ၾူၼ်တူၵ်းၼမ်ႉလုပ်ႇၶဝ်ႈႁိူၼ်းၵူၼ်းမိူင်း တီႈဝဵင်းလႃႈသဵဝ်ႈ

တင်ႈတႄႇမိူဝ်ႈဝၼ်းထီႉ 26 August 2022 (လိူၼ်သိပ်းမႂ်ႇ 1 ၶမ်ႈ ပီႊတႆး 2116 ၼီႈ) ယၢမ်းၵၢင်ၶမ်ႈ ၾူၼ်တူၵ်းႁႃႇယႂ်ႇႁႃႇလူင်ဢမ်ႇထၢတ်ႇလႄႈ ႁဵတ်းႁႂ်ႈၼမ်ႉႁွင်ႈ၊ ၼမ်ႉႁူၺ်ႈၼမ်ႉလွႆ ၼွင်းလုပ်ႇထူမ်ႈ ၸွမ်းသဵၼ်ႈတႃသၢႆတၢင်း လႄႈ ႁိူၼ်းယေးၵူၼ်းမိူင်း ၼႂ်းဝဵင်းလႃႈသဵဝ်ႈ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ။ တေႃႇထိုင်မိူဝ်ႈၼႆႉ ဝၼ်းထီႉ 27 August 2022 ယၢမ်းၵၢင်ၼႂ်ၵေႃႈ ၾူၼ်တိုၵ်ႉတူၵ်းဢမ်ႇပႆႇထၢတ်ႇ ဝႃႈၼႆ။

မိူဝ်ႈဝၼ်းထီႉ 26 August 2022 ၵူၺ်းၼင်ႇၵဝ်ႇ တီႈၼႂ်းၸႄႈဝဵင်းမိူင်ႈသၢတ်ႇ ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇၵေႃႈ ၾူၼ်တူၵ်းႁႅင်းသေ ႁဵတ်းႁႂ်ႈ ၼမ်ႉထူမ်ႈၼမ်ႉၼွင်းလႄႈ ၶူဝ်ၶွၼ်ႇၵရိတ်ႉ (Concrete Bridge) ဢၼ်မီးတီႈဝၢၼ်ႈႁူဝ်ၼႃးၼၼ်ႉ ၵူၼ်ႇပင်းၵႂႃႇၸွမ်းၼမ်ႉမိူၼ်ၵၼ် ဝႃႈၼႆ။

ၵွပ်ႈပိူဝ်ႈၼၼ်လႄႈ ယၢမ်းၽွင်းတေႃႈလဵဝ် ပွတ်းသၢႆသဵၼ်ႈတၢင်း မိူင်းသၢတ်ႇ-မိူင်းၵူၵ်း-မိူင်းပဵင်း ၼႆႉ ဢမ်ႇပႆႇၸၢင်ႈဢွၵ်ႇၶၢဝ်းတၢင်းၵႂႃႇမႃး ဝႃႈၼႆ။

ၶၢဝ်းႁိုဝ်ႉၶၢဝ်းၾူၼ်ပီႊၼႆႉ ယွၼ်ႉမီးၾူၼ်တူၵ်းႁႃႇယႂ်ႇႁႃႇလူင်လႄႈ ႁဵတ်းႁႂ်ႈ ပဵၼ်ၽေးသၽႃႇဝ ၼမ်ႉႁူၺ်ႈၼမ်ႉလွႆၼွင်းလူၵ်ႈ လၢႆလၢႆပိုၼ်ႉတီႈ ၼႂ်းၸိုင်ႈတႆးသေ ၵူၼ်းမိူင်းလႆႈႁပ်ႉလွင်ႈလူႉသုမ်းတင်းၼမ်တင်းလၢႆ။

တႆးလွတ်ႈလႅဝ်း