ယွၼ်ႉသင်မိူင်းၸိုင်ႈတႆး တူၵ်းတႅမ်ႇၵွတ်းၽၢၼ်

ယွၼ်ႉသင်ၼႂ်းမိူင်းၸိုင်ႈတႆးလူင်ႁဝ်းတူၵ်းတႅမ်ႇ ၵွတ်းၽၢၼ်လႃႇ ယွၼ်ႉသင်ၵူၼ်းမိူင်းၸိုင်ႈတႆးႁဝ်းၶႃႈၼႆႉ ၵမ်ႈပႃႈၼမ်ၵေႃႈ ဢွၼ်ပၢႆႈၵႂႃႇယူႇ တၢင်ႇတီႈ တၢင်ႇမိူင်း တိူဝ်းၼမ်မႃး မၢင်ၸိူဝ်းယင်းပႆႇလႆႈ ပွၵ်ႈႁိူၼ်းၶိုၼ်း  လုၵ်ႈဢွၼ်ႇႁဝ်းႁၢမ်းၵၢၼ်ႁဵၼ်းၵၢၼ်သွၼ်ၼမ်မႃး ၊ ပေႃးႁဝ်းၶႃႈလၢမ်းတူၺ်းတႄႉ ဢမ်ႇဝႃႈၵၢၼ်သင် ၶႃႈၼေႃ ယွၼ်ႉၵူၼ်းမိူင်းၸိုင်ႈတႆး ႁဝ်းၶႃႈ ႁဵတ်းၵၢၼ်ဢမ်ႇပေႉ ၵိၼ်သမ်ႉဢမ်ႇပေႃး ယွၼ်ႉလူၺ်ႈ ၵၢၼ်ပၢႆးမိူင်း ပၢႆးသိုၵ်း ဢမ်ႇၼိမ်ဢမ်ႇသဝ်း ၵၢၼ်ႁႃငိုၼ်းယၢပ်ႇ ၵၢၼ်ႁႃလဵင်ႉတွင်ႉယၢပ်ႇႁႅင်းပူၼ်ႉလႄႈ ၵူၼ်းမိူင်းႁဝ်းၶႃႈ ၵမ်ႈပႃႈၼမ် ဢွၼ်ၵၼ်ပၢႆႈ ၵႂႃႇႁဵတ်းၵၢၼ်မိူင်းၶႄႇ ထႆး မၢၼ်ႈ ၸိူဝ်းၼႆႉၶႃႈယဝ်ႉ ဢၼ်ႁဝ်း ၶႃႈႁူႉၸၵ်းလီသေပိူၼ်ႈ  ဝၢၼ်ႈဢမ်ႇႁၢမ်းႁိုဝ်တေၶၢမ်ႇလႆႈ ၊ ၵူၼ်းမိူင်းႁဝ်းၶႃႈ ၵမ်ႉပႃႈၼမ် တႄႇၸဵမ် ၶႅပ်ႇဝဵင်း တေႃႇထိုင်ဝၢၼ်ႈၼွၵ်ႈၸွၵ်ႉထိူၼ်ႇ ႁဵတ်းၵိၼ်ႁႆႈ သႆႉၵိၼ် သူၼ် ၸွမ်းၶိင်ႇလႂ်ၶၢဝ်းၼၼ်ႉၵူၺ်း လႄႈ ၾႆးၾႃႉၼႆၵေႃႈဢမ်ႇၸွတ်ႇတူဝ်ႈထိုင်လႆႈ ၸွမ်းဝၢၼ်ႈၼွၵ်ႈၼႃးပၢင်ႇ ပေႃးပဵၼ်ၸိူင်ႉၼႆ ဝၢၼ်ႈမိူင်း ႁဝ်းၶႃႈ တိုၼ်းတေတူၵ်းတႅမ်ႇၵွတ်းၽၢၼ် ၵႂႃႇတိၵ်းတိၵ်းၼၼ်ႉၶႃႈယဝ်ႉ။

ယွၼ်ႉပၢင်တိုၵ်းပွတ်းႁွင်ႇ ႁဵတ်းႁႂ်ႈတႆးႁဝ်းႁၼ်ၽိတ်းၵၼ်

ဢိင်ၼိူဝ်ပၢႆးဝူၼ်ႉၵၢၼ်မိူင်း ႁဝ်းႁႃးပီႈၼွင်ႉပိူင်ႈၵၼ်လႄႈ ပဵၼ်လွင်ႈယၢပ်ႇတႃႇတေပူၵ်း တင်ႈ ၸိုင်ႈတႆးႁဝ်းတႄႉတႄႉ ၊ ႁဝ်းႁႃးမီးတၢင်းႁၼ်ပိူင်ႈၵၼ်ၸိူင်ႉႁိုဝ် ၽၢႆႇၼိုင်ႈဢဝ်သဵင်ၵၢင်ၸႂ် ၵူၼ်းမိူင်းၸိုင်ႈ တႆးပဵၼ်ယႂ်ႇ ၽၢႆႇၼိုင်ႈသမ်ႉ ဢဝ်ဝႃႇတမုၵ်ႉၸုမ်း ဢဝ်ဝႃႇတဢူၺ်းလီပဵၼ်ယႂ်ႇသေ ဢမ်ႇဝူၼ်ႉၼႃႈဝူၼ်ႉ လင် ပၼ်ႁႃတႆးႁဝ်းၶႃႈ ႁိုဝ်တေၸၢင်ႈယဝ်ႉၸၢင်ႈဝၢႆး လိူဝ်သေၼၼ်ႉ ၽူႈၶဵၼ်လူင်ႁဝ်းၼၼ်ႉၵေႃႈ ဢဝ်လွင်ႈတၢင်းသေဢၼ်ဢၼ် ၽေႃႇသၢင်ႈႁဵတ်းႁႂ်ႈပဵၼ်ပၢင်တိုၵ်းမႃး၊ ၶႃႈႁဝ်းတေယုၵ်ႉၼေပိူင်တႅၵ်ႈ တူဝ်ယၢင်ႇမၼ်း မိူၼ်ၼင်ႇ ပၢင်တိုၵ်းပွတ်းႁွင်ႇႁဝ်းၶႃႈၼႆႉ တီႈတႄႉမၼ်းၵွမ်ႉၵႃႈ ပၼ်ႁႃၵႄႈၵၢင် တႆးႁဝ်းၼင်ႇၵၼ်ၼၼ်ႉ ၶႃႈလၢမ်းၶၢတ်ႈတူၺ်းတႄႉ တိုၼ်းတေ ၵႄႈလိတ်ႈၵၼ်ၵႂႃႇလႆႈယူႇ ၵူၺ်းၵႃႈ မိူၼ်မီးၵူၼ်းသေၵေႃႉ ၸွႆႈတွၵ်ႇၸိမ်ႁႂ်ႈပဵၼ်ၵႂႃႇသွင်ၵိူင်း တူၺ်းၶႃႈလႄႈ ၸေႃႇမိၼ်းထုၼ်း ၵေႃႉဢၼ်ပဵၼ် ၽူႈၶၢၼ်ပၢၵ်ႇ ၶွင်ႇသီႇသိုၵ်းမၢၼ်ႈၼၼ်ႉ လႆႈဢွၵ်ႇမႃးလၢတ်ႈၽၢၼ်ႇတၢင်း သိုဝ်ႇၶၢဝ်ႇဢၼ်မီးၸိုဝ်ႈသဵင် (RFA) ၼႂ်းဝၼ်းထီႉ 5 October 2020 ပူၼ်ႉမႃး ၼႂ်းၼၼ်ႉပႃးလွင်ႈ RCSS/SSA ထူဝ်းၼႃႈသိုၵ်းၶိုၼ်ႈပွတ်းႁွင်ႇ ၵၢဝ်ႇမၢပ်ႇၼႄးဝႃႈ “ ၶွင်ႇသီႇဢဝ်ၶိုၼ်းၸိုင်ႈတႆး တပ်ႉသိုၵ်းၸိုင်ႈတႆး RCSS/SSA ၼႆႉလႆႈ ပူၼ်ႉပႅၼ် လိၵ်ႈၵိၼ်ၵႅၼ်ႇ NCA သေ ထူဝ်းသိုၵ်းၶိုၼ်ႈပွတ်းႁွင်ႇ RCSS/SSA တိုၼ်းလူဝ်ႇလႆႈထွႆထွၼ်ဢွၵ်ႇ ပွတ်းႁွင်ႇ ၶိုၼ်းမူတ်းမူတ်း သေ ပွၵ်ႈမိူဝ်းယူႇပွတ်းၸၢၼ်းၶိုၼ်း သဵင်ႈသဵင်ႈၼႆယူႇ ၊ ယွၼ်ႉတပ်ႉ သိုၵ်းၸိုင်ႈတႆး ပူၼ်ႉပႅၼ် NCA လႄႈ တပ်ႉသိုၵ်းမၢၼ်ႈၸင်ႇလႆႈၶဝ်ႈလေႃႇတိုၵ်းမႃးႁၢဝ်ႉႁၢဝ်ႉႁႅင်းႁႅင်း” လၢတ်ႈၼေၼင်ႇ ၼႆ။ ၸဝ်ႈသိုၵ်းဢုမ်ႈၶိူဝ်း ၽူႈၶၢၼ်ပၢၵ်ႇ တပ်ႉသိုၵ်းၸိုင်ႈတႆး RCSS/SSA ဢွၵ်ႇမႃးတုမ်ႉတွပ်ႇၶိုၼ်း ၽၢၼ်ႇသိုဝ်ႇၶၢဝ်ႇတႆးလွတ်ႈလႅဝ်း ၼႂ်းဝၼ်းထီႉ 5 ဢွၵ်ႇထူဝ်ႇပိူဝ်ႇ 2020 ဝႃႈ “ ပဵၼ်ႁိုဝ်မီးႁိုဝ်မႃးၵေႃႈ ယူႇတီႈၽၢႆႇတပ်ႉသိုၵ်းၸိုင်ႈတႆး RCSS/SSA တေၶတ်းၸႂ်ထိင်းသိမ်း NCA သေ ၼင်ႇႁိုဝ်ပေႃးတေ ဢမ်ႇပဵၼ်မႃး ပၢင်တိုၵ်းသိုၵ်းသိူဝ်ၼၼ်ႉၵေႃႈ တေၶတ်းၸႂ်ငိူင်ႉဝႄႈပၼ် တီႈဢၼ်ဢမ်ႇၸၢင်ႈ ငိူင်ႉဝႄႈပၼ်လႆႈၼၼ်ႉၵေႃႈ ၵႃႈတေလႆႈၵႅတ်ႇၶႄတူဝ်ၶိုၼ်း ပၢင်တိုၵ်းတေယိုတ်ႈယၢဝ်းၵႂႃႇႁိုင်ထႅင်ႈၵႃႈႁိုဝ် ပၢင်တိုၵ်းတေယဵၼ်မိူဝ်ႈလႂ် ၼၼ်ႉတႄႉ မၼ်းယူႇတီႈ ၶွင်ႇသီႇသိုၵ်းမၢၼ်ႈၶဝ်လုမ်းလုမ်းၵူၺ်း ” လၢတ်ႈ ၵႂႃႇၼင်ႇၼႆ။ ဝၢႆးသေၼၼ်ႉမႃး ပၢင်တိုၵ်းၵႄႈ ၶွင်ႇသီႇသိုၵ်း မၢၼ်ႈ လႄႈ RCSS/SSA ၸင်ႇပဵၼ်ပၢင်တိုၵ်းၵၼ် မႃးၼႂ်းမိူင်းတႆးပွတ်းႁွင်ႇ ႁၢဝ်ႉႁၢဝ်ႉႁႅင်းႁႅင်းထႅင်ႈ ၽၢႆႇၶွင်ႇသီႇတပ်ႉသိုၵ်းမၢၼ်ႈၶဝ် ၸႂ်ႉပႃးႁိူဝ်းမိၼ် ၶဝ်ႈပိုတ်းယိုဝ်းၸွမ်း ပွတ်းၵျွၵ်ႉမႄး ၊ ဝၢႆးသေပၢင်တိုၵ်းၵႄႈၵၢင် ၶွင်ႇသီႇသိုၵ်းမၢၼ်ႈတင်း RCSS/SSA ယဝ်ႉတူဝ်ႈၵႂႃႇၼၼ်ႉ ပၢင်တိုၵ်းသိုၵ်းတႆးသွင်ၸုမ်းၵေႃႈပေႃႇပဵၼ်မႃး ၽၢႆႇတင်းၸုမ်းသိုၵ်း SSPP မီးဢူၺ်းလီ ၶဝ်ႈၸွႆႈတင်းၼမ် မိူၼ်ၼင်ႇ ဝ လွႆ ၵဝ်ႈၵၢင်ႉ သိုၵ်းၵူၼ်းမိူင်းၸဵမ်ၸိူဝ်းၼႆႉ။ ၵဵဝ်ႇၵပ်းပၢင်တိုၵ်းတႆး တေႃႇတႆးႁဝ်းၼႆႉ ယူႇတီႈမုၵ်ႉၸုမ်းၶွင်ႇ သီႇဢဝ်ၶိုၼ်းၸိုင်ႈတႆး တပ်ႉသိုၵ်းၸိုင်ႈတႆး RCSS/SSA ဝူၼ်ႉတေႃႇၼႃႈ ပေႃႈမႄႈ ၵူၼ်းမိူင်းသေ ၸင်ႇထွႆႇထွၼ်ပၼ် ဢွၵ်ႇမႃးပွတ်းႁွင်ႇၵမ်းဢိတ်းဢိတ်းယူႇယဝ်ႉ။

ငမ်းယဵၼ် ဢၼ်ဝႃႈၼႆႉၽႂ်ၽႂ်ၵေႃႈ ၶႂ်ႈၸၢမ်ႇပူၺ်ႈယူႇတႂ်ႈႁူမ်ႈငဝ်း လွင်ႈငမ်းယဵၼ်ယူႇ ။ ပေႃးႁဝ်းမႃးတူၺ်းၶိုၼ်း မိူဝ်ႈပၢၼ်ပူႇမွၼ်ႇႁဝ်းၶဝ်ၼၼ်ႉၵေႃႈ ၶဝ်ယူႇၸွမ်းသၽႃႇဝ ၵတ်းၵတ်းယဵၼ်ယဵၼ် ၶဝ်ဢမ်ႇမၢၵ်ႈမီး မိူၼ်ၵၢပ်ႈယၢမ်းလဵဝ်သေတႃႉ ၸိူဝ်းၶဝ်ဢမ်ႇထိုင်တီႈတုၵ်ႉၶ တူၵ်းၵိၼ်း ၶၢၼ်ၸႂ် မိူၼ်ၵၢပ်ႈ ပၢၼ်ယၢမ်းလဵဝ်သေဢိတ်း ။ ၼင်ႇႁိုဝ်ပေႃးတေပဵၼ်လွင်ႈငမ်းယဵၼ်မႃးလႆႈၼၼ်ႉ လႆႈႁၼ်မုၵ်ႉၸုမ်း ၶွင်ႇသီႇဢဝ်ၶိုၼ်းၸိုင်ႈတႆး တပ်ႉသိုၵ်းၸိုင်ႈတႆး RCSS/SSA ၶတ်းၸႂ်တိုၵ်းသူၼ်း ၶဝ်ႈႁႃဢုပ်ႇဢူဝ်း ၵူႈၸုမ်းၸုမ်း ထႅင်ႈၽၢႆႇၼိုင်ႈတၢင်းၼိုင်ႈၵေႃႈ ဢမ်ႇဝႃႈတေပဵၼ်လူင်ပွင်ၸိုင်ႈမၢၼ်ႈ ၶွင်ႇသီႇသိုၵ်းမၢၼ်ႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ပႃႇတီႇပၢႆးမိူင်းၶဝ် လႆႈယုၵ်ႉဢဝ်ၶေႃႈၵႂၢမ်း ဢၼ်ဝႃႈငမ်းယဵၼ်ၼႆႉသေ ဢဝ်မႃးတူၵ်ႇလၢတ်ႈဢုပ်ႇၵၼ် ဢဝ်ႁဵတ်းပဵၼ်တီႈႁၢင်ႈလီတႃ တေႃႇၵူၼ်းမိူင်းမႃးတေႃႇထိုင်ဝၼ်းမိူဝ်ႈၼႆႉ၊ ၽၢႆႇမၢၼ်ႈၶဝ်ၵေႃႈ ဢဝ်ၸိုဝ်ႈဢၼ်ဝႃႈ ငမ်းယဵၼ်ၼႆၼၼ်ႉ ႁဵတ်းပဵၼ်ၼႃႈတိူဝ်ႈ ယိုၼ်းမိုဝ်း ႁွင်ႉဢုပ်ႇၸွမ်း ၸုမ်းယိပ်းၵွင်ႈၵၢင်ႇ ယူႇၶိူဝ်းၶိူဝ်းယႂ်းယႂ်း တေႃႇထိုင်မိူဝ်ႈလဵဝ်ၶႃႈယဝ်ႉ ၽၢႆႇၸုမ်းယိပ်းၵွင်ႈၵၢင်ႇၶဝ်ၵေႃႈ ၼင်ႇႁိုဝ်ပေႃးတေမီးမိူင်းမႃး မီးၼႃႈလိၼ်ၽွင်းငမ်းတူဝ်ၵဝ်ႇမႃး မီးလွင်ႈထၢင်ႇႁၢင်ႈမႃးၼၼ်ႉ လႆႈႁၼ်ၶဝ်ၶတ်းၸႂ် ဢဝ်လွင်ႈငမ်းယဵၼ် ဢုပ်ႇၵုမ်ၵၼ်မႃး ဢမ်ႇထၢတ်ႇမိူၼ်ၵၼ် ၊ ၵူၺ်းၵႃႈ ဢၼ်သူၵဝ်ႁဝ်းႁႃး လႆႈႁၼ်ယူႇယၢမ်းမိူဝ်ႈလဵဝ်ၼႆႉသမ်ႉ ဢမ်ႇပဵၼ်မႃးၼင်ႇၶဝ်လၢတ်ႈဝႆႉသေဢိတ်း လၢႆးႁဵတ်းသၢင်ႈၶဝ်ၼႆၵေႃႈပိူင်ႈၵၼ် တင်းသဵၼ်ႈတၢင်းငမ်းယဵၼ်တႄႉတႄႉ။ ၼႂ်းမိူင်းႁူမ်ႈတုမ်လူင်ႁဝ်းၼႆႉ ပဵၼ်ပွႆးတိုၵ်းၵၼ်မႃး မိူဝ်ႈလႂ် ၶၢဝ်းယၢမ်းလႂ်သေဢမ်ႇဝႃႈ ၵုမ်ႇၼိၵ်ႈၸၢၵ်ႈ ၵူၼ်းမိူင်းႁဝ်းတိၵ်းတိၵ်း ၼၼ်ႉၵူၺ်း တေႃႈၼင်ႇ ၸွမ်းၵျွင်း ၸွမ်းဝတ်ႉ ၸဝ်ႈမုၼ်ၶဝ်ပေႃးဢမ်ႇလွတ်ႈ ။ ၼႂ်းမိူင်းႁူမ်ႈတုမ်ဢၼ်ပွမ် လူင်ႁဝ်းၼႆႉ လွင်ႈၵတ်းယဵၼ် လွင်ႈၽဵင်ႇပဵင်း လွင်ႈမူၼ်ႈသိူဝ်း လွင်ႈၶိုၼ်ႈယႂ်ႇမႂ်ႇသုင်ၸဵမ်ၸိူဝ်းၼႆႉ တေလႆႈဝႃႈတိုၵ်ႉ ႁၢင်ႇၵႆသူၵဝ်ႁဝ်းႁႃးယူႇ။

ယွၼ်ႉဝႃႈဝၢၼ်ႈမိူင်းၸိုင်ႈတႆးႁဝ်း တိုၵ်ႉထုၵ်ႇယူႇပႃႈတႂ်ႈပိူၼ်ႈဝႆႉလႄႈ ၸင်ႇဢဝ်ၵၢၼ် လုၵ်ႉၽိုၼ်ႉသေ တေႃႇသူႈမႃးပီႊယၢဝ်းၶၢဝ်းႁိုင် ၵၢၼ်လုၵ်ႉၽိုၼ်ႉၼႆႉ ဢမ်ႇဝႃႈၼႂ်းမိူင်း ၼွၵ်ႈမိူင်း ႁူႉၵႃႈၸႂ်ႉတိုဝ်းလွၵ်းလၢႆး ၼင်ႇပိင်ႇၺႃႇၽႂ်မၼ်းမီးၼၼ်ႉသေ တေႃႇသူႈလုၵ်ႉၽိုၼ်ႉၵႂႃႇ  ၊ မီးလၢႆလၢႆ ၸိုင်ႈမိူင်း ဢၼ်သုမ်ႇငမ်းၼိူဝ် ၸုမ်းလုၵ်ႉၽိုၼ်ႉသေ ဢဝ်ၸုမ်းလုၵ်ႉၽိုၼ်ႉ ၼင်ႇၵၼ် တိုၵ်းၵၼ်ၶိုၼ်း ႁိမ်ၼႃႈတီႈ ႁိမ်ၼႃႈလိၼ်ၵၼ်ၶိုၼ်း။ သူၵဝ်ႁဝ်းႁႃး ၸွင်ႇတေပႃႈပဵၼ် တႆးလႅတ်းတႆးသႅဝ်းႁိုဝ် တႃႇဝၼ်း တင်းၼႃႈ ၊ ၶွင်ႇသီႇလုၵ်ႈသိုၵ်းမၢၼ်ႈၶဝ် ၶဝ်ႈတဝ်ၼႂ်းထိူၼ်ႇမိူင်းလႂ်ၵေႃႈ ပဵၼ်ပၢင်တိုၵ်းၵၼ်မိူဝ်ႈ ၼၼ်ႉၶႃႈယဝ်ႉ ၊ မၢၼ်ႈၶဝ်ၼႆႉ လၵ်းလိင်းတၢၼ်ႇလႂ် ႁႃတီႈဝႃႈမၼ်း ပေႃးဢမ်ႇမီးယဝ်ႉ။

တီႈတႄႉမၼ်း ၼႂ်းၵႃႈပၢႆးဝူၼ်ႉၵၢၼ်မိူင်းၸိုင်ႈတႆး  တႃႇတေပူၵ်းတင်ႈၸိုင်ႈမိူင်း ဢမ်ႇၼၼ် ဢဝ်လွတ်ႈလႅဝ်းၵွၼ်းၶေႃၸိူဝ်းၼၼ်ႉၵေႃႈ ၵူၼ်းမိူင်းတႆးႁဝ်းၶႃႈ မီးတၢင်းႁၼ်ထိုင် မိူၼ်ၵၼ်တင်းမူတ်း တင်းပိုၵ်းယူႇ ၵူၺ်းၵႃႈၼင်ႇႁိုဝ်ပေႃးတေထိုင်ယိူင်းမၢႆႁဝ်းၼၼ်ႉ မီးတီႈလွင်ႈၽွမ်ႉႁူမ်ႈ လႄႈမီးတီႈ ႁႅင်းထၢတ်ႈၸႂ်ၼၼ်ႉၵူၺ်း။ ႁႅင်းထၢတ်ႈၸႂ်ၸဝ်ႈၵဝ်ႇၼၼ်ႉၵေႃႈလမ်ႇလွင်ႈတႄႉတႄႉ  ႁဝ်းပႆတၢင်းၽိတ်း သေ လူမ်ႉလုၵ်ႉယဝ်ႉ ယႃႇပေၵူဝ်လွင်ႈဢၼ်တေလႆႈ‌လုၵ်ႉ သိုပ်ႇပႆၶၢဝ်းတၢင်းႁဝ်းၼၼ်ႉၶိုၼ်း။ ယုမ်ႇယမ် လႃႈ ဢမ်ႇပဵၼ်လႆႈတႃႇတေလူႉၵုၼ်ႇပင်းတူၵ်းသုမ်းယူႇတႃႇသေႇ၊ ၵႃႈတေလႆႈႁဵတ်းသၢင်ႈ ဢဝ်ႁင်းၵူၺ်း ၵူၼ်းၵေႃႉလႂ်ဢမ်ႇႁၵ်ႉဝၢၼ်ႈမိူင်းၵေႃႈ မိူၼ်ၵၼ်တင်း ဢမ်ႇႁၵ်ႉတူဝ် မၼ်းၶိုၼ်းၵူၺ်း ၶႃႈယဝ်ႉ။ တေႃႈ ၼင်ႇတဝ်ႇ ပႆထိူင်းတၢၼ်ႇလႂ် ယင်းထိုင်ယိူင်းမၢႆလႆႈဢွၼ်တၢင်း ပၢင်တၢႆး ၵူၼ်းႁဝ်းၵေႃႈမိူၼ်ၵၼ်ၶႃႈယဝ်ႉ ႁဵတ်းၵၢၼ်သိုၵ်း ၵၢၼ်မိူင်း ၵၢၼ်တူင်ႇဝူင်းၵူၼ်း ၵၢၼ်သင်ၵေႃႈလီ ႁႂ်ႈမေႃဝႆႉၸႂ်ၵတ်းၸႂ်ယဵၼ် ဝႆႉၸႂ်ယၢဝ်းယၢဝ်းသေႁဵတ်းသၢင်ႈၵႂႃႇလွႆးလွႆး ယိူင်းမၢႆႁဝ်းဢမ်ႇတွၼ်ႉပၢႆႈပႅတ်ႈႁဝ်း ယူႇတီႈႁဝ်းၵူၺ်း ၸွင်ႇ တေပၢႆႈပႅတ်ႈယိူင်းမၢႆ ၶႂ်ႈတိုၵ်းသူၼ်းမႃးၼင်ႇၼႆ။

တႅမ်ႈ−ၸၢႆးထုၼ်းလႃႉ

*** ပွင်ႈၵႂၢမ်းႁူဝ်ၼႆႉ ပဵၼ်ပၢႆးဝူၼ်ႉလႄႈတၢင်းႁၼ်ထိုင်သုၼ်ႇတူဝ် ၽူႈတႅမ်ႈလိၵ်ႈၵူၺ်း ဢမ်ႇၸႂ်ႈၶေႃႈၶၢၼ်ပၢၵ်ႇ တႆးလွတ်ႈလႅဝ်း။