လုမ်ႈၾႃႉၵႂၢင်ႈယႂ်ႇ ဢွင်ႈတီႈတႃႇတႆးသဝ်းထင် ႁိုဝ်တေၵိုတ်းသင်

မိူဝ်ႈပူၼ်ႉမႃး တႆးႁဝ်းယၢမ်ႈမီးႁေႃသႅင် ယၢမ်ႈမီးဝၢၼ်ႈမိူင်း ယၢမ်ႈမီးၽႅၼ်ႇလိၼ် ဢၼ်ၵႂၢင်ႈယႂ်ႇ ၵူၺ်းထိုင်မႃးဝၼ်းမိူဝ်ႈၼႆႉ လုမ်ႈၾႃႉလူင်ႁဝ်းၵႂၢင်ႈယႂ်ႇတေႉ မႅၼ်ႈၶႃႈယဝ်ႉ ၽႅၼ်ႇလိၼ်ဝၢၼ်ႈမိူင်းႁဝ်း ဝၼ်းမိူဝ်ႈၼၼ်ႉ၊  မိူဝ်ႈၼႆႉၸွမ်းသွၵ်ႈႁႃတၢၼ်ႇလႂ်ၵေႃႈ ႁိုဝ်တေလိူဝ်သင် ၵူၺ်းလႆႈႁၼ်တႆးႁဝ်းၶႃႈ ၸမ်ယဵၼ်းပဵၼ်ၵူၼ်းဢၼ်ၽၢၼ်ဝၢၼ်ႈၽၢၼ်မိူင်းမႃးၵမ်းလွႆးလွႆး၊ ပိူင်တႅၵ်ႈမၼ်း မိူၼ်ၼင်ႇ ၶိူဝ်းၵူၼ်းရူဝ်ႇႁိၼ်ႇၵျႃႇၼႆႉ ယၢမ်ႈပဵၼ်ၶိူဝ်းယႂ်ႇၶိူဝ်းလူင် မီးႁူဝ်ၼပ်ႉၵူၼ်းၼမ် လႄႈ မီးၸွတ်ႇတူဝ်ႈလုမ်ႈၾႃႉလူင်ႁဝ်း ဝၼ်းမိူဝ်ႈၼႆႉ သင်ႁဝ်းမႃးတူၺ်းၶိုၼ်းၶိူဝ်းရူဝ်ႇႁိၼ်ႇၵျႃႇပေႃးၼႆ လုမ်ႈၾႃႉၵႂၢင်ႈယႂ်ႇသေတႃႉ တႃႇၸိူဝ်းၶဝ်ၵမ်ႈၽွင်ႈ ဢမ်ႇမီးၽႅၼ်လိၼ်ၵိူတ်ႇဢၼ်တႅတ်ႈတေႃး ဢမ်ႇမီးမၢႆၾၢင်ၸိုင်ႈမိူင်း ဢၼ်တႅတ်ႈတေႃး သွၼ်ႉယူႇမိူင်းပိူၼ်ႈၵႂႃႇ တေႃႇၸူဝ်ႈလုၵ်ႈပၢၼ်လၢၼ်ၶဝ် ၼၼ်ႉၵူၺ်း။

လုမ်ႈၾႃႉလူင်ႁဝ်း လႆႈႁပ်ႉႁူႉလွင်ႈတုၵ်ႉၶ ၵပ်ႉၵိၼ်း  ၸၢဝ်းၶိူဝ်းၵူၼ်း ရူဝ်ႇႁိၼ်ႇၵျႃႇ Rohingya သေတႃႉ ပႆႇၸွႆႈၵႄႈလိတ်ႈပၼ်သင်လႆႈ၊ ၼႂ်းမိူင်းႁူမ်ႈတုမ်မၢၼ်ႈၼႆႉ ၸၢဝ်းၶိူဝ်းရူဝ်ႇႁိၼ်ႇၵျႃႇ ယူႇမႃးပီႊယၢဝ်းၶၢဝ်းႁိုင် ပၢၼ်သိုပ်ႇပၢၼ် ၵူၼ်းၶိူဝ်းမၢၼ်ႈၶဝ် တိုၵ်ႉၼပ်ႉသွၼ်ႇဝႃႈ ၸိူဝ်းၶဝ် ပဵၼ်ၵူၼ်းပၢႆႈၽေး လုၵ်ႉပင်းၵလႃးတဵတ်ႉ မႃးၵူၺ်းၼႆသေ သိုပ်ႇလိုပ်ႈလမ်း ၸိူဝ်းရူဝ်ႇႁိၼ်ႇၵျႃႇ ဢွၵ်ႇဝၢၼ်ႈမိူင်းၵႂႃႇယူႇ၊ ပေႃးယူႇတီႈမၢၵ်ႇတႃ ၶိူဝ်းၵူၼ်းသေတူၺ်းတႄႉ ၸၢဝ်းၶိူဝ်းရူဝ်ႇႁိၼ်ႇၵျႃႇၼႆႉ ထူပ်းၺႃးလွင်ႈႁုၵ်းႁၢႆႉ ၼပ်ႉပွၵ်ႈမၼ်းပေႃးဢမ်ႇလႆႈ လႄႈပုၼ်ႈတႃႇဢၼႃႇၵၢတ်ႈ လုၵ်ႈလၢၼ်ၶဝ်ၼႆၵေႃႈ ႁႃသဵၼ်ႈတၢင်းႁိုဝ်တေထူပ်း  ၸၢဝ်းၶိူဝ်းရူဝ်ႇႁိၼ်ႇၵျႃႇ ဢၼ်ထုၵ်ႇသိုၵ်းမၢၼ်ႈ ပိုတ်းယိုဝ်း လိုပ်ႈလမ်းပႅတ်ႈၼၼ်ႉ ပၢႆႈၶဝ်ႈသေႃႉယူႇ ဢွင်ႈတီႈပၢႆႈၽေး  Kutupalong refugee camp ဢၼ်ယႂ်ႇလိူဝ်သေပိူၼ်ႈ ၼႂ်းလုမ်ႈၾႃႉ ဢၼ်တင်ႈယူႇပွတ်းဝၼ်းဢွၵ်ႇမိူင်းပင်းၵလႃးတဵတ်ႉၼၼ်ႉ ၾႆးယင်းမႆႈပႅတ်ႈ။ ၸၢဝ်းၶိူဝ်း ရူဝ်ႇႁိၼ်ႇၵျႃႇၼႆႉ လႆႈထုၵ်ႇထွတ်ႇၸိုဝ်ႈဢွၵ်ႇၼႂ်းပီႊ 1982 သေ လႆႈႁဵတ်းဢွၵ်ႇပၼ်ဝႂ်ၾၢင်သီၶၢဝ် ဢၼ်ႁပ်ႉႁွင်းပၼ်ယူႇ ၼႂ်းမိူင်းႁူမ်ႈတုမ်လႆႈၼႆၼၼ်ႉၵူၺ်း။ ထိုင်မႃးၼႂ်းပီ 2015 ၼၼ်ႉလူင်ပွင်ၸိုင်ႈ မိူင်းႁူမ်ႈတုမ် လႆႈၵဵပ်းဢဝ်ၶိုၼ်း ဝႂ်သီၶၢဝ်ၼၼ်ႉသေ ၸၢဝ်းၶိူဝ်းရူဝ်ႇႁိၼ်ႇၵျႃႇၵေႃႈ ယဵၼ်းပဵၼ် ၵူၼ်းဢမ်ႇမီးဝၢၼ်ႈမိူင်း ဢမ်ႇမီးၼင်လိၼ် ၵႂႃႇပႅတ်ႈၼၼ်ႉၶႃႈယဝ်ႉ၊ ၼႆႉၶႃႈႁဝ်းတေယုၵ်ႉၼေပိူင်တႅၵ်ႈမၼ်းပွတ်းပွတ်းၼင်ႇၼႆ တႆးႁဝ်းၶႃႈၼႆႉ ၸၢင်ႈတေမိူၼ် ၶိူဝ်းၵူၼ်းရူဝ်ႇႁိၼ်ႇၵျႃႇ ယူႇႁိုဝ် တၢင်းႁၼ်သုၼ်ႇတူဝ်ၵဝ်ၶႃႈ မုင်ႈႁၼ်တႄႉ တႆးႁဝ်းၶႃႈ ထုၵ်ႇတပ်ႉသိုၵ်းမၢၼ်ႈၶဝ် မိပ်ႇငႅၼ်းၵၼ်ႉၸၼ်လူလၢႆ ၶႃႈႁႅမ် လိုပ်ႈႁေႃႈၶၢႆႉဝၢၼ်ႈၶၢႆႉဝဵင်း  ဢဝ်လွင်ႈတၢင်းၵူႈလွၵ်းၵူႈလၢႆးသေ လိုပ်ႈလမ်းၵူၼ်းမိူင်းႁဝ်း ထိုင်တီႈပေႃးလႆႈပၢႆႈၵႂႃႇယူႇသဝ်းထင်မိူင်းပိူၼ်ႈ ပဵၼ်ၵူၼ်းၽၢၼ်မိူင်း ပဵၼ်ၵူၼ်းပၢႆႈၽေး မီးတင်းၼမ် ၼပ်ႉႁူဝ်လၢၼ်ႉၵေႃႉ မၼ်းၶႃႈယဝ်ႉ၊ လွင်ႈၼႆႉ ၵူႈၸဝ်ႈၸဝ်ႈတေႁူႉႁၼ်ၵၼ်မႃးယူႇ ယၢမ်းလဵဝ် ပေႃးႁဝ်းလၢတ်ႈတီႈၵူၼ်းၼွၵ်ႈမိူင်းဝႃႈ “ၵဝ်ၶႃႈပဵၼ်တႆး ယူႇမိူင်းတႆး ပေႃးၼႆ ပိူၼ်ႈတေဢမ်ႇႁူႉၸၵ်းလူးၵွၼ်ႇ ၸိူဝ်းၵႂႃႇသဝ်းထင် မိူင်းဝၼ်းတူၵ်း တေႁူႉလီသေပိူၼ်ႈၶႃႈလွင်ႈၼႆႉ”၊ မိူင်းတႆး ဢမ်ႇမီးၸိုဝ်ႈဢၼ်ပဵၼ်ၸိုင်ႈမိူင်း ၼႂ်းလုမ်းၸၢတ်ႈၸိုင်ႈလုမ်ႈၾႃႉမၵ်းမၼ်ႈဝႆႉ ၵူၺ်းတေမီးဝႃႈ ပိူဝ်းမႃး (Burma) or  မျၢၼ်ႇမႃႇ (Myanmar)  ၼႆၵူၺ်း။ ယွၼ်ႉႁဝ်းၶႃႈ ယိပ်းဝႂ်ၾၢင် မိူင်းႁူမ်ႈတုမ်မၢၼ်ႈ ဝႆႉၵူၺ်းၶႃႈလူႉ ဝႂ်တႆးဢမ်ႇမီး လႄႈ ၵူၼ်းၶိူဝ်းတႆးႁဝ်းၶႃႈ ၸမ်တေမိူၼ် ၸၢဝ်းၶိူဝ်းရူဝ်ႇႁိၼ်ႇၵျႃႇ မႃးၵမ်းလွႆးလွႆးၶႃႈယဝ်ႉ၊ တႆးႁဝ်းၶႃႈၼႆႉ ယဵၼ်းငၢႆႈလိူဝ်သေပိူၼ်ႈ ယူႇမိူင်းလႂ်ၵေႃႈၸွႆးၸပ်းၾိင်ႈထုင်း ဢဝ်လိၵ်ႈၵႂၢမ်းမိူင်းၼၼ်ႉ ပဵၼ်ယႂ်ႇသေ လိုမ်းဝၢၼ်ႈၵိုတ်ႇမိူင်းၼွၼ်းပႅတ်ႈၵေႃႈ တေမီးတင်းၼမ်၊ လွင်ႈၼႆႉ တူၺ်းလႄႈမိူဝ်ႈၽွင်းပၢၼ်တႅပ်းသီႇတႅပ်းၼၼ်ႉ တေႃႈၼင်ႇလိၵ်ႈတႆး ယင်းလႆႈလၵ်ႉသွၼ်ၵၼ်မႃး ပေႃးၶႆႈၶူၼ်ႉၶိုၼ်း ၶိူဝ်းဝၢၼ်ႈမိူင်းၵေႃႈ လီၸႂ်လဵၵ်ႉၸွမ်း ၽဝလုၵ်ႈမႄႈတႆးတေႉတေႉၶႃႈယဝ်ႉ။

ထိုင်မႃးၼႂ်းဝၼ်းထီႉ 24  March 2023 ပူၼ်ႉမႃးၼႆႉသမ်ႉ လႆႈႁၼ် ၸေႃႇမိၼ်းထုၼ်း (ဇော်မင်းထွန်း) ၵေႃႉဢၼ်ပဵၼ်ၽူႈၶၢၼ်ပၢၵ်ႇတပ်ႉသိုၵ်းမၢၼ်ႈ  ဢွၵ်ႇမႃးလၢတ်ႈဝႃႈ တေႁပ်ႉဢဝ်ၶိုၼ်း ၸၢဝ်းၶိူဝ်းရူဝ်ႇႁိၼ်ႇၵျႃႇ ၸိူဝ်းပၢႆႈၽေးမီးဝႆႉၼႂ်းမိူင်းပင်းၵလႃးတဵတ်ႉၼၼ်ႉ ပွၵ်ႈၶိုၼ်းမိူင်းႁူမ်ႈတုမ်မၢၼ်ႈ ၼႆယူႇ၊ ၵူၺ်းၵႃႈ ၸၢဝ်းၶိူဝ်းရူဝ်ႇႁိၼ်ႇၵျႃႇ ၸိူဝ်းမီးဝႆႉဢွင်ႈတီႈပၢႆႈၽေးၼၼ်ႉ ဢမ်ႇၶႆႈပွၵ်ႈၶိုၼ်းမိူင်းႁူမ်ႈတုမ်မၢၼ်ႈယဝ်ႉၼႆယူႇ။

လီသေလၢႆၶၢဝ်းယၢမ်းဢၼ်ပူၼ်ႉမႃး တႄႇၸဵမ်မိူဝ်ႈသိုၵ်းမၢၼ်ႈ တႄႇငဝ်ႈယိုတ်းသိမ်းဢႃႇၼႃႇမႃး ၼႂ်းပီႊ 1962 လႄႈၼႂ်းၵႄႈၵၢင်မႃး ႁၢၼ်ႉတေႃႇဝၼ်းမိူဝ်ႈၼႆႉ  ၶွင်ႇသီႇသိုၵ်းမၢၼ်ႈ လႆႈယိုတ်းသိမ်းဢဝ်ဢႃႇၼႃႇမႃး လၢႆပွၵ်ႈလၢႆၵမ်း ၵၢၼ်မိူင်းႁူမ်ႈတုမ်မၢၼ်ႈၼႆႉ တႄႇၸဵမ် ဢဝ်လွတ်ႈလႅဝ်း ၵွၼ်းၶေႃ တႂ်ႈဢင်းၵိတ်ႉၸွမ်းၵၼ်မႃး ၵူၼ်းမိူင်းႁဝ်း ထုၵ်ႇၶႃႈႁႅမ်တၢႆ ထုၵ်ႇၵၼ်ႉၸၼ်လူလၢႆ လိုပ်ႈႁေႃႈပႅတ်ႈ ၸိူဝ်းဢမ်ႇမီးတၢင်းၽိတ်းသင်ၼၼ်ႉ မိူၼ်ဝူဝ်းၵႂၢႆး ဢၼ်ဢမ်ႇမီးတၢင်းၽိတ်းသင် ယွၼ်ႉလွင်ႈမိူၵ်ႈမႂ်ႈ ၸဝ်ႈဢၢမ်းၼၢတ်ႈ ဢၼ်ဢမ်ႇမီးၸႂ်ထမ်းတြႃး၊ ဝူၼ်ႉ/ႁဵတ်း တင်ႈၸႂ် တႃႇပေႉပုၼ်ႈ၊ တင်ႈၸႂ် ၽဵဝ်ႈမူၺ်ႉၶိူဝ်းၵူၼ်း၊ ဢဝ်ဢမ်းၼၢတ်ႈၼႂ်းၵမ်မိုဝ်း ၸဝ်ႈၵဝ်ႇမီးၼၼ်ႉ‌သေ ထၢင်ႇႁၢင်ႈၶီႇၼဵၵ်းတဵၵ်းတဵင် လႄႈ ႁဵတ်းလွင်ႈမိူၵ်ႈမႂ်ႈ တေႃႇၵူၼ်းမိူင်းတႆးႁဝ်းမႃး၊ ဢိင်ၼိူဝ်လွင်ႈၸိူဝ်းၼႆႉ တႆးႁဝ်းၶႃႈ တေသိုပ်ႇယၢင်ႈ သဵၼ်ႈတၢင်းလႂ် ဢမ်ႇၼၼ်တေဢဝ်ႁႅင်းလူမ်းဢီးထွင်းပဝ်ႇ ဢဝ်ႁႅင်းၼမ်ႉ ၸႅဝ်ႈဝႃႈၵူၺ်းႁိုဝ်  သင်တႆးႁဝ်းဢဝ်လွင်ႈၽွမ်ႉႁူမ်ႈ ဢၼ်တေပဵၼ် ၼမ်ႉၼိုင်ႈၸႂ်လဵဝ်ၵၼ်ၼၼ်ႉ ဝႆႉပဵၼ်လွင်ႈယႂ်ႇ ဢဝ်ပဵၼ်ငဝ်ႈၶၢမ်ႇပိုၼ်ႉ သိုပ်ႇယၢင်ႈၸွမ်းၼင်ႇယိူင်းဢၢၼ်းဢၼ်မီးဝႆႉၼၼ်ႉ တေၸၢင်ႈ‌ဢွင်ႇမၢၼ် မႃးယူႇ၊ ၼင်ႇတဝ်ႇ ပႆထိူင်းသေတႃႉ ယင်းထိုင်ယိူင်းမၢႆလႆႈဢွၼ်တၢင်း ပၢင်တႆးလူးၵွၼ်ႇ ၵူၼ်းႁဝ်းၵေႃႈမိူၼ်ၵၼ် ႁဵတ်းၵၢၼ်သိုၵ်း ၵၢၼ်မိူင်း ၵၢၼ်တူင်ႇဝူင်း ၵၢၼ်သင်ၵေႃႈလီ ႁႂ်ႈမေႃဝႆႉၸႂ်ၵတ်းၸႂ်ယဵၼ် ဝႆႉၸႂ်ယၢဝ်းယၢဝ်းသေ ႁဵတ်းသၢင်ႈၵႂႃႇလွႆးလွႆး ယိူင်းမၢႆႁဝ်း ဢမ်ႇတွၼ်ႉပၢႆႈပႅတ်ႈႁဝ်း ယူႇတီႈတႆးႁဝ်းၵူၺ်း ၸွင်ႇတေပၢႆႈပႅတ်ႈယိူင်းမၢႆ။

ႁဝ်းလူမ်ႉယဝ်ႉ ယႃႇပေၵူဝ် လွင်ႈတေ‌လုၵ်ႉၶိုၼ်း သင်ဝႃႈလႆႈထူပ်း လွင်ႈယၢပ်ႇၽိုတ်ႇ ၼႂ်းၵၢၼ်မိူင်း ၵၢၼ်သိုၵ်းမႃးပေႃးၼႆ ႁဝ်းတေလႆႈမူၼ်ႉမႄး ၵႄႈလိတ်ႈဢဝ်ႁင်းၵူၺ်း ဝၼ်းမိူဝ်ႈၼႆႉတႆးႁဝ်းၶႃႈ လီၶွၼ်ႈႁႅင်း ႁူမ်ႈပဵၼ်ၼမ်ႉၼိုင်ႈၸႂ်လဵဝ်ၵၼ်ယဝ်ႉ လူဝ်ႇမေႃဢဝ်ၵၼ်ဝႃႈ ပႃးၵၼ်ပဵၼ် မေႃၼပ်ႉယမ်ၵၼ် မေႃပွင်ႇၸႂ်ပၼ်ၵၼ် မေႃပဵၼ်သဵင်လဵဝ်ၵၼ်ပေႃးၼႆ ဝၼ်းၼိုင်ႈၸဝ်ႉၸဝ်ႉ တႃႇဢဝ်မိူင်းတႆး လွတ်ႈလႅဝ်းၵွၼ်းၶေႃၼၼ်ႉၵေႃႈ တေဢမ်ႇမီးလွင်ႈယၢပ်ႇသင်၊ ႁဵတ်းသင်လႄႈဝႃႈၼၼ်ၶႃႈလႃႇ ႁဝ်းမႃးတူၺ်း ၸုမ်းတွႆႇတိုင်ႈၶဝ်လႄႈ ၼိုင်ႈၵေႃႉမေႃၼိုင်ႈမဵဝ်း မႃးႁူမ်ႈၵၼ်သေတွႆႇ သဵင်ဢွၵ်ႇမႃးၼၼ်ႉၵေႃႈ လီထွမ်ႇတေႉတေႉ တေႃႈၼင်ႇၼၼ်ၶႃႈယဝ်ႉ ၵၢၼ်တႆးႁဝ်းၶႃႈၵေႃႈ သင်ႁဝ်းမႃးႁူမ်ႈၵၼ်ႁဵတ်းၵၢၼ် ၵၢၼ်ႁဝ်းၼၼ်ႉၵေႃႈ တေၸဵဝ်းဢွင်ႇမၢၼ် တေၸဵဝ်းထိုင်တီႈၼၼ်ႉၶႃႈယဝ်ႉ။

မိူၼ်ၼင်ႇလၢႆလၢႆၸိုင်ႈမိူင်း ၸိူဝ်းပဵၼ်ဝႆႉလုၵ်ႈၸုမ်း ဢႃႇသီႇယၼ်ႇ ၶိုၼ်ႈယႂ်ႇမုၼ်းလႅင်းမႃး ၵူၼ်းမိူင်းပိူၼ်ႈ မီးလွင်ႈထၢင်ႇႁၢင်ႈ ႁဵတ်းႁႃၵိၼ်လွတ်ႈလွတ်ႈလႅဝ်းလႅဝ်း ႁင်းၽႂ်ႁင်းမၼ်း၊ မိူင်းႁူမ်ႈတုမ်မၢၼ်ႈ ႁဝ်းၼႆႉသမ်ႉ ပဵၼ်မိူင်းဢၼ်သုၵ်ႉယုင်ႈဢူၼ်ၵဝ်းလိူဝ်သေပိူၼ်ႈ တိုၵ်ႉပဵၼ် ၽိုၼ်းပဵၼ်ၾႆး လႄႈၵူၼ်းမိူင်း တူၵ်းတႅမ်ႇၵွတ်းၽၢၼ် ယၢမ်းမိူဝ်ႈလဵဝ်ၼႆႉ ၼိုင်ႈၶႅၼ်းႁၢႆႉၸႃႉ ၵၢၼ်မိူင်း မိူင်းႁူမ်ႈတုမ်မၢၼ်ႈ တိူၵ်ႈတၼ်ဝႆႉ တႄႇၸဵမ်မိူဝ်ႈသိုၵ်းမၢၼ်ႈသိမ်းဢႃႇၼႃႇမႃး။ ၼႂ်းငဝ်းလၢႆးဢၼ်ပဵၼ်ယူႇ ၵပ်ႉၵိၼ်းယူႇၵူႈၽၢႆႇၵူႈတၢင်းၼႆႉ ပုၼ်ႈတႃႇ ၸိူဝ်ႉၶိူဝ်းတႆးႁဝ်း သင်ႁဝ်းပၢႆႈၵေႃႈ ႁဝ်းတေၽၢၼ် သင်ႁဝ်းယၢၼ်ပႅတ်ႈဝၢၼ်ႈမိူင်းၵေႃႈ ႁဝ်းတေသုမ်းထႅင်ႈၵူၺ်း၊ ၶႂ်ႈယွၼ်းဢဝ်ၶေႃႈၵႂၢမ်း ပူႇမွၼ်ႇၼၢႆးယႃႈႁဝ်းၶဝ် သင်ႇသွၼ်ဝႃႈ “ယိူၼ်ႉလႆႈၵေႃႈယိူၼ်ႉ ဢမ်ႇယိူၼ်ႉလႆႈၵေႃႈယိူၼ်ႉ” ၼႆၼၼ်ႉသေ ယိူၼ်ႉယူႇၵႂႃႇ သဝ်းၵႂႃႇ တႃႇပုၼ်ႈပၢင်ႈဝၢၼ်ႈမိူင်း တႃႇၵႅတ်ႇၶႄၸိူဝ်ႉၶိူဝ်း လႄႈတိုၵ်းတေႃးဢဝ်ၶိုၼ်းၽႅၼ်ႇလိၼ်ၸိုင်ႈမိူင်းႁဝ်းသေၵမ်း။

ပၢႆၵမ် − ၸၢႆးထုၼ်းလႃႉ

*** ပွင်ႈၵႂၢမ်းႁူဝ်ၼႆႉ ပဵၼ်ပၢႆးဝူၼ်ႉလႄႈတၢင်းႁၼ်ထိုင်သုၼ်ႇတူဝ် ၽူႈတႅမ်ႈလိၵ်ႈၵူၺ်း ဢမ်ႇၸႂ်ႈ​​ၶေႃႈၶၢၼ်ပၢၵ်ႇ တႆးလွတ်ႈလႅဝ်း။