ၵူၼ်းသူႇသမ်းၵိၼ်ယႃႈမဝ်းၵမ် လႄႈ ၽူႈလၵ်ႉလိူင်ႇၼမ် တီႈလၢႆးၶႃႈ

တင်ႈတႄႇႁၢင်ပီႊ 2023 မႃးၼႆႉ တီႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း မီးၽူႈလၵ်ႉၵူၼ်းၸူၼ် လႄႈ ၵူၼ်းသူႇသမ်းၵိၼ်ယႃႈမဝ်းၵမ် လိူင်ႇၼမ်ၶိုၼ်ႈႁႅင်းမႃးတႄႉတႄႉ။

မိူဝ်ႈဝၼ်းထီႉ 17 December 2023 (လိူၼ်ၸဵင်မႂ်ႇ 5 ၶမ်ႈ ပီႊတႆး 2118 ၼီႈ) ၽွင်းၵူၼ်းမိူင်းၼႂ်းဝဵင်းလၢႆးၶႃႈ ၼႃႈႁိူၼ်းလင်ၼိုင်ႈ ဢွၵ်ႇၵႂႃႇႁႃႁဵတ်းၵၢၼ်ႁႆႈသူၼ် ၸွမ်းၼွၵ်ႈဝဵင်းယူႇၼၼ်ႉ မီးၽူႈလၵ်ႉၵႂႃႇလၵ်ႉတႅပ်းဢဝ်သၢႆၾႆး တီႈၼႂ်းႁိူၼ်း လႄႈ လၵ်ႉဢဝ်ပႃး လဵၵ်း/ၶူဝ်းၶွင် ထႅင်ႈလၢႆလၢႆလွင်ႈ မဵဝ်းဢၼ်တေၸၢင်ႈ လႅၵ်ႈၶၢႆလႆႈပဵၼ်ငိုၼ်းၼၼ်ႉ ဝႃႈၼႆ။

ၸွမ်းၼင်ႇၵူၼ်းမိူင်းၼႂ်းပိုၼ်ႉတီႈ ၵေႃႉဢၼ်ဢမ်ႇၶႂ်ႈဢွၵ်ႇၸိုဝ်ႈ လႄႈ တီႈယူႇတၼ်းသဝ်းၼၼ်ႉ လၢတ်ႈၼႄတီႈ သိုဝ်ႇၶၢဝ်ႇ တႆးလွတ်ႈလႅဝ်း ဝႃႈ − “ၽွင်းၼႆႉ ၽူႈလၵ်းၵူၼ်းၸူၼ် ၶႂ်ႈႁၢႆႉလိူင်းၵျၢမ်းဝႆႉလိူဝ်ၵဝ်ႇယဝ်ႉ ပေႃးလၢမ်းတူၺ်းတႄႉ ၶဝ်တေလႅပ်ႈႁဵတ်းပဵၼ်ၸုမ်းသေ ၶဝ်ႈလၵ်ႉၸိူင်ႉၼၼ်၊  ၶူဝ်းၶွင်ဢၼ်ပႃးၵႂႃႇၸွမ်း ၵူၼ်းလၵ်ႉၼၼ်ႉ တေပဵၼ်ၸႃႉဢၼ်မီးၼွၵ်ႈႁိူၼ်းၵူၺ်း ၼႂ်းႁိူၼ်းတႄႉဢမ်ႇတၼ်းၶဝ်ႈၼင်ႇၵဝ်ႇ၊ ပူၼ်ႉမႃးမွၵ်ႈၼိုင်ႈဝူင်ႈၼႆႉၵူၺ်း လူတ်ႉၶိူင်ႈၶႃႈၵိုတ်းဝႆႉ ႁိမ်းၼႃးၽင်ႇတဵင်းသေ ၵႂႃႇၸႂ်းသူၼ်လႄႈ တိုၵ်ႉမီးၵူၼ်းမႃးလၵ်ႉဢဝ် ပႅတ်ႇထရီႇ ၼႂ်းမၼ်းၵႂႃႇယူႇ” ဝႃႈၼႆ။

မိူဝ်ႈႁူဝ်လိူၼ် November 2023 ၼၼ်ႉၵေႃႈ မီးၵူၼ်းလၵ်ႉ ၽွၵ်ႈၶဝ်ႈႁိူၼ်း ပီႈၶမ်းလူႇ ပွၵ်ႉႁူဝ်ၽၢႆ ဝဵင်းလၢႆးၶႃႈသေ လႆႈသုမ်းၵႂႃႇ ၶူဝ်းၶွင်ငိုၼ်းၶမ်း တင်းၼမ်တင်းလၢႆ ယူႇယဝ်ႉ။

ထႅင်ႈလွင်ႈၼိုင်ႈၵေႃႈ ၵူၼ်းမိူင်းၵမ်ႈၽွင်ႈ သၢမ်ပၢၼ်ၸဵတ်းသႅၼ်း ဢွၼ်ၵၼ်သူႇသမ်းၵိၼ်ယႃႈမဝ်းၵမ် ၼမ်ႁႅင်းဝႆႉလႄႈ ၵမ်ႉၼမ်ပၢင်သူႇယႃႈ/ၶၢႆယႃႈ တေမီးၸွမ်းၵုင်းလႅင် တၢင်းဢွၵ်ႇဝဵင်းလၢႆးၶႃႈ ဢၼ်မုင်ႈၼႃႈၵႂႃႇတၢင်း ဝဵင်းပၢင်လူင်သေ ဢွင်ႈတီႈၸိူဝ်းၼႆႉ တၢင်းၽၢႆႇပလိၵ်ႈမၢၼ်ႈ ႁူႉႁၼ်ၸွမ်းသေတႃႉ ဢမ်ႇယွမ်းဢဝ်တၢင်းၽိတ်း ၵူၼ်းသူႇသမ်းၵိၼ်ၶၢႆ ယႃႈမဝ်းၵမ်လႄႈ တင်ႈၸႂ်ပွႆႇႁႂ်ႈလွတ်ႈလႅဝ်းဝႆႉ ၼႆယဝ်ႉ။

ဝၢႆးသေၸုမ်းသိုၵ်းမၢၼ်ႈ ယိုတ်းဢၢမ်းၼၢတ်ႈၸိုင်ႈမိူင်းယဝ်ႉၼၼ်ႉ ၶၼ်ၵုၼ်ႇၵႃႉတၢင်းၶၢႆဢမ်ႇၼိမ် ပႃးၸဵမ်ပၢႆးမၢၵ်ႈမီးၼႂ်းမိူင်း တူၵ်းႁႅင်းၼႃႇသေ ၼိုင်ႈၶႅၼ်းသၢင်ႈပၼ် လွင်ႈတၢင်းတုၵ်ႉၶၵူၼ်းမိူင်း လႄႈ ၽူႈလၵ်ႉၵူၼ်းၸူၼ်ၵေႃႈ ၼိုင်ႈၶႅၼ်းလိူင်ႇၼမ်မႃးတႄႉတႄႉ ၼႆယဝ်ႉ။

တႆးလွတ်ႈလႅဝ်း