ၸဝ်ႈၼႃႈတီႈထႆး တီႉၺွပ်းလႆႈယႃႈမဝ်းၵမ်တင်းၼမ်

ၸဝ်ႈၼႃႈတီႈထႆး တီႉၺွပ်းလႆႈယႃႈမဝ်းၵမ် ဢၼ်လုၵ်ႉၼႂ်းမိူင်းတႆး တေႃႉတၢင်ႇၵႂႃႇ တီႈၼႂ်းမိူင်းထႆးၼၼ်ႉတင်းၼမ်။

မိူဝ်ႈဝၼ်းထီႉ 21 November 2023 (လိူၼ်သိပ်းသွင်မႂ်ႇ 9 ၶမ်ႈ ပီႊတႆး 2117 ၼီႈ) ယၢမ်းၵၢင်ၶိုၼ်း 20:30 မူင်းၼၼ်ႉ ၸဝ်ႈၼႃႈတီႈ ၽူႈမီးပုၼ်ႈၽွၼ်းထႆး လၢႆလၢႆၽၢႆႇ ႁူမ်ႈၵၼ်ဢွၵ်ႇလဵပ်ႈယၢမ်း ၵူတ်ႇထတ်းထူပ်းႁၼ် မီးၵူၼ်းၶီႇႁိူဝ်းၸွမ်းမႄႈၼမ်ႉၶွင် သေ ၵႂႃႇၵိုတ်းႁိမ်းႁွမ်း ဝၢၼ်ႈသူၼ်တွၵ်ႇ ဢိူင်ႇဝၢၼ်ႈသႅဝ်း ၸႄႈဝဵင်းၵဵင်းသႅၼ် ၸႄႈတွၼ်ႈၵဵင်းႁၢႆး မိူင်းထႆး လႄႈ ဝၢႆးၼၼ်ႉ ၸဝ်ႈၼႃႈတီႈထႆး ၸင်ႇလႆႈၶဝ်ႈၵူတ်ႇ ထတ်းထူပ်းႁၼ်ထူင်ၵေႃႇၸၢၼ်ႈ 15 ထူင် ဢၼ်သႂ်ႇယႃႈမ မိၵ်ႈ AAA ၊ ၼိုင်ႈထူင်လႂ် မီးယႃႈမယူႇမွၵ်ႈ 200,000 မဵတ်ႉ ႁူမ်ႈယႃႈမတင်းမူတ်းမီးယူႇမွၵ်ႈ 3 လၢၼ်ႉမဵတ်ႉ ၵူၼ်းတေႃႉသူင်ႇတႄႉ တၼ်းပၢႆႈလွတ်ႈၵႂႃႇလႆႈ ဝႃႈၼႆ။

ၽၢႆႇတၢင်းၸဝ်ႈၼႃႈတီႈထႆးၶဝ် ယုမ်ႇယမ်ဝႃႈ ယႃႈမၼၼ်ႉလုၵ်ႉတီႈၼႂ်းမိူင်းတႆး ပွတ်းဢွၵ်ႇသေ ၸႂ်ႉႁိူဝ်းတေႃႉတၢင်ႇၶၢမ်ႈမႄႈၼမ်ႉၶွင် ၶဝ်ႈၵႂႃႇ ၼႂ်းမိူင်းၸိုင်ႈထႆး ဝႃႈၼႆ။

ၵဵဝ်ႇလူၺ်ႈလွင်ႈၸဝ်ႈၼႃႈတီႈထႆး တီႉၺွပ်းလႆႈယႃႈမဝ်းၵမ်ပွၵ်ႈၵမ်းၼႆႉသေ ၽၢႆႇတၢင်းၸဝ်ႈၼႃႈတီႈ ၽူႈၵဵဝ်ႇၶွင်ႈၶဝ် တေၵူတ်ႇၸႅတ်ႈႁွႆးၼိဝ်ႉမိုဝ်း လႄႈ ၸဝ်ႈၶွင် ႁိူဝ်းသေ ၸွမ်းသွၵ်ႈႁႃၽူႈၸိူဝ်းၵဵဝ်ႇၶွင်ႈ တႃႇဢဝ်မႃးပၼ်တၢမ်ႇတၢင်းၽိတ်း ၸွမ်းၼင်ႇမၢႆမီႈၸိုင်ႈမိူင်းမီးၼၼ်ႉ ဝႃႈၼႆ။

မိူဝ်ႈဝၼ်းထီႉ 20 November 2023 ၼၼ်ႉၵေႃႈ ၸဝ်ႈၼႃႈတီးထႆး ၵူတ်ႇထတ်းတီႉ ၺွပ်းလႆႈယႃႈမ မိၵ်ႈ 999 ႁူမ်ႈယႃႈမတင်းမူတ်း 110,000 မဵတ်ႉ ၼႂ်းပိုၼ်ႉတီႈ ဝၢၼ်ႈၼေႃးလႄး ဢိူင်ႇမွၼ်ႉပိၼ်ႇ ၸႄႈဝဵင်းမိူင်းၾၢင် ၸႄႈတွၼ်ႈၵဵင်းမႆႇ မိူင်းၸိုင်ႈထႆး မိူၼ်ၵၼ်ဝႃႈၼႆ။

တႆးလွတ်ႈလႅဝ်း