ၽေးသၽႃႇဝၵိူတ်ႇၶိုၼ်ႈၵွပ်ႈၵူၼ်းယႃႉ

ၽေးသၽႃႇဝဢၼ်ဝႃႈၼႆႉ ပဵၼ်ၽေးဢၼ်ပေႃႇပဵၼ်မႃး လႆႈၵူႈၶိင်ႇ ဢမ်ႇပႂ်ႉ ၶၢဝ်းယၢမ်းသင် ပဵၼ်ၽေး ဢၼ်ၸၢင်ႈပေႃႇပဵၼ်မႃးႁင်းၵူၺ်း လူၺ်ႈဢမ်ႇၸၢင်ႈဢဝ် တၢင်းၽိတ်းမၼ်း လႄႈပဵၼ်ၽေး ဢၼ်ၶဵင်ႇတႃႉတေႃႇ တူဝ်မီးၸႂ်သတ်ႉတဝႃႇ တင်းလၢႆ၊ ၸဵမ်ၵူၼ်း လႄႈၶူဝ်းၶွင် ၵူႈသမ်ႇသႅၼ်ပိူင်။ ပေႃးတေလၢတ်ႈ လွင်ႈၽေးသၽႃႇဝ ဢၼ်ဝႃႈၼႆႉၵေႃႈ မီးလၢႆပိူင်လၢႆမဵဝ်းယူႇ မိူၼ်ၼင်ႇ ၽေးၼမ်ႉလူၵ်ႈၼမ်ႉထူမ်ႈ၊ လူမ်းလႅင်ႉၽတ်ႉ၊ ၾႃႉၽႃႇ၊ ၽူၼ်လူင်လူမ်းလူင်၊ ၽႅၼ်ႇလိၼ်ဝႆ (ဢိင်ႇသၼ်ႇ)၊ သိုဝ်ႇၼႃႇမိ(ႁွၼ်ၼမ်ႉလူင်ၼႂ်းပၢင်ႇလၢႆႇၽၢင်ႇၽၢပ်ႈ)၊ လိၼ်ၵူၼ်ႇ တႄႇၵႂႃႇ ၽေးၽိုၼ်းၽေးၾႆး လႄႈမႆႈပူၼ်ႉၵတ်းပူၼ်ႉ ၸိူဝ်းၼႆႉ ပဵၼ်ၽေးသၽႃႇဝသဵင်ႈသဵင်ႈယဝ်ႉ။

ၵွပ်ႈပိူဝ်ႈတူဝ်မီးၸႂ်လႄႈ ၵူၼ်းႁဝ်းၵူႈၵေႃႉၼႆႉ ပိုင်ႈဢိင်ယူႇၸွမ်းသၽႃႇဝလႄႈ တိုၼ်းတေၸၢင်ႈထူပ်း ဢမ်ႇၼမ်ၵေႃႈဢေႇ၊  ၵူၺ်းတီႈၼိုင်ႈလႄႈတီႈၼိုင်ႈ တေဢမ်ႇမိူၼ်ၵၼ်လႆႈ မၢင်တီႈၵေႃႈ ၵႆႉထူပ်းၼႃႇၽေးသၽႃႇဝၼႆႉ မၢင်တီႈၵေႃႈ ဢမ်ႇပေႃးသူႈထူပ်း၊ ၵူၺ်းပဵၼ်ၸိူင်ႉႁိုဝ်ၵေႃႈလီ ၽေးသၽႃႇဝၼႆႉ ၵိူတ်ႇၶိုၼ်ႈပဵၼ်မႃး လူၺ်ႈၵူၼ်းႁဝ်း ႁဵတ်းဢဝ်ၽွင်ႈယူႇၼႆ တိုၼ်းဢမ်ႇၽိတ်း၊ ပေႃးႁဝ်းမေႃႁၵ်ႉသႃ ထိင်းသိမ်းသၽႃႇဝလီလီၵေႃႈ သၽႃႇဝတေဢမ်ႇပၼ်ၽေးႁဝ်းၶိုၼ်း၊ ပေႃးႁဝ်းယႃႉသၽႃႇဝၵေႃႈ သၽႃႇဝ တေၶိုၼ်းယႃႉႁဝ်းၼႆပဵၼ်ၾိင်ႈၶူင်းၵၢင်ယဝ်ႉ။

မိူင်းသၼ်လွႆ ၸိုင်ႈတႆးႁဝ်းၼႆႉ ပေႃးဢဝ်ပိုၼ်ႉတီႈၼႂ်းလုမ်ႈၾႃႉဝႃႈၸိုင် ပဵၼ်တီႈသၽႃႇဝၶိုၵ်ႉၶႅမ်ႉဝႆႉတီႈၼိုင်ႈလႄႈ ဢမ်ႇပေႃးသူႈၵိူတ်ႇၶိုၼ်ႈ ၽေးသၽႃႇဝ ၼမ်ၵႃႈႁိုဝ်၊ ႁိုင်ႁိုင်ၼၢၼ်းၼၢၼ်း ၸင်ႇပေႃႇမီးမႃး ပဵၼ်ပွၵ်ႈပဵၼ်လႂ် ပဵၼ်တီႈပဵၼ်ယွမ်ႇၵူၺ်း ႁႂ်ႈၵူၼ်းမိူင်းတႆးႁဝ်း ပေႃးလူႉယႂ်ႇသုမ်းလူင်ၵေႃႈ ဢမ်ႇပဵၼ်တေႉတေႉ။ သင်တေဢဝ်တႅၵ်ႈၸင်ႈတူၺ်း တၢင်ႇတီႈတၢင်ႇမိူင်း ဢၼ်ပိူၼ်ႈထူပ်းၼၼ်ႉၼႆၸိုင် တိုၵ်ႉဝႃႈလႆႈ ပႆႇပဵင်းပိူၼ်ႈထူပ်းၼင်ႇၵဝ်ႇ။ ရႃႇသီႇဢုတု ၼႂ်းၸိုင်ႈတႆးႁဝ်းၵေႃႈ မီးသၢမ်ၶၢဝ်းၵူၺ်း ၶၢဝ်းၵတ်း၊ ၶၢဝ်းမႆႈ၊ ၶၢဝ်းၾူၼ် (ၶၢဝ်းႁိုဝ်ႉ) ၼႆႉၵူၺ်း၊ ပေႃးမႃးတူၺ်း တၢင်ႇတီႈတၢင်ႇမိူင်းၸိုင် ရႃႇသီႇဢုတု မီးယူႇသီႇၶၢဝ်း ၶၢဝ်းၵတ်း၊ ၶၢဝ်းမႆႈ၊ ၶၢဝ်းႁႅင်ႈ၊ ၶၢဝ်းၾူၼ် ၼႆလူးၵွၼ်ႇ။ ယွၼ်ႉၼၼ် တေလႆႈဝႃႈ သၽႃႇဝမိူင်းႁဝ်းၼႆႉ ပဵၼ်တီႈယူႇငၢႆႈ သႃႇယႃႇဝႆႉတီႈၼိုင်ႈ၊ ၵူၺ်းပႅၵ်ႉသမ်ႉဝႃႈၼၼ်သေတႃႉ ၼႂ်းၶၢဝ်းတၢင်း 10 ပီႊမႃးၽၢႆႇၼႆႉ ၵွပ်ႈၵူၼ်းႁဝ်း ဢမ်ႇပေႃးမေႃႁၵ်ႉသႃထိင်းသိမ်းသၽႃႇဝ ၼမ်ႉလိၼ်ႁိၼ်ၽႃႁဝ်းလႄႈ
ၵူၼ်းမိူင်းၸိုင်ႈတႆးႁဝ်း လႆႈထူပ်းၽေးသၽႃႇဝယူႇပဵၼ်ပွတ်းပဵၼ်တွၼ်ႈ။

ၽေးသၽႃႇဝ​လႄႈ ၸိုင်ႈတႆး

ၽေးသၽႃႇဝ ၼႂ်းၸိုင်ႈတႆးႁဝ်း ဢၼ်ၵႆႉမီးၵႆႉပဵၼ်ယူႇၼၼ်ႉ တေလႆႈႁၼ် ၽေးၽႅၼ်ႇလိၼ်ဝႆ (ဢိင်ႇသၼ်ႇ) လႄႈၽေးၼမ်ႉထူမ်ႈၸိူဝ်းၼႆႉယဝ်ႉ။ မိူဝ်ႈပူၼ်ႉမႃး 12 ပီႊ ၽွင်းပီႊ 2011 ၼၼ်ႉ ၼႂ်းၸိုင်ႈတႆးပွတ်းဢွၵ်ႇ မိူၼ်ၼင်ႇ တႃႈၶီႈလဵၵ်းၸိူဝ်းၼႆႉ လႆႈထူပ်းၽေးၽႅၼ်ႇလိၼ်ဝႆ (ဢိင်ႇသၼ်ႇ) ၼႆသေ ႁဵတ်းႁႂ်ႈႁိူၼ်းယေး၊ ၶူဝ်၊ သဵၼ်ႈတႃႈသၢႆတၢင်း တႄႇၵႂႃႇၸိူဝ်းၼႆႉ လူႉၵွႆၵူၼ်ႇပင်း တင်းၼမ် သေဢမ်ႇၵႃး ႁဵတ်းႁႂ်ႈၵူၼ်းလူႉသဵင်ႈသၢႆၸႂ်ၵႂႃႇ ၵမ်ႈၽွင်ႈလႄႈ ထိုင်တီႈၽူႈႁွင်ႉၵႂၢမ်း ၸၢႆးႁၢၼ်လႅင်း ပေႃးႁွင်ႉဢွၵ်ႇ ၽဵင်းၵႂၢမ်းမၢၵ်ႇ “ၽေးသၽႃႇဝလႄႈသင်ႇၶႃႇရ” ၼႆမႃးယူႇ။ ၼႂ်းၽဵင်းၵႂၢမ်းႁူဝ်ၼၼ်ႉ ထွမ်ႇယဝ်ႉ ယွၼ်ႈထိုင်မၢၵ်ႇႁူဝ်ၸႂ်တေႉတေႉ မၼ်းၸၢႆးတေႁွင်ႉပႃး လွင်ႈငိၼ်းမွင်ၸႂ်ဢွၼ်ႇ မၼ်းၼၼ်ႉ ယူႇယဝ်ႉ။

ၼႂ်းၽဵင်းၵႂၢမ်းႁူဝ်ၼႆႉ မၼ်းလၢတ်ႈၼႄဝႃႈ ၽေးသၽႃႇဝၼႆႉ ဢမ်ႇလိူၵ်ႈၸၼ်ႉထၢၼ်ႈၵူၼ်းလႄႈ ဢမ်ႇလိူၵ်ႈၽၢၼ်မီးၼႆယဝ်ႉ၊ လိူဝ်ၼၼ်ႉ မၼ်းပိူင်းၼႄဝႃႈ ပေႃးပဵၼ်မႃးယဝ်ႉ လူႉသုမ်းယဝ်ႉ ဢမ်ႇမီးဝၼ်းပွၵ်ႈမိူၼ်ၵဝ်ႇလႆႈ ၸဵမ်ပေႃႈမႄႈ ႁိူၼ်းယေး လုၵ်ႈလၢင်းၼၢင်းမေး တႄႇၵႂႃႇ တိုၼ်းဢမ်ႇ ၸၢင်ႈႁွင်ႉပွၵ်ႈၶိုၼ်းလႆႈၼၼ်ႉယဝ်ႉ။

လိူဝ်သေ ၽေးလႅၼ်ႇလိၼ်ဝႆယဝ်ႉ ၼႂ်ႈၸိုင်ႈတႆးႁဝ်းတေၸၢင်ႈမီးထႅင်ႈ ၼမ်ႉထူမ်ႈ တႄႇၵႂႃႇၸိူဝ်းၼႆႉယဝ်ႉ။ မိူၼ်ၼင်ႇၼႂ်းပီႊ 2021-2022 (ၶၢဝ်းၾူၼ်) ၼႆႉ ပီႈၼွင်ႉၵူၼ်းမိူင်းတႆးႁဝ်းၶႃႈ ပွတ်းပိုၼ်ႉသၢႆတႅမ်ႇ မိူၼ်ၼင်ႇ မိူင်းတူၼ်၊ တႃႈၶီႈလဵၵ်း၊  ၵဵင်းတုင်၊ မိူင်းသၢတ်ႇ လႄႈ ပွတ်းတူၵ်းၶူင်း − ၵႃႇလိ ၵုၼ်ႁဵင်၊ မိူင်းၼၢႆး၊ မိူင်းပၼ်ႇ ထႅင်ႈလၢႆလၢႆတီႈ လႆႈထူပ်းၽေးၼမ်ႉထူမ်ႈ ႁိူၼ်းယေး၊ သူၼ်ႁႆႈၼႃး၊ သဵၼ်ႈတႃႈသၢႆတၢင်း ၸိူဝ်းၼႆႉယဝ်ႉ၊ လိူဝ်ၼၼ်ႉဢမ်ႇၵႃး တေႃႈၼင်ႇတီႈငဝ်ႈၸိုင်ႈ လွႆတႆးလႅင်းၵေႃႈ ယင်းလႆႈၺႃးၽေးသၽႃႇဝ လိၼ်ၵူၼ်ႇၼမ်ႉထူမ်ႈမိူၼ်ၵၼ် ယွၼ်ႉၼၼ် ၽေးသၽႃႇဝၼႆႉ မၼ်းဢမ်ႇလိူၵ်ႈပိုၼ်ႉတီႈတေပဵၼ်တီႈလႂ်၊ ၵူၼ်းမေႃလုမ်းလႃး သၽႃႇဝၶႅမ်ႉၵေႃႈ တီႈၼၼ်ႉတေလွတ်ႈၽေး။

ၽေးသၽႃႇဝ ၼွၵ်ႈမိူင်း

ၼႂ်းပီႊၼႆႉပေႃးလၢတ်ႈလွင်ႈၽေးသၽႃႇဝၼႆၵေႃႈ တေၵႂႃႇဝူၼ်ႉၸပ်းထိုင် မိူင်းတူႇရၵီႇ လႄႈ မိူင်းသီးရီးယႃး ၼၼ်ႉၵမ်းလဵဝ်ယဝ်ႉ။ ၼႂ်းပီႊ 2023 မႃးၼႆႉ မိူင်းတူႇရၵီႇ လႄႈ မိူင်းသီးရီးယႃး လႆႈထူပ်းၽေးၽႅၼ်ႇလိၼ်ဝႆ(ဢိင်ႇသၼ်ႇ) သေ မီးလွင်ႈလူႉသုမ်းယႂ်ႇလူင်တေႉတေႉဝႃႈဝႃႈ။ ဢၼ်ၶဝ်တႄႇလႆႈထူပ်းၼႆႉ မိူဝ်ႈၼႂ်းဝၼ်းထီႉ 6 February 2023 ၼၼ်ႉ ဢိင်ႇသၼ်ႇတီႈမိူင်းတူႇရၵီႇသေ ၵူၼ်းမိူင်းယူႇသဝ်းၼႂ်းမိူင်း မွၵ်ႈ 10 ၸႄႈဝဵင်း လႆႈႁပ်ႉၽွၼ်းတုမ်ႉယွၼ်ႈလႄႈ ဝၢႆးလင်မႃးၵေႃႈ ၶိုၼ်းလႆႈ ထူပ်းထႅင်ႈလၢႆပွၵ်ႈလၢႆၵမ်း။ လွင်ႈလူႉသုမ်း ယွၼ်ႉၽေးသၽႃႇဝတင်းမူတ်းၼၼ်ႉ ယူႇတီႈ ၸုမ်းၸၢတ်ႈၸိုင်ႈလုမ်ႈၾႃႉ UN  လၢမ်းၶၢတ်ႈဝႆႉၼၼ်ႉတႄႉ ႁူဝ်ၵူၼ်းလူႉတၢႆႁူမ်ႈတင်းမူတ်းဢမ်ႇယွမ်း 46,104 ၵေႃႉ၊ ႁိူၼ်းတိူၵ်ႈလူႉၵွႆၸွမ်း 230,000 လင်လႄႈ သင်တေႁူမ်ႈလွင်ႈလူႉသုမ်းတင်းမူတ်းၼႆႉ ဢမ်ႇယွမ်း 34,200 လၢၼ်ႉတေႃႇလႃႇဢမေႇရိၵၢၼ်ႇ ၼႆယူႇ (ၼႆႉပဵၼ်တီႈမိူင်းတူႇရၵီႇမိူင်းလဵဝ်ၵူၺ်း) တီႈမိူင်းသီးရီးယႃးၵေႃႈ ၵူၼ်းတၢႆဢမ်ႇယွမ်း 5,800 ၵေႃႉ ၼႆယဝ်ႉ။

လိူဝ်သေ တူႇရၵီႇ လႄႈ သီးရီးယႃးယဝ်ႉ တီႈမိူင်းဢႄႇလ်သႃႇဝႃႇတေႃႇ El Salvador ၵေႃႈမီးလွင်ႈၽႅၼ်ႇလိၼ်ဝႆမိူၼ်ၵၼ်၊ ၶၢဝ်းတၢင်းသွင်ဝၼ်း ဝၼ်းထီႉ 15-16 January 2023 ၼၼ်ႉ ၽႅၼ်ႇလိၼ်ဝႆ ဢမ်ႇယွမ်း 219 ပွၵ်ႈဝႃႈၼႆဝႆႉ၊ ၵူၺ်းၵႃႈ လွင်ႈလူႉသုမ်းတႄႉ ဢမ်ႇပေႃးမီးသင်တေႉၼင်ႇၵဝ်ႇ။

လွင်ႈလူႉသုမ်းယွၼ်ႉၽေးသၽႃႇဝၼႆႉ တေလႆႈဝႃႈ ႁဝ်းဢမ်ႇလွင်းၵေႃႈသုမ်းတေႉ သုမ်းဝႃႈယဝ်ႉ၊ ၼႂ်းလုမ်ႈၽႃႉၼႆႉ ဢမ်ႇသူႈမီးမိူင်းလႂ် ဢၼ်လွတ်ႈၽေးသၽႃႇဝ ဢမ်ႇၼမ်ၵေႃႈဢေႇ တိုၼ်းလႆႈထူပ်းယူႇၼၼ်ႉယဝ်ႉ။ လိူဝ်ၼၼ်ႉဢမ်ႇၵႃး မိူဝ်ႈလိူၼ် August 2022 ၼၼ်ႉၵေႃႈ မိူင်းပႃႇၵိတ်ႇသတၢၼ်ႇ ထူပ်းၽေးၼမ်ႉထူၼ်ႈသေ မီးလွင်ႈလူႉသုမ်းၶူဝ်းၶွင် ႁိူၼ်းယေး ဢိၵ်ႇသၢႆၸႂ်ၵူၼ်း ဢၼ်လႆႈလူႉသဵင်ႈ ယွၼ်ႉၽေးသၽႃႇဝလူင်ၼၼ်ႉ ဢမ်ႇယွမ်း 1,136 ၵေႃႉ၊ တေလႆႈဝႃႈ မိူင်းဢၼ်ထူပ်းၽေးၼမ်ႉထူမ်ႈလိူဝ်ပိူၼ်ႈသုတ်း လႆႈလူႉသုမ်းၼမ်သေပိူၼ်ႈ ၼႂ်းလုမ်ႈၽႃႉ ပီႊ 2022 ၼၼ်ႉ ပဵၼ်မိူင်းပႃႇၵိတ်ႇသတၢၼ်ႇၼႆယဝ်ႉ၊  လိူဝ်ၼၼ်ႉ မိူၼ်ၼင်ႇ မိူင်းၵူဝ်းရီးယႃးၸၢၼ်း၊ မိူင်းၶႄႇ၊ မိူင်းထႆး လႄႈ လၢႆလၢႆမိူင်းၵေႃႈ ထူပ်းၺႃးၽေးၼမ်ႉထူမ်ႈ ၼမ်ယူႇမိူၼ်ၵၼ်။

ၼႂ်းလိူၼ် March 2023 ၼႆႉၵေႃႈ မိူၼ်ၼင်ႇ တီႈၵုၼ်ဢႅပ်ႉၾရိၵပွတ်းၸၢၼ်း တီႈမိူင်း Malavi ပွတ်းၸၢၼ်း၊ မိူင်း Mozambique ပွတ်းႁွင်ႇၸိူဝ်းၼႆႉ ထူပ်းလူမ်းလႅင်ႉ Cyclone Freddy ၽတ်ႉၶဝ်ႈႁၢဝ်ႈႁႅင်းလႄႈ ႁဵတ်းႁႂ်ႈၵူၼ်းလူႉတၢႆ ႁူမ်ႈၵၼ်ယူႇမွၵ်ႈ 200 ၵေႃႉ၊ မၢတ်ႇၸဵပ်း 600 ပၢႆပၢႆ၊ ႁၢႆလၢႆဝႆႉယူႇ 37 ၵေႃႉၼႆယဝ်ႉ။ ၽေးသၽႃႇဝၼႆႉ သင်တေၼပ်ႉပႃးဢၼ်ပူၼ်ႉမႃးပီႊယၢဝ်းၶၢဝ်းႁိုင်ၸိုင် ၼိုင်ႈၶႅၼ်းၼမ်ၼႅၼ်ႇယဝ်ႉ မိူၼ်ၼင်ႇဢၼ်ဢမ်ႇလိုမ်းလႆႈသေၵိုၵ်းပိုၼ်းဝႆႉယူႇတေႃႇယၢမ်းလဵဝ်ၼႆႉၵေႃႈ မိူဝ်ႈပီႊ 2008 မိူင်းႁူမ်ႈတုမ်မၢၼ်ႈထူပ်းၽေး လူမ်းလႅင်ႉလူင် သၢႆႇၶလူၼ်း ၼႃႇၵိတ်ႉသ် (Cyclone Nargis)၊ ၼႂ်းပီႊ 2004 မိူင်းထႆးထူပ်းၽေး သိုဝ်ႇၼႃႇမိ (ႁွၼ်ၼမ်ႉလူင်ၼႂ်းပၢင်ႇလၢႆႇၽၢင်ႇၽၢပ်ႈ)၊ တေႃႈၼင်ႇၼၼ် ပီႊ 2011 မိူင်းၵျႃႇပၢၼ်ႇ ထူပ်းၽေးသိုဝ်ႇၼႃႇမိထႅင်ႈ၊ ၼႂ်းပီႊ 2012 ၼႂ်းၵုၼ်ယူးရူပ်ႉ ထူပ်းၽေးၵတ်းႁႅင်းပူၼ်ႉ မႄႈၼမ်ႉလူင်ယဵၼ်းပဵၼ်ၼမ်ႉၶႅင် ၵူၼ်းလူႉတၢႆမၢၵ်ႇမိူဝ် ယွၼ်ႉႁႅင်းၵတ်းတင်းၼမ်တႄႇၵႂႃႇ ၸိူဝ်းၼႆႉယဝ်ႉ။

ၽေးသၽႃႇဝၵိူတ်ႇၶိုၼ်ႈယွၼ်ႉသင်?

ဢၼ်ၽေးသၽႃႉဝၵိူတ်ႇၶိုၼ်ႈပဵၼ်မႃးယူႇၼႆႉ ပဵၼ်ယွၼ်ႉၵူၼ်း ႁဝ်းႁဵတ်းဢဝ်ၽွင်ႈယူႇ ၼၼ်ႉယဝ်ႉ။ မိူၼ်ၼင်ႇ ႁူင်းၸၢၵ်ႈလူင်၊ ၶုတ်းၶမ်း၊ ၶုတ်းၽွႆႈ (ထၢၼ်ႇႁိၼ်) ၸူင်လိၼ်ၸိူဝ်းၼႆႉ ၵွပ်ႈႁဵတ်းႁႂ်ႈလိၼ်လုၵ်းလိၼ်ငၢၵ်ႈလႄႈ ထိုင်ၶိင်ႇႁိုဝ်ႉၶိင်ႇၾူၼ်မႃး လိၼ်ၶိုၼ်းသုတ်ႉၶၢႆႉႁႃၵၼ် တႄႇၵႂႃႇၸိူဝ်းၼႆႉ ၸၢင်ႈပဵၼ်မႃးဢိင်ႇသၼ်ႇယူႇၼႆၼၼ်ႉ ၵူၼ်းႁဝ်းႁူႉယူႇႁင်းၽႂ်မၼ်း။

ဢၼ်ၼမ်ႉလႆႈလူၵ်ႈလႆႈထူမ်ႈၵေႃႈ ပဵၼ်ယွၼ်ႉၵူၼ်းပႃးၽွင်ႈယူႇ ၵမ်ႈၽွင်ႈယႃႉပႃႇမႆႉပႃႇတွၵ်ႇ၊ ၵမ်ႈၽွင်ႈတဵင်ၽၢႆလူင်တႄႇၵႂႃႇၸိူဝ်းၼႆႉလႄႈ ၸင်ႇပဵၼ်မႃးၼမ်ႉလူၵ်ႈၼမ်ႉထူမ်ႈယဝ်ႉ။ သၽႃႇဝၼႆႉ ပေႃးႁဝ်းယႃႉမၼ်းၵေႃႈ ဝၼ်းၼိုင်ႈမၼ်းၶိုၼ်းတေယႃႉႁဝ်းၶိုၼ်း ၼႆႉပဵၼ်ၾိင်ႈၶူင်းၵၢင်ယဝ်ႉ။ ၵွပ်ႈၼႆ ၼင်ႇႁိုဝ်ႁဝ်းပေႃးတေလွတ်ႈၽေးသၽႃႇဝၼၼ်ႉ ႁဝ်းလူဝ်ႇဢွၼ်ၵၼ်ထိင်းသိမ်း သၽႃႇဝ ႁႂ်ႈလီ ႁႂ်ႈၶႅမ်ႉ သေၵမ်းၼႆ….။

လွမ်ႉမိူင်း-ၵေးသီး

တႆးလွတ်ႈလႅဝ်း

ဢၢင်ႈဢိင် – www. taifreedom.com