ယွၼ်ႉၾႆးၾႃႉသွတ်ႉလႄႈ ၾႆးမႆႈဝတ်ႉၵျွင်းလူင်ၼွင်ၵေႃႈ ၸႄႈဝဵင်းသီႇပေႃႉ

ယွၼ်ႉလွတ်ႇၾႆးၾႃႉတႅၵ်ႇသွတ်ႉလႄႈ ၾႆးလႆႈလုၵ်ႉမႆႈႁၢဝ်ႈႁႅင်း တီႈဝတ်ႉၵျွင်းၼွင်ၵေႃႈ ဢိူင်ႇၼွင်ၵေႃႈ ၸႄႈဝဵင်းသီႉပေႃႉ လႄႈၶူဝ်းၶွင်ဢၼ်မီးၼႂ်းဝတ်ႉ ဢမ်ႇတၼ်းလႆႈသင် ဝႃႈၼႆ။

မိူဝ်ႈၼႆႉဝၼ်းထီႉ 4 May 2023 (လိူၼ်ႁူၵ်းလွင်ႈ 1 ၶမ်ႈ ပီႊတႆး 2117 ၼီႈ) ၶၢဝ်းယၢမ်း 11:30 မူင်း ၾႆးၵိုင်ႉၵၢင်ႉလုၵ်ႉမႆႈတီႈဝတ်ႉၵျွင်းလူင်ၼွင်ၵေႃႈ ဢၼ်မီးၼႂ်းဝၢၼ်ႈၼွင်ၵေႃႈ ဢိူင်ႇၼွင်ၵေႃႈ ၸႄႈဝဵင်းသီႇပေႃႉလႄႈ ၶူဝ်းၶွင်ၵူႈလွင်ႈ ပႃးၸဵမ်ႁုၼ်ႇႁၢင်ႈၽြႃး၊ ပပ်ႉထမ်းတြႃး ပႃးၵႂႃႇၸွမ်းၾႆးမူတ်း ဢမ်ႇတၼ်းလႆႈသင်လႄႈ တေႃႇထိုင်ၶၢဝ်းယၢမ်းဝၢႆးဝၼ်း 15:00 မူင်း ယင်းပႆႇမွတ်ႇ မီးလွင်ႈလူႉသုမ်း ၶူဝ်းၶွင်ၸႂ်ႉတိုဝ်းၼႂ်းဝတ်ႉၵျွင်း(ဢမ်ႇပႃးဝတ်ႉၵျွင်း) ဢမ်ႇယွမ်း 114 သႅၼ်ပျႃး ၼႆယဝ်ႉ။

သင်ႇၶၸဝ်ႈတူၼ်ၼိုင်ႈ လၢတ်ႈၼႄတီႈသိုဝ်ႇၶၢဝ်ႇတႆးလွတ်ႈလႅဝ်းဝႃႈ “ၸႂ်ႈယဝ်ႉ မိူဝ်ႈၼႆႉၾႆးမႆႈတီႈဝတ်ႉလူင်ၼွင်ၵေႃႈ မိူဝ်ႈၶၢဝ်းယၢမ်း 11:30 မူင်းၼႆႉ ပဵၼ်ယွၼ်ႉၾႆးၽႃႉတႅၵ်ႇသျွတ်ႉ၊ ၶူဝ်းၶွင်ၼႂ်းဝတ်ႉၵေႃႈ ပႃးၵႂႃႇမူတ်းယဝ်ႉဢမ်ႇတၼ်းလႆႈသင် တေႃႉတႄႉတၼ်းလႆႈ လူတ်ႉၶိူင်သွင်လမ်းၵူၺ်း လိူဝ်ၼၼ်ႉတႄႉၾႆးမႆႈပႅတ်ႈမူတ်းယဝ်ႉ ပေႃးတေၼပ်ႉသွၼ်ႇတူၺ်းလွင်ႈလူႉသုမ်းတႄႉ တေတူၵ်းယူႇမွၵ်ႈ 114 သႅၼ်ပျႃးၼႆႉ၊ တေႃႇထိုင်မိူဝ်ႈလဵဝ်ၼႆႉၵေႃႈ တၵႃႇၶဝ်တိုၵ်ႉဢွၼ်ၵၼ်ၶတ်းၸႂ်ႁူတ်းၾႆးယူႇ လႄႈမီးလူတ်ႉၶႄၾႆးၼႂ်းဝဵင်းသီႇပေႃႉ 2 လမ်း မႃးၶႄၸွႆႈ” လၢတ်ႈၼႄၼင်ႇၼႆ။

မၼ်းၸဝ်ႈ ယင်းသိုပ်ႇလၢတ်ႈၼႄထႅင်ႈဝႃႈ “မိူဝ်ႈၾႆးတႄႇမႆႈၼၼ်ႉ တီႈၼိူဝ်ဝတ်ႉၵျွင်းတႄႉဢမ်ႇမီးၽႂ်ယူႇ ၵွပ်ႈပဵၼ်ၶၢဝ်းသုင်းသွမ်းဝၼ်းလႄႈ ၸဝ်ႈသၢင်ႇၶဝ်လူင်းသုင်းသွမ်းၼၼ်ႉၼႃႇၼႆ၊ ပေႃးဝႃႈလႆႈငိၼ်းသဵင်တႅၵ်ႇၵေႃႈ ၾႆးလုၵ်ႉမႆႈႁႅင်းယဝ်ႉ၊ ဢၼ်ပဵၼ်ၸဝ်ႈသြႃႇ ဢိၼ်ႇတၵ ၽူႈၼင်ႈဝတ်ႉၵျွင်းၼွင်ၵေႃႈၼႆႉၵေႃႈ မၼ်းၸဝ်ႈဢမ်ႇယူႇ မိူဝ်ႈလဵဝ်မၼ်းၸဝ်ႈဢွၵ်ႇတၢင်းဝႆႉ ထၢင်ႇတေမီးၵၢၼ်တၢင်ႇၸိူဝ်ႉတၢင်ႇပိူင်” လၢတ်ႈၼႄၼင်ႇၼႆ။

ဝၢၼ်ႈၼွင်ၵေႃႈၼႆႉ မီးၼိူဝ်သဵၼ်ႈတၢင်းၵႃး ၼမ်ႉလၼ်ႈ−သီႇပေႃႉ၊ ယၢမ်ႈပဵၼ်ၼႂ်းၼႃႈလိၼ်ၵုမ်းၵမ် တပ်ႉသိုၵ်းၸိူဝ်ႉၸၢတ်ႈၸိုင်ႈတႆး (SSNA) ဢၼ် ၸဝ်ႈသိုၵ်းလူင် ၵၢၼ်းယွတ်ႈ ဢွၼ်ႁူဝ်ၼၼ်ႉ ၼႆယဝ်ႉ။

တႆးလွတ်ႈလႅဝ်း