ဢိၼ်းတီးယႃး သူင်ႇတပ်ႉၶိုၵ်ႉတွၼ်း ၵႂႃႇဢဝ်ႁူမ်ႇလူမ်ႈတီႈ ဝဵင်းမူဝ်းယေး လႅၼ်လိၼ် ဢိၼ်းတီးယႃး-မိူင်းႁူမ်ႈတုမ်

ဝၢႆးသေ ၵူၼ်းမိူင်းဢိၼ်းတီးယႃး 2 ၵေႃႉ ထုၵ်ႇၺႃးယိုဝ်းတၢႆ တီႈဝဵင်းတမူး ၽၢႆႇတၢင်း မိူင်းႁူမ်ႈတုမ်ယဝ်ႉ ထိုင်မႃး ဝၼ်းထီႉ 7 July 2022 ႁိူဝ်းမိၼ်မႅင်းမီႈ တပ်ႉၶိုၵ်ႉတွၼ်း (Commando) ဢိၼ်းတီးယႃး လမ်းၼိုင်ႈ မိၼ်မႃးလူင်းတီႈ ဝဵင်းမူဝ်းယေး ၸႄႈမိူင်းမၼိပူႇရ ၸိုင်ႈမိူင်းဢိၼ်းတီးယႃး လႅၼ်လိၼ်မိူင်းဢိၼ်းတီးယႃး-မိူင်းႁူမ်ႈတုမ် ဝႃႈၼႆ။

မိူဝ်ႈဝၼ်းထီႉ 5 July 2022 ယၢမ်းဝၢႆးဝၼ်းၼၼ်ႉ ၵူၼ်းမိူင်းဢိၼ်းတီးယႃး ဢၼ်ပဵၼ်ၵူၼ်းၶိူဝ်းတမီးလ်လႄႈ ယူႇသဝ်းတီႈဝဵင်းမူဝ်းယေး 2 ၵေႃႉ ၸိုဝ်ႈႁွင်ႉ မူဝ်ႇႁၢၼ်ႇ ဢႃႇယု 28 ပီႊ လႄႈ ဢမ်ႇလယႃႇၼႃႇ ဢႃႇယု 35 ပီႊ ထုၵ်ႇၺႃးယိုဝ်းတၢႆ တီႈႁိမ်းႁူင်းႁဵၼ်း ဢ.မ.ၵ မၢႆ (4) ပွၵ်ႉၸေႃႇပႂႃး ဝဵင်းတမူး ၾင်ႇတၢင်းမိူင်းႁူမ်ႈတုမ် ၽွင်းၶဝ်သွင်ၵေႃႉ ၵႂႃႇဢႅဝ်ႇလႄႇၵူၼ်းႁူႉၸၵ်းၶဝ်ၼၼ်ႉ ဝႃႈၼႆ။

ၵူၼ်းမိူင်းၼႂ်းပိုၼ်ႉတီႈလၢတ်ႈဝႃႈ ယွၼ်ႉၵူၼ်းမိူင်းဢိၼ်းတီးယႃး 2 ၵေႃႉ ထုၵ်ႇၺႃးယိုဝ်းတၢႆ ၾင်ႇတၢင်းမိူင်းႁူမ်ႈတုမ်လႄႈ ဢိၼ်းတီးယႃး ၸင်ႇသူင်ႇ တပ်ႉၶိုၵ်ႉတွၼ်း မႃးဢဝ်ႁူမ်ႇလူမ်ႈ ၸွမ်းလႅၼ်လိၼ်ၵေႃႈပဵၼ်လႆႈယူႇ ဝႃႈၼႆ။

သိုဝ်ႇၶၢဝ်ႇ Republic ဢွၵ်ႇၶၢဝ်ႇၵႂႃႇ မိူဝ်ႈဝၼ်းထီႉ 5 July 2022 ၼၼ်ႉဝႃႈ ၵူၼ်းမိူင်းဢိၼ်းတီးယႃး 2 ၵေႃႉ ဢၼ်ထုၵ်ႇယိုဝ်းတၢႆၼၼ်ႉ ပဵၼ်ႁွႆးမိုဝ်း ၸုမ်းပျူႇၸေႃးထီး ဢၼ်ယူႇၽၢႆႇတႂ်ႈၵုမ်းၵမ် ၶွင်ႇသီႇသိုၵ်းမၢၼ်ႈ ၼႆယဝ်ႉ။

ၸုမ်းၵႅတ်ႇၶႄၵူၼ်းမိူင်း PDF ဝဵင်းတမူးၵေႃႈ ပိုၼ်ၽၢဝ်ႇဝႃႈ ၵူၼ်းမိူင်းဢိၼ်းတီးယႃး 2 ၵေႃႉၼၼ်ႉ ထုၵ်ႇပျူႇၸေႃးထီး ဢၼ်ယူႇၽၢႆႇတႂ်ႈၵုမ်းၵမ် ၶွင်ႇသီႇသိုၵ်းမၢၼ်ႈ ပိုတ်းယိုဝ်းၶႃႈႁႅမ်တၢႆ ဝႃႈၼႆ။

ၸေႃႇမိၼ်းထုၼ်း ၽၢႆႇပိုၼ်ၽၢဝ်ႇ ၶွင်ႇသီႇသိုၵ်းမၢၼ်ႈသမ်ႉ တုမ်ႉတွပ်ႇလၢတ်ႈဝႃႈ ပဵၼ်ၸုမ်း PDF ပိုတ်းယိုဝ်းတၢႆလႄႈ ၶၢပ်ႈတူဝ်တၢႆ ၵူၼ်းမိူင်းဢိၼ်းတီးယႃး 2 ၵေႃႉၼၼ်ႉၵေႃႈ လႆႈၸုတ်ႇၽဝ်ပႅတ်ႈယဝ်ႉ ဝႃႈၼႆ။

PDF ဝဵင်းတမူး လၢတ်ႈၼႄတီႈ သိုဝ်ႇၶၢဝ်ႇဝႃႈ လွင်ႈဢၼ်ၶွင်ႇသီႇသိုၵ်းမၢၼ်ႈ ၵၢဝ်ႇၼႄးဝႃႈ PDF ပိုတ်းယိုဝ်းၶႃႈႁႅမ်တၢႆ ၵူၼ်းမိူင်းဢိၼ်းတီးယႃး 2 ၵေႃႉ ဢၼ်ဝႃႈ ၼၼ်ႉ ဢမ်ႇမၢၼ်ႇမႅၼ်ႈ၊ တီႈပွၵ်ႉၸေႃႇပႂႃး ဢွင်ႈတီႈဢၼ် ၵူၼ်းမိူင်းဢိၼ်းတီးယႃး 2 ၵေႃႉ ထုၵ်ႇယိုဝ်းတၢႆၼၼ်ႉၵေႃႈ ပဵၼ်ပွၵ်ႉပျူႇၸေႃးထီးၶဝ် ပဵၼ်ယႂ်ႇဝႆႉၵူၺ်း၊ ၸုမ်း PDF ႁဝ်းၶႃႈ ဢမ်ႇလႆႈယူႇၼႂ်းဝဵင်း ဝႃႈၼႆ။

ဝၢႆးသေ ၵူၼ်းမိူင်းဢိၼ်းတီးယႃး 2 ၵေႃႉ ထုၵ်ႇပိုတ်းယိုဝ်းၶႃႈႁႅမ်တၢႆယဝ်ႉ ထိုင်မႃး ဝၼ်းထီႉ 6 July 2022 ၵူၼ်းမိူင်းဢိၼ်းတီးယႃး ဢွၼ်ၵၼ်ၼႄၵၢင်ၸႂ် ယွၼ်းၶၢပ်ႈတူဝ်တၢႆၵူၼ်းမိူင်းဢိၼ်းတီးယႃး 2 ၵေႃႉ ၼၼ်ႉသေဢမ်ႇၵႃး ဢဝ်ၾႆး ၸုတ်ႇၽဝ်ပႅတ်ႈ ႁူင်းပလိၵ်ႈမၢၼ်ႈ ဢၼ်မီးႁိမ်းလႅၼ်လိၼ်ၼၼ်ႉ ဝႃႈၼႆ။

တီႈဝဵင်းမူဝ်းယေးၼႆႉ တင်ႈတႄႇ ဝၼ်းထီႉ 6 July 2022 ၽၢႆႇဢုပ်ႉပိူင်ႇ ၼႂ်းပိုၼ်ႉတီႈၶဝ် လႆႈပိုၼ်ၽၢဝ်ႇဝႆႉဝႃႈ ၵူၼ်းမိူင်းဢိၼ်းတီးယႃး တေဢမ်ႇလႆႈၵႂႃႇၾင်ႇတၢင်း မိူင်းႁူမ်ႈတုမ်၊ ၵူၼ်းမိူင်းႁူမ်ႈတုမ်ၵေႃႈ ပေႃးဢမ်ႇမီးဝႂ်ႁပ်ႉႁွင်း တေဢမ်ႇလႆႈၶဝ်ႈမႃး ၾင်ႇတၢင်းမိူင်းဢိၼ်းတီးယႃး၊ လိူဝ်သေၼၼ်ႉ ႁၢမ်ႈၵူၼ်းမိူင်းၸူႉတုမ် 5 ၵေႃႉ ၶိုၼ်ႈၼိူဝ် လႄႈ ႁဵတ်းပဵၼ်မူႇပဵၼ်ၸုမ်းၵႂႃႇမႃးၸိူဝ်းၼႆႉ၊ ၵူၺ်းၵႃႈ ဝႃႈၼၼ်သေတႃႉ မိူဝ်ႈဝၼ်းထီႉ 7 July 2022 ယၢမ်းႁူဝ်ၶမ်ႈ 18:00 မူင်းၼၼ်ႉ ၵူၼ်းမိူင်းဢိၼ်းတီးယႃး တီႈဝဵင်းမူဝ်းယေး ဢွၵ်ႇမႃးၼႄၵၢင်ၸႂ် တုၵ်းယွၼ်းႁႂ်ႈႁဵတ်းပၼ်လွင်ႈၽဵင်ႇပဵင်းတြႃး တွၼ်ႈတႃႇ  ၵူၼ်းမိူင်းဢိၼ်းတီးယႃး 2 ၵေႃႉ ဢၼ်ထုၵ်ႇပျူႇၸေႃးထီး ပိုတ်းယိုဝ်းၶႃႈႁႅမ်တၢႆ ၼၼ်ႉယူႇ ၼႆယဝ်ႉ။

တႆးလွတ်ႈလႅဝ်း