သိုၵ်းထႆး လႄႈ ၵူၼ်းတေႃႉသူင်ႇယႃႈ ပိုတ်းယိုဝ်းၵၼ် မီးၵူၼ်းတၢႆ 2 ၵေႃႉ

သိုၵ်းထႆး လႄႈ ၵူၼ်းတေႃႉသူင်ႇယႃႈမဝ်းၵမ် ဢၼ်လၵ်ႉလွမ်ၶဝ်ႈၵႂႃႇ ၼႂ်းလႅၼ်လိၼ်ထႆးၼၼ်ႉ လႆႈမီးလွင်ႈပိုတ်းယိုဝ်းၵၼ်သေ မီးၵူၼ်းတၢႆ 2 ၵေႃႉ ယူႇယဝ်ႉ။

မိူဝ်ႈဝၼ်းထီႉ 21 December 2023 (လိူၼ်ၸဵင်မႂ်ႇ 9 ၶမ်ႈ ပီႊတႆး 2118 ၼီႈ) ယၢမ်းၵၢင်ၼႆၸဝ်ႉ မွၵ်ႈ 04:00 မူင်း (ၶၢဝ်းယၢမ်းမိူင်းထႆး)  ၽၢႆႇတၢင်းသိုၵ်းထႆး လႆႈဢွၵ်ႇတူင်ႉၼိုင် ၸွမ်းလႅၼ်လိၼ် တႆး−ထႆး ၼႂ်းပိုၼ်ႉတီႈ ဝၢၼ်ႈပႃႇသီ ဢိူင်ႇမလိၵႃ ၸႄႈဝဵင်းမႄႈဢၢႆး ၸႄႈတွၼ်ႈၵဵင်းမႆႇ ဢၼ်ဢမ်ႇပေႃးႁၢင်ႇၵႆၵၼ်တင်း မိူင်းယွၼ်း ၸႄႈတွၼ်ႈမိူင်းသၢတ်ႇ မိူင်းတႆးပွတ်းဢွၵ်ႇၼၼ်ႉ လႆႈထူပ်းၵူၼ်းဢၼ်လီထၢင်ႇထိူမ်လၢႆၵေႃႉလႄႈ ၽွင်းၽၢႆႇသိုၵ်းထႆး လႆႈယွၼ်းၶဝ်ႈၵူတ်ႇထတ်းၼၼ်ႉ ၽၢႆႇတၢင်းၵူၼ်းတေႃႉသူင်ႇယႃႈ လႆႈတႄႇပိုတ်းယိုဝ်းသိုၵ်းထႆးဢွၼ်တၢင်း ၼႆယဝ်ႉ။

ဝၢႆးသေသဵင်ၵွင်ႈယဵၼ်ၵႂႃႇ ၽၢႆႇတၢင်းသိုၵ်းထႆးၶဝ်ၵေႃႈ လႆႈၶဝ်ႈၵူတ်ႇထတ်းၸႅတ်ႈတူၺ်းၼႂ်းပိုၼ်ႉတီႈ ဢၼ်မီးလွင်ႈပိုတ်းယိုဝ်းၵၼ်ၼၼ်ႉ ထူပ်းႁၼ်ထူင်သႂ်ႇယႃႈမ မၢၵ်ႇမိူဝ်ယူႇၸွမ်းသဵၼ်ႈတၢင်း 13 ပိူဝ်ႉ လႄႈ ထူပ်းႁၼ်တူဝ်တၢႆၵူၼ်း 2  ၵေႃႉ၊ သိမ်းလႆႈၵွင်ႈပွတ်း လႄႈ ၵွင်ႈယၢဝ်း 2 လဝ်း ဝႃႈၼႆ။

ၼႂ်းထူင်ပိူဝ်ႉၼၼ်ႉ မီးယႃႈမ မိၵ်ႈမၢႆ Y1 ၼိုင်ႈပိူဝ်ႉလႂ် မွၵ်ႈ 200,000 မဵတ်ႉ ႁူမ်ႈယႃႈမတင်းမူတ်း 2,060,000 မဵတ်ႉ ၼႆယဝ်ႉ။

မိူဝ်ႈၼႂ်းဝၼ်းထီႉ 16 December 2023 ပူၼ်ႉမႃးၼၼ်ႉၵေႃႈ သိုၵ်းထႆး လႄႈ ၵူၼ်းၵႃႉယႃႈ လႆႈမီးလွင်ႈပိုတ်းယိုဝ်းၵၼ်သေ မီးၵူၼ်းတၢႆၵႂႃႇ 15 ၵေႃႉ လႆႈယႃႈမ တင်းမူတ်း 2,040,000 မဵတ်ႉ ၼႆယူႇယဝ်ႉ။

တႆးလွတ်ႈလႅဝ်း

တီႈမႃးၶၢဝ်ႇ−Maesaipress