Typhoon Nesat ၽတ်ႉလူမ်ႇၶဝ်ႈၼႂ်း လၢဝ်း−ဝႅတ်ႉၼၢမ်း

ၽၢႆႇၾိင်ႈၾႃႉရႃႇသီႇလၢဝ်း ပၼ်ၾၢင်ႉဝႃႈ လူမ်းလႅင်ႉလူင် Typhoon Nesat  ၽတ်ႉလူမ်ႇၶဝ်ႈၼႂ်းမိူင်းဝႅတ်ႉၼၢမ်းယဝ်ႉ တေသိုပ်ႇလၢမ်းၶဝ်ႈပႃးၼႂ်းမိူင်းလၢဝ်း ၼႂ်းဝၼ်းထီႉ 17-23 October 2022 ၼႆႉ ဝၢႆးသေလုၵ်ႉတီႈၼႂ်းၸႄႈမိူင်း Hainan မိူင်းၶႄႇ လူင်းမႃးၼၼ်ႉၼႆယူႇ။

မိူဝ်ႈဝၼ်းထီႉ 16  October 2022 လူမ်းလႅင်ႉလူင် Nesat ၼၼ်ႉ လႆႈၶဝ်ႈလူမ်ႇၼႂ်း မိူင်းၾီႇလိပ်ႇပိၼ်ႇၵႂႃႇသေ လႆႈလႅၵ်ႈလၢႆႈၵႂႃႇပဵၼ် Typhoon ယဝ်ႉ သိုပ်ႇမုင်ႈၼႃႈၵႂႃႇတၢင်း မိူင်းဝႅတ်ႉၼၢမ်း လႄႈ မိူင်းလၢဝ်း ၼႆယူႇ။

ၽၢႆႇတၢင်းလၢဝ်းၶဝ်တႄႉ လၢမ်းၶၢတ်ႈဝႆႉဝႃႈ ဝၢႆးသေၶဝ်ႈလူမ်ႇၼႂ်းမိူင်းဝႅတ်ႉၼၢမ်းယဝ်ႉ ႁႅင်းလူမ်းတေလူတ်းယွမ်းလူင်းမႃးထႅင်ႈသေ ပဵၼ်လူမ်းလႅင်ႉမႃးၶိုၼ်း ဢွၼ်တၢင်းတေၶဝ်ႈမႃး ၼႂ်းမိူင်းလၢဝ်းလႄႈ လႆႈပၼ်ၾၢင်ႉထိုင် ၽွၼ်းတုမ်ႉယွၼ်ႈ ဢၼ်တေၸၢင်ႈတုမ်ႉတိူဝ်ႉ ၼႂ်းမိူင်းလၢဝ်းၼၼ်ႉ တေႁဵတ်းႁႂ်ႈမီးၽူၼ်တူၵ်းႁၢဝ်ႈႁႅင်း လႄႈ ၾႃႉတႅၵ်ႇၾႃႉလင်ၸိူဝ်းၼႆႉမႃး ယူႇယဝ်ႉ။

သိုဝ်ႇၼႂ်းမိူင်းဝႅတ်ႉၼၢမ်းၵေႃႈ လၢႆးငၢၼ်းဝႃႈ ၽၢႆႇၽူႈမီးပုၼ်ႈၽွၼ်းမိူင်းဝႅတ်ႉၼၢမ်းၼၼ်ႉ လႆႈပၼ်ၾၢင်ႉထိုင်ၵူၼ်းမိူင်းၼႂ်းလၢႆၸႄႈတွၼ်ႈ ဢၼ်ယူႇပွတ်းႁွင်ႇၼၼ်ႉ ႁႂ်ႈပႂ်ႉတူၺ်းၸွမ်း ငဝ်းလၢႆးလႄႈ ႁၢင်ႈႁႅင်းႁပ်ႉမိုဝ်းၸွမ်း Typhoon Nesat ၼႆႉယူႇ။ လၢတ်ႈလႆႈဝႃႈ  Typhoon Nesat ၼႆႉ ပဵၼ်လူမ်းလႅင်ႉလူင်ဢၼ်ၶဝ်ႈလူမ်ႇၼႂ်းမိူင်းဝႅတ်ႉၼမ်းပီႊၼႆႉ ပဵၼ်လုၵ်ႈထီႉ 6 ယဝ်ႉ ဝႃႈၼႆ။ မိူဝ်ႈသွင်ဝၼ်းပူၼ်ႉမႃးၼၼ်ႉၵေႃႈ လူမ်းလႅင်ႉလူင် Senka  လႆႈၽတ်ႉထူပ်းၶဝ်ႈ ၼႂ်းမိူင်းဝႅတ်ႉၼၢမ်းမိူၼ်ၵၼ်လႄႈ ႁဵတ်းႁႂ်ႈမီးၵူၼ်းလူႉသဵင်ႈတၢႆၵႂႃႇ 10 ၵေႃႉ ၼႆယူႇ။

ၽၢႆႇတၢင်းႁွင်ႇၵွင်ႇၵေႃႈ လႆႈဢွၵ်ႇမႃးပိုၼ်ၽၢဝ်ႇပၼ်ၾၢင်ႉၽေး Typhoon Nesat ၼႆႉ ႁႂ်ႈပဵၼ်ၶၵ်ႉတွၼ်ႈႁၢႆႉႁႅင်း မၢႆ 3 မိူဝ်ႈဝႃးၼႆႉ လႄႈ တေၸႂ်ႉတိုဝ်းၵႂႃႇတေႃႇထိုင်ဝၢႆးဝၼ်းမိူဝ်ႈၼႆႉ ၸွမ်းလူၺ်ႈ Typhoon Nesat ၼၼ်ႉ ႁႅင်းမၼ်းႁွတ်ႈထိုင်ပႃး ၼႂ်းႁွင်ႇၵွင်ႇသေလႄႈ ႁဵတ်းႁႂ်ႈလူမ်းႁႅင်းၽတ်ႉထွင်းသႂ်ႇ တူၼ်ႈမႆႉႁၵ်းၵူၼ်ႇလူမ်ႉတဵင်လူတ်ႉ ၸိူဝ်းၼႆႉသေ ႁဵတ်းႁႂ်ႈမီးၵူၼ်းမၢတ်ႇၸဵပ်းၵႂႃႇ 7 ၵေႃႉ ၼႆယဝ်ႉ။

လူမ်းလႅင်ႉလူင် Nesat ၼႆႉၵေႃႈ ဝၢႆးသေၶဝ်ႈၽတ်ႉၼႂ်းမိူင်းၾီႇလိပ်ႇပိၼ်ႇယဝ်ႉၵႂႃႇၼၼ်ႉ လႆႈၶဝ်ႈၽတ်ႉထူဝ်းသႂ်ႇ ၵုၼ်ထႆႇဝၼ်ႇ မီးလိၼ်ၵူၼ်ႇမႃးသေ ပဵၼ်ၽေးတင်းမူတ်း 268 ပွၵ်ႈ တူဝ်ႈတင်းၵုၼ်ထႆႇဝၼ်ႇ ႁူမ်ႈထိုင်ပႃး ၵူၼ်းမိူင်း 88 ၵေႃႉ ဢၼ်ၶမ်ဝႆႉယူႇၼႂ်းလူတ်ႉ ၵိုတ်းၶမ်ဝႆႉ ၼႂ်းၵၢင်တၢင်းယွၼ်ႉလိၼ်ၵူၼ်ႇၸိူဝ်းၼႆႉၼႆယဝ်ႉ။

တႆးလွတ်ႈလႅဝ်း