ၽႅၼ်ႇလိၼ်ဝႆ တီႈၼႂ်းၸိုင်ႈထႆး ႁႅင်းသၼ်ဝႆ 4.1 ရိၵ်ႇတိူဝ်ႇ

ၽႅၼ်ႇလိၼ်ဝႆ (ဢိင်သၼ်ႇ) ၸၼ်ႉထၢၼ်ႈ 4.1 ရိၵ်ႇတိူဝ်ႇ ဢွင်ႈတီႈသုၼ်ၵၢင်ယူႇ ၼႂ်းၸႄႈဝဵင်းလွႆသၵိတ်း ၸႄႈတွၼ်ႈၵဵင်းမႆႇ မီးႁႅင်းသၼ်ဝႆတီႈၼႂ်းၵဵင်းမႆႇ လႄႈ လမ်းပုၼ်းသေတႃႉ ၵူၺ်းၵႃႈ ဢမ်ႇပႆႇမီးလၢႆးငၢၼ်း လွင်ႈလူႉသုမ်းသင် ဝႃႈၼႆ။

ၸုမ်းပႂ်ႉတူၺ်းငဝ်းလၢႆးၽႅၼ်ႇလိၼ်ဝႆ လၢႆးငၢၼ်းဝႃႈ မိူဝ်ႈၼႆႉ ဝၼ်းထီႉ 20 October 2022 (လိူၼ်သိပ်းဢဵတ်းလွင်ႈ 11 ၶမ်ႈ ပီႊတႆး 2116 ၼီႈ) ယၢမ်းမိူင်းထႆးၵၢင်ၼႂ်ၸဝ်ႉ 04:36 မူင်းၼၼ်ႉ မီးၽႅၼ်ႇလိၼ်ဝႆ ဢွင်ႈတီႈသုၼ်ၵၢင် ဢၼ်ယူႇႁိမ်းႁွမ်း ဢိူင်ႇမႄႈၶိုဝ်ႇ ၸႄႈဝဵင်းလွႆသၵဵတ်း ၸႄႈတွၼ်ႈၵဵင်းမႆႇ ၸိုင်ႈထႆး သေ ၼႂ်းႁႅင်းသၼ်ဝႆ 4.1 လိုၵ်းလူင်းတႂ်ႈလိၼ် 2 ၵီႇလူဝ်ႇမီႇတိူဝ်ႇ ၼႆယဝ်ႉ။

ၸုမ်းပႂ်ႉတူၺ်းငဝ်းလၢႆးၽႅၼ်ႇလိၼ်ဝႆ သိုပ်ႇလၢတ်ႈဝႃႈ ၽႅၼ်ႇလိၼ်ဝႆပွၵ်ႈၼႆႉ လႆႈႁပ်ႉႁူႉထိုင်ႁႅင်းသၼ်ဝႆ တီႈၼႂ်းပိုၼ်ႉတီႈ ၸႄႈဝဵင်းလွႆသၵဵတ်း၊ ၸႄႈဝဵင်းၵဵင်းမႆႇ၊ ၸႄႈဝဵင်းသၼ်ၵမ်းၽႅင်း၊ ၸႄႈဝဵင်းမႄႈရိမ်း၊ ၸႄႈဝဵင်းသၼ်သၢႆး ႁူမ်ႈပႃး ၸႄႈဝဵင်းဝၢၼ်ႈထိ ၸႄႈတွၼ်ႈလမ်းပုၼ်း လႄႈ ၸႄႈဝဵင်းတွၵ်ႇၶမ်းတႆႈ ၸႄႈတွၼ်ႈၽယဝ်း ဝႃႈၼႆ။

ၼွၵ်ႈလိူဝ်သေၼႆႉယဝ်ႉ ၼႂ်းဝၼ်းလဵဝ်ၵၼ်ၼႆႉၵူၺ်းၼင်ႇၵဝ်ႇ မိူဝ်ႈယၢမ်းမိူင်းထႆး ၵၢင်ၼႂ်ၸဝ်ႉ တီႈၼႂ်းၸႄႈဝဵင်းလွင်း ၸႄႈတွၼ်ႈၽႄႉ လႆႈမီးၽႅၼ်ႇလိၼ်ဝႆ 2 ပွၵ်ႈ ပဵၼ်မိူဝ်ႈၼႂ်းၶၢဝ်းယၢမ်း 01:39 မူင်း မီးႁႅင်းသၼ်ဝႆ 2.30 ရိၵ်ႇတိူဝ်ႇလႄႈ မိူဝ်ႈယၢမ်း 03: 26 မူင်းၼၼ်ႉသမ်ႉ မီးႁႅင်းသၼ်ဝႆ 1.5 ရိၵ်ႇတိူဝ်ႇသေ လႆႈပဵၼ်ၵႂႃႇတီႈၼႂ်းဢိူင်ႇမႄႈ ပၢၼ်း၊ ဢိူင်ႇႁူၺ်ႈဢေႃႉ ၸႄႈဝဵင်းလွင်း ၸႄႈတွၼ်ႈၽႄႉ ဝႃႈၼႆ။

မိူဝ်ႈဝၼ်းထီႉ 19 October 2022 ယၢမ်းၵၢင်ၼႂ် 08:20 မူင်းၼၼ်ႉၵေႃႈ ၸုမ်းပႂ်ႉတူၺ်းငဝ်းလၢႆးၽႅၼ်ႇလိၼ်ဝႆ ပိုတ်ႇလၢတ်ႈဝႃႈ မီးၽႅၼ်ႇလိၼ်ဝႆ တီႈၼႂ်းဢိူင်ႇမႄႈပၢၼ်း ၸႄႈဝဵင်းလွင်း ၸႄႈတွၼ်ႈၽႄႉ မီးႁႅင်းသၼ်ဝႆယူႇတီႈ 2.3 ရိၵ်ႇတိူဝ်ႇလႄႈ မိူဝ်ႈယၢမ်း 10:10 မူင်းၼၼ်ႉသမ်ႉ လႆႈၽႅၼ်ႇလိၼ်ဝႆတီႈ ၼႂ်းဢိူင်ႇႁူၺ်ႈဢေႃႉ ၸႄႈဝဵင်းလွင်း ၸႄႈတွၼ်ႈၽႄႉ မီးႁႅင်းသၼ်ဝႆယူႇတီႈ 2.0 ရိၵ်ႇတိူဝ်ႇ မိူၼ်ၵၼ် ဝႃႈၼႆ။

ၸိူဝ်ႉႁိုဝ်ၵေႃႈလီ တေႃႇထိုင်ယၢမ်းၽွင်းတေႃႈလဵဝ် ဢမ်ႇပႆႇမီးလၢႆးငၢၼ်းလွင်ႈလူႉ သုမ်းလႄႈ ၽၢႆႇၸဝ်ႈၼႃႈတီႈ ၽူႈမီးပုၼ်ႈၽွၼ်းတီႈၼႂ်းၸႄႈတွၼ်ႈၵဵင်းမႆႇ ၸီႉသင်ႇ ႁႂ်ႈၵူႈၸႄႈဝဵင်းၵူတ်ႇထတ်းလႄႈ လၢႆးငၢၼ်းလွင်ႈလူႉသုမ်း ႁူမ်ႈပႃး ၽွၼ်းတုမ်ႉယွၼ်ႈ ဢၼ်တေၸၢင်ႈလႆႈႁပ်ႉၼၼ်ႉ ဝႃႈၼႆ။

တႆးလွတ်ႈလႅဝ်း