လၢၼ်ႉမူၼ်ႈသိူဝ်း လႄႈ ၸၢတ်ႈပၢၼ် ၼုမ်ႇႁၢႆးၸၢႆးယိင်းတႆး

တင်ႈတႄႇဝၢႆးသေ ႁၢင်လိူၼ် June မႃးထိုင်ၼႂ်းလိူၼ် July  ပၢတ်ႈဢွၼ်တၢင်းၼႆႉ ၶွင်ႇသီႇသိုၵ်းမၢၼ်ႈ မီးၽႅၼ်ၸတ်းၵၢၼ်ၼိူဝ် လၢၼ်ႉမူၼ်ႈသိူဝ်း ( မိူင်းၽီ ၼႂ်းမိူင်းၵူၼ်း ) လၢႆလၢႆဝဵင်းသေ ႁဵတ်းႁႂ်ႈ ၶၢဝ်ႇငၢဝ်း ၼႆႉ လိုဝ်းႁူင်တုမ်ႉယွၼ်ႈတေႃႇၵူၼ်းႁဵတ်းၵၢၼ်ႁႃၵိၼ်လဵင်ႉတွင်ႉၵၼ်ဝႃႈၼႆ။

မိူဝ်ႈဝၼ်းထီႉ  06.Jul.2023  ( ပ − လိူၼ်ပႅတ်ႇလွင်ႈ 4 ၶမ်ႈ ၊ ပီႊတႆး 2117 ၼီႈ ) ၵေႃႇမတီႇၽၢႆႇၵုမ်း ၸတ်းဝီႇတီႇယူဝ်ႇ (ဗီဒီယိုစိစစ်ကြီးကြပ်ရေးကော်မတီ)  ၶဝ်ႈၸႅတ်ႈလၢၼ်ႉ KTV Bar ၸွင်ႇၸွမ်းပၵ်းပိူင် ဢမ်ႇၸွမ်း (6)တီႈ ဢၼ်ၸိုဝ်ႈသဵင်ယႂ်ႇ ၼႂ်းဝဵင်းတႃႈၶီႈလဵၵ်း ၼႆယဝ်ႉ။

လၢၼ်ႉတီႈမူၼ်ႈသိူဝ်း ဢၼ်ထုၵ်ႇၶဝ်ႈထတ်းၼၼ်ႉ  1) လၢၼ်ႉ Harry Potter KTV ၊ 2) သူၺ်ႇပူးတီး KTV ၊ 3) မႃႉမိၼ် Bar ၊ 4) 1G1 KTV ၊ 5) 9 ၸၼ်ႉ KTV ၊ 6)  DAT Bar ႁူင်းလႅမ်းတႃႈၶီႈလဵၵ်း ဝႃႈၼႆ။ ၼႂ်းၼၼ်ႉ လိူဝ်‌သေ 1G1 KTV ယဝ်ႉ ၵိုတ်းတႃႇ (5) တီႈၼၼ်ႉ လႆႈသင်ႇပိၵ်ႉဢိုတ်းဝႆႉၸူဝ်ႈၶၢဝ်း ယွၼ်ႉဝႃႈ တီႈဢၼ်ၸွမ်းပိူင် ၼၼ်ႉ တိုၵ်ႉမီးဢၼ်လူဝ်ႇထႅင်ႈ။ ၼႂ်းဝဵင်းတႃႈၶီႈလဵၵ်းၼႆႉ လၢၼ်ႉ KTV , Bar ၼႆႉ မီးပဵၼ် 10 တီႈပၢႆဝႃႈၼႆ။

လွင်ႈတၢင်းဢၼ်ႁဵတ်းသၢင်ႈ ၸဝ်ႈၼႃႈတီႈ ၽၢႆႇၶွင်ႇသီႇသိုၵ်းမၢၼ်ႈ ၶဝ်ႈၸႅတ်ႈထတ်း လၢၼ်ႉမူၼ်ႉသိူဝ်း ၸိူဝ်းၼႆႉ မီးၶၢဝ်ႇဝွင်းဝႅင်း ဢမ်ႇယိုၼ်ယၼ်လႆႈဝႃႈ ငဝ်ႈတႄႇမၼ်းလုၵ်ႉမႃးတီႈ ယွၼ်ႉလုၵ်ႈယိင်း ၵူၼ်းလူင် ၸၼ်ႉသုင်ၼႂ်းၶွင်ႇသီႇသိုၵ်းမၢၼ်ႈၵေႃႉ ၼိုင်ႈ ၵႂႃႇလႄႇလၢၼ်ႉမူၼ်ႈသိူဝ်း ၵိၼ်ပူၼ်ႉလူၼ်ႉၼွင်း လိုမ်းတူဝ် လိုမ်းၶိင်းထိုင်တီႈလႆႈၶိုၼ်ႈႁူင်းယႃ လႄႈ ၸင်ႇတႄႇမီးၵၢၼ်ၵူတ်ႇထတ်းၵမ်ၵိၼ်းၼိူဝ် လၢၼ်ႉမူၼ်ႈသိူဝ်း KTV , PUB , Bar , Nigth Club ၼႆယဝ်ႉ။

ၸိူင်ႉႁိုဝ်ၵေႃႈလီ လွင်ႈၶွင်ႇသီႇသိုၵ်းမၢၼ်ႈ ၶဝ်ၶဝ်ႈၵူတ်ႇထတ်းလၢၼ်ႉမူၼ်ႈသိူဝ်း KTV , PUB , Bar , Nigth Club ၼႆႉ ပဵၼ်လၢႆးလဵၼ်ႈလွၵ်းသိုၵ်းမၢၼ်ႈ ႁႂ်ႈၵူၼ်းမိူင်းႁၼ်လီၼိူဝ်ၶွင်ႇသီႇသိုၵ်းမၢၼ်ႈၵူၺ်း ဝႃႈၼႆ။

ၵူၼ်းမိူင်းတႃႈၶီႈလဵၵ်း ၵေႃႉၼိုင်ႈလၢတ်ႈၼႄဝႃႈ “ မၼ်းပဵၼ်လၢႆးၸၼ်ၸႂ်ၵူၼ်းမိူင်းလႄႈ ႁႂ်ႈႁၼ်လီၼိူဝ် သိုၵ်းမၢၼ်ႈၶဝ်ၼၼ်ႉၵူၺ်း ၵွပ်ႈဝႃႈ လၢၼ်ႉၸိူဝ်းၼႆႉ မၼ်းယႃႉၸၢတ်ႈပၢၼ်ၵူၼ်းၼုမ်ႇႁဝ်းလုသုမ်းၸၢတ်ႈ ပၢၼ်ၼမ်ၼႃႇ ” ၼႆယဝ်ႉ။

လၢၼ်ႉမူၼ်ႈသိူဝ်း ၼႆႉ တေမီးလၢႆလၢႆသႅၼ်း မိူၼ်ၼင်ႇ  KTV , PUB , Bar , Nigth Club  ၸိူဝ်းၼႆႉ ပဵၼ်ဢွင်ႈတီႈလႄႇ လၢဝ် မူၼ်ႈသိူဝ်း ႁႃတီႈပိုတ်ႇဢူၵ်းပိုတ်ႇၸႂ် ပၢၼ်ၼုမ်ႇႁၢႆးယိင်းၸၢႆးလႄႈ သႅၼ်းဢႃႇယု ပၢၼ်ၵၢင် ( 18 – 45 ) ။ ၸိူင်ႉႁိုဝ်ၵေႃႈလီ တီႈမူၼ်ႈသိူဝ်းပိုတ်ႇဢူၵ်းပိုတ်ႇၸႂ်ၼႆႉ မီးလၢႆးတၢင်းလၢႆမဵဝ်းၵေႃႈ ၵမ်ႈၼမ်ၵူၼ်းႁဝ်း တေၵႆႉသူင်ၵျိူၵ်ႈ ဢၼ်တိုတ်ႉၸၼ်ၸႂ်ငၢႆႈလႄႈ တိတ်းၸွႆးငၢႆႈ။

လွင်ႈဝႃႈ ၼႂ်း လၢၼ်ႉ KTV , PUB , Bar , Nigth Club , Massage  တီႈမိပ်ႇၼူတ်ႈ မၼ်းမီးတၢင်းလီမူၼ်ႈသိူဝ်း မွၵ်ႈၵႃႈႁိုဝ်ၼႆၼၼ်ႉ တၢမ်တူဝ်ၵေႃႉၵႂႃႇၶဝ်ႈႁူမ်ႈၸင်ႇတေလၢတ်ႈလႆႈတဵမ်တီႈလႄႈ ႁူႉၸႄးၸိမ်ႇမၼ်းတဵမ် ထူၼ်ႈ။ ၵွပ်ႈၼၼ်လႄႈ ၵူၼ်းမိုတ်ႈၵိုဝ်းၵေႃႉၼိုင်ႈ ဢုပ်ႇၶႆႈၼႄဝႃႈ “ KTV , PUB , Bar , Nigth Club ၼႆႉ မၼ်းပဵၼ်တီႈမူၼ်ႈသိူဝ်း မီးတၢင်းၵိၼ်ၸႄး မီးဢၼ်ထုၵ်ႇၸႂ်ငၢႆႈတင်းလၢႆၼၼ်ႉယဝ်ႉ ၊  လူဝ်ႇမီး ငိုၼ်းၸႂ်ႉ ၸၢႆႇပၼ်ၵူၺ်း ပဵၼ်လၢၼ်ႉမိူင်းၽီ ၼႂ်းမိူင်းၵူၼ်း ၵေႃႈဝႃႈလႆႈယဝ်ႉ ” ၼင်ႇၼႆ။

ၵွၼ်ႇသိုၵ်းမၢၼ်ႈ ပႆႇယိုတ်းဢမ်းၼၢတ်ႈပီႊ 2021 ၼၼ်ႉ လၢၼ်ႉမူၼ်ႉသိူဝ်း ၼႆႉ မီးယူႇသေတႃႉၵေႃႈ ႁႂ်ႈပေႃး ဝႃႈ ၼႂ်းလၢၼ်ႉမီးၶၢႆၶိူင်ႈမဝ်းမိင်းယႃႈမဝ်းၵမ် ၸေးမဵဝ်းၼၼ်ႉ ဢမ်ႇပေႃးမီး ဢမ်ႇႁႃငၢႆႈဝႃႈၼႆ။ တႄႇ ၼႂ်းပီႊ2022 ၼႆႉမႃး ၼႂ်းလၢၼ်ႉမူၼ်ႈသိူဝ်း ၼႂ်းဝဵင်းလူင်ၼေႇပျီႇတေႃႇ ထိုင် တႃႈၵုင်ႈ တႃႈလိူဝ်ႇ တူၼ်ႈတီး တႃႈၶီႈလဵၵ်း ဢမ်ႇဝႃႈဝဵင်းလႂ် ၸိူဝ်းမီးလၢၼ်ႉ KTV , PUB , Bar , Nigth Club ၼႆႉ ယႃႈမဝ်းၵမ် ႁႃလႆႈငၢႆႈငၢႆႈ ၼႆယဝ်ႉ။

လၢၼ်ႉ KTV , PUB , Bar , Nigth Club မီးတၢင်းၵိၼ်သင်ၽွင်ႈ?

ၵမ်ႈၼမ် လၢၼ်ႉ KTV , PUB , Bar , Nigth Club ၼႆႉ တေၶၢႆလႆႈဢၼ်ပဵၼ်တၢင်းၵၢၼ် လဝ်ႈၵူႈသႅၼ်းသႅၼ်း ၊ ဝၢႆႇ လဝ်ႈမၢၵ်ႇမႆႉ လႄႈ တေပိုတ်ႇပဵၼ်ၶၢဝ်းယၢမ်းဢၼ်လူင်ပွင်ၸိုင်ႈတမ်းဝၢင်းဝႆႉ။ ၼႂ်းမိူင်းတႆးႁဝ်းလႄႈ ၼႂ်း မိူင်းႁူမ်ႈတုမ်သမ်ႉ ဢိင်ၼိူဝ် ၵၢၼ်ဢုပ်ႉပိူင်ႇဢမ်ႇႁူမ်ႇငမ်းလႆႈထိုင်တီႈ လႄႈ ႁဵတ်းႁႂ်ႈယႃႈမဝ်းၵမ် လိူင်ႇၼမ် ဢဝ်လူၼ်ႉၶဝ်ႈထိုင်ၼႂ်းလၢၼ်ႉမူၼ်ႈသိူဝ်း တင်းလၢႆလႄႈ ထိုင်တီႈယႃႉလုပႃး ၸၢတ်ႈပၢၼ်ၵူၼ်း ၼုမ်ႇယိင်းၸၢႆးတႆးႁဝ်းမႃး တင်းၼမ်။

မိူဝ်ႈဢွၼ်တၢင်း ၵူၼ်းမိူင်းႁဝ်း တေသူင်ၸႂ်ႉၵၼ် ယႃႈမ ၸွမ်းပွႆးသၢင်ႇလွင်း၊ ပွႆးမႃႇသႃႇ ၊ ပၢင်တေႃႇလွင်း ၊ တီႈၶႅၵ်ႇလီပၢင်ၸႃႉ တေႃႇထိုင် ၼႂ်းသူၼ်ၼႂ်းႁိူၵ်ႈ ၸၢင်ႈၵၼ်ဢဝ်ယႃႈမပဵၼ်ႁႅင်း ႁဵတ်းၵၢၼ်၊ ဢဝ်ၸၢတ်ႈပၢၼ် လုသုမ်း၊ ယွင်ႇယႃႈမသေ ႁႅမ်တၢႆလုၵ်ႈမေး ပေႃႈမႄႈ ပီႈၼွင်ႉ ၵေႃႈ ယၢမ်ႈမီးမႃး ။ မိူဝ်ႈလဵဝ်သမ်ႉ ၼုမ်ႇႁၢႆးၸၢႆးယိင်း သႅၼ်းႁုၼ်ႈမႂ်ႇႁဝ်းသမ်ႉ မႃးလုသုမ်းၸၢတ်ႈပၢၼ် ၸွမ်းၼႂ်းလၢၼ်ႉ KTV , Bar ။

ယႃႈမဝ်းၵမ်သိုဝ်ႉၵိၼ်လႆႈၸွမ်းၼႂ်းလၢၼ်ႉမိူင်းႁူမ်ႈတုမ်ၼႆႉ လဝ်ႈၵူႈသႅၼ်း၊ လႅၼ်းယႃႈ  ၊ ယႃႈၶေး ( K – ketamine ) ၊ ယႃႈဢီး (E – Ecstasy or MDMA ) ၊ Happy Water ( ၼမ်ႉသဝၼ် ၊ ၼမ်ႉမိူင်းၽီ ) ၊ ပၢင်တေႃႇလွင်း ၊ မိပ်ႇၼူတ်ႈ ၊ မႄႈမွၵ်ႇယႃႈ ၸိူဝ်းၼႆႉ ဝႃႈၼႆ။

ယႃႈမဝ်းၵမ်ၼင်ႇဝႃႈမႃး ၼႆႉ ၵူၼ်းႁဝ်းဢမ်ႇလွတ်ႈၵၢင်းမၼ်းလႆႈ၊ ၶဝ်ႈတၢင်းတိုဝ်းၸႂ်ႉၸွမ်း ၼႂ်းယႃႈ ယႃလၢႆလၢႆသႅၼ်းသေတႃႉ ပေႃးၸႂ်ႉတိုဝ်းဢမ်ႇထုၵ်ႇတီႈမၼ်းၵေႃႈ ႁူႉမီးၽွၼ်းတုမ်ႉယွၼ်ႈတေႃႇ ၵူၼ်းၵိၼ်မၼ်း တင်းပၢႆးတူဝ်လႄႈပၢႆးၸႂ်ယူႇ။ ဢၼ်ႁၢင်ႈႁၢႆႉသုတ်းသမ်ႉ ဢဝ်ၸၢတ်ႈပၢၼ်ၽဝႃႉ လႆႈတူၵ်းၸူမ် ပဵၼ်ၶီႈၶႃႈမၼ်းပႅတ်ႈ။

ၵူၼ်းၼုမ်ႇယိင်းၸၢႆးတႆး လႆႈလုသုမ်းၸၢတ်ႈပၢၼ် ယွၼ်ႉသင်?

မိူဝ်ႈလဵဝ်ၼႆႉ ၵူၼ်းၼုမ်ႇသႅၼ်းႁုၼ်ႈမႂ်ႇႁဝ်း ၸဵမ်ၸၢႆးတင်းယိင်း လႆႈမႃးလုသုမ်းၸၢတ်ႈပၢၼ် ၼႂ်းလၢၼ်ႉ မူၼ်ႈသိူဝ်းၼႆႉ မီးတင်းၼမ်ဝႃႈၼႆ။ တီႈၼႆႉပေႃးဝႃႈ ဝူၼ်ႉတူၺ်းၸွမ်း ၼႆႉပိူင်လူင်မၼ်းပဵၼ်ယွၼ်ႉသင်ၼႆ တေပႃးၵၼ်လၢႆၸိူဝ်ႉလၢႆပိူင်ယူႇ။

1) ဝၢၼ်ႈမိူင်း ဢမ်ႇၼိမ်သဝ်း ဢမ်ႇၵတ်းယဵၼ် ၊ ၶုၼ်မိူင်းဢမ်ႇပူၵ်းပွင်ပၼ် ႁႂ်ႈၵူၼ်းမိူင်းၽၵ်းၵႃႈ လႆႈယူႇမူၼ်ႈသိူဝ်းႁႃၵိၼ်လဵင်ႉတွင်ႉလႆႈတဵမ်ထူၼ်ႈ၊

2) ပၢႆးမၢၵ်ႈမီးတူၵ်းၵိၼ်း ၵၢၼ်ၵႃႉၶၢႆယၢပ်ႇ ၶၼ်ၵုၼ်ႇသိၼ်ၵႃႉသမ်ႉၶိုၼ်ႈသုင် ၵူၼ်းမိူင်းႁႃငိုၼ်းၶဝ်ႈ လႆႈဢေႇ လႆႈသိုဝ်ႉၵႃႈၶၼ်ယႂ်ႇသုင်၊

3) ယႃႈမဝ်းၵမ်လိူင်ႇၼမ်မႃး ယွၼ်ႉၵၢၼ်ဢုပ်ႉပိူင်ႇၽွင်းငမ်းဢွၼ်ႇဢႄး ဢမ်ႇထိုင်တီႈႁူမ်ႇငမ်းလႆႈၵူႈ ၸွၵ်ႉၵူႈယွမ်ႇ၊

4) ၸိုင်ႈမိူင်းၺႃး ၼွၵ်ႈမိူင်းပိၵ်ႉႁႅတ်ႉပၢႆးမၢၵ်ႈမီးလႄႈၵမ်ၵိၼ်း

5) ပဵၼ်သိုၵ်းသိူဝ်ၼႂ်းမိူင်းဢမ်ႇယဝ်ႉဢမ်ႇဝၢႆး ။

ၼႂ်း (5) ၶေႃႈ ၼႆႉ ပဵၼ်ငိူၼ်ႈၼဵၼ်လူင်မၼ်းသေ ဢၼ်တၢမ်းမႃးၸွမ်းသမ်ႉ ၵူၼ်းၼုမ်ႇ ဝူၼ်ႉႁႃလၢႆးလႆႈ ငိုၼ်းတၢင်းလတ်း ၊ ၶႂ်ႈမူၼ်ႈၵျေႃႇပူၼ်ႉပၢၼ်၊ ၶွႆလွင်ႈၶိူင်ႈၸႂ်ႉတင်းတိုဝ်းၵၢပ်ႈပၢၼ်မႂ်ႇ ၶႂ်ႈမၢၵ်ႈမီးမိူၼ်ပိူၼ်ႈ ၊ ၶႂ်ႈၸၢမ်းႁဵတ်းတူၺ်းလွင်ႈမႂ်ႇမႂ်ႇ ၊ ဢူၺ်းၵေႃႉ သူၼ်းႁူၺ်းၵႂႃႇႁဵတ်းၵၢၼ် ၼႂ်းလၢၼ်ႉ    KTV , PUB , Bar , Nigth Club ၼႆႉ သေ ၸင်ႇလႆႈလွင်ႈလႆမူၼ်ႈၸႂ်ၸွမ်းၼႂ်းတူင်ႇဝူင်းၼႆႉပႅတ်ႈ။

လႆႈလုသုမ်းၸၢတ်ႈပၢၼ်ၸိူင်ႉႁိုဝ်?

ၼႂ်း လၢၼ်ႉမူၼ်ႈသိူဝ်း KTV , PUB , Bar , Nigth Club ၼႆႉ ပဵၼ်တီႈမီးတၢင်းၵိၼ် ယႃႈမဝ်းၵမ်ၸေးမဵဝ်းမၼ်း လႄႈ လုၵ်ႉတီႈဢမ်ႇမၵ်ႉလဝ်ႈ ဢမ်ႇမေႃၵိၼ်လဝ်ႈၵေႃႈ တေမေႃၵိၼ်လဝ်ႈမႃး၊ လုၵ်ႉတီႈၵိၼ်လဝ်ႈသေ တေၸႂ်ႉယႃႈ K , E , Happy Water မႃး ၊ လုၵ်ႉတီႈၼႆႉသေ သင်ပဵၼ်ၼၢင်းယိင်းၵေႃႈ ပေႃးၵိၼ်ၺႃးယႃႈ သေမဵဝ်းမဵဝ်းဢၼ်ႁဵတ်းႁႂ်ႈမီးၸႂ်ၵႃႇမ ႁႅင်းမႃး  ဢမ်ႇၼၼ် မဝ်းလူၼ်ႉပူၼ်ႉၼႃႇလႄႈ လႆႈလုသုမ်းတူဝ်ပၼ် ပေႃႈလဵင်ႉလၢဝ်းပၢၼ်းၶဝ်ၵႂႃႇၼႆယဝ်ႉ။

ၼၢင်းယိင်းဢၼ်ပႆႇလႆႈလုသုမ်းပၢၼ်သၢဝ် ပၼ်ၽႂ်ၼၼ်ႉ ႁူႉၵႃႈၽႂ်ၵေႃႈတေၸူမ်းတွမ်ၸူမ်းႁွပ်ႇ ၸွမ်းႁွင်ႉ ၵူၺ်းၵႃႈ ပေႃးလႆႈပူၼ်ႉပၢၼ်သၢဝ်ယဝ်ႉ တေမိူၼ်ၽႅၼ်ႇၸႅတ်ႉဢၼ်ၼုၵ်းၵူဝ်ႈလိၼ်သေ ထုၵ်ႇဝုတ်ႉပႅတ်ႈ ၵႂႃႇၵူၺ်း။

လၢၼ်ႉမူၼ်ႈသိူဝ်း KTV , PUB , Bar , Nigth Club ၼႆႉ မၼ်းမိူၼ် ၶုမ်ငရၢႆးလူင် ပုၼ်ႈတႃႇၼုမ်ႇႁၢႆးၸၢႆးယိင်း ႁဝ်း ဢၼ်တေႁဵတ်းႁႂ်ႈ ၸၢတ်ႈပၢၼ်လုသုမ်းယွၼ်ႉမၼ်း။ လႆႈငိုၼ်းငၢႆႈၵေႃႈ ယူတ်းငိုၼ်းငၢႆႈမိူၼ်ၵၼ်။  ၵွပ်ႈဝႃႈ ၶိူင်ႈမိင်းမဝ်းဢၼ်ၸႂ်ႉတိုဝ်း ယႃႈ K , E ၼၼ်ႉ ပေႃးမၼ်းပူၼ်ႉႁႅင်းတူဝ်ၵူၼ်းၼႆ ၸၢင်ႈႁဵတ်းႁႂ်ႈၵူၼ်း ႁဝ်း လိုမ်းတူဝ်လိုမ်းၶိင်း ၊ ပေႃးဢမ်ႇႁူႉလၢႆး ယူတ်းယႃ လႄႈ ဢမ်ႇယူတ်းယႃလႆႈၶိုတ်းတၼ်းၵေႃႈ ၸၢင်ႈလုသုမ်း သၢႆၸႂ်ပႃးၵွၼ်ႇဝႃႈၼႆ။

ၵူၼ်းၼုမ်ႇၵေႃႉၼိုင်ႈ ဢၼ်ယၢမ်ႈၶဝ်ႈဢႅဝ်ႇလႄႇတီႈလၢၼ်ႉ KTV လၢတ်ႈၼႄဝႃႈ “ ပေႃးဝႃႈ ၵိၼ်ၼမ်ႉမိူင်းၽီ  ( Happy Water ) ၼၼ်ႉယဝ်ႉတႄႉ ၵူၼ်းၼႆႉဢမ်ႇတဵၼ်ႈဢမ်ႇၵႃႈၼႆ ၽႂ်ၵေႃႈယဝ်ႉၶႃႈ တိုၼ်းႁတ်းလၢတ်ႈဢေႃႈ မၼ်းတိုၼ်း ဢမ်ႇယူႇလႆႈၶႃႈ    ၊ ပိူၼ်ႈဢမ်ႇပိုတ်ႇပၼ်ၽဵင်း ၵႂၢမ်းၶိုတ်းတၼ်း ၵူၺ်းၵေႃႈ ၸႂ်ပေႃးၶႂ်ႈလမ်ယဝ်ႉၶႃႈ ၊ တဵၼ်ႈတဵၼ်ႈၵႃႈၵႃႈၵေႃႈ မၢင်ၵမ်းမိူၼ်မၼ်းဢမ်ႇပေႃးထိုင်ၸႂ်လီ သမ်ႉပေႃးၶႂ်ႈၶဝ်ႈၵႂႃႇယူႇၼႂ်း လမ်းၽူင်း (သွင်းပွၵ်ႉ) ၼၼ်ႉၵွၼ်ႇၶႃႈ ၊ ပေႃးမဝ်း ယႃႈ ၶေး ဢီးသမ်ႉ ၸၢင်ႈမီးၸႂ်တေႃးသဢွၵ်ႇႁင်းၵူၺ်းၵေႃႈ ယၢမ်ႈႁၼ်ဢေႃႈ ၊ ၵမ်ႈၽွင်ႈၼႆႉ ၵမ်တႃမိုဝ်း ၼႃႈလမ်ၼႃႈလႅင် လႄႇႁႃၽိတ်းၵၼ်ၶိုၼ်းတင်းတႆးၵေႃႉၼႂ်းႁွင်ႈလဵဝ်ၵၼ် ၵေႃႈမီးၶႃႈ ” လၢတ်ႈၼင်ႇၼႆ။

ၶိုၼ်းသိုပ်ႇလၢတ်ႈထႅင်ႈဝႃႈ “ ၶႃႈယၢမ်ႈၵႂႃႇပွၵ်ႈၼိုင်ႈယဝ်ႉၶႂ်ႈၵႂႃႇထႅင်ႈ ႁဵတ်းၼႆဢေႃႈ  မၼ်းတိတ်းၸႂ်ငၢႆႈ ၼႃႇၶႃႈ ၊ မိူဝ်ႈတႄႇမၼ်းတႄႉ ၵိၼ်လဝ်ႈၸွမ်းတႆးၵေႃႉတၢင်ႇတီႈသေ ပေႃးမဝ်းလဝ်ႈမႃးယဝ်ႉတႄႉ ၸူဝ်းၵၼ် ၵႂႃႇႁႃလၢၼ်ႉမိူင်းၽီ ၵမ်းလဵဝ်ယဝ်ႉၶႃႈ ၊ မီးပႃးသၢဝ်သၢဝ်ႁေၶႃႈလူးၼေႃႈ ၊ ၵူၺ်းၵႃႈ ပေႃးဝႃႈ ဝူၼ်ႉတူၺ်းလီလီတႄႉ မၼ်းပဵၼ်ၽေးတေႃႇတူဝ်ႁဝ်း ၸၢတ်ႈပၢၼ်ႁဝ်း လႄႈ တႃႇသိုပ်ႇသၢႆၸိူဝ်ႉၶိူဝ်းၵေႃႈ တေၸၢင်ႈတုမ်ႉတိူဝ်ႉပႃးၶႃႈၼႃ ပေႃးၵိၼ်ယႃႈၸိူဝ်းၼၼ်ႉၼမ်ပူၼ်ႉ၊ ငိုၼ်းၵေႃႈသဵင်ၼမ် ႁူဝ်သိပ်း သႅၼ်မၼ်းဢေႃႈ ၼိုင်ႈၶမ်ႈၼႆႉ ” ၼင်ႇၼႆ။

ၸၢႆးၼုမ်ႇၵူၼ်းလႅၼ်ႈလူတ်ႉၵေႃႉၼိုင်ႈ လၢတ်ႈဝႃႈ “ လၢၼ်ႉ KTV  ၼႆႉ မၼ်းဢမ်ႇၵႃႈ တႃႈၶီႈလဵၵ်းၵူၺ်းၶႃႈ မီးလၢႆတီႈၼႃႇယဝ်ႉ ၼႂ်းမိူင်းတႆးႁဝ်းၼႆႉ ဢၼ်လီမႆႈၸႂ်ၼႆႉ ယိင်းသၢဝ်ဢွၼ်ႇလုၵ်ႈမႄႈတႆးႁဝ်း ဢမ်ႇပႆႇႁူႉ လွင်ႈၽိတ်းလွင်ႈထုၵ်ႇသင် ပေႃးၺႃးပိူၼ်ႈလွၵ်ႈလႅၼ်ၸူဝ်းႁွင်ႉသေ ယၢမ်ႈလႆႈငိုၼ်းၼမ်ႁေ ၼိုင်ႈ ပွၵ်ႈ သွင်ပွၵ်ႈယဝ်ႉတႄႉ ႁွင်ႉၵႂႃႇငၢႆႈဝႆႉၶႃႈဢေႃႈ ဢမ်ႇဝႃႈၼႂ်း ဝဵင်း ဝၢၼ်ႈၼွၵ်ႈ မိူဝ်ႈလဵဝ်ၼႆႉ သူင်ၵၼ်ၵႂႃႇၼႃႇၶႃႈ ၵမ်ႈၽွင်ႈၵႂႃႇႁႃတၢင်းၵျေႃႇတၢင်းမူၼ်ႈ ၵမ်ႈၽွင်ႈသမ်ႉ ၵႂႃႇႁႃငိုၼ်း မၼ်းလႆႈငၢႆႈၶႃႈၼႃႇ ၊ ၵမ်ႈၽွင်ႈဢဝ်ၵမ်ႈမၼ်းတေႃႇၶႃႈၼႃႇၼေႃႈ လူဝ်ႇလႆႈငိုၼ်းၵူၺ်း မၼ်းပဵၼ်ဝႆႉၸိူင်ႉၼႆဢေႃႈ ” ၼႆယဝ်ႉ။

ငဝ်းလင် လၢၼ်ႉမူၼ်ႈသိူဝ်း?

ၼင်ႇဢၼ်ၵူၼ်းမိူင်းၶဝ်ႈဢွၵ်ႇၼႂ်းၽၢႆႇၶႃႈႁၢပ်ႇၵၢၼ်ၶုၼ်မၢၼ်ႈၵေႃႉၼိုင်ႈ ဢုပ်ႇၶႆႈၼႄၼၼ်ႉ “ လၢၼ်ႉ KTV , PUB , Bar , Nigth Club ပွတ်းဝဵင်းတႃႈၶီႈလဵၵ်းၼႆႉတႄႉမၼ်းပဵၼ် ၸဝ်ႈငိုၼ်းသႃး ( သၢမ်ၸဵင်ႇၶမ်း ) ၶဝ် ယူႇလပ်ႉလင်မၼ်းသေ ပိုတ်ႇၽုၺ်ႇဝႆႉ။ ငူပ်ႉငီႉ ၵၼ်တင်းၸဝ်ႈၼႃႈတီႈ ၽၢႆႇဢုပ်ႉပိူင်ႇၶဝ်သေ ႁဵတ်းႁႃၵိၼ် ” ဝႃႈၼႆ။

ၵူၼ်းမိူင်းတႃႈၶီႈလဵၵ်းလၢတ်ႈဝႃႈ “ မိူၼ်ၼင်ႇ ၽၢႆႇၶွင်ႇသီႇသိုၵ်းမၢၼ်ႈၶဝ်လူင်းထတ်း ႁူင်းလႅမ်း ဢၼ်ပိုတ်ႇဝႆႉ လၢၼ်ႉ KTV , Bar   ၼၼ်ႉ မၼ်းပဵၼ်ၵၢၼ်ႁဵတ်းႁႃ ႁႂ်ႈလႆႈၼႃႈလီတီႈၵူၼ်းမိူင်းၵေႃႈပႃး လႄႈ လွၵ်းလၢႆးတႃလႆႈငိုၼ်းၶဝ်ၽၢႆႇၼိုင်ႈၵူၺ်း တႃႇတေဝႃႈပိၵ်ႉဢိတ်းဢမ်ႇပၼ်ပိုတ်ႇၶိုၼ်း ၼႆၼၼ်ႉ မၼ်းဢမ်ႇပဵၼ်လႆႈ ၵွပ်ႈဝႃႈ ၶဝ်လႆႈၵိၼ်ၸွမ်းၼႆႉ မၼ်းပဵၼ်မေႃႈၶဝ်ႈၶဝ်ယူႇယဝ်ႉ ၊ ၵူၼ်းပိုတ်ႇမၼ်းၵေႃႈ လိူဝ်သေပဵၼ် ၽူႈမၢၵ်ႈလူၼ်ႉလိူဝ်ၶဝ် ဢမ်ႇမီးၽႂ်ၶႃႈလေႃႇ၊ ဢွၼ်ႇယိင်းတႆးႁဝ်းပတ်းပိုၼ်ႉၵွၼ်ႇ ၶႃႈယူဝ်ႉ ဢၼ်မႃးႁဵတ်းၵၢၼ် လုသုမ်းၸၢတ်ႈပၢၼ်သၢဝ်ၶဝ်ၼႂ်း KTV , Bar  ယႃၸႂ်ပဵၼ်ၽႅၼ်ႇၸဵတ်ႉတိၼ် ပေႃႈ လဵင်ႉၸဝ်ႈငိုၼ်းသႃးၸိူဝ်းၼႆႉ ” ၼင်ႇၼႆ။

“ ဢၼ်ၼႃႇႁႅင်းၼႆႉ ပဵၼ်ဢွၼ်ႇယိင်းတႆးႁဝ်းၼၼ်ႉယဝ်ႉၶႃႈ ၊ ယွၼ်ႉဝၢၼ်ႈမိူင်းၶိုတ်းၵၢပ်ႈလႄႈ ၶႂ်ႈမိူၼ် ပိူၼ်ႈၼႆလႄႈ မင်မိင်လူင်ၵႂႃႇ ပေႃႈမႄႈၵေႃႈဢမ်ႇၵုမ်းထိင်းလႆႈၸွမ်းၼႆ ပေႃးပဵၼ်ၸိူင်ႉၼႆတိၵ်းတိၵ်းတႄႉ လီမႆႈၸႂ်တႃႇၼေႃႇတႅၼ်းၶိူဝ်းမိူင်းႁဝ်းဝႆႉၶႃႈဢေႃႈ ” သိုပ်ႇလၢတ်ႈတၢင်းႁၼ်ထိုင်ၼင်ႇၼႆ။

ၵူၼ်းၼႂ်းမိူင်းတႆးႁဝ်းၵမ်ႈၼမ် တေလႆႈဝႃႈ မႃးႁႃႁဵတ်းၵၢၼ်လွၵ်ႈလၢႆးၸိူဝ်းၼႆႉသေ မၢင်ႇၵိူဝ်းလႆႈငိုၼ်းငၢႆႈ ၵမ်းလိုၼ်းၵေႃႈတူၵ်းပဵၼ်ယိူဝ်ႇၼႂ်းၵၢင်ၶိုၼ်းၾႆးၶွင်ႇၾႆးလႅင် ဢဝ်သလေႇၸိုဝ်ႈသဵင်တူဝ်ၵဝ်ႇတူၵ်းယေႃႈ ၼႃႈလဵၵ်ႉၼႂ်းတူင်ႇဝူင်းၵူၼ်းၵႂႃႇ။

ၽူႈၵုမ်းထိင်း လူဝ်ႇၸွမ်းႁႄႉႁၢမ်ႈ ႁႄႉၵင်ႈ လုၵ်ႈလၢၼ်ၽႂ်မၼ်း

ယွၼ်ႉဝႃႈ ၵၢၼ်ၼႂ်းလၢၼ်ႉ KTV , Bar ဢၼ်ပဵၼ်မီးယူႇၼႂ်းမိူင်းႁဝ်းၶႃႈ ယၢမ်းလဵဝ်ၼႆႉ မၼ်းတေပိူင်ႈတင်း တၢင်ႇမိူင်းဝႆႉ ယွၼ်ႉၼၼ် လုၵ်ႈလၢၼ်ၽႂ်ၵေႃႈယဝ်ႉ ပေႃးဝႃႈမၼ်းတေၵဵဝ်ႇၵပ်းတင်းၵၢၼ်ႁႃလဵင်ႉတွင်ႉ ဢမ်ႇၸႂ်ႈၵၢၼ်လီၼၼ်ႉ ထုၵ်ႇလႆႈၵုမ်းထိင်းတူၺ်းလူၸွမ်းတႄႉတႄႉယူႇ။ ပေႃးဝႃႈလုသုမ်းမႃးတေပဵၼ် လုၵ်ႈလၢၼ်ႁဝ်းသေ တေသုမ်းလၢႆၸိူဝ်ႉလၢႆပိူင်မိူၼ်ၵၼ်။ ၸိုဝ်ႈသဵင် သၢႆၸႂ် ၸိူဝ်ႉၶိူဝ်း ဝွတ်ႈဝၢႆးၸွမ်းၵၼ် ၼၼ်ႉၶႃႈယဝ်ႉ။

ၽူႈၵုမ်းထိင်းၼႆသမ်ႉ ဢမ်ႇၵွမ်ႉၵႃႈပဵၼ်ပေႃႈမႄႈ ပီႈၼွင်ႉၸိူဝ်ႉၶိူဝ်းၵူၺ်း ပႃးၸဵမ် ၽူႈမီးဢေႃးၸႃႇ ၼႂ်းဝၢၼ်ႈၼႂ်းဢိူင်ႇ သင်ႇၶႃႇၸဝ်ႈ၊   သြႃႇသမ်းမႃး ၊ ၽူႈဢုပ်ႉပိူင်ႇ ၼႂ်းဝၢၼ်ႈၼႂ်းသူၼ်ၼႂ်းဝဵင်း ၊ ၸဝ်ႈၼႃႈၻီႈ ဢုပ်ႉပိူင်ႇၶဝ်တင်းလၢႆ လီလႆႈၶႂ်ႈၸႂ် ႁႃးတၢင်းၵုမ်းထိင်း ႁႄႉၵင်ႈ ႁႄႉႁၢမ်ႈ ၼင်ႇႁိုဝ်လုၵ်ႈလၢင်းလၢၼ် လိၼ်ႁဝ်း ပေႃးတေဢမ်ႇၵဵဝ်ႇၶွင်ႇလႄႈ ဢမ်ႇတူၵ်းၼႂ်းၶုမ်ငရၢႆးလူင်  ၽေးၵူၼ်းၼႆႉသေၵမ်းၼႆ ၶႂ်ႈယွၼ်း တိုၵ်းသူၼ်းပႃးၼင်ႇၼႆ။

လၢၼ်ႉ KTV , Bar , PUB , Night Club ၼႆႉ ဢဝ်ဢၵျၢင်ႉတၢင်းယၢမ်ႈလု ၊ ဢဝ်ၸၢတ်ႈပၢၼ်လုသုမ်း၊ ပဵၼ်တီႈႁႃငိုၼ်းပၼ် ၸဝ်ႈငိုၼ်းသႃးၶဝ်ၶိုၼ်းလႄႈ ပဵၼ်တီႈ ႁၵ်းပႅတ်ႈတၢင်းယၢမ်ႈၵူၼ်းၼိုင်ႈၵေႃႉ ၼႆၵေႃႈ ဝႃႈလႆႈ။ တီႈလၢၼ်ႉမူၼ်ႈသိူဝ်းၼႆႉ ၵူၼ်းၼုမ်ႇယိင်းၸၢႆး ပႃးၸဵမ်ၵူၼ်းသိုၵ်းၵူႈၸုမ်း သူင်မိုတ်ႈ ၸႂ်ႉ ၸၢႆႇငိုၼ်းၸွမ်းၼိုင်ႈၶမ်ႈၶိုၼ်းဢၢၼ်ႇႁူဝ်သိပ်းသႅၼ်မၼ်းသေ ပဵၼ်တီႈပိုတ်ႇဢူၵ်းပိုတ်ႇၸႂ် ႁႃတၢင်းမူၼ်ႈ ပႃးၵွၼ်ႇ။

ယွၼ်ႉၼႆလႄႈ ပေႃးဢဝ်မႆႉထတ်းၵၢၼ်ၸိူဝ်ႉၸၢတ်ႈဝႃႈၼႆ ယႃႈမဝ်းၵမ်ၼႆႉ ပဵၼ်ၶိူင်ႈမိုဝ်းတႃႇတိုၵ်းတေႃး ၽဵဝ်ႈမူၺ်ႉၵၼ် လၢႆးၵတ်းယဵၼ် ၸိူဝ်ႉၶိူဝ်းတၢႆၵမ်းလွႆးလွႆးလႄႈ ပေႃးႁူႉဝႃႈ မၼ်းတုမ်ႉတိူဝ်ႉတေႃႇ ၸိူဝ်ႉၶိူဝ်း ပဵၼ်ၽေးတေႃႇတူင်ႇဝူင်းႁဝ်းၼႆ ထုၵ်ႇလီၶၢၼ်ၶတ်း ထုၵ်ႇလီၵုမ်းထိင်း ထုၵ်ႇလီၸွႆႈၵၼ်ႁႄႉႁၢမ်ႈၵႂႃႇၵူႈၽၢႆႇ ၵူႈတၢင်းယူႇ။

ပၢႆၵမ် − မၢဝ်ႇတႆး ( ၵုင်းၵႅင်း )

*** ပွင်ႈၵႂၢမ်းႁူဝ်ၼႆႉ ပဵၼ်ပၢႆးဝူၼ်ႉလႄႈတၢင်းႁၼ်ထိုင်သုၼ်ႇတူဝ် ၽူႈတႅမ်ႈလိၵ်ႈၵူၺ်း ဢမ်ႇၸႂ်ႈၶေႃႈၶၢၼ်ပၢၵ်ႇ တႆးလွတ်ႈလႅဝ်း။