ၽေးသၽႃႇဝ ႁဵတ်းႁႂ်ႈလုၵ်ႈဢွၼ်ႇ ႁၢမ်းတီႈယူႇတၼ်းသဝ်းၼပ်ႉႁူဝ်လၢၼ်ႉၵေႃႉ

ၼႂ်းၶၢဝ်းတၢင်း 6 ပီႊ ပူၼ်ႉမႃးၼႆႉ မီးလုၵ်ႈဢွၼ်ႇ 43 လၢၼ်ႉၵေႃႉ လႆႈႁၢမ်းတီႈယူႇ တၼ်းသဝ်း ယွၼ်ႉလူၺ်ႈၽေးသၽႃႇဝ။

မိူဝ်ႈဝႃးဝၼ်းထီႉ 6 October 2023 (လိူၼ်သိပ်းလွင်ႈ 7 ၶမ်ႈ ပီႊတႆး 2117 ၼီႈ) ၼၼ်ႉ ယူႇတီႈၸုမ်းလူလွမ်တူၺ်းထိုင်လုၵ်ႈဢွၼ်ႇ (UNICEF) လၢႆးငၢၼ်းဝႃႈ တႄႇဢဝ်မိူဝ်ႈ ၼႂ်းပီႊ 2016−2021 ၶၢဝ်းတၢင်း 6 ပီႊပူၼ်ႉမႃးၼႆႉ ယွၼ်ႉၽေးသၽႃႇဝ ဢမ်ႇဝႃႈ တေပဵၼ် လူမ်းလႅင်ႉ၊ ၼမ်ႉထူမ်ႈ၊ ၾႆႈမႆႈထိူၼ်ႈမႆႈပႃႇ လႄႈ ၾိင်ႈၾႃႉရႃႇသီႇ ႁၢႆႉႁႅင်းၸိူဝ်းၼႆႉ  ႁဵတ်းႁႂ်ႈလုၵ်ႈဢွၼ်ႇ ၸွတ်ႇတူဝ်ႈတင်းလုမ်ႈၾႃႉမွၵ်ႈ 43 လၢၼ်ႉ ၵေႃႉ ႁၢမ်းတီႈယူႇတၼ်းသဝ်း လႄႈ မိူင်းၾီႇလိပ်ႇပိၼ်ႇ၊ ဢိၼ်းတီးယႃး တင်း ၶႄႇ ပဵၼ်ၸိုင်ႈမိူင်းဢၼ်မီးလုၵ်ႈဢွၼ်ႇ ႁၢမ်းတီႈယူႇတၼ်းသဝ်းၼမ်လိူဝ်သေပိူၼ်ႈ လႄႈ မီးၸမ်ၶိုင်ႈၼိုင်ႈၶွင် လုၵ်ႈဢွၼ်ဢၼ်ႁၢမ်းတီႈယူႇတၼ်းသဝ်း ၸွတ်ႇတူဝ်ႈ တင်းလုမ်ႈၾႃႉၼႆႉ ဝႃႈၼႆ။

ၼွၵ်ႈလိူဝ်သေၼႆႉ တႄႇၼႆႉၵႂႃႇထႅင်ႈ 30 ပီႊတၢင်းၼႃႈ သင်ၼပ်ႉသွၼ်ႇတူၺ်း လွင်ႈၽေးသၽႃႇဝ လူၺ်ႈမႄႈၼမ်ႉလူၼ်ႉၽင်ႇ ဢမ်ႇၼၼ် ၼမ်ႉထူမ်ႈ ဝၢႆးသေ မီးလူမ်းလႅင်ႉ cyclone ၽတ်ႉၶဝ်ႈယဝ်ႉ သေဢမ်ႇၵႃး ႁူမ်ႈထိုင်ပႃး ၾိင်ႈၾႃႉရႃႇသီႇ လႅၵ်ႈလၢႆႈၸိူဝ်းၼႆႉ တေႁဵတ်းႁႂ်ႈႁူဝ်ၼပ်ႉလုၵ်ႈဢွၼ်ႇ ဢၼ်တေႁၢမ်း တီႈယူႇတၼ်းသဝ်း ယွၼ်ႉၽေးသၽႃႇဝၼၼ်ႉ တေၽိူမ်ႉၶိုၼ်ႈသုင်ပဵၼ် 113 လၢၼ်ႉ ၵေႃႉ ဝႃႈၼႆ။

ၸိူင်ႉႁိုဝ်ၵေႃႈလီ ယွၼ်ႉဢမ်ႇမီးၵၢၼ်ဝၢင်းၽႅၼ် ၶၢႆႉၵူၼ်းထူပ်းၽေး သၽႃႇဝ ႁႅင်ႈလႅင်ႉ၊ ၼမ်ႉထူမ်ႈ၊ လူမ်းလႅင်ႉ ၸိူဝ်းၼႆႉဝႆႉလူင်ႈၼႃႈလႄႈ ၵဵဝ်ႇလူၺ်ႈႁူဝ်ၼပ်ႉ လုၵ်ႈဢွၼ်ႇ ဢၼ်ႁၢမ်းတီႈယူႇတၼ်းသဝ်းၼၼ်ႉ တေၸၢင်ႈဢေႇလိူဝ်သေ လွင်ႈပဵၼ်တႄႉၵေႃႈ ပဵၼ်လႆႈ ၵွပ်ႈဢမ်ႇၸၢင်ႈၵဵပ်းသဵၼ်ႈမၢႆမၼ်းလႆႈၽဵၼ်ႈၽဵၼ်ႈ ဝႃႈၼႆ။

တႆးလွတ်ႈလႅဝ်း