ၵႃးၽႃႇၵၼ်လႄႈ မီးၵူၼ်းလူႉသဵင်ႈ 9 ၵေႃႉ ႁိမ်းဝဵင်းပၢင်ဢူး

မိူဝ်ႈဝၼ်းထီႉ 28 August 2022 (လိူၼ်သိပ်းမႂ်ႇ 3 ၶမ်ႈ ပီႊတႆး 2116 ၼီႈ) ယၢမ်းၵၢင်ၶမ်ႈမွၵ်ႈ 20:00 မူင်းၼၼ်ႉ ၵႃးလူင် 22 မၢၵ်ႇ(ၵႃးတွႆး) လႄႈ ၵႃးလူင် 6 မၢၵ်ႇ ပဵၼ်ၽေးၵိုင်ႉၵၢင်ႉၽႃႇၺႃးၵၼ် တီႈသဵၼ်ႈတၢင်းသၢႆငိူင်ႉဝႄႈ ဝဵင်းပၢင်ဢူးသေ ႁဵတ်းႁႂ်ႈမီးၵူၼ်းလူႉသဵင်ႈ 9 ၵေႃႉ မၢတ်ႇၸဵပ်းတင်းၼမ် ၼႆယဝ်ႉ။

ၵဵဝ်ႇလူၺ်ႈလွင်ႈၼႆႉသေ ၽူႈၶဝ်ႈၸုမ်းပရႁိတ(သၼ်တိသုၶ) ၵေႃႉၼိုင်ႈ လၢတ်ႈၼႄတီႈ သိုဝ်ႇၶၢဝ်ႇဝႃႈ   ပိူင်ပဵၼ်မၼ်းတႄႉၵေႃႈ ၵႃး 22 မၢၵ်ႇ လႄႈ ၵႃး 6 မၢၵ်ႇ ၽႃႇၺႃးၵၼ်တီႈႁိမ်းပႃႇပႅၵ်ႇ သဵၼ်ႈတၢင်းသၢႆငိူင်ႉဝႄႈ ဝဵင်းပၢင်ဢူးသေ ၸုမ်းၽၢႆႇၶႄၾႆးၸႄႈဝဵင်း လႄႈ ၸုမ်းပရႁိတၶဝ် လႆႈၵႂႃႇၸွႆႈထႅမ် ဢွင်ႈတီႈပဵၼ်ၽေး ၵိုင်ႉၵၢင်ႉၼၼ်ႉဢေႃႈ၊ ယွၼ်ႉပဵၼ်ၽေးၵိုင်ႉၵၢင်ႉသေ ႁဵတ်းႁႂ်ႈ မီးၵူၼ်းလူႉသဵင်ႈတၢႆ ထင်တီႈ 5 ၵေႃႉ၊ ထႅင်ႈ 4 ၵေႃႉသမ်ႉ လူႉသဵင်ႈၵႂႃႇ ၽွင်းတိုၵ်ႉဢဝ်တူဝ်သူင်ႇယူတ်းယႃ ဝႃႈၼႆ။

“ဢွင်ႈတီႈပဵၼ်ၽေးၵိုင်ႉၵၢင်ႉၼၼ်ႉ ပဵၼ်တီႈပႃႇပႅၵ်ႇ သဵၼ်ႈတၢင်းသၢႆငိူင်ႉဝႄႈ ဝဵင်းပၢင်ဢူးသေ လႆႈႁပ်ႉႁူႉဝႃႈ ၵႃး 6 မၢၵ်ႇၼၼ်ႉ လုၵ်ႉတၢင်းမၵူၺ်း-ဢွင်ႇလၢၼ်ႇ သေ ဢွၵ်ႇၶၢဝ်းတၢင်းမႃးတၢင်းဝဵင်းပၢင်ဢူး၊ ၼႂ်းၵႃးၼၼ်ႉ မီးၵူၼ်းၶီႇၸွမ်းမွၵ်ႈ 15 ၵေႃႉ၊ ၼႂ်းၵူၼ်းဢၼ်လူႉသဵင်ႈၵႂႃႇ 9 ၵေႃႉၼၼ်ႉ ပႃးၽူႈယိင်း 3 ၵေႃႉ” ဝႃႈၼႆ။

ယွၼ်ႉပဵၼ်ၽေးၵိုင်ႉၵၢင်ႉ ၵႃးၽႃႇၺႃးၵၼ်သေ မီးၵူၼ်းမၢတ်ႇၸဵပ်းႁၢဝ်ႈႁႅင်း 7 ၵေႃႉ လႄႈ ၼႂ်းၵူၼ်းမၢတ်ႇၸဵပ်းၼၼ်ႉ ၵမ်ႈၽွင်ႈၵေႃႈ လုၵ်ႉတီႈႁူင်းယႃဝဵင်းပၢင်ဢူး လႆႈၶိုၼ်းၶၢႆႉၵႂႃႇယူတ်းယႃတူဝ်တီႈဝဵင်းလိူဝ်ႇ(မၢၼ်းတလေး) ဝႃႈၼႆ။

တႆးလွတ်ႈလႅဝ်း