ယွၼ်ႉလူမ်းလႅင်းၶၢဝ်းမႆႈ ၽတ်ႉၶဝ်ႈလႄႈ မၢင်ပိုၼ်ႉတီႈလင်ႁိူၼ်းၵူၼ်းလူႉလႅဝ် ၼပ်ႉႁူဝ်ပၢၵ်ႇ

မိူဝ်ႈဝၼ်းထီႉ 21 April 2023 (လိူၼ်ႁူၵ်းမႂ်ႇ 3 ၶမ်ႈ ပီႊတႆး 2117 ၼီႈ) ယၢမ်းႁူဝ်ၶမ်ႈ မွၵ်ႈ 18:00 မူင်းၼႆႉ လူမ်းလႅင်ႉၶၢဝ်းမႆႈ ၽတ်ႉၶဝ်ႈတီႈဝၢၼ်ႈတတႃးဢူး​လႄႈ ဝၢၼ်ႈဢွင်ႇမိၼ်ႇၵူင်း​၊ ဝဵင်း​လႄႇ​ဝေး၊ ​​ၼေႇပျီႇတေႃႇ ၵူၼ်းဝၢၼ်ႈလူႉသဵင်ႈတၢႆ 7 ​ၵေႃႉ လႄႈ လင်ႁိူၼ်းၵူၼ်းမိူင်းလူႉၵွႆ 200 ပၢႆ ဝႃႈၼႆ။

ၵဵဝ်ႇလူၺ်ႈလွင်ႈ လူမ်းလႅင်ႉၶၢဝ်းမႆႈၽတ်ႉၶဝ်ႈ​သေ ၵူၼ်းမိူင်းလႆႈလူႉသဵင်ႈတၢႆၵႂႃႇ 7 ၵေႃႉ​လႄႈ မီးၵူၼ်းမၢတ်ႇၸဵပ်း 100 ပၢႆ၊  ၼႂ်းၵူၼ်းမၢတ်ႇၸဵပ်းၼႆႉ တႃႇ 20 ​ၵေႃႉ ပဵၼ်ဢၼ်လီမႆႈၸႂ်ဝႆႉ​သေ လင်ႁိူၼ်းဢၼ်လႆႈလူႉၵွႆ​သမ်ႉ တီႈဝၢၼ်ႈတတႃးဢူး 77 လင်၊ ဝၢၼ်ႈဢွင်ႇမိၼ်ႇၵူင်း 155 လင် ၼႆယဝ်ႉ။

ၵူၼ်းဝၢၼ်ႈ​ၵေႃႉၼိုင်ႈလၢတ်ႈ​ဝႃႈ “လူမ်းလဵင်ႉလူင်ၼႆႉ လုၵ်ႉတၢင်းၽၢႆႇၸၢၼ်းဝဵင်း​လႄႇ​ဝေး ၽတ်ႉပဝ်ႇၶဝ်ႈမႃး​ၶႃႈ​ဢေႃႈ၊ မိူဝ်ႈလဵဝ်​တႄႉ တိုၵ်ႉပဵၼ်ၽွင်းသွၵ်ႈႁႃၵူၼ်းထူပ်း​ၽေး​လႄႈ ဢဝ်လူတ်ႉၸွႆႈထႅမ်ၸွႆႈၵူၼ်းၵူၼ်း​ၽေးယူႇၶႃႈ၊ ​မႄႈထဝ်ႈ​ၵေႃႉၼိုင်ႈ ​လႄႈ ၵူၼ်းၸၢႆး​ၵေႃႉၼိုင်ႈ​ဢၼ်ပဵၼ်ၵူၼ်းဝၢၼ်ႈ ဢွင်ႇမိၼ်ႇၵူင်း၊ လႄႈထႅင်ႈ 5​ ၵေႃႉ​ ဢၼ်တၢႆၼၼ်ႉ​ ပဵၼ်ၵူၼ်းဝၢၼ်ႈ တတႃးဢူးၶႃႈ ႁိူၼ်းၵေႃႈလႆလူႉၵွႆမူတ်း” လၢတ်ႈ​ၼႄၼင်ႇၼႆ။

ၼႂ်းဝၼ်းလဵဝ်ၵၼ်ၵူၺ်းၼင်ႇၵဝ်ႇ တီႈဝဵင်းၵၼီႇ၊ တိူင်း​ၸေႈၵႅင်း​ၵေႃႈ ယၢမ်းႁူဝ်ၶမ်ႈမွၵ်ႈ 17:00 မူင်းၼႆႉ ဢမ်ႇၸႂ်ႈၶိင်ႇၶၢဝ်းၾူၼ်​​သေ ၾူၼ်လူင်လူမ်းလူင် ၽတ်ႉၶဝ်ႈ​ၼႂ်းဝၢၼ်ႈ 8 ဝၢၼ်ႈ ဢၼ်ယူႇၽၢႆႇၸၢၼ်း​မႄႈၼမ်ႉၶျိၼ်းတႂိၼ်း (ချင်းတွင်းမြစ်) လင်ႁိူၼ်းၵူၼ်းဝၢၼ်ႈမွၵ်ႈ 200 ၼႆႉ လဵၵ်းမုင်းႁိူၼ်းၽူင်ႉပိဝ် လႆႈလူႉၵွႆမိူၼ်ၵၼ် ဝႃႈၼႆ။

တႆးလွတ်ႈလႅဝ်း