႉ၊ 4. ဝၢၼ်ႈလွႆပဝ်း တႃႇလင်ႁိူၼ်း 225 လင် မီးၵူၼ်းလႆႈပၢႆႈၽေး 1,035 ၵေႃႉ၊ 5. ဝၢၼ်ႈၼမ်ႉသူမ်ႈ တႃႇလင်ႁိူၼ်း 45 လင် မီးၵူၼ်းလႆႈပၢႆႈၽေး 385 ၵေႃႉ၊ 6. ဝၢၼ်ႈလႃးႁႄ တႃႇလင်ႁိူၼ်း 90 လင် မီးၵူၼ်းလႆႈပၢႆႈၽေး 480 ၵေႃႉ၊ 7. ဝၢၼ်ႈမၢၵ်ႇၶိူဝ်ၶမ်း တႃႇလင်ႁိူၼ်း 65 လင် မီးၵူၼ်းလႆႈပၢႆႈၽေး  350 ၵေႃႉ၊ 8. ဝၢၼ်ႈၵုင်းမၢၵ်ႇလၢင်း တႃႇလင်ႁိူၼ်း 35 လင် မီးၵူၼ်းလႆႈပၢႆႈၽေး 180 ၵေႃႉလႄႈ လင်ႁိူၼ်းတင်းမူတ်းတေမီး 706 လင် ၵူၼ်းမိူင်းလႆႈပၢႆႈၽေးသမ်ႉမီး 3,768 ၵေႃႉ ဝႃႈၼႆ။

ၼွၵ်ႈလိူဝ်သေတီႈၼႂ်းဢိူင်ႇလွႆပဝ်းယဝ်ႉၼၼ်ႉ တီႈၼႂ်းဢိူင်ႇႁူၺ်ႈၸၢင်ႉၽိူၵ်ႇၵေႃႈ မီးၵူၼ်းမိူင်းလႆႈပၢႆႈၽေး မိူၼ်ၼင်ႇ− 1. ဝၢၼ်ႈၺွင်ႇမူၼ်း တႃႇလင်ႁိူၼ်း 75 လင် မီးၵူၼ်းလႆႈပၢႆႈၽေး 350 ၵေႃႉ၊ 2. ဝၢၼ်ႈလိၼ်ပူၵ်ႇလူင် တႃႇလင်ႁိူၼ်း 180 လင် မီးၵူၼ်းလႆႈ ပၢႆႈၽေး 800 ၵေႃႉ၊ 3. ဝၢၼ်ႈငႃးမူး တႃႇလင်ႁိူၼ်း 60 လင် မီးၵူၼ်းလႆႈပၢႆႈၽေး 600 ၵေႃႉ၊ 4. ဝၢၼ်ႈႁူၺ်ႈၸၢင်ႉၽိူၵ်ႇ တႃႇလင်ႁိူၼ်း 240 လင် မီးၵူၼ်းလႆႈပၢႆႈၽေး 1,801 ၵေႃႉ၊ 5. ဝၢၼ်ႈၼမ်ႉႁူး တႃႇလင်ႁိူၼ်း 60 လင် မီးၵူၼ်းလႆႈပၢႆႈၽေး 300 ၵေႃႉ၊ 6. ဝၢၼ်ႈၵုင်းပဝ်း တႃႇလင်ႁိူၼ်း 180 လင် မီးၵူၼ်းလႆႈပၢႆႈၽေး 620 ၵေႃႉ၊ 7. ဝၢၼ်ႈၼွင်လႅင်တႂ်ႈ တႃႇလင်ႁိူၼ်း 170 လင် မီးၵူၼ်းလႆႈပၢႆႈ 800 ၵေႃႉ၊ 8. ဝၢၼ်ႈၼွင်လႅင်ၼိူဝ် တႃႇလင်ႁိူၼ်း 210 လင် မီးၵူၼ်းလႆႈပၢႆႈၽေး 1,200 ၵေႃႉ၊ 9. ဝၢၼ်ႈသူၺ်ႇၸၢင်ႉ တႃႇလင်ႁိူၼ်း 100 လင် မီးၵူၼ်းလႆႈပၢႆႈၽေး 500 ၵေႃႉ ႁူမ်ႈလင်ႁိူၼ်း ၵူၼ်းပၢႆႈ ၽေးမီး 1,275 လင် ႁူဝ်ၼပ်ႉၵူၼ်းပၢႆႈၽေးမီး 6,671 ၵေႃႉ ဝႃႈၼႆ။

မိူၼ်ၼင်ႇၼၼ် တီႈၼႂ်းဢိူင်ႇၼႃးႁီးၵေႃႈ မီးၵူၼ်းမိူင်းလႆႈပၢႆႈၽေး တေမီးမိူၼ်ၼင်ႇ− 1. ဝၢၼ်ႈၼႃးႁီးလ တႃႇလင်ႁိူၼ်း 82 လင် မီးၵူၼ်းလႆႈၽေး 400 ၵေႃႉ၊ 2. ဝၢၼ်ႈၶူး 96 လင် မီးၵူၼ်းလႆႈပၢႆႈၽေး 470 ၵေႃႉ၊ 3. ဝၢၼ်ႈပူင်းလၢဝ်း တႃႇလင်ႁိူၼ်း 70 လင် မီးၵူၼ်းလႆႈပၢႆႈၽေး 300 ၵေႃႉ၊ 4. ဝၢၼ်ႈဢုမ်ႇတိုင်း တႃႇလင်ႁိူၼ်း 83 လင် မီးၵူၼ်းလႆႈပၢႆႈၽေး 420 ၵေႃႉ၊ 5. ဝၢၼ်ႈၼႃးၵူင်း တႃႇလင်ႁိူၼ်း 70 လင် မီးၵူၼ်းလႆႈပၢႆႈၽေး 350 ၵေႃႉ၊ 6. ဝၢၼ်ႈၵႃႇလ တႃႇလင်ႁိူၼ်း 80 လင် မီးၵူၼ်းလႆႈပၢႆႈၽေး 450 ၵေႃႉ၊ 7. ဝၢၼ်ႈလွႆၸေႇတီႇ တႃႇလင်ႁိူၼ်း 70 လင် မီးၵူၼ်းလႆႈပၢႆႈၽေး 350 ၵေႃႉ ႁူမ်ႈလင်ႁိူၼ်းတင်းမူတ်း 551 လင် ႁူဝ်ၼပ်ႉၵူၼ်းပၢႆႈၽေးတင်းမူတ်းမီး 2,740 ၵေႃႉ လႄႈ ႁူမ်ႈလင်ႁိူၼ်းၵူၼ်းမိူင်းဢၼ်လႆႈပၢႆႈၽေးတင်းမူတ်း 3 ဢိူင်ႇ တေမီး 2,532 လင် ႁူဝ်ၼပ်ႉၵူၼ်းတင်းသဵင်ႈသမ်ႉတေမီး 13,179 ၵေႃႉ ၼႆယဝ်ႉ။

မိူဝ်ႈဝၼ်းထီႉ 20 June 2022 ၼၼ်ႉ ယွၼ်ႉပၢင်တိုၵ်းၼႂ်းမိူင်းယၢင်းလႅင်သေ ႁဵတ်းႁႂ်ႈၵူၼ်းမိူင်း ဢၼ်ယူႇသၢင်ႈၵိၼ်သဝ်းတီႈၼႂ်း မိူင်းယၢင်းလႅင်ၼၼ်ႉ လႆႈပၢႆးၽေးမႃး ယူႇသွၼ်ႈသဝ်းတီႈ ၸိုင်ႈတႆးပွတ်းၸၢၼ်း တေမီးယူႇတႃႇလင်ႁိူၼ်း 545 လင်သေ ႁူဝ်ၼပ်ႉၵူၼ်းပၢႆႈၽေးသမ်ႉတေမီး 2,054 ၵေႃႉလႄႈ ၵူၼ်းပၢႆႈၽေးၸိူဝ်းၼႆႉ လႆႈၸႅၵ်ႇၵၼ်သေယူႇသဝ်းၵႂႃႇတီႈၼႂ်း − ဝၢၼ်ႈၼမ်ႉတူၵ်း၊ လွႆၽြႃး ၊လိၼ်ပူၵ်ႇတႅၵ်ႇ ၊ၵုင်းသႃႇ ၊လိၼ်လမ် ၊လုင်းၵမ်ႇ ၊ၼမ်ႉတဝ်း ၊ၼမ်ႉႁူး၊ထီႇၵႃး ၊ဝဵင်းၵဝ်ႇၸၢမ်ၵႃး ၊ဝၢၼ်ႈၵုင်းသႃႇ ၊ၵျွၵ်ႉတၢၼ်း ၊ဝဵင်းၸၢမ်ၵႃး ၊ၵုင်းၶမ်း၊မွၵ်ႇပီ  ၊ ၵျွၵ်ႉတလူင်းဢွၼ်ႇ ၊ၵုၼ်ၸၢၼ်း ၊ၵဵင်းၶမ်း ၊လွႆပုတ်း ၊ႁူဝ်ၼႃး ၊ၵုၼ်ဝူဝ်း ၊ပၢၼ်းၵၢၼ်ႇ  ၸိူဝ်းၼႆႉ ဝႃႈၼႆ။

ယွၼ်ႉပၢင်တိုၵ်းသိုၵ်းမၢၼ်ႈ တင်း ၸုမ်းၵႅတ်ႇၶႄၵူၼ်းမိူင်း PDF သေ ႁဵတ်းႁႂ်ႈၵူၼ်းမိူင်းလႆႈပွႆႇပႅတ်ႈ ႁိူၼ်းယေး ပၢႆႈၽေးႁႃတီႈလွတ်ႈၽေးၼၼ်ႉ လူဝ်ႇတၢင်းၸွႆႈထႅမ်တီႈ ၽူႈမီးၼမ်ႉၸႂ် ၸေႇတၼႃႇ ၽိူၵ်ႇၸိုၼ်ႈၶၢဝ်သႂ်ႁဝ်းၶဝ်  မိူၼ်ၼင်ႇ− ၶဝ်ႈၼမ်ႉတၢင်းၵိၼ် ၶွင်ၵိၼ်ယႅမ်ႉ၊ ၽႃႈယၢင်၊ ၽႃႈႁူမ်ႇ ၶူဝ်းၼွၼ်း၊ ဢီႈယႃ ၸႃႉၵႂႃၸိူဝ်းၼႆ ယူႇယဝ်ႉ။

တႆးလွတ်ႈလႅဝ်း