ပိူၼ်ႈသုမ်းမိူင်း လႄႈ ပိူၼ်ႈဢဝ်မိူင်းၵွၼ်းၶေႃလႆႈၸိူင်ႉႁိုဝ်?

မိူဝ်ႈၼႆႉႁဝ်းႁႃးၸွင်ႇပႃႈပဵၼ်တႆးလႅတ်းသႅဝ်း လွတ်ႈလႅဝ်း လွတ်ႈၵွင်ႈ လွတ်ႈလွင်ႈဢၼ်ပိူၼ်ႈမႃးယွင်ႈ မႃးယွၵ်ႇ လွတ်ႈလွင်ႈၶႅၼ်ၼႃႈတီႈၵၼ် လွတ်ႈပဵၼ်ၶီႈၶႃႈပိူၼ်ႈတၢင်ႇၶိူဝ်းႁိုဝ် ႁဝ်းႁႃးပႆႇလွတ်ႈသေလွင်ႈ ၵေႃႈယႃႇ ပေႃးဝႃႈတႆးႁဝ်းတိုၵ်ႉမီးတိုၼ်းလၢင်း လွင်ႈၽွမ်ႉႁူမ်ႈယူႇၼႆ တႆးႁဝ်းၶႃႈတေဢမ်ႇလႆႈၵူမ်ႈ ႁူဝ်တေႃႇၽႂ် မိူင်းတႆးဢၼ်ဝႃႈၼၼ်ႉ တေၸၢင်ႈပဵၼ်မႃးၼင်ႇႁဝ်းႁႃးမုင်ႈမွင်းဝႆႉယူႇ။

မိူၼ်ၼင်ႇမိူင်းထႆးၼႆႉ မီးၼင်လိၼ်တိတ်းၸပ်းမိူင်းတႆးဝႆႉသေဢမ်ႇၵႃး မိူဝ်ႈပၢၼ်ပူႇမွၼ်ႇႁဝ်းၶဝ် ယင်းလႆႈ ႁူမ်ႈၵၼ်သေ တိုၵ်းၶိုၼ်း ၸၢဝ်းၶိူဝ်းမၢၼ်ႈၶဝ်မႃး ဢမ်ႇၸႂ်ႈႁိုဝ် ၸဝ်ႈၾႃႉ ၼရေႊသူၼ်ၼႆႉ မၼ်းၸဝ်ႈ ယူႇၸွမ်းၽူႈၶဵၼ် ၵိၼ်ၶဝ်ႈႁူမ်ႈမူႇၸွမ်းၽူႈၶဵၼ် ၵူၺ်းၼမ်ႉၸႂ်မၼ်းၸဝ်ႈ ဢမ်ႇတွၼ်ႉယွမ်းၼွမ်း ၸူးၽူႈၶဵၼ်သေဢမ်ႇၵႃး မၼ်းၸဝ်ႈဢဝ်ၼမ်ႉၵတ်ႉဢၼ်မီးၼၼ်ႉသေ ႁတ်းၶဵင်ႇတႃႉၸူးၽူႈၶဵၼ် ၽၢႆႇ ၽူႈၶဵၼ် မီးႁႅင်းယႂ်ႇၼမ်သေတႃႉ မၼ်းၸဝ်ႈၸႂ်ႉလွၵ်းလၢႆး ပၢႆးပိင်ႇၺႃႇ ၸႂ်ႉၺၢၼ်ႇသေ တိုၵ်းၶိုၼ်း ယွၼ်ႉၼၼ်လႄႈ မိူင်းထႆးဢၼ်ဝႃႈၸင်ႇမီးမႃးၶႃႈယဝ်ႉ ယၢမ်းတေႃႈလဵဝ် ႁုၼ်ႇႁၢင်ႈမၼ်းၸဝ်ႈ တႆးႁဝ်း တိုၵ်ႉဢဝ်ပဵၼ်တီႈၵိူဝ်းယမ်မႃးတေႃႇဝၼ်းမိူဝ်ႈၼႆႉၶႃႈယဝ်ႉ။

ပၢင်တိုၵ်း ၼႂ်းမိူင်းဢႅပ်ႇၾၵၢၼ်ႇၼိတ်ႉသတၢၼ်ႇ ၸုမ်းတႃႇလီပၢၼ်ႇၵေႃႈတေႃႈၼင်ႇၼၼ်ၶႃႈယဝ်ႉ တိုၵ်း ၵၼ်မႃးႁိုင်ထိုင် 20 ပီႊပၢႆသေ ၵမ်းလိုၼ်းသမ်ႉ ၵွပ်ႈၶုၼ်မိူင်း ဢႅပ်ႇၾၵၢၼ်ႇၼိတ်ႉသတၢၼ်ႇ ၶဝ်ဢမ်ႇမီးၸႂ် ၶႂ်ႈလွတ်ႈလႅဝ်းသဝ်းၶေႃ ဢမ်ႇမီးၼမ်ႉၸႂ်ၶႂ်ႈပူၵ်းပွင်ၶိုၼ်းမိူင်းၶဝ်သေဢမ်ႇၵႃး ယွၼ်ႉဝႃႈ ၽူႈၼမ်းၶဝ် ၵေႃႈတိုၼ်း ယူႇမဝ်ၵိၼ်မၢင် ဢမ်ႇလုမ်းလႃးၵူၼ်းမိူင်းၶဝ် ယူႇၽၢႆႇၽူႈၶဵၼ်တဵၵ်းတဵင်ၶိုၼ်း ၵူၼ်းၼႂ်းမိူင်း ၸဝ်ႈၵဝ်ႇ ဢၼ်ပဵၼ်ၼိူဝ်ႉလိူတ်ႈၸဝ်ႈၵဝ်ႇ ဢမ်ႇတမ်းဝၢင်းၽႅၼ်ၵၢၼ်သေပိူင် ၵူၺ်းၵုမ်ႇၵိၼ်သူး ၵိၼ်လၢပ်ႈ ဢၼ်ၵူၼ်းၼွၵ်ႈမိူင်း ယိုၼ်ႈမွပ်ႈပၼ်ၼၼ်ႉၵူၺ်းလႄႈ ၽိူဝ်ႇထိုင်ၼႂ်းပီႊ 2021 ဢမေႇရိၵၢၼ်ႇ လႆႈထွႆထွၼ်သိုၵ်း ဢွၵ်ႇၼႂ်းမိူင်းၶဝ်ၵႂႃႇယဝ်ႉၼၼ်ႉ တႃႇလီႇပၢၼ်ၶဝ် ဢဝ်ၶၢဝ်းယၢမ်း ပွတ်းပွတ်းသေ တိုၵ်း သိမ်းဢဝ် မိူင်းဢႅပ်ႉၾၵၢၼ်ႇၼိတ်ႉသတၢၼ်ႇ ၶဝ်လႆႈလုမ်းလုမ်း ၼၼ်ႉၶႃႈယဝ်ႉ ။ လွင်ႈၼႆႉ ၶႃႈႁဝ်း ၶႂ်ႈပိူင်း ၼႄဝႃႈ ယွၼ်ႉၸုမ်းတႃႇလီႇပၢၼ်ႇ မီးယိူင်းဢၢၼ်းဝႆႉမၼ်ႈမၼ်ႈၵႅၼ်ႇၵႅၼ်ႇ တႃႇသိမ်းဢဝ်မိူင်း ဢႅပ်ႉၾၵၢၼ်ႇၼိတ်ႉသတၢၼ်ႇ ႁႂ်ႈပေႃးလႆႈမႃးၼႆလႄႈ ၸိူဝ်းၶဝ်လႆႈတမ်းဝၢင်း ၽႅၼ်ၶဝ်ၵူႈဝၼ်း ဢမ်ႇဝႃႈဝၼ်းလႂ် ၸိူဝ်းၶဝ် ဢမ်ႇတွၼ်ႉယူႇမဝ်ၵိၼ်မၢင် ၶိုင်ပွင်ႁၢင်ႈၶိူင်ႈ တႃႇတိုၵ်းယူႇတႃႇသေႇ မိူၼ်ၼင်ႇ ဝၢင်းတပ်ႉဝႆႉၸွမ်းလႅၼ်လိၼ် ပိူဝ်ႈတႃႇၶဝ်ႈတိုၵ်းလႆႈၵူႈၶၢဝ်းယၢမ်း ၵမ်းလိုၼ်းမႃးၵေႃႈ လွင်ႈမုင်ႈမွင်း လွင်ႈၼွၼ်းၾၼ်ၶဝ်ၼၼ်ႉ ပဵၼ်မႃးလွင်ႈတႄႉယူႇယဝ်ႉ။ တီႈတႄႉမၼ်း ဢမေႇရိၵၢၼ်ႇၶဝ် လႆႈၸွႆႈ ထႅမ်ၽၢႆႇဢႅပ်ႉၾၵၢၼ်ႇၼိတ်ႉသတၢၼ်ႇ ၼမ်လိူဝ်သေၼမ်ၶႃႈယဝ်ႉ ၵူၺ်းၵႃႈ ၽူႈဢွၼ်ႁူဝ် ၽူႈၼမ်း ဢႅပ်ႉၾၵၢၼ်ႇၼိတ်ႉသတၢၼ် ၵုမ်ႇမဝ်းမိင်းၸွမ်းဢႃႇၼႃႇ မဝ်းမိင်းၸွမ်း ၵႅဝ်ႈသႅင်ငိုၼ်းၶမ်း ပေႃးမီးငိုၼ်း ၸႂ်ႉတိုဝ်းတဵမ်တဵမ်ထူၼ်ႈထူၼ်ႈ မီးဢႃႇၼႃႇၼႂ်းမိုဝ်းၵေႃႈပေႃးယဝ်ႉၼႆလႄႈ ယွၼ်ႉပၢႆးဝူၼ်ႉ ဢၼ်ၼႆႉသေ  ၵမ်းလိုၼ်းမႃး ထိုင်တီႈ ပေႃးလႆႈသုမ်းဝၢၼ်ႈမိူင်းၵႂႃႇ ငၢႆႈငၢႆႈလူမ်လူမ်။

တႆးႁဝ်းၶႃႈၼႆႉၵေႃႈ တေႃႈႁိုဝ်တေပိူင်ႈၵၼ်တၢင်း ဢႅပ်ႉၾၵၢၼ်ႇၼိတ်ႉသတၢၼ်ႇ ၵွပ်ႈဢမ်ႇၽွမ်ႉၵၼ် ၵွပ်ႈၶႂ်ႈပေႉပုၼ်ႈၵၼ် ၵွပ်ႈဢမ်ႇဢဝ်သဵင်ၵၢင်ၸႂ်ၵူၼ်းမိူင်းဝႃႈလႄႈ ၵမ်းလိုၼ်းမႃး ႁူႉတိုၼ်းတေမိူၼ် ဢႅပ်ႉၾၵၢၼ်ႇၼိတ်ႉသတၢၼ်ႇ ၵႂႃႇၵမ်းသိုဝ်ႈယူႇယဝ်ႉ။ ႁဵတ်းသင်လႄႈဝႃႈၼၼ်လႃႇပေႃးၼႆ ယၢမ်းလဵဝ် မၢၼ်ႈ ဢုပ်ႉမိူင်းတႆးတင်းပိုၵ်းယဝ်ႉ ၸၢဝ်းၶိူဝ်းၸိူဝ်းမီးႁႅင်းယႂ်ႇမႃးသမ်ႉ ၶႂ်ႈပိူင်ႇမိူင်းတႆး တင်းမူတ်းတင်းပိုၵ်း ၵေႃႈပိူင်ၼိုင်ႈ ယွၼ်ႉတႆးႁဝ်းၶႃႈ ႁဵတ်းၵၢၼ်ၸိူဝ်ႉၸၢတ်ႈဢမ်ႇထိုင်တီႈလႆႈ ႁဵတ်းၵၢၼ်ဢၼ်ပဵၼ် သုၼ်ႇတူဝ်ၸဝ်ႈၵဝ်ႇၵူၺ်းလႄႈ၊ တေႃႇထိုင်ဝၼ်းမိူဝ်ႈၼႆႉ ၵူၼ်းဝၢၼ်ႈၵူၼ်းမိူင်း တုၵ်ႉၶၸွမ်းၼပ်ႉႁူဝ် လၢၼ်ႉၵေႃႉ ၵူၼ်းမိူင်းႁဝ်းၶႃႈလႆႈထုၵ်ႇ ၶီႇၼဵၵ်းတဵၵ်းတဵင်ႁၢဝ်ႉႁႅင်းမႃး  ၵူၼ်းမိူင်းႁဝ်းၶႃႈၶၢမ်ႇ ၼႃႈလဵၵ်ႉတႃ ၼွႆႉသေ ယွၼ်းယူႇပိုင်ႈႁူမ်ႈမိူင်းပိူၼ်ႈ ၼပ်ႉႁူဝ်လၢၼ်ႉၵေႃႉမၼ်း တႆးႁဝ်းၶႃႈတေ ဢမ်ႇၸူမ်ႁၢႆလၢႆၵႂႃႇၼၼ်ႉ ၽႂ်တေႁတ်းလၢတ်ႈ ၊ ၸဵမ်ၸိူဝ်းၼႆႉ မၼ်းဢမ်ႇၸႂ်ႈတၢင်းလဵၼ်ႈ လႄႈ  ၵူၼ်းတႆး ၸုမ်းတႆး ဢၼ်မီးၸိုဝ်ႈဝႃႈ တႆး..တႆး..တႆး..ၼၼ်ႉ လီဢဝ်ႁဵတ်းပဵၼ်တွၼ်ႈသွၼ် ႁဝ်းၵႂႃႇၶၢဝ်းၼႃႈ တႄႉတႄႉ။

တႆးႁဝ်းၶႃႈၼႆႉ ယူႇႁိမ်းလႂ် ၸမ်ၶိူဝ်းလႂ်ၼႆၵေႃႈ ယဵၼ်းပဵၼ်ၶိူဝ်းၼၼ်ႉၵႂႃႇ ပိူင်တႅၵ်ႈမၼ်း ယူႇၸၢပ်ႈၼင် လိၼ်မၢၼ်ႈ ၼႆၵေႃႈယဵၼ်းပဵၼ်မၢၼ်ႈၵႂႃႇ ၊ ယူႇၸၢပ်ႈလိၼ်ၶႄႇၼႆၵေႃႈ ယဵၼ်းပဵၼ်ၶႄႇၵႂႃႇ ယူႇၸၢပ်ႈၼင် လိၼ်ထႆးၼႆၵေႃႈ ယဵၼ်းပဵၼ်ထႆးၵႂႃႇ လွင်ႈၼႆႉသင်ႁဝ်းၶႃႈဝူၼ်ႉတူၺ်းတိုၼ်ႈတိုၼ်ႈၼႆၵေႃႈ တေၸၢင်ႈ ပဵၼ်ဢၼ်တိုၼ်ႈတိုၼ်ႈၵႂႃႇၵူၺ်း ၊ တႆးႁဝ်းၶႃႈလီဢဝ်တၢင်းႁူႉဢၼ်မီးတီႈ တူဝ်ၽႂ်မၼ်းၼၼ်ႉသေ ဝူၼ်ႉ ႁဵတ်းလွင်ႈ ဢၼ်တႆးႁဝ်းတေဢမ်ႇၸၢင်ႈယဵၼ်း မိူၼ်ၼင်ႇ ၸႂ်ႁဝ်းၼႆႉ မႆႈၵေႃႈပဵၼ်ၸႂ် ဝႆးၵေႃႈ ပဵၼ်ၸႂ် ထိူင်းၵေႃႈပဵၼ်ၸႂ် ၶႂ်ႈႁႂ်ႈမၼ်းပဵၼ်ၸိူင်ႉႁိုဝ် ႁႂ်ႈၾၢင်ႁၢင်ႈဢွၵ်ႇမႃးၸိူင်ႉႁိုဝ်ၼႆၼၼ်ႉၵေႃႈ ယူႇတီႈၸႂ်ၸဝ်ႈ ၵဝ်ႇ ယူႇတီႈတၢင်းမေႃ လႅတ်းသႅဝ်းၸဝ်ႈၵဝ်ႇၼၼ်ႉၵူၺ်း ဝႃႈတေထိင်းသိမ်း ၵႂႃႇလႆႈႁိုင်ၵႃႈႁိုဝ် ၸဵမ်ၸိူဝ်း ၼႆႉ ယူႇတီႈၸႂ်ႁဝ်းၶႃႈၼၼ်ႉၵူၺ်း။

ပီႊၼိုင်ႈယဝ်ႉပီႊၼိုင်ႈ ပူၼ်ႉၵႂႃႇ ၶၢဝ်းတၢင်းပူၼ်ႉမႃးယဝ်ႉ 75 ပီႊမိူင်း ယွၼ်ႉတႆးႁဝ်း ဢမ်ႇႁူႉငဝ်ႈၶၢမ်ႇပိုၼ်ႉ ၵၢၼ်မိူင်း ဢမ်ႇႁူႉငဝ်ႈၶၢမ်ႇပိုၼ်ႉဢၼ်ဝႃႈၵွၼ်းၶေႃ ဢမ်ႇႁူႉငဝ်ႈၶၢမ်ႇပိုၼ်ႉၽွမ်ႉႁူမ်ႈ − ငမ်းယဵၼ် ထၢင်ႇႁၢင်ႈ ၼၼ်ႉလီလီလႄႈ ၼႂ်းလုမ်ႈၾႃႉလူင်ၼႆႉ တႆးႁဝ်းၶႃႈၸင်ႇပဵၼ်ၽူႈလုၵ်ႉၽိုၼ်ႉ ႁိုင်ယၢဝ်းၼၢၼ်း မႃးမိူၼ်ပိူၼ်ႈ ယဝ်ႉၵေႃႈၸုမ်းလုၵ်ႉၽိုၼ်ႉၼႂ်းၸိူဝ်ႉၸၢတ်ႈတႆးႁဝ်းၶႃႈၵူၺ်း ပေႃးမီးပဵၼ်လၢႆမူႇလၢႆၸုမ်းယဝ်ႉ ၊ ၼႂ်းမိူင်းၸိုင်ႈတႆးႁဝ်းၵေႃႈ မီးၸုမ်းလုၵ်ႉၽိုၼ်ႉၼမ်လိူဝ်သေပိူၼ်ႈ ၊ ၸိူင်ႉႁိုဝ်ၵေႃႈလီၶႃႈၵႂႃႈ ပိူင်လူင်မၼ်း ႁဝ်းၶႃႈ လူဝ်ႇမီးၼမ်ႉၸႂ်လုၵ်ႉၽိုၼ်ႉဢၼ်ၸႅတ်ႈဢၼ်ၸၢင်ႇမၼ်း ၵူၺ်းဢမ်ႇၵႃး ၼမ်ႉၵတ်ႉတၢင်းၶႅၼ်ႇ တၢင်းမေႃဝူၼ်ႉ မေႃႁဵတ်း မေႃသၢင်ႈၼၼ်ႉၵေႃႈ  ႁဝ်းၶႃႈတေလႆႈမီး တေလႆႈလဵပ်ႈႁဵၼ်းဢဝ် မိူၼ်ၼင်ႇ ပိူင်တႅၵ်ႈ ဢၼ်ပဵၼ်ယူႇၼႂ်းမိူင်းပိူၼ်ႈၼၼ်ႉသေ ဢဝ်မႃးၸႂ်ႉတိုဝ်းၵႄႈလိတ်ႈၵႂႃႇ ဝၼ်းၼိုင်ႈမႃးတေ ၸၢင်ႈထိုင်ယိူင်းမၢႆလူင်ႁဝ်းၼၼ်ႉလႆႈယူႇ။

တီႈတႄႉမၼ်း လုၵ်ႈသိုၵ်းမၢၼ်ႈၶဝ် ၶတ်းၸႂ်ပိၵ်ႉႁူပိၵ်ႉတႃ ၶတ်းၸႂ်ႁဵတ်းႁႂ်ႈပၢႆးမၢၵ်ႈမီးတႆးႁဝ်းတူၵ်းတႅမ်ႇ ၵွတ်းၽၢၼ် ၶတ်းၸႂ်ႁေႉႁၢမ်ႈ လွင်ႈထိင်းသိမ်းၾိင်ႈငႄႈၾိင်ႈထုင်း လႄႈ လိၵ်ႈလၢႆးတႆးႁဝ်းၶႃႈ မႃးၶၢဝ်း ႁိုင်ယဝ်ႉလႄႈ  ယၢမ်းမိူဝ်ႈလဵဝ် ၵူၼ်းမိူင်းတႆး ၸင်ႇလႆႈတုၵ်ႉယၢၵ်ႈၵွတ်းၽၢၼ် ႁၢမ်းၵၢၼ် ႁၢမ်းတီႈယူႇတၼ်း သဝ်းၼမ်မႃး ၵူၼ်းမိူင်းႁဝ်းၶႃႈ ထုၵ်ႇတီႉၺွပ်းၶႃႈႁႅမ် မိူၼ်ဝူဝ်းမိူၼ်ၵႂၢႆး လႆႈပၢႆႈ လႆႈၼီ မႃးႁၢၼ်ႉတေႃႇထိုင် ဝၼ်းမိူဝ်ႈၼႆႉ ၶႃႈယဝ်ႉ ၊ ၽွင်းယၢမ်းတေႃႈလဵဝ် ၵူၼ်းမိူင်းၸိုင်ႈတႆးႁဝ်းၶႃႈ ဢၼ်မီးၵႂႃႇ ၵူႈတီႈၵူႈတၢင်း ၸိူဝ်းၼၼ်ႉ ႁႂ်ႈၸဵဝ်းပွင်ႇၸႂ် ဝႆးၾႆးဝႃႈ ယွၼ်ႉ ပူႇမွၼ်ႇၼၢႆးယႃႈႁဝ်းလႆႈလူင်းလၢႆးမိုဝ်း လိၵ်ႈႁူမ်ႈမၢႆပၢင်လူင် တႃႇၵေႃႇတင်ႈ မိူင်းႁူမ်ႈတုမ်ၸွမ်းမၢၼ်ႈ ၼႂ်းဝၼ်းထီႉ 12 2 1947  ယၢမ်းၵၢင်ၼႂ်လႃႈ 11.00 မူင်း တီႈပၢင်ႇပဵင်းလူင် ၸဵင်ႇၸၢၼ်းဝၼ်းတူၵ်း ဝဵင်းပၢင်လူင် တႃႇယူႇႁူမ်ႈၵၼ် ၶၢဝ်းတၢင်း 10 ပီႊၼႆသေတႃႉ တေႃႇဝၼ်း မိူဝ်ႈၼႆႉ ၶၢဝ်းတၢင်းပူၼ်ႉမႃး ၼပ်ႉႁူဝ်သိပ်းပီႊမိူင်းယဝ်ႉ လိၵ်ႈႁူမ်ႈမၢႆပၢင်လူင်ဢၼ်ဝႃႈၼၼ်ႉ မီးတီႈလႂ် ၽႂ်ၵေႃႉယႃႉလုသိၵ်ႇပႅတ်ႈၼႆၵေႃႈ ပႆႇမီးလွင်ႈဢဝ်တၢင်းၽိတ်းသင်လႆႈၼိူဝ် မၢၼ်ႈၶဝ်။ ဢၼ်ဢွၼ်ႁူဝ် လူင်းလၢႆးမိုဝ်းၼၼ်ႉ ပဵၼ်တႆးႁဝ်းၶႃႈၵေႃႉဢွၼ်ႁူဝ်ပိူၼ်ႈ လူင်းလၢႆးမိုဝ်း လိၵ်ႈႁူမ်ႈမၢႆပၢင်လူင်လႄႈ တေႃႇထိုင်ဝၼ်းမိူဝ်ႈၼႆႉ တႆးႁဝ်းၶႃႈယင်းတုၵ်းယွၼ်း ႁႂ်ႈမၢၼ်ႈၶဝ်ႁဵတ်းၸွမ်း ၼမ်ႉၸႂ်ပၢင်လူင်ယူႇ ၊ ထႅင်ႈၽၢႆႇၼိုင်ႈတၢင်းၼိုင်ႈ မိူၼ်ၼင်ႇတၢင်ႇၸၢဝ်းၶိူဝ်းၶဝ် ဢမ်ႇပေႃးဝႆႉၼမ်ႉၼၵ်း လိၵ်ႈႁူမ်ႈ မၢႆပၢင်လူင်ၼၼ်ႉၵႃႈႁိုဝ်။  မၢင်ၸုမ်းၸုမ်းၼႆႉဢမ်ႇတွၼ်ႉ လၢတ်ႈထိုင်သေပွၵ်ႈ မၢင်ၸုမ်းသၢင်ႈ တပ်ႉသိုၵ်းၵႅၼ်ႇၶႅင်ယဝ်ႉ ယွၼ်းၼႃႈလိၼ်ၽွင်းငမ်း မၢင်ၸိူဝ်းယွၼ်းတင်ႈၸိုင်ႈမိူင်း ၸဵမ်ၸိူဝ်းၼႆႉ မႃးၶႃႈယဝ်ႉ ဢၼ်လၢတ်ႈထိုင် လိၵ်ႈႁူမ်ႈမၢႆပၢင်လူင် မႃးတေႃႇထိုင်ဝၼ်းမိူဝ်ႈၼႆႉၵေႃႈ ပဵၼ်တႆးႁဝ်းၶႃႈၵူၺ်း ၊ ဢၼ်ယွၼ်း ၼႃႈလိၼ်ၽွင်းငမ်း တူဝ်ၵဝ်ႇ ယူႇမိူဝ်ႈလဵဝ် လႄႈ ၸိူဝ်းလႆႈၼႃႈလိၼ် ၽွင်းငမ်းတူဝ်ၵဝ်ႇ သေသိုပ်ႇ ယွၼ်းတင်ႈၸိုင်ႈမိူင်းမႃးႁၢဝ်ႉႁႅင်း မိူဝ်ႈလဵဝ်ၼႆႉၵေႃႈ ပဵၼ်ယူႇမီးယူႇ ၼႂ်းၸိုင်ႈတႆးႁဝ်းၶႃႈ ၵမ်ႈၼမ်။

ပၼ်ႁႃၵၢၼ်မိူင်း ၵၢၼ်သိုၵ်း ဢၼ်ပဵၼ်ယူႇၼႂ်းၸိုင်ႈတႆးႁဝ်းၶႃႈမိူဝ်ႈလဵဝ်ၼႆႉ မၢင်ၸုမ်းဝႃႈ မၼ်းတိုၵ်ႉ ၸဝ်ႉၼႃႇ တႃႇတေဢဝ်လွတ်ႈလႅဝ်းသဝ်းၶေႃ ၽူႈၶဵၼ်ၸၢင်ႈၵူၼ်ႇပင်းႁဝ်းလႆႈငၢႆႈဢိူဝ်ႈ ၼႆၵေႃႈမီး ၵမ်ႈၽွင်ႈၵေႃႈဝႃႈ ယွၼ်းႁႂ်ႈလႆႈႁူဝ်မႃႇပဵင်းၵၼ် ၵမ်ႈၽွင်ႈၵေႃႈၵိူင်းၸူးဢူၺ်းလီ တႆးႁဝ်းၼင်ႇၵၼ် ပၢႆးႁၼ် ပိူင်ႈၵၼ် သႂ်ႇသႂ်ႇမႃးတႆးႁဝ်းၼင်ႇၵၼ် ႁိမ်းၼႃႈတီႈၵၼ် တိုၵ်းၵၼ်ၶိုၼ်း ႁဵတ်းႁႂ်ႈၵူၼ်းၼႂ်းမိူင်းၸဝ်ႈၵဝ်ႇ လႆႈပၢႆႈလႆႈၼီ လႆႈတုၵ်ႉယၢၵ်ႈၵေႃႈၼမ်မႃးတႄႉတႄႉ။ ယွၼ်ႉၵၢၼ်လဵပ်ႈႁဵၼ်းႁူႉႁၼ်တႆးဢေႇႁႅင်းပူၼ်ႉ လႄႈ တႆးဢၼ်ဝႃႈၼၼ်ႉၵေႃႈလိူဝ်သေၸိုဝ်ႈတႆးယဝ်ႉ တေဢမ်ႇၵိုတ်းလိူဝ်သင် ၊ ႁဵတ်းၵႂႃႇႁဵတ်းၶိုၼ်း သႂ်ႇသႂ်ႇမႃး တီႈႁႃၵိၼ် လဵင်ႉတွင်ႉတႆးႁဝ်းၶႃႈ ၼၼ်ႉတေဢမ်ႇၵိုတ်းလိူဝ်ၶႃႈယဝ်ႉ။

မိူဝ်ႈၼႆႉၶၢဝ်းယၢမ်းၼႆႉ ထုၵ်ႇလီႁဵတ်းႁိုဝ်ၵေႃႈ ႁဵတ်းလႃႈ သင်ႁဝ်းၶႃႈၵုမ်ႇပႂ်ႉၶၢဝ်းယၢမ်း မိူၼ်ၵႃႈပူၼ်ႉမႃး ယူႇတိၵ်းတိၵ်းတႄႉ ၼိူဝ်ၼင်လိၼ်မိူင်းတႆးၼၼ်ႉ တေဢမ်ႇမီးၵူၼ်းတႆးႁဝ်းၶႃႈ ၵိုတ်းသေၵေႃႉၶႃႈယဝ်ႉ၊ ဝၼ်းမိူဝ်ႈၼႆႉ ႁဝ်းၶႃႈလီ ႁူႉတူဝ် လီလႅၵ်ႈလၢႆႈ လၢႆးႁဵတ်းလၢႆးသၢင်ႈႁဝ်း ၼင်ႇႁိုဝ်ပေႃးတေပဵၼ်မႃး တီႈၸႂ်ယႂ်ႇ ဝၼ်းတင်းၼႃႈ လႄႈ တေပဵၼ်ဝၼ်းလီတႃႇႁဝ်းတၢင်းၼႃႈၼၼ်ႉယူႇ ဢမ်ႇႁၢင်ႉ။

ပၢႆၵမ်−ၸၢႆးထုၼ်းလႃႉ

ဢိင် − ပပ်ႉ ၼမ်ႉတႃၵႄႈပၢင်တိုၵ်း − ၽူႈဢွၼ်ႁူဝ်ၵိုၵ်းပိုၼ်း

*** ပွင်ႈၵႂၢမ်းႁူဝ်ၼႆႉ ပဵၼ်ပၢႆးဝူၼ်ႉလႄႈတၢင်းႁၼ်ထိုင်သုၼ်ႇတူဝ် ၽူႈတႅမ်ႈလိၵ်ႈၵူၺ်း ဢမ်ႇၸႂ်ႈၶေႃႈၶၢၼ်ပၢၵ်ႇ တႆးလွတ်ႈလႅဝ်း။