ဢိင်ႇသၼ်ႇ တီႈမိူင်းဢႅပ်ႉၾၵၢၼ်ႇၼိတ်ႉသ်တၢၼ်ႇ လႄႈ ပႃႇၵိတ်ႉသ်တၢၼ်ႇ မီးၵူၼ်းလူႉတၢႆမၢတ်ႇၸဵပ်းၼမ်

သိုဝ်ႇၶၢဝ်ႇ TNN World ဢွၵ်ႇဝႆႉ မိူဝ်ႈၼႆႉ ဝၼ်းထီႉ 23 March 2023 (လိူၼ်ႁႃႈမႂ်ႇ 3 ၶမ်ႈ ပီႊတႆး 2117 ၼီႈ) ဝႃႈ ႁူဝ်ၼပ်ႉၵူၼ်းလူႉသဵင်ႈတၢႆယွၼ်ႉဢိင်ႇသၼ်ႇ(ၽႅၼ်ႇလိၼ်ဝႆ) ဢၼ်မီးႁႅင်းသၼ်ႇဝႆယူႇတီႈ 6.5 ရိၵ်ႇတိူဝ်ႇ မိူဝ်ႈဝၼ်းထီႉ 21 March 2023 တီႈမိူင်းဢႅပ်ႉၾၵၢၼ်ႇၼိတ်ႉသ်တၢၼ်ႇ လႄႈ မိူင်းပႃႇၵိတ်ႉသ်တၢၼ်ႇၼၼ်ႉ ၽိူမ်ႉၶိုၼ်ႈပဵၼ် 19 ၵေႃႉလႄႈ ၵူၼ်းမၢတ်ႇၸဵပ်းၼမ်လိူဝ်သေ 200 ၵေႃႉ ဢိၵ်ႇတင်း ႁိူၼ်းယေးၵူၼ်းမိူင်း လူႉသုမ်းတင်းၼမ် ဝႃႈၼႆ။

မိူဝ်ႈဝၼ်းထီႉ 19 March 2023 ပူၼ်ႉမႃးၼၼ်ႉၵေႃႈ ဢိင်ႇသၼ်ႇ ၸမ်ဝဵင်း Jurm ၼႂ်းမိူင်းဢႅပ်ႉၾၵၢၼ်ႇၼိတ်ႉသ်တၢၼ်ႇ ဢၼ်ယူႇၸမ်လႅၼ်လိၼ် မိူင်းပႃႇၵိတ်ႉသ် တၢၼ်ႇ  6.5 ရိၵ်ႇတိူဝ်ႇသေ ႁဵတ်းႁႂ်ႈလိၼ်ၵူၼ်ႇပင်းလၢႆလၢႆတီႈလႄႈ ဢိင်ႇသၼ်ႇ ပွၵ်ႈၼႆႉၵေႃႈ ႁပ်ႉႁူႉႁႅင်းသၼ်ႇဝႆလႆႈထိုင်ပဵၼ် 8 ၸိုင်ႈမိူင်း ဝႃႈၼႆ။

ၵဵဝ်ႇလူၺ်ႈလွင်ႈဢိင်ႇသၼ်ႇပွၵ်ႈၼႆႉသေ တီႈၼႂ်းမိူင်းပႃႇၵိတ်ႉသ်တၢၼ်ႇ မီးလွင်ႈလူႉ သုမ်းဢေႇလိူဝ်သေ ဢၼ်ၵူဝ်ၵၼ်ဝႆႉ ၼႆယဝ်ႉ။ တီႈၼႂ်းမိူင်းဢႅပ်ႉၾၵၢၼ်ႇ ၼိတ်ႉသ်တၢၼ်ႇ ၼႂ်းပွတ်းတွၼ်ႈ ဢွင်ႈတီႈဢိင်ႇသၼ်ႇၼၼ်ႉ မီးလွင်ႈယၢပ်ႇၽိုတ်ႇ တႃႇဢဝ်ၶေႃႈမုၼ်းလွင်ႈလူႉသုမ်းလႄႈ ႁူဝ်ၼပ်ႉၵူၼ်းလူႉတၢႆလႆႈၼင်ႇဝႆးၽႂ်း ဝႃႈၼႆ။

တႆးလွတ်ႈလႅဝ်း